HAMALIMON 12

Aturan haiason ni ina na baru mardakdanak

1Dilehen Tuhan ma angka aturan tu si Musa songon on, 2adop bangso Israel. Muda tubuan dakdanak sada ina, muda halaklahi na sorang i, hodar ma ina i pitu ari honokna dos dohot hatiha marorot pamatangnia. 3Di ari pasalapankon angkon sunaton ma dakdanak i. 4Dung sorang dakdanak i, lolot ni tolu pulu tolu ari, hodar do etongon ina i angke hahurangan mudar. Dung i pe anso taretong ias. Taran so sidung aturan haiason i, nada tola dais ina i tu angka barang sipakeon di bagasan parugamoan jana nada tola masuk tu Inganan Na Badia i.

5Muda manubuhon dakdanak sada ina, dakdanak na sorang i dadaboru, gabe hodar ma ina i opat bolas ari honokna dos dohot hatiha marorot pamatangnia. Lolot ni onom pulu onom ari hodar do ina i, angke hahurangan mudar ia. Dung i pe anso nietong ia ias.

6Dung salpu hatiha upacara pangiasonna bope hara ni na manubuhon anak halaklahi sanga dadaboru, angkon obanon ni ina i ma silehen-lehen sipasahaton tu malim di pintu ni Bandar Parmianan Ni Tuhan. Silehen-lehen i, i ma sada anak ni biri-biri na marumur sataon sanga haul situtungon dohot sada darapati sanga hatutu gabe haul hasesaan ni dosa. 7Angkon pasahaton ni malim i ma tu Tuhan jana patuluskon sada hatiha laho manyesa haramunan ni ina i, anso ias ia di bagasan ugamo. I ma angkon karejohonon ni ina na baru manubuhon dakdanak.

8Muda so tarpatupa ina i mangalehen anak ni biri-biri angkon obanonnia ma dua darapati sanga dua hatutu. Sada ma i gabe haul situtungon, na asing i gabe haul hasesaan ni dosa. Baenon ni malim i ma sada hatiha laho manyesa hahodaran ni ina i, anso gabe ias.

Currently Selected:

HAMALIMON 12: LAIAKB

Highlight

Copy

Compare