HAKIM-HAKIM 9

Si Abimelek

1Sanoli kehe ma si Abimelek anak ni si Gideon i tu kota Sikem inganan ni koum sisolkot ni inangnia. Mangkobari ma ia disi dohot halahi, ning ia ma, 2“Cubo hamu ma jolo sapai hamu halak na maringanan di Sikem on, dia do na dumenggan: Diparenta anak ni si Gideon sipitu pulu halak i, sanga diparenta sada halak? Laing sungguli hamu tu halahi paboa na adong dope hubungan ni parmudaronku dohot halahi.” 3Jadi kehe ma koum sisolkot ni inang ni si Abimelek i mandapotkon angka halak Sikem i jana dipalalu halahi ma tona ni si Abimelek tu halahi. Jadi diputuskon halak Sikem i ma laho mangihutkon si Abimelek, angke mangihutkon pandapot ni halahi laing adong do tutu hubungan parmudaronna dohot halahi. 4Dung i dilehen halahi ma tusia pitu pulu hepeng perak na dibuat sian bagas parsombaan ni Baal-Berit. Dipake si Abimelek ma hepeng i mangupai sarombongan parjahat anso margabung dohot ia, 5lalu kehe ma halahi tu huta ni amangnia di Ofra. Di ginjang ni sada batu, disi ma dibunu ia kahangginia sipitu pulu halak i. Tapi anggo si Jotam anak sianggian ni si Gideon i nada dohot hona bunu hara ni na martabuni ia. 6Jadi marlagut ma sude halak Sikem dohot Bet-Milo, lalu kehe tu bona ni sampinur parbeguan na di Sikem. Ditabalkon halahi ma disi si Abimelek gabe raja.

7Dung dibege si Jotam salaho tusi, kehe ma ia tu puncut ni Dolok Gerisim, lalu marsurak ma ia sian i adop angka jolma i, “Tangihon hamu au, hamu angka halak Sikem, anso laing ditangihon Debata muse hamu! 8Sanoli marlagut ma angka hayu-hayu giot mamili raja ni halahi. Jadi didok halahi ma tu bona ni zetun, ‘Ho ma da rajanami.’ 9Dialusi bona ni zetun ma, ‘Ah, nada ra au. Harana muda au gabe rajamunu, angkon mantak ma au mangharuarkon miak zetun na dipake laho pasangapkon Debata dohot jolma.’ 10Jadi didok angka hayu i ma tu bona ni ara, ‘Ho ma da, rajanami!’ 11Tapi dialusi bona ni ara i ma, ‘Nada ra au, angke muda gabe rajamunu, angkon mantak au marbatuhon batu ni ara na tonggi-tonggi.’ 12Dung i, mangkuling ma angka hayu i tu bona ni anggur, ‘Aha dope, ho ma da na gabe rajanami.’ 13Tapi dialusi bona ni anggur i ma, ‘Dia ma he gabe mantak au parohon anggur na pasonangkon roha ni Debata dohot jolma, hum patunda ni na gabe rajamunu!’ 14Jadi hara ni i gabe mangkuling ma sude bona ni hayu i tu tada-tada, ‘Ho noma da rajanami.’ 15Dialusi tada-tada i ma, ‘Muda sian situtu ni rohamunu do mambaen au gabe rajamunu, ro ma hamu marlindung di toru ni linggomanku. Tapi anggo nada ra hamu, ruar do api sian angka dangkangku na marduri on na manyurbu sude angka bona ni ares na di Libanon.’ ”

