PANGARATAION 2

Angka taon dompak di parhorsihan

1“Ujungna kehe ma hita mangulahi tu parhorsihan mamolus sian dalan laho tu Solok Akaba, songon na niparentahon ni Tuhan tu au. Dung i honok sajo ma hita madang-adang di luat partoran Edom.

2Dung i didok Tuhan ma tu au, 3bahaso na dung tuk ma honokna hita na madang-adangi di luat partoran i. Jadi angkon kehe ma hita tu Utara. 4Dung i disuru Tuhan ma au mangalehen sitiopan ni roha di hamu songon on, ‘Nada sadia honok nari masuhanmunu ma tano partoran Edom, luat ni angka kahanggimunu pomparan ni si Esau. Mabiar ma halahi tu hamu, tapi angkon marjaga-jaga do hamu. 5Indangkon sai porangi hamu halahi, angke hum sanjongkal pe sian tano ni halahi i nada lehenonKu tu hamu, angke na dung Hulehen do Edom tu pomparan ni si Esau. 6Tola do hamu manobusi panganon dohot inumon sian halahi.’

7Ingot hamu ma sanga songon dia pamasumasu ni Tuhan Debatamunu di hamu di bagasan sasude na nibaenmunu. Madung diparmudu-mudu Ia hamu salolot na madang-adang mamolus parhorsihan na bolak i. Madung didongani Ia hamu di na opat pulu taon on jana dipasingkop Ia sandok na hasaya di hamu.

8Hita pe antong mardalan do torus mamolus Luat Edom jana tatinggalkon dalan na sian kota Elat dohot Esion-Geber laho tu Laut Mate, lopus mangeldok hita tu Habincaran na tu Moab. 9Didok Tuhan tu au, ‘Ulang hahua hamu halak Moab pomparan ni si Lot i, jana ulang porangi hamu. Na dung Hulehen do kota Ar di halahi jana sian tano ni halahi i, saotik pe nada lehenonKu i di hamu.’ ”

(10Narobi adong do sada bangso raksasa na margoar halak Em, i hian do na mangingani Ar. Sarupa do gincatna dohot halak Anakim, laing bangso raksasa. 11Laing songon halak Anakim, digoari halak muse do halahi, halak Refaim. Tapi anggo halak Moab, digoar do halahi halak Em. 12Na jolo maringanan di Edom do halak Hori, tapi dipaorot pomparan ni si Esau ma halahi jana dipangabis ma bangso i, lalu diingani halahi tanona i, laing songon bangso Israel di pudian ni ari na paorot angka musuna sian tano na nilehen ni Tuhan di halahi.)

13“Dung i tataripari ma Batang aek Zered songon na niparentahon ni Tuhan tu hita. 14I ma na masa di taon patolu pulu salapankon dung tatadingkon Kades-Barnea. Madung marujung ngolu ni sude tentara na sangoncap i, songon na nilumbahon ni Tuhan humani. 15Sai torus do dialo Tuhan halahi, lopus tu ujungna hona pusa halahi.

16Dung mate sude tentara ni bangso i, 17didok Tuhan ma tu hita, 18‘Sadari on bolusonmunu ma Luat Moab, mamolus sian dalan Ar. 19Jadi madung donok hamu tu tano ni halak Amon, pomparan ni si Lot. Ulang hahua hamu sanga porangi hamu halahi, harana sian tano na dung Hulehen di halak i, saotik pe nada adong na giot lehenonKu di hamu.’ ”

(20Tarbarita muse do luat i tano Refaim, i ma goar ni bangso na mangingani i najolo; muda halak Amon mandok goar ni halahi, halak Zamsumim. 21Songon halak Anakim, halahi pe laing bangso na ginjang na godang do. Santak do gogo ni halahi, jana bilanganna pe bahat. Hape diabisi Tuhan do halahi, gabe dirampas halak Amon tano ni halahi, lalu diingani halahi. 22Laing songon i ma dibaen Tuhan tu halak Edom, pomparan ni si Esau, na mangingani luat partoran Edom. Diabisi Tuhan halak Hori, gabe dibuat halak Edom tano i lalu diinganisa, jana lopus tu sadari on pe laing halak Edom do maringanan disi. 23Anggo tano na di topi ni Laut Tonga na dung dibuat ni angka halak na sian pulo Kreta do i. Madung diabisi halahi halak Awi, na mangingani tano i humani, lalu diingani halahi ma luat i lopus tu Selatan marbalok di kota Gasa.)

24“Dung tasalpui Moab, didok Tuhan ma tu hita, ‘Kehe ma ne manaripari Batang aek Arnon. PasahatonKu ma tu ho si Sihon raja ni halak Amori na mamarenta di Hesbon, maradu luatna i. Porangi ma i, lalu ingani tanona i. 25Mamungka sadari on baenonKu ma angka bangso sanga na di dia pe mabiar tu hamu. Sandok jolma gabe humitir ma mabiar muda dibegesa didok goarmunu.’ ”

Israel manaluhon Raja Sihon

(Bil. 21:21-30)

26“Dung i Hutongos ma piga-piga halak suruan sian Parhorsihan Kedemot tu Raja Sihon na sian Hesbon laho palaluhon hata dame na mandok: 27‘Patola ma hami mamolus sian tano ni raja i. Hum dalan i do sibolusonnami nada pola manyirpang hami sian i. 28Hami garari pe sipanganon na hami pangan dohot aek na hami inum. Hum na giot mamolus luat on do hami, 29lopus hami taripari Batang aek Jordan laho mamasuhi tano na giot silehenon ni Tuhan Debatanami tu hami. Pomparan ni si Esau na maringanan di Edom dohot halak Moab na maringanan di Ar, madung mangisinkon hami mamolus luat ni halahi.’

30Hape nada ra Raja Sihon patolahon hita mamolus tanonia i. Madung dipapir Tuhan Debatamunu i rohania jana papuluk-pulukkon, anso tartaluhon hita ia jana tabuat luatnia i. Laing hita do mangingani luat i lopus saonnari.

31Dung i didok Tuhan ma tu au, ‘Ligi da, Raja Sihon dohot luatna i, umpe margeldok Hubaen di jolomu; antong buat jana ingani ma tanona i.’ 32Jadi ro ma si Sihon dohot sude parangannia laho mamorangi hita di lambung ni kota Jahas, 33hape dipasahat Tuhan Debatanta i do ia tu hita, gabe tabunu ia dohot angka dakdanaknia maradu sude tentarania i. 34Laing di hatiha i tarampas jana taroncohon ganop kota, jana tabunu pangisina i sudena, halaklahi, dadaboru dohot angka dakdanak. Nada adong na tapadiar mangolu. 35Tapambuati pahan-pahanan ni halahi jana tarampasi angka kota ni halahi. 36Dipadiar Tuhan Debata do hita mangarampas kota i sudena, mamungka sian Aroer, di topi ni Batang aek Arnon, dohot kota na di tonga ni rura i, di sude dalan na tu Gilead. Nada adong kota na matogutu tembokna di hita. 37Tapi nada kehe hita tu luat ni halak Amon, sanga tu topi ni Batang aek Jabok, sanga tu angka kota na di luat partoran, sanga tu inganan na asing, sanga na dia pe na nirarang ni Tuhan Debatanta.”

Currently Selected:

PANGARATAION 2: LAIAKB

Highlight

Copy

Compare