JEHESKIEL 27

Ende andung-andung maradopkon Tirus

1-3Didok Tuhan Debata i ma tu au, “Ale anak ni jolma parsantongkinan, endehon ma sada andung taringot tu Tirus, na maringanan di labuan, jana na marboniaga dohot angka bangso di topi ni laut:

Songon on ma hata ni Tuhan Debata,

‘Ale Tirus didok ho: Au ma kapal na sun jeges.’

4Songon bagas do di ho anggo laut i.

Dipajongjong ho songon kapal na jogi.

5Dindingmu hayu ares sian Dolok Hermon

tiang layarmu hayu sampinur sian Libanon.

6Angka dayungmu dibaen halahi

sian angka hayu na godang di Basan do i.

Inganan ni juguhanmu dibaen sian tusam

sian pulo Siprus do i asalna,

na nipajagar dohot gading na arga.

7Layar na gabe tandamu sian abit linen

na ditonun di Mesir, na disulam marrupa-rupa.

Halus ma tutu abit ni angka tandamu,

tonunan Siprus na rara ungu.

8Sian Sidon dohot Arwad do pandayungmu

angka parlaut na malo-malo do anak buamu.

9Angka tukang hayu na markarejo di kapal

i ma angka na pande sian Gabal.

Sian ganop luat marroan angka kapal

laho marsambung di na marjagal.

10Angka tentara sian Persia, Lidia dohot Libia masuk tu tentaramu. Dipargantungkon halahi parince dohot kupia baja ni halahi di angka tembok ni hutamu. Madung diurupi halahi pataluhon angka musu lalu manamba habonggalanmu. 11Angka tentara na sian Arwad manjagoi di tembok-tembokmu; angka palas-palasmu dikawal angka halak na sian Gamad. Margantungan angka parince ni halahi marderet-deret di tembokmu. Halahi ma patamba hajegesanmu.

12Digadisi ho ma angka barang-barang boniagamu na marlobi-lobi i, jana gararna dijagiti ho ma perak, bosi, simbora na bontar dohot na lomlom. 13Marboniaga ho di Junani, di Tubal dohot di Mesekh jana gararna dijagit ho ma sian halahi angka hatoban dohot barang-barang na sian tumbaga. 14Disambari ho ma angka barang-barangmu dohot kudo ni kareta, kudo tunggang dohot bagal na sian Bet-Togarma. 15Halak na maringanan di Rodus pe marboniaga do dohot ho jana halak na maringanan di pasisir manobusi barang-barang jagalanmu marhite gading dohot hayu na lomlom. 16Angka parboniaga sian Siria manobusi angka barang-barang boniagamu dohot angka suhamu na bahat i. Digarari halahi ma i dohot simata na sian batu zamrud, abit na rara bunga torung, abit na marsulam, linen na halus, simata na sian batu koral dohot batu na rara dalimo. 17Juda dohot Israel manukar barang jagalanmu dohot gandum, aer ni loba, miak zetun dohot angka parmasak. 18Halak Damaskus marboniaga dohot ho hara ni bahatna suhamu, hara niragam ni angka barangmu na bahat i. Anggur na sian Helbon, imbulu ni biri-biri sian Sahar. 19Jana ditukarkon halahi do anggur gonti ni angka barangmu, bosi na dung ditopa sian usal, hayu dohot tobu pe adong do di barang jagalanmu. 20Halak Dedan manggarar barang-barangmu dohot abit-abit ni palano. 21Halak Arab dohot na mangarajai tano Kedar, ditobusi do barang-barangmu dohot anak ni biri-biri, biri-biri jantan dohot hambeng. 22Laho manobusi angka barang-barangmi diobani angka parboniaga na sian Seba dohot Raema do angka parhiasan, sere dohot parmasak na dumenggan. 23Kota Haran pe, Kane, Eden angka parboniaga na sian Seba, angka kota ni Asur dohot Kilmad, marboniaga do i sude dohot ho. 24Digadisi halahi do tu ho angka pakean sigodang arga, abit na rara bunga torung, abit na marsulam, angka parmadani na marrupa-rupa tompana, dohot angka ragam ni tali na togu. 25Marbaris-baris do kapal maroban barang-barang boniagamu.

Songon kapal do ho na sorat marmuat,

kapal na mamolusi laut na sun bolak.

26Dioban angka pandayung ma i tu laut na so marbatas.

Ditondong alogo Habincaran na manggosa-gosa.

27Sude barang boniaga muatanmi,

sandok parlaut songon i anak buami,

sude tukang hayu dohot saudagarmi,

ganop tentara na di kapal i,

halahi sudena mago bonom,

di hatihamu harom.

28Umbege sora angguk-angguk ni angka parlautmi,

humutur ma angka tano na ditopi ni laut i.

29Saonnari tading ma kapal i

mandarat sude parlautmi.

30Ditangisi halahi bagianmi

humolos jana lungun mangandungi.

Disampakkon halahi abu tu uluna

jana margiling di abuan tanda ni arsakna.

31Hara ni ho dicukur halahi uluna

mamake abit goni hara ni gok ni arsakna.

Lungun noma partangis ni halahi

jana diandungi halahi bagianmi.

32Dung i diandungkon halahi ma songon on mangandungi ho:

Ise ma na songon Tirus,

na dung diagohon di tonga ni laut?

33Taran diadangi ho angka laut

mardongan muatan na gok,

digohi ho do haporluan ni angka bangso;

angka raja pe dibaen ho do makayo hara ni bahat ni barang-barangmu.

34Saonnari na dung bonom do ho,

magopu di tandolan ni laut ho.

Sude paranganmu maradu dohot muatanmu

mago rap dohot ho di tonga-tonga laut.

35Sude halak na maringanan ditopi ni laut humitir umbege bagianmi. Angka raja ni halahi pe sun biarna; tarida di bohi ni halahi langan hara ni biarna. 36Limpot noma ho sapanjangna. Angka parboniaga di sandok tano on gabe tarsonggot hara ni biarna betak sai ro bagian sisongon i, tung na dangol do ujungmu mago ma ho salolot-lolotna.”

Currently Selected:

JEHESKIEL 27: LAIAKB

Highlight

Copy

Compare