PANGARATAION 8

Tano na denggan baen siinganan

1“Sude aturan na Hulehen tu hamu sadari on, haburjuhon hamu ma mangoloi i, anso hot hamu mangolu, martamba bahat dohot maringanan di tano na nijanjihon ni Tuhan tu ompumunu. 2Ingot hamu ma! Opat pulu taon lolotna Tuhan Debatamunu manogu-nogu hamu di pardalanan na dao manyalpui parhorsihan. Diloas Ia masa angka hamaolon tu hamu laho manguji hamu, anso tarida Ia sanga aha na giot baenonmunu jana sanga na oloanmunu do angka parentaNia. 3Dipadiar Ia hamu tangkuraparon, dung i dilehen Ia tu hamu manna baen panganon, i ma sipanganon na so jungada hian dope dipangan hamu sanga ompumunu. Na mangajari hamu do umbaen dipatupa Tuhan songon i bahaso nada hum sian roti sajo jolma mangolu, tapi sian sude na nidok ni Tuhan. 4Salolot na opat pulu taon on nada mumut pakeanmunu, jana nada manggurbak patmunu. 5Ingot hamu ma, na niuhuman ni Tuhan Debatamunu do hamu songon sada ama na mamodai angka dakdanakna. 6Antong, patulus hamu ma sandok na niparentahon ni Tuhan: Ihutkon hamu ma angka aturanNia jana sai habiari hamu ma Ia. 7Obanon ni Tuhan Debatamunu ma hamu tu sada tano na napu, sada luat na gok batang aek dohot mualna, maradu aek na marponot na marbuldak tu angka rura dohot angka tor; 8sada luat na gabe pambuatan ni gandum dohot bajaure, anggur, batu ni ara, batu ni dalimo, miak zetun dohot manisan. 9Anggo disi nada unjung tangkuraparon sanga hurangan hamu. Marisi bosi do batu karangna i jana sian angka dolok-dolokna i tartombang hamu do tumbaga. 10Sandok sipanganon por ni rohamunu, rade do di hamu, jana mandok tarimakasi ma hamu tu Tuhan Debatamunu hara ni tano napu na dung nilehenNa i di hamu.”

Sipaingot anso ulang nihalupahon Tuhan

11“Jamot ma hamu, anso ulang jabat dihalupahon hamu Tuhan Debatamunu; sian sude parentaNia na Hulehen tu hamu sadari on, ulang adong sada pe na nipasidingmunu. 12Muda rade sipanganon por ni rohamunu i di hamu, jana dung dipajongjong hamu angka bagas na denggan di hamu baen ingananmunu, 13jana muda dung martamba lombu, hambeng dohot biri-birimunu, perak dohot seremunu, maradu sude arta sinadongan na asing i, 14jamot ma hamu anso ulang gabe manyombong hamu jana lupa tu Tuhan Debatamunu na dung paluahon hamu sian Mesir, ingananmunu diparhatoban. 15Dipimpin Tuhan do hamu mamolus parhorsihan na bolak jana na jorbut i, disi bahat ulok na marbisa dohot hala. Di tano na mahiang na so maraek i disuru Ia do mardalan aek sian batu mamak na pir i anso minum hamu sapuas-puasna. 16Di parhorsihan i dilehen Ia do manna gabe sipanganonmunu, i ma sipanganon na so jungada humani dope dipangan ompumunu di jolo ni i. Diparo Ia angka hamaolon tu dirimunu laho manguji hamu anso di ujungna tarbaen Ia mamasumasu hamu dohot rasoki. 17Jadi, ulang diambang hamu hara ni pambaenan dohot gogomunu sandiri hamu gabe mamora. 18Ingot hamu ma! Tuhan Debatamunu i do na mambaen mamora hamu. Patunda ni na laing setia do Ia lalu tu sadari on tu janji na nibaenNia dohot ompumunu umbaen na dipatupa Ia na songon i. 19Jago ma hamu! Ulang lupa hamu tu Tuhan Debatamunu, sanga marbalik tu angka debata na asing laho mamele dohot mangoloi tusi. Muda dibaen hamu na songon i, Hupaingot ma hamu sadari on pasti pusaon ni Tuhan hamu. 20Muda nada marpangoloion hamu tu Tuhan, hamu pe laing hona pusa muse do songon angka bangso na giot abiskononNia di jolo ni matamunu.”

Currently Selected:

PANGARATAION 8: LAIAKB

Highlight

Copy

Compare