16“Antong,” ning si Jotam manguduti, “Tutu ma he na dung sian ias ni rohamunu na nibaenmunu marhite na manabalkon si Abimelek gabe raja? Madung he dibaen hamu na sapatutna maradopkon damang si Gideon dohot tu koum sisolkotnia? Na dung dibalos hamu ma he angka jasa na nibaen ni damang i 17na dung marjuang humopkop hamu? Ingot, na dung ditongtangkon ia do hosania paluahon hamu sian angka halak Midian. 18Hape sadari on dikhianati hamu ma keluarga ni damang i. Ma dibunu hamu sudena anaknia – pitu pulu halak sanoli mambunu di ginjang ni sada batu. Anak ni damang do si Abimelek sian radingnia. Hape ditabalkon hamu ma i gabe raja ni Sikem, hum patunda ni na adong hubungan parmudaronnia dohot hamu. 19Antong muda sian ias ni rohamunu do tindakanmunu sadari on maradopkon damang dohot keluargania i, tole ma marsonang-sonang hamu dohot ia, jana padiar ma marsonang-sonang ia dohot hamu. 20Tapi anggo na so songon i do pangalahona, sai ruar ma nian api na manyurbu sude halak Sikem dohot Bet-Milo. Jana sai ruar muse ma nian api sian halak Sikem dohot Bet-Milo manutung sude si Abimelek.” 21Dung salpu i maporus ma si Jotam paluahon dirina lalu kehe ma ia tu Beer, dibaen mabiar ia tu si Abimelek, kahangginia i.

22Tolu taon honokna si Abimelek mamarenta Israel. 23Jadi dibaen Tuhan ma parbadaan antara ni si Abimelek dohot angka halak Sikem, gabe mangalo halahi tusia. 24Tarjadi pe pangalaho on, anso marbalos do hajahatan ni si Abimelek dohot angka halak Sikem na manjajang ia anso mambunu angka anak ni si Gideon na pitu pulu halak i. 25Dipambaeni halak Sikem i ma angka pangadang di ambubu ni angka dolok laho manangkup si Abimelek. Sanga ise na mamolus disi disamun angka pangadang i ma i. Jadi gabe dipaboa ma i tu si Abimelek.

26Madung ro di hatiha i si Gaal anak ni si Ebed rap dohot angka kahangginia laho maringanan di Sikem; jana mararop roha do angka halak Sikem i tusia. 27Kehe ma halahi mamutik anggur di angka kobun anggur, lalu mambaen anggur siinumon jana mambaen pesta. Mangan minum ma halahi di inganan pamelean ni debata ni halahi lalu disumpai halahi ma si Abimelek. 28Didok si Gaal ma, “Ise ma he si Abimelek i jana ise lakna hita angka halak Sikem on? Inda he anak ni si Gideon i? Inda he na patut gabe hatoban ni si Hemor anak ni si Sikem do si Gideon dohot si Zebul wakilnia i? 29Sugari au ma rupani na mamimpin angka halak Sikem on, ma pasti marujung carito ni si Abimelek i hubaen. Dokkononku hian ma antong tusia, ‘Tole, maju bo ho! Arahon tentarami jana beta ma haruar marporang!’ ”

30Gabe muruk ma si Zebul parkuaso na di kota Sikem i umbege hata ni si Gaal i. 31Ditongos ia ma utusan tu si Abimelek di Aruma maroban barita songon on, “Ma ro si Gaal anak ni si Ebed rap dohot angka kahangginia tu Sikem jana dijajang ia halak kota i anso mangalo tu ho. 32Jadi hara ni i, sugari nian kehe ma ho martabuni dohot angka halakmu di ladang muda borngin. 33Ancogot manyogot muda bincar mataniari, ompot ma porangi kota i. Jana muda haruar si Gaal dohot angka halaknia i mangalo ho, i ma hatiha na denggan di ho mangaroro ia!”

34Jadi mardalan ma si Abimelek dohot sude anak buania i borngin-borngin. Marserak do halahi opat rombongan lalu martabuni ma halahi di ruar ni kota Sikem. 35Disi diida si Abimelek dohot angka dongannia i si Gaal haruar jana jongjong di horbangan ni kota i, haruar ma halahi sude sian partabunianna be. 36Diida si Gaal ma halahi, lalu didok ia ma tu si Zebul, “Ligi da! Adong halak na manuat sian angka ambubu ni tor tuson!”

“Aah, nada jolma da i,” ning si Zebul mangalusi, “Hum halinu do i di dolok.”

37Jadi didok si Gaal ma muse, “Ligi da! Ma manuat angka jolma i sian tor i, jana sarombongan nari na giot ro tuson ma i sian bona ni sampinur parbeguan an!”

