JOSUA 21

Angka kota ni Marga Levi

1-2Sanoli kehe ma angka kapala ripe na sian Marga Levi tu Silo na di Luat Kanaan laho mangadop tu Malim Eleasar, si Josua anak ni si Nun, dohot angka kapala ripe ni sude marga sian bangso Israel. Didok halahi ma, “Markite-hite si Musa madung ditonahon Tuhan parenta anso dilehen angka kota di hami halak Levi baen inganannami jana muse anso laing dilehen di hami tano padang-padang na humaliang angka kota i baen di pahan-pahanannami.” 3Jadi laing songon parenta ni Tuhan i, dibuat halak Israel ma tano nampuna ni halahi sandiri, i ma angka kota dohot padang-padangna, lalu dilehen ma i tu halak Levi.

4Na parjolo manjagit angka kotana, i ma golongan ni Marga Kehat. Angka ripe na sian pomparan ni Malim Harun dilehen tolu bolas kota sian Marga Juda, Simeon dohot Benyamin. 5Angka ripe na deba nari na sian Marga Kehat dilehen sampulu kota sian Marga Efraim, Marga Dan dohot Marga Manase Parhasundutan.

6Golongan ni Marga Gerson dapotan tolu bolas kota sian Marga Isakar, Aser, Naftali dohot Manase Parhabincaran.

7Angka ripe na sian Marga Merari dapotan dua bolas kota sian Marga Ruben, Gad dohot Zebulon.

8Songon i ma parbagi ni angka kota dohot tano padang-padangna markite-hite undian tu halak Levi dibaen halak Israel laing songon na niparentahon ni Tuhan markite-hite si Musa.

Angka kota na ditontuhon di Marga Kehat

9Angka on ma goar ni kota na dilehen sian tano Juda dohot Simeon. 10Tu pomparan ni si Kehat anak ni Aron Marga Levi. Parbagian ni halahi do parjolo ditontuhon. 11Dilehen do tu halahi Kiryat-Arba (ima Hebron-Arba i ma goar ni amang ni si Enak), na di tano pardolok-dolokan ni Juda, dohot tano panjampalan na humaliangna. 12Tapi angka kobun dohot kota na humaliang ni angka kota i, madung dilehen tu si Kaleb anak ni si Jefunne gabe ia nampunasa. 13Angka on ma kota na dilehen tu pomparan ni Malim Harun: Hebron (sada sian kota haporusan), Libna, 14Jatir, Estemoa, 15Holon, Debir, 16Ain, Juta dohot Bet-Semes, dohot sude tano panjampalanna. Gabe sambilan kota ma sian na dua marga i. 17Sian tano ni Benyamin, dilehen halahi ma: Gibeon, Geba, 18Anatot, dohot Almon, dohot sude tano panjampalanna. 19Tolu bolas kota ma sude na dilehen tu angka malim pinompar ni si Harun.

20Halak Levi na deba nari sian pomparan ni si Kehat, dijagit halahi do parbagian sanga na piga kota sian tano Efraim. 21Dilehen do tu halahi Sikem i ma na di partoran Efraim, sada sian angka kota haporusan, dohot tano padang-padangna Geser, 22Kibsaim dohot Bet-Horon, dohot tano padang-padangna, opat kota. 23Sian tano ni Dan dilehen do tu halahi Elteke, Gibeton, 24Ayalon dohot Gatrimon, dohot tano padang-padangna, opat kota. 25Sian tano ni Marga Manase di sabola Hasundutan dilehen do tu halahi: Taanak, Gatrimon, dohot tano padang-padangna, dua kota. 26Sampulu kota dohot tano padang-padangna ma sude na nijagit pomparan ni si Kehat.

Angka kota na ditontuhon di Marga Gerson dohot Merari

27Halak Levi sian pomparan ni si Gerson, dijagit halahi do angka kota di tano ni Marga Manase Parhabincaran, i ma Golan di Basan, sada sian kota haporusan, dohot Beestera dohot tano padang-padangna. 28Sian tano Isakar dijagit halahi opat kota, i ma: Kision, Dobrat, 29Jarmut dohot En-Ganim rap dohot angka tano padang-padangna. 30Sian Marga Aser dijagit halahi opat kota, i ma: Misal, Abdon, 31Helkat, Rehob rap dohot tano padang-padangna. 32Sian Marga Naftali dijagit halahi tolu kota, i ma: Kedes dohot padang-padangna Hamad-Dor, Kartan, dohot angka tano padang-padangna. 33Tolu bolas kota ma dijagit angka ripe sian pomparan ni si Gerson, dohot angka tano padang-padangna.

34Halak Levi na deba nari, i ma sian pomparan ni si Merari, dijagit halahi dope opat kota sian tano ni Marga Zebulon i ma: Jokneam, Karta, 35Dimna, Nahalal dohot angka tano padang-padangna. 36Sian tano ni Marga Ruben dijagit halahi opat kota, i ma: Beser, Jahaz, 37Kedemot, Mefaat dohot tano padang-padangna. 38Sian tano ni Marga Gad dijagit halahi opat kota, i ma: Ramot na di Gilead (sada sian kota haporusan), Mahanaim, 39Hesbon, Jaser, dohot angka tano padang-padangna. 40Jadi dua bolas kota ma sude na dijagit pomparan ni si Merari.

41Jadi sian tano bagian ni sude bangso Israel, adong ma opat pulu salapan kota na dilehen di angka halak Levi. 42Adong be do tano padang-padang humaliang kota i.

Diingani halak Israel tano Kanaan

43Songon i ma dilehen Tuhan tu halak Israel sude tano na dung DijanjihonNia i mardongan sumpa tu ompu na umpompar halahi. Dung dibuat tano i, maringanan ma halak Israel disi. 44Jadi domu tu na dung dijanjihon Tuhan tu ompu na umpompar angka halak Israel i, dijagohon Tuhan ma antong sude luat i gabe sonang. Sian sude angka musu ni halahi i umpe adong sada na tolap mangalo halahi, angke dilehen Tuhan do hamonangan di halak Israel maradopkon angka musu ni halahi. 45Dipatulus Tuhan do sasude na dijanjihonNia tu halak Israel; sada pe nada adong na so dipatulusNia.

Currently Selected:

JOSUA 21: LAIAKB

Highlight

Copy

Compare