JEHESKIEL 33

Diangkat Debata si Jeheskiel gabe panjago

(Jeh. 3:16-21)

1Mangkuling muse ma Tuhan tu au, ning ia ma, 2“Ale jolma parsantongkinan, dokkon ma tu bangsomi, muda Huparo parporangan tu sada luat, on ma na giot tarjadi. Pilion ni halak luat i ma sian tonga-tonga ni halahi sada halak panjago. 3Muda diida panjago i ro musu, paluonnia do tanda ni bahaya anso hobas sude halak. 4Muda adong sahalak na umbege sora ni sarune i, tapi nada ra ia dipasingot, jadi ro podang i, hona bunu ma ia, gabe mate ma ia hara ni salania sandiri. 5Dibege ia do sora ni sarune i, tapi nada ra ia dipasingot, mate ma ia hara ni salania sandiri. Muda ditangihon ia do sipasingot i, malua ma hosana. 6Tapi sugari diida panjago i ro musu hape nada dipalu ia sarune tanda ni bahaya, lalu dibunui musu i angka jolma pardosa i, sian ia do tuntutonKu hamamate ni halahi.

7Ale jolma parsantongkinan, Huangkat do ho gabe panjago ni bangso Israel. Palalu ma tu halahi sipaingot on: 8Muda Hupabotohon tu ho, na giot mate sada halak parjahat, hape nada dipaingot ho ia anso dipauba ia pangalahonia i anso malua ia nian, jadi mate ma ia songon sada halak pardosa. Tapi tuntutonKu do tu ho tanggung jawab salaho tu hamamatenia. 9Muda dipaingot ho parjahat i jana nada ra ia mantak mambaen na jahat, mate do ia songon pardosa tapi anggo ho sandiri malua do.”

Ganop jolma martanggung jawab be

10Didok Tuhan ma tu au, “Ale anak ni jolma, pasulak ma tu halak Israel na nidok ni halahi on, ‘Mardangol do hami hara ni na mamorsan dosa dohot hajahatannami. Bia ma pambaennami mangolu?’ 11Dokkon ma tu halahi, mangasahon Au na mangolu, Tuhan Debata nada jop rohangKu muda mate halak parjahat i; tapi sugari mulak ma nian ia manadingkon angka dosana anso tongtong ia mangolu. Ale bangso Israel, antak hamu ma mambaen na jahat! Biasi angkon sai mate hamu?”

12“Antong, ale jolma parsantongkinan, dokkon ma tu halak Israel muda mambaen dosa halak na burju, gabe nada tarurupi hadengganannia i ia. Muda mantak halak parjahat mambaen dosa, nada be hona uhum ia baenon jana muda mambaen dosa halak na burju, nada be malua ia baenon. 13Bolas jadi do na dung Hujanjihon laho paluahon halak na burju i, tapi anggo dipungka ia do mambaen dosa jana diarop rohania giot paluaonKu ia hara ni hadengganannia na salpu i, sala do ia disi. Nada paingot-ingotonKu be hadengganan na dung unjung dibaen ia jana mate noma ia hara ni angka dosania i. 14Bolas jadi do na dung Hupaingot halak parjahat i mandok na giot mate noma ia. Tapi anggo mantak do ia mambaen dosa jana dipungka ia patupahon sanga aha na denggan dohot na tutu, 15umpamana dipaulak ia barang na digadehon ni halak, sanga barang na nitangkonia boti dioloi ia angka uhum na maroban tu hangoluan, gabe nada mate be ia, tapi mangolu noma. 16Nada be paingot-ingotonKu angka dosa na nibaenna i, jana mangolu ma ia hara ni na patuluskon sanga aha na tutu dohot na denggan.

17Tapi didok bangso i do na so tigor na Hubaen i! Hape nian na nibaen ni halahi i do na so tigor. 18Sanoli nari Huondolkon, muda dipungka halak na burju mambaen na jahat, na giot mate noma i. 19Muda mantak halak parjahat i mambaen dosa jana dipungka mambaen na denggan dohot na tutu, mangolu noma ia. 20Tapi haru songon i pe, laing didok halak Israel do na so tigor na Hubaen i. Satutuna do, uhumanKu ma halahi ganop marguru tu pambaenanna be.”

Barita taringot tu hadadabu ni Jerusalem

21Di tanggal lima bulan sampulu, di taon padua bolaskon habuangannami, ro ma sada halak na malua sian Jerusalem jana dipaboa ia ma tu au na dung madabu kota i. 22Di borngin parpudi painte so haroronia i, madung songgop tu au tangan ni Tuhan. Jadi di na ro bayo i tu au, madung tarbaen au manghobari jana nada ngungu be au.

Angka dosa ni bangso i

23Didok Tuhan ma tu au, 24“Ale jolma parsantongkinan, didok angka jolma na maringanan di angka lobu ni parhutaan na di tano Israel i do, ‘Dapot si Abraham do sude tano on, hape sasada ia sajo do nian. Hita on songon i ma bahatta, jadi gabe hita noma nampuna on.’ ”

25Jadi hara ni i disuru Tuhan Debata i ma au palaluhon tonaNia on tu halahi, “Dipangan hamu do juhut na marmudar dope; disomba hamu gana-ganaan jana mamunu jolma hamu. Na puluk ma da hamu mandok hamu nampuna tano on. 26Podangmunu i do dipangasahon hamu. Sihagigian do na nibaenmunu. Sude do hamu marmainan. Puluk dope he hamu mandok hamu nampuna tano on?

27Mangasahon Au Na Mangolu, ninna Tuhan Debata, angkon mate tarbunu noma angka jolma na maringanan di lobu ni kota na sego i. Angka na maringanan di padang-padang, panganon ni angka binatang panyoro noma i. Angka na martabuni di dolok-dolok dohot angka liang, mate ma i baenon ni nyae masa. 28BaenonKu ma luat i gabe padang halongonan na lungun, jana marujung ma kuaso na sai dipangasahon ni halahi. Gabe gasgas hatubuan ni duri ma angka dolok na di Israel, gabe nada adong be halak tarbaen mamolussa. 29Di na hona uhum baenonKu bangso i hara ni angka dosa ni halahi jana mamolngit Hubaen luat i, gabe botoon ni halahi ma Au do Tuhan.”

Pangkorhon ni jamita ni panurirang i

30Didok Tuhan ma, “Ale jolma parsantongkinan, sihata-hataan ni angka dongan sabangsomu noma ho muda marpungu-pungu halahi di lambung ni angka tembok ni kota i sanga di jolo ni angka pintu ni bagas. Marsipandohonan ma halahi na sada tu donganna, ‘Beta, hita tangihon ma sanga aha tona ni Tuhan sadari on.’ 31Ro do halahi marbahat-bahat songon bangsongKu, tangihonon ni halahi do angka hata na nidokmu, tapi anggo na niparentahonmu nada diterge halahi. Hata holong ni roha do dipajojor bibir ni halahi, tapi anggo rohana di bagasan hum mamikiri untung sajo do. 32Dietong do ho songon sada halak parende na mangendehon logu ni na marsihaholongan, parsora na jeges jana na malo mamalu hasapi. Tutu nian dibege halahi do hata na nidokkonmi tapi nada dioloi halahi. 33Tulus do sude na nidokkonmu, jana muda dapot hatihana, botoon ni halahi ma, na dung jungada adong sada panurirang di tonga-tonga ni halahi.”

Currently Selected:

JEHESKIEL 33: LAIAKB

Highlight

Copy

Compare