HARURUAR 15

Ende ni si Musa

1Dung i diendehon si Musa dohot halak Israel ma ende on di Tuhan,

“Giot marende ma au di Tuhan,

hara ni na monang Ia marhasurungan.

Kudo dohot na mangalombut diambungkon Ia tu bagasan laut.

2 Tuhan do na gogo mangondihon au

sasadaSa do na dung paluahon au.

Ia do Debatangku, pujionku ma Ia,

Debata ni daompung, huendehon ma hagodanganNa.

3 Tuhan do panglima ni porang;

Tuhan, i ma goarNa.

4Tentara ni Mesir dohot angka karetana diambungkon Ia tu laut,

tentara pilian na jumingar bonom di Laut Rara.

5Laut na bagas mangalingkup halahi;

songon batu, bonom di bagasan laut i.

6Tangan siamunMi ale Tuhan, tung na so tarpatudos hagogoanna,

tangan siamunMi ale Tuhan mangaropuk angka musu.

7Marhite hatongamonMu na lumobi, dibalikkon Ho aloMu

marpiar-piar hamuruhonMu, jana manutung halahi songon durame.

8Diombus Ho do laut i, jana marbalun songon dolok na gincat;

jongjong tingkos songon panambok; gabe pir tandolan ni laut i.

9Ninna musu, ‘Ayakonku ma halahi anso hutangkup

jana hubuat por ni rohangku.

Sintahonku ma podangku jana hurampas ma sude arta ni halahi,

hubagi-bagi jana di au ma i lopus sombu rohangku.’

10Hape, sangombus pe hosaMu, o Tuhan,

halak Mesir i pe gabe marmogapan,

bonom songon simbora di aek na magodang.

11 Tuhan, ise ma sian angka debata sileban na tudos dohot Ho?

Di sangap dohot di habadiaan, ise manyalpui Ho?

Ise tarbaen patupa angka hahomangan

dohot angka karejo na godang songon na binaenMu?

12Dipahortang Ho tangan siamunMi,

jana dibondut tano i ma musunami.

13Setia do Ho tu janjiMu manogu

bangso na dung nipaluaMu,

diiring Ho do halahi tu tanoMu na badia marhite hagogoonMu.

14Madung dibege angka bangso, jana humitir be halahi mabiar,

halak Pilistin pe gabe manyogar.

15Angka pamimpin ni Edom gabe manyogar

halak Moab na gogo i gabe manyikur,

angka halak Kanaan pe marroha heput.

16Biar dohot sursar mandondoni halahi;

O Tuhan, paida-ida gogoMi,

jana umpe margogo be jongjong hara ni na humitir halahi lopus mamolus bangsoMi –

bangso na nipaluaMu sian parhatobanan i.

17Ho do pataruhon halahi masuk,

jana pahotkon halahi di ginjang ni dolokMu,

inganan na nitodoMu gabe inganan parmiananMu;

bagas na nipajongjongMu.

18Mamarenta ma Ho, ale Tuhan salolot-lolotna.”

Ende ni si Miryam

19Di na nitariparan ni halak Israel laut i, mardalan di tano na mahiang do halahi. Tapi dung masuk angka kareta ni halak Mesir bope kudo dohot na manjuguhisa tu laut i, dipadalan Tuhan ma mulak aek i, gabe bonom halahi.

20Dung i dibuat si Miryam, i ma sada panurirang, iboto ni si Harun ma rapanonia jana sude dadaboru rap mamalu rapano lalu manortor. 21Marende ma si Miryam di halahi,

“Marende ma di Tuhan, dibaen

tarlobi do hamonanganNia

kudo dohot na manenggetsa

diambungkon Ia tu bagasan laut.”

Aek na paet

22Dung i dioban si Musa ma bangso Israel sian Laut Rara adop Parhorsihan Sur. Tolu ari halahi mardalan mamolus parhorsihan i nada ungada marsuo dohot aek. 23Jadi bolkas ma halahi tu sada inganan na margoar Mara, adong do aek disi tapi na lobi paet, jabat nada tarinum. Hara ni i do digoari ma inganan i Mara,#15:23 MARA: “Paet” do astuan ni goar on di hata Ibrani. astuanna: paet. 24Gabe mungut-ungut ma halahi tu si Musa, marsapa, “Aha noma inumonta?” 25Dung i martangiang ma si Musa marsitutu tu Tuhan, dung i gabe dipatidahon Tuhan ma tu si Musa samponggol hayu. Diambungkon si Musa ma hayu i tu aek i, gabe tarinum ma aek i.

Di inganan i ma dilehen Tuhan angka paraturan tu halahi, jana disi ma diuji Ia halahi. 26Ninna Tuhan ma, “Angkon oloanmunu do Au sian sude rohamunu, marhite na patupahon sanga aha na denggan di Au bope patulus sude na Huparentahon. Muda dikarejohon hamu do i, nada uhumanKu hamu marhite angka nyae songon na dung Hubaen tu halak Mesir i. Au do Tuhan na pamalum hamu.”

27Dung i lalu ma halahi tu huta Elim. Adong do disi dua bolas mual ni aek dohot pitu pulu bona ni kurma. Marbandar di lambung ni aek i ma halahi.

Currently Selected:

HARURUAR 15: LAIAKB

Highlight

Copy