HARURUAR 17

Haruar aek sian batu

(Bil. 20:1-13)

1Dung i kehe ma sude halak Israel maninggalkon Parhorsihan Sin, jana marpinda-pinda ma halahi sian inganan na sada tu inganan na asing mangihutkon parenta sian Tuhan. Sanoli marbandar halahi di Rafidim, tapi nada adong aek inumon disi. 2Dung i marungut-ungut ma halahi tu si Musa, ninna ma, “Lehen di hami aek inumon.”

Dialusi si Musa ma, “Biasi marungut-ungut jana diuji hamu Tuhan?”

3Tapi sun do nguas ni angka jolma i jana sai torus do halahi marungut-ungut tu si Musa. Ninna halahi ma, “Biasi dioban ho hami haruar sian Mesir? Giot padiaronmu ma hami, dohot angka dakdanaknami maradu pahan-pahanannami mate manguas?”

4Pio-pio ma si Musa tu Tuhan, ning ia ma, “Aha ma baenonku tu angka halak on? Ligi ma, madung marhobas halahi giot mandangguri au dohot batu.”

5Didok Tuhan ma tu si Musa, “Piohon ma sanga piga-piga halak pamimpin ni halak Israel jana joloi hamu ma mardalan bangso i. Laing oban ma tungkot na nipakemu mangalipat Batang aek Nil i. 6Jongjong pe Au di jolomu di sada batu di Dolok Sinai. Lipat ma batu i, gabe haruar ma aek sian batu i, anso minum halahi.” Dibaen si Musa ma songon i disaksihon angka pamimpin ni Israel i.

7Digoari ma inganan i Masa,#17:7 MASA: Astuan ni goar on di hata Ibrani “Manguji”. angke di inganan i ma diuji halak Israel Tuhan, di na nisapaan ni halahi, “Rap dope ulaning Tuhan, dohot hita sanga nada?” Laing margoar do inganan i Meriba,#17:7 MERIBA: Astuan ni goar on di hata Ibrani: “Mungut-ungut”. angke di inganan i ma marungut-ungut halahi.

Porang dohot Amalek

8Jadi ro ma da halak Amalek mangaroro halak Israel di kota Rafidim. 9Didok si Musa ma tu si Josua, “Pilii ma jolo sanga na piga-piga halak anso kehe marporang mangalo halak Amalek ancogot. Anggo au, jongjong di puncut ni dolok do maniop tungkot na nisuru oban ni Tuhan tu au.” 10Jadi dipatulus si Josua ma sanga songon dia na niparentahon ni si Musa i tusia. Kehe ma ia mamorangi halak Amalek; tapi anggo si Musa, si Harun dohot si Hur manangkok ma tu dolok lopus tu puncutna an. 11Salolot dipahortang si Musa tangannia i, monang ma halak Israel. Tapi muda hum madabu tangannia i, monang ma halak Amalek. 12Jadi dung loja tangan ni si Musa, dibuat si Harun ma dohot si Hur sada batu juguhan ni si Musa; jongjong ma si Harun dohot si Hur di siamun siambirang ni si Musa laho manungkol tangannia i anso hot toltol lopus sundut mataniari. 13Ujungna talu ma sude halak Amalek i dibaen si Josua.

14Dung i didok Tuhan ma tu si Musa, “Suratkon ma taringot tu hamonangan on, anso sai tongtong dipaingot-ingot. Dok tu si Josua, na giot lantuhanKu do sude halak Amalek on.” 15Jadi dipajongjong si Musa ma sada langgatan, jana dibaen ia ma goarna, “Tuhan do Manderangku.” 16Didok si Musa ma, “Tiop hamu ma mandera ni Tuhan, timbo-timbo! Marporang do Tuhan mangalo halak Amalek ro di salolot-lolotna!”

Currently Selected:

HARURUAR 17: LAIAKB

Highlight

Copy