38Didok si Zebul ma tu si Gaal, “Bia do, di dia do saonnari babamu na ruak i. Na salpu i didok ho, mahua ma hita angkon sai tunduk tu si Abimelek i? On ma halakna angka na nilayasanmi. Tole bo, maju bo ho mangaroro halahi!” 39Jadi dioban si Gaal ma angka halak Sikem, dialo halahi ma si Abimelek. 40Tapi disoro si Abimelek ma ia lopus maporus ia. Mardabuan ma angka haul lopus tu pintu horbangan ni kota i. 41Ujungna kehe ma si Abimelek tu Aruma, jana diusir si Zebul ma si Gaal dohot kahanggina sian Sikem. Nada dipatola be halahi maringanan disi.

42Ancogotna i mamungka ma halak Sikem manadingkon kota i giot tu ladang jana dipaboa ma i tu si Abimelek. 43Jadi dipalagut si Abimelek ma angka halaknia jana dibagi tolu ia ma pasukannia i, jana kehe ma halahi martabuni di ladang-ladang i lalu tongtong marjago-jago. Jadi di na niidania halak kota i na giot tu ladang, ruar ma ia sian partabuniannia i lalu dibunu ia ma halahi. 44Di hatiha na maju hipas si Abimelek dohot pasukannia i mangaroro tu horbangan ni kota i, dikojar pasukannia na dua rombongan nari i ma angka halak na marlojongi tu ladang-ladang i jana dibunu. 45Marporang ma si Abimelek manangging sadari i jana dimasuhi ia ma kota i; dibunu ia halak pangisina i, dirumpakkon ia hutana i lalu direrakkon ia sira disi.

46Di na tarbege tu angka halak na adong di bagasan benteng ni Sikem salaho tusi, kehe ma halahi marsiholip di bagasan liang na di toru ni kuil El-Berit. 47Dipaboa halak ma tu si Abimelek na dung marlagut angka halak Sikem disi. 48Jadi gabe kehe ma si Abimelek dohot angka halaknia i tu Dolok Zalmon. Diponggoli ia ma disi angka dangka ni hayu dohot kapak, lalu diporsan ia di abarania. Disuru ia ma hipas baenon ni angka halaknia i sanga na aha dibaen ia. 49Gabe marsitaba ma ganop be dangka ni hayu, mangihutkon si Abimelek. Ditimbun halahi ma sude hayu i di baba ni liang ni kuil i lalu dipurun, hape halak Sikem i laing di bagasan do. Jadi hara ni i, mate ma sude halak Sikem i, hira-hira saribu halak bahatna halaklahi dohot dadaboru.

50Dung i kehe ma si Abimelek tu Tebes. Dihobuk ia ma kota i lalu dimasuhi ia. 51Adong do sada benteng di tonga-tonga ni kota i; jana marlojongi ma sude jolma na maringanan di kota i tu benteng i. Masuk ma halahi tu bagasan benteng i lalu dikunci halahi jana manaek ma halahi tu palas-palas i. 52Dung i ro ma si Abimelek tusi laho mangaroro benteng i. Di na lalu ia tu pintu ni benteng i jana giot manyurbusa, 53adong ma sada anak boru mandabuhon sada batu panggilingan tu ginjang ni ulunia jabat biltak takar-takar ni uluna i. 54Diompoti si Abimelek ma mamiohon doli-doli na mamorsan sinjatania i jana didok ia ma, “Sintak ma podangmi jana bunu ma au; nada ra au muda adong na mandok bahaso na dibunu ni dadaboru au.” Gabe ditiham doli-doli i ma ia lopus mate. 55Di na niida ni halak Israel na dung marujung ngolu ni si Abimelek, mulak ma halahi sudena.

56Songon i ma carana dibaen Debata mambaloskon tu si Abimelek hajahatan na nibaennia maradopkon amangnia di na nibununia kahangginia sipitu pulu halak i. 57Jana diuhumi Tuhan do halak Sikem hara ni hajahatan ni halahi i. Topet do antong songon na nidok ni si Jotam anak ni si Gideon i taringot tu halahi di na nisumpaannia halahi.

Currently Selected:

HAKIM-HAKIM 9: LAIAKB

Highlight

Copy

Compare