HARURUAR 37

Paulihon Poti Parjanjian

(Har. 25:10-22)

1Dipauli si Besaleel ma Poti Parjanjian sian hayu akasia, 110 sentimeter ginjangna, tohangna dohot gincatna 66 sentimeter. 2Di bagasan dohot sian ruar dilampis ia do dohot sere na polin jana marbingke sere dibaen ia. 3Dibaen ia muse do opat golang-golangna sian sere inganan ni porsan-porsanna jana dibaen ia ma i di patna na opat i, dua golang sabariba. 4Dibaen ia muse ma porsan-porsanna sian hayu akasia na nilampis dohot sere, 5jana disurukkon ia ma i tu golang-golangna i angkup bariba. 6Dung i dibaen ia ma langkopna sian sere na polin, 110 sentimeter ginjangna jana bidangna 66 sentimeter. 7Dibaen ia muse ma dua kerub sian sere tuangan, 8sada be ganop ujung ni tutup ni poti i. Songon i ma pambaennia di patung na dua i gabe sada dohot langkopna i. 9Paadop-adop ma kerub na dua i, jana mangerbang ma habongna i manutupi langkop ni poti i.

Pauli meja inganan ni roti sihaulkonon tu Debata

(Har. 25:23-30)

10Dipauli si Besaleel ma meja sian hayu akasia 88 sentimeter ginjangna, bidangna 44 sentimeter jana gincatna 66 sentimeter. 11Dilampis dohot sere na polin do meja i jana marbingke sere do dibaen ia humaliang. 12Dibaen ia muse ma pambibirina 7,5 sentimeter humaliang meja i. Dibaen do bingke ni pambibiranna i humaliang sian sere. 13Dibaen ia ma opat golang-golang pamorsananna di suhi-suhina na opat i, di ginjang ni patna i. 14Golang-golang panahan ni porsan-porsanna i di lambung ni pambibiranna i ma dibaen. 15Hayu porsan-porsanna i sian hayu akasia do dibaen jana dilampis dohot sere. 16Panjamaan ni meja i sian sere na polin do dibaen ia; angka pinggan, mangkuk, angka botol-botol dohot kendina sipakeon manghaulkon aek ni anggur.

Pauli parlampuan

(Har. 25:31-40)

17Dibaen si Besaleel ma parlampuan sian sere na polin. Jongjonganna dohot sitiopanna sian sere tompoan dibaen ia. Angka bunga-bungana, lampusungna dohot lampakna songon na sada do i tu sitiopanna i.

18Adong ma onom dangkana sian lambung, tolu be angkup bariba. 19Ganop dangkana i adong ma dibaen tolu bunga songon hiasanna tar songon bunga ni bua pala marlampusung dohot marlampak. 20Di sitiopanna i adong ma opat hiasanna tar songon bunga ni bua pala na marlampusung dohot marlampak. 21Di pangkal ni sude dangkana i, dibaen ma songon bunga na marlampusung. 22Sude parlampuan i dohot angka lampusung maradu angka dangka-dangkana i sian sangkimpal sere tompoan do i dibaen. 23Dibaen ia ma di parlampuan i pitu lampu dohot gampit-gampit dohot talam, sian sere na polin do i sudena. 24Adong ma 35 kilo bahat ni sere na polin laho mambaen parlampuan i dohot angka panjamaanna i.

Pauli langgatan panutungan ni hamonyan

(Har. 30:1-5)

25Dibaen si Besaleel ma sada langgatan sian hayu akasia baen inganan panutungan ni hamonyan. Sogi opat do dibaen langgatan i, 45 sentimeter ginjangna dohot bidangna. Gincatna 90 sentimeter. Tanduk na opat na di suhi-suhina na opat i sada do i dohot langgatan i. 26Sabola sian ginjang, suhi-suhina na opat i dohot tandukna i dilampis do i dohot sere na polin jana dibaen ma bingkena humaliang laing sian sere, 27lalu dibaen ia ma dua golang-golang pamorsanna di toru ni bingkena i angkup bariba laho manahan porsan-porsanna i muda hatiha marobansa. 28Sian hayu akasia do dibaen ia porsan-porsanna i jana dilampis ia do i dohot sere.

Martanak miak upacara dohot hamonyan

(Har. 30:22-38)

29Ditanak si Besaleel muse ma miak upacara dohot pultak ni hamonyan na huskus, dicampur songon miak na huskus.

Currently Selected:

HARURUAR 37: LAIAKB

Highlight

Copy