HAKIM-HAKIM 20

Bangso Israel martahi giot marporang

1Jadi marroan ma sude halak Israel sian Dan di Utara lopus tu Berseba di Selatan, dohot sian Gilead di Habincaran laho mangoloi pio-pio i. Marlagut ma halahi jana marsada di Mispa di adopan ni Tuhan. 2Adong ma sudena opat ratus ribu tentara pardalan pat. Laing dohot muse do ro disi angka pamimpin ni ganop marga ni Israel. 3-4Laing tarbege do di hatiha i di angka halak Benyamin bahaso na dung marlagut sude halak Israel na asing i di Mispa.

Jadi disapai angka halak Israel i ma halak Levi na hona bunu i radingna, “Caritohon ma jolo antong tu hami sanga na bia pangalahona tarjadi hajahatan i!” Dialusi halak Levi i ma, “Na kehe do au dohot radingki marborngin di Gibea na di Luat Benyamin. 5Dung i marroan ma angka halak Gibea borngin i laho manjalahi au. Dihobuk halahi ma bagas inganan parbornginanki, maksudna laho mamatehon au, tapi dung i dipaksa halahi ma marcampur dohot radingki lopus mate. 6Jadi gabe hubuat ma bangkena i lalu huponggol-ponggol, dung i hutongos ma i tu marga ni Israel na dua bolas i samponggol be. Hubaen pe songon i hara ni angka halak Gibea i do na mambaen na jahat jana sihailahononkon di tonga-tonga ni halak Israel. 7Antong, hamu sudena na adong dison, halak Israel do sudena. Jana, na mangido partimbangan ma au tu hamu!”

8Jadi rap jongjong ma angka halak na marlagut i disi mandok, “Sahalak pe sian hami na dison nada adong na mulak tu bandar sanga tu bagasna. 9Songon on ma na giot sibaenonta. Porangonta ma Gibea, jana laho patupahon i pilionta ma angka halak na giot menyerang marhite undi. 10Saparsampulu ma sian halak Israel na giot mangkobasi panganon di halak na marporang i. Na deba nari i ma kehe mamorangi Gibea laho manguhumi halahi hara ni hajahatan na nibaen ni halahi i di tonga-tonga ni halak Israel.” 11Songon i ma marsada halak Israel laho mamorangi Gibea.

12Dung i diutus halak Israel ma halak tu sude luat ni Benyamin laho palaluhon barita on: “Hajahatan aha dehe na nibaenmunu i? 13Pasahat hamu ma angka jolma na jorngang na sian Gibea i tu hami anso hami bunu halahi jana songon i ma anso mago hajahatan i sian tonga-tonga ni halak Israel.” Hapengani umpe diterge angka halak Benyamin hata ni halak Israel na asing i. 14Mur marroan be ma angka halak Benyamin sian sude kota na di Luat Benyamin i tu Gibea laho mamorangi angka halak Israel na asing i. 15Di na sadari i dipalagut halak Benyamin ma dua pulu onom ribu bahat ni tentara na marsinjata podang, dohot pitu ratus halak tambana sian Gibea, angka na dung dipili. 16Sian sudena tentara i, pitu ratus halak pangambiloi, jana na metar do halahi marambalang. Muda mangambalang halahi, nada jungada ampal saotik pe. 17Di pihak ni halak Israel na asing i, madung marlagut opat ratus ribu halak bahatna angka tentara na tarlatih.

Parporangan mangalo halak Benyamin

18Kehe ma halak Israel tu inganan paribadatan na di Betel, lalu disapai halahi ma tu Debata, “Horong ni marga dia do sian hami angkon na parjolo situtu kehe mamorangi halak Benyamin?”

Dialusi Tuhan ma, “Marga Juda.”

19Ancogotna i kehe ma angka halak Israel i lalu marbandar ma halahi di lambung ni kota Gibea. 20Dung i dibaen halahi ma inganan ni tentara ni halahi paadop-adop dohot kota i, lalu dipungka halahi ma mamorangi tentara ni Benyamin. 21Jadi haruar muse ma tentara ni Benyamin i jana dibunu halahi ma dua pulu ribu halak tentara ni Israel laing di na sadari i.

22Jadi hara ni na talu i, gabe dipapungu halahi ma muse gogona, jana diatur halahi ma mangulahi tentara ni halahi laing songon natuarina i. 23Kehe ma halak Israel tu inganan paribadatan, lalu tangis disi tu Tuhan. Disapai halahi ma, “Tuhan, angkon ulahannami dope kehe mamorangi angka kahangginami halak Benyamin i?”

Dialusi Tuhan ma, “Olo, maju ma.” 24Paduanolihon ma halahi kehe mangalo tentara ni Benyamin i. 25Jana dipadua noli tentara ni Benyamin muse ma haruar mangalo. Dibunu halahi do sanoli on salapan bolas ribu angka tentara ni Israel na tarlatih. 26Jadi gabe kehe muse ma halak Israel tu Betel tangis tu Tuhan. Puaso do halahi disi lopus borngin jana dipasahat halahi do angka haul pardonganan dohot angka haul situtungon. 27Di Betel do di hatiha i Poti Parjanjian ni Debata, 28jana si Pinehas anak ni si Eleasar, pahompu ni si Harun do na markarejo gabe malim. Jadi marsapa ma rayat i tu Tuhan, “Tuhan, angkon laing kehe dope hami mamorangi angka kahangginami halak Benyamin i, sanga na angkon antahonanmi do porang on?”

