JEHESKIEL 19
19
Ende andung
1Pungka ma sada ende andung-andung taringot tu angka induk ni Israel:
2Songon singa boru-boru do inangmu
na gogo boti na jorbut.
Dipagodang-godang ia angka anaknia
di tonga-tonga ni angka singa na tongam.
3Sada sian anakna
diajari manjalahi soroanna.
Jadi gabe singa na garang ma
panjomak jana sisoro jolma.
4Angka bangso na umbege taringot tusia
marsipalu ma tanda ni na ro mara.
Dipadapot ma ia di bagasan lubang jana ditaban,
lalu di harihiri ma jana disarat ma i tu Mesir.
5Ngolngolan inangna i paintehon anakna;
diboto ia muse ma na so adong be gunana paintehonsa.
Gabe diajar ia ma anaknia na asing i
gabe singa na ganas jana na barani.
6Impas godang ma anak ni singa i
jana mardongan dohot singa na asing i.
Marsiajar ma ia manjalahi soroanna,
jana laing dohot muse jolma dipangansa.
7Angka benteng dionjarkon ia
angka kota pe disegohon ia.
Gabe manyikur ma halak saluat
pabege-bege parngaurna na mambaen humutur.
8Mardomu ma angka bangso laho mangalo ia.
Marroan be halahi sun sian dia-dia.
Disampakkon halahi jorat manangkupsa,
gabe dapot jana tartangkup ma ia.
9Dipamasuk ma ia tu hurungan ni singa
lalu dioban tu tano Babel, mangadop tu raja.
Pir dibaen manjago ia anso ulang habegean be parngaurna
di angka dolok ni Israel angka na gincat.
10Tudos do indukmu tu bona ni anggur na jeges
na tubu di kobun di lambung ni anak ni batang aek.
Tubu ia napu boti marbatu
hara ni aek na disi lobi so pola marsiadu.
11Ruar ma sada dangkana na togos,
pola patut ia baenon tungkot harajaan,
jana pusukna mangalobi i sian ombun,
gabe murtamba ma i hara ni gincatna
dohot hara ni bulung na rimbun.
12Hape diumpat tangan na muruk ia
lalu disampakkon tu tano noma.
Mangombus ma alogo Habincaran, mambaen malos batuna taran hajegesanna.
Masopak dangkana i gabe mahiang lalu nitutungan.
13Saonnari disuan ma ia di parhorsihan
di tano na so maraek jana na gariang.
14Jana rarat ma api sian bulung ni hayu anggur i laho manganhon parbatuna,
gabe nada adong be dangka na togos jana nada adong be tungkot harajaan.
Ende andung-andung do on jana pakeon gabe ende andung-andung tu joloanon.
Currently Selected:
JEHESKIEL 19: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
