HAKIM-HAKIM 12
12
Si Jefta dohot Marga Efraim
1Marhobas ma di hatiha i Marga Efraim laho marporang, lalu kehe ma halahi manaripari Batang aek Jordan giot tu Zafon. Didok halahi ma tu si Jefta, “Biasi kehe ho mamorangi bangso Amon so jolo dipiohon ho hami? Saonnari na giot tutungonnami ma ho dohot isi ni bagasmu.”
2Didok si Jefta ma, “Na adong do parsalisian godang antara ni halak Amon dohot hami halak Gilead. Madung hupiohon hamu anso ro mangurupi paluahon hami sian angka halak Amon i, hape nada ro hamu. 3Jadi dung adong pos ni roha di au na so ro be hamu mangurupi hami, jadi gabe hubaranihon noma kehe mamorangi angka halak Amon i, haru pe angkon mate au. Jadi dilehen Tuhan ma di au hamonangan maralohon halahi. Antong, biasi ro hamu pajolohon mamorangi au?” 4Dung i dipalagut si Jefta ma sude halak Gilead, lalu kehe ma halahi mamorangi dohot manaluhon halak Efraim. (Na nitudu ni halak Efraim do halak Gilead na maringanan di Efraim dohot Manase na manyirang dirina sian Efraim, margana i.) 5Diingani halak Gilead na marporang i ma angka inganan panariparan na di Batang aek Jordan, anso tarbaen halahi manangkup angka halak Efraim na giot maporus. Ganop adong halak Efraim na giot maporus, mangido isin anso dipaloas taripar, disapai halak Gilead i ma, “Halak Efraim dehe ho?” Alusanna ma i, “Nada ale.” 6Disuru halahi ma i mandok hata “Syibolet.” Dokkononna ma “Sibolet” angke nada malo mandok hata i topet pandokna. Lalu tangkuponna ma i lalu dibunu di sada inganan panariparan i. Jadi mate tarbunu ma opat pulu dua ribu halak Efraim di hatiha i.
7Onom taon honokna si Jefta mamimpin halak Israel. Dung i marujung ma ngolunia lalu dikuburkon di huta hagodangannia di Gilead.
Si Ebsan, si Elon dohot si Abdon
8Dung si Jefta, si Ebsan na sian Betlehem ma mamimpin halak Israel songon sada hakim. 9Adong do tolu pulu halaklahi anak ni si Ebsan on jana tolu pulu halak borunia. Dipabagas ia tu angka marga na asing do borunia i, lalu dibuat ia ma tolu pulu halak boru sian marga na asing di angka anaknia i. Pitu taon honokna si Ebsan mamimpin halak Israel, 10dung i marujung mangolunia jana dikuburkon di Betlehem.
11Dung si Ebsan, si Elon na sian Marga Zebulon ma mamimpin halak Israel sampulu taon honokna. 12Dung i marujung mangolunia lalu dikuburkon di Ayalon na di Luat Zebulon.
13Dung si Elon, si Abdon anak ni si Hilel na sian Piraton ma mamimpin halak Israel. 14Adong do opat pulu anaknia halaklahi jana angka pahompunia halaklahi adong tolu pulu halak. Adong be do ganop halahi halode tunggangna. Salapan taon honokna halak Israel dipimpin si Abdon. 15Dung i marujung mangolunia lalu dikuburkon di Piraton na di Luat Efraim di luat partoran ni halak Amalek.
Currently Selected:
HAKIM-HAKIM 12: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
