AMOS 2

Moab

1Songon on ma didok Tuhan, “Hara ni na dung mardosa halak Moab marhite tolu hajahatan, lopus tu opat hajahatan, nada tarikonKu be haputusanKi, angke madung ditutungi halahi holi-holi ni Raja Edom gabe hapur. 2Hara ni i tongosonKu ma api tu tano Moab jana surbuonna sude angka benteng ni Keriot lopus abis. Marmatean ma halak Moab di tonga-tonga ni hagaoron ni porang, di na mangkuling sarune jana taran disurakkon tanda ni parporangan. 3PangabisonKu ma angka parkuaso sian tonga-tonga ni halahi jana bunuonKu ma ia rap dohot angka pamimpin ni luat i,” ninna Tuhan.

Juda

4Songon on ma didok Tuhan, “Hara ni na dung mardosa halak Juda marhite tolu hajahatan lopus tu opat hajahatan, nada tarikonKu be haputusanKi. Dilaosi halahi do angka parenta ni Tuhan, jana nada dimomosi halahi haputusanNia. Lilu do halahi dibaen angka debata na nisomba ni angka ompu ni halahi. 5Hara ni i, tongosonKu ma api tu Juda jana surbuonna ma lopus abis angka benteng ni Jerusalem.”

Uhuman ni Debata tu Israel

6Songon on ma didok Tuhan, “Hara ni na dung mardosa halak Israel marhite tolu hajahatan lopus tu opat hajahatan nada tarikonKu be haputusanKi, angke digadis halahi do angka halak na tigor hara ni hepeng jana halak na pogos hara ni sapasang solop. 7Didege-dege halahi do halak na gale na so margogo, jana dipabali halahi do jolma na pogos. Ama-ama dohot anakna rap mandongani modom sada na poso dadaboru, gabe hodar goarKu na badia i patunda ni i. 8Di sude inganan paribadatan, marmodoman jolma disi mamake baju na nibuat ni halahi gabe jaminan ni utang ni halak na pogos. Di Bagas Ni Debata, diinum halahi do anggur na nibuat ni halahi sian halak na marutang tu halahi.

9Haru songon i pe ale bangsongKu, hara ni hamu do umbaen na Huabisi halak Amori na ginjang-ginjang i songon bona ni tusam dohot na gogo-gogo i songon bona ni sampinur. 10Huoban do hamu haruar sian Mesir, jana Hutogu mamolus padang parhorsihan opat pulu taon honokna. Hulehen do di ho tano ni halak Amori gabe tanomu sandiri. 11Hupili do sian angka dakdanakmu gabe panurirang, dohot angka doli-dolimu gabe halak nasir.#2:11 NASIR: Halak Israel na mangalehen dirina mangoloi Debata jana marhaul na so minum anggur, sanga siinumon na koras, nada manggusting obuk jana nada dais tu bangke. (Ligi Bil. 6:1-8) Nada he tutu songon i, ale halak Israel? Au Tuhan mandok songon i.

12Hape dibaen hamu do halak nasir minum anggur, jana dilarang hamu angka panurirang palaluhon tonangKu. 13Saonnari odotkononKu ma hamu lopus damos tu tano, lopus mangangguk hamu songon kareta na sorat maroban gandum. 14Na hipas marlojong pe nada tarbaen luncat; mago ma hagogoon ni halak na gogo, jana halak na barani pe nada tarbaen paluahon dirina. 15Na malo manyior pe nada manahan, na hipas marlojong pe nada tarbaensa paluahon dirina, jana na mangalombut kudo pe nada malua. 16Anggo di ari i salang parajurit na umpuluk pe tadingkonna do sinjatana, kehe marlojong. Au, Tuhan mandok songon i.”

Currently Selected:

AMOS 2: LAIAKB

Highlight

Copy

Compare