Dialusi Tuhan ma, “Pajolo hamu ma mamorangi halahi! Ancogot lehenonKu ma hamonangan di hamu.”

29Umbege alus ni Tuhan i, gabe kehe ma angka halak Israel mambaen inganan ni tentarana di angka inganan na buni humaliang Gibea. 30Jadi di ari patoluhon diporangi halahi ma tentara ni Benyamin marhite na paadopkon tentara i tu Gibea laing songon na nibaen ni halahi di angka ari na salpu i. 31Laing mangaroro do angka halak Benyamin i, jadi gabe diompani ma halahi haruar sian kota i. Laing songon na dung salpu i, dipungka halahi ma mamunui halak Israel di inganan na talak di ruar ni kota di dalan laho tu Betel dohot di dalan laho tu Gibea. Hona bunu ma halak Israel tolu pulu halak. 32Jadi hara ni i gabe didok angka halak Benyamin i ma, “Ma tataluhon halahi laing songon dimulana i.”

Tapi na dung disangkapon tentara ni Israel i hian do laho mundur laho mangompani tentara ni Benyamin i tu angka dalan godang i, dao sian kota. 33Di na mundur tentara inti ni Israel i jana manyusun pasukan mangulahi di Baal-Tamar, manigor haruar ma sian angka partabunianna halak ni halahi na di ruar humaliang kota Gibea. 34Angka halak pilian do halahi sian Israel; sampulu ribu halak bahatna. Tarjadi ma parporangan na jebu di na mangaroro sisampulu ribu halak i tu Gibea. Nada adong sangkaan ni halak Benyamin bahaso na giot talu noma halahi santongkin nari. 35Dilehen Tuhan ma hamonangan di halak Israel maralohon halak Benyamin, jabat do dua pulu lima ribu saratus tentara ni Benyamin dibunu angka halak Israel. 36Baru pe anso mamoto angka halak Benyamin hapengani na dung talu halahi.

Siasat na mambaen monang halak Israel

Na sangajo do tentara inti ni Israel i maporus sian angka halak Benyamin i, harana margogoihon tu anak bua ni halahi na di angka inganan partabunian na humaliang Gibea i do halahi. 37Diompoti angka na martabuni i ma masuk mangaroro tu Gibea; manyarsar ma halahi sap di kota i jana dibunu halahi ma sude jolma na disi. 38Tapi na dung satahi hian do halahi painte so i, muda adong timus martimbual hapal tu ginjang sian tonga-tonga ni kota i, 39angkon marbalik ma pasukan inti i mangalo musu i.

Di hatiha i madung dibunu angka halak Benyamin tolu pulu halak tentara ni Israel. Jana didok angka halak Benyamin i ma, “Ma talu halahi tabaen laing songon na parjolo i.” 40Tapi tompu ma martimbual timus tu ginjang sian tonga-tonga ni kota Gibea. Tarsonggot be ma angka halak Benyamin i di na manaili halahi jana diida halahi ma mosok sude kota i. 41Jana laing di hatiha i marbalik ma manigor pasukan inti ni Israel mangalo, jadi gabe mabiar ma tentara ni Benyamin i angke madung diboto halahi nada sadia lolot nari be talu ma halahi. 42Jadi marlojong ma halahi sian angka halak Israel kehe adop tano padang-padang na di ruar ni kota, hape nada tarbaen halahi luncat. Hona hobuk ma halahi di antara ni pasukan inti ni Israel dohot pasukan na ro di hatiha i sian sabola kota. Santak do hataluan na nitanggung ni halak Benyamin. 43Dihobuk jana dikojar angka halak Israel ma halahi torus lalu tu sada inganan di Habincaran ni Gibea. Di na mangkojar i, dibunu halahi ma 44salapan bolas ribu tentara na malo marporang sian Benyamin. 45Marputar ma tentara ni Benyamin na deba nari lalu maporus mamolus sian tano padang-padang tu angka dolok-dolok batu di Rimon. Lima ribu sian halahi hona bunu di tonga dalan. Lobina i dikojar lopus tu Gideom. Sian halahi hona bunu do adong dua ribu halak. 46Jadi adong ma dua pulu lima ribu halak tentara ni Benyamin na hona bunu di ari i – angka tentara na malo marporang do i sudena.

47Tapi sian na marlojong mamolus tano padang-padang tu angka dolok batu na di Rimon i, adong do onom ratus halak na malua. Di Rimon ma halahi maringanan opat bulan lolotna. 48Dung i mulak ma halak Israel i lalu diporangi halahi ma jana dibunu ma sudena halak Benyamin na teba i – halaklahi, dadaboru, angka dakdanak songon i muse dohot pahan-pahanan. Jana disurbu halahi ma sada kota na adong di luat i.

Currently Selected:

HAKIM-HAKIM 20: LAIAKB

Highlight

Copy

Compare