HAKIM-HAKIM 17
17
Angka patung na nisomba ni si Mika
1Adong ma sada halaklahi na margoar si Mika. Maringanan di luat partoran na di tano Efraim do ia. 2Sanoli didok ia ma tu inangnia, “Inang! Dompak na magoan inang saribu saratus hepeng perak, hubege diburai inang do na manangko i. Di au do hepeng i, au do na mambuatsa.”
Dialusi inangnia i ma, “Sai dipasupasu Tuhan ma da ho, anakku!” 3Dipaulak ia ma hepeng perak i tu inangnia, gabe ninna inangnia i ma: “Anso ulang hona bura ho anakku, hupasahat ma hepeng i tu Tuhan. Anso dipake i mambaen sada gana-ganaan sian hayu na dilampis dohot perak. Jadi saonnari hupaulak ma tu ho hepeng perak i.” 4Tapi laing dipaulak ia do hepeng perak i tu inangnia. Dibuat inangnia i ma dua ratus hepeng perak i jana dilehen ma i tu tukang perak, giot mambaen sada gana-ganaan sian hayu jana dilampis dohot perak. Jadi dipayakkon si Mika ma patung i di bagasnia.
5Si Mika sandiri pe na dung adong do sada inganan parsombaannia jana dibaen ia angka patung ni gana-ganaan dohot sada efod.#17:5 EFOD: Di hata Ibrani, patuduhon sada abit panutup ni andora di baju dinas ni Malim Godang do Efod. Madung diangkat ia muse do sahalak anaknia gabe malim. 6Di hatiha i nada adong raja ni bangso Israel; marsibaen roha-rohana be do ganop jolma.
7Laing di hatiha i adong ma sada halak doli-doli sian Marga Levi jana marasal sian kota Betlehem na di tano Juda. 8Madung kehe ia sian Betlehem jana mardalan ma ia laho manjalahi tano siinganan na asing. Di pardalanan i, lalu ma ia di bagas ni si Mika di luat partoran Efraim. 9Disapai si Mika ma tusia, “Sian dia dehe ho dongan?”
Dialusi bayo i ma, “Halak Levi sian Betlehem na di Juda do au. Na manjalak-jalahi tano siinganan do au.”
10Didok si Mika ma, “Dison sajo ma ho maringanan, anso ho gabe panuturi dohot malimnami. Hulehen pe di ho muse pakean dohot panganon songon i muse sampulu hepeng perak ganop taon.” 11Satuju ma doli-doli i, jana tinggal ma ia di bagas ni si Mika, dibaen ma ia songon anakna sandiri. 12Diangkat si Mika ma ia gabe malimna jana maringanan di bagas ni si Mika. 13Jadi ninna si Mika ma, “Antong, saonnari madung pos rohangku sai baenon ni Tuhan ma na denggan tu au, angke madung adong sada halak Levi di au na gabe malim.”
Currently Selected:
HAKIM-HAKIM 17: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
