2 SAMUEL 10

Ditaluhon si Daud halak Amon dohot halak Siria

(1 Juj. 19:1-19)

1Nada sadia honok, jumolo ma Raja Nahas na sian Amon jana si Hanun anakna i ma gabe raja. 2Dung i didok Raja Daud ma, “Giotku mardongan do dohot si Hanun laing songon tu amangnia i si Nahas, na mardongan dohot au.” Jadi disuru si Daud ma utusan tu Luat Amon jana dipalalu halahi ma tona paboa na dohot ia mararsak ni roha.

3Tapi didok angka parpangkat na di Luat Amon i ma tu si Hanun, “Na diambang roha ni raja i dehe lakna na laho pasangapkon amanta umbaen na ditongos si Daud tonana dohot mararsak ni roha i. Nada! Na giot mamata-matai kota on do disuru ia angka jolma i tuson, anso tartaluhon ia kota on muse.”

4Jadi gabe ditangkup si Hanun ma suruan ni si Daud i; dicukur ia ma janggutna i sabariba, digotap ia pakeanna i mamungka sian panggulna i, dung i baru ma disuru ia halahi kehe. 5Tapi ila ma roha ni halahi mulak tu tano ni halahi. Dung dipaboa na masa i tu si Daud, ditonahon ia ma anso dipainte angka utusannia i di jolo ni Jeriko lopus tubu mangulahi janggut ni halahi i.

6Torang ma diboto halak Amon na dung gabe musu ni halahi si Daud. Jadi diongkos halahi ma dua pulu ribu tentara ni Siria na adong di Bet-Rehob dohot si Zoba songon i muse dua bolas ribu tentara na sian Tob, dohot raja ni tano Maaka rap dohot saribu halak paranganna. 7Dung tarbege songon i tu si Daud, disuru ia ma si Joab dohot sasude tentarania kehe mangalo halahi. 8Marbaris ma halak Amon laho ruar jana diatur halahi ma barisanna di jolo ni pintu horbangan ni Raba, kota sabungan ni halahi jana angka na asing i, i ma halak Siria bope halak Tob dohot Maaka, maratur ma marbaris di padang na talak i.

9Dung diida si Joab na tarhapit do hape ia dibaen parangan ni musu na di jolo dohot na di pudinia i, dipili ia ma angka parajurit na dumenggan di Israel, lalu diatur ia ma halahi maradopan dohot tentara ni Siria i. 10Tentara na deba nari i dipasahat ia ma tu si Abisai angginia i, jana diatur si Abisai ma barisan ni halahi maradopan dohot tentara ni Amon. 11Didok si Joab ma tu angginia i, “Muda nada tolap au be mangadopi tentara ni Siria i, ompoti ma mangurupi au; muda nada lobas ho be mangadopi tentara ni Amon i, huurupi pe ho. 12Papir ma rohamu! Dison ma tapatuduhon habaranion manghopkop bangsonta dohot manghopkop angka kota ni Debatanta. Sai dipatulus Tuhan ma sanga aha giot ni rohaNia.”

13Dung i kehe ma si Joab dohot parangannia i mangaroro, jana maporus ma tentara ni Siria i. 14Di na niida ni halak Amon na dung maporus tentara ni Siria i, halahi pe maporus noma sian si Abisai lalu mundur tu bagasan kota i. Dung sidung diporangi si Joab halak Amon i, mulak ma ia tu Jerusalem.

15Diida halak Siria ma na dung talu halahi dibaen halak Israel, jadi gabe dipiohon halahi ma sandok tentarana anso marlagut mangulahi. 16Dung i disuru pio Raja Hadadeser ma halak Siria na adong di Habincaran ni Batang aek Efrat. Jadi ro ma halahi tu Helam na niuluhon ni si Sobah, i ma panglima ni tentara ni si Hadadeser sian Zoba. 17Umbege na masa i, manigor dipalagut si Daud ma sude tentara ni Israel, lalu ditaripari halahi ma Batang aek Jordan, dung i maju torus tu Helam. Disi ma diatur halak Siria barisanna lalu maju ma halahi mangalo si Daud. 18Tapi ditaluhon halak Israel ma tentara ni Siria i. Dibunu si Daud dohot anak buania ma pitu ratus parkareta porang, dohot opat pulu ribu tentara parkudo; asing ni i, banga do bugang ni si Sobah panglima ni tentara ni musu i lopus mate di galanggang ni parporangan i. 19Dung diida angka raja na nikuasoan ni si Hadadeser na dung talu halahi, mangido mardame ma halahi jana tunduk tu halak Israel. Mamungka sian i nada puluk be halak Siria mangurupi halak Amon.

Currently Selected:

2 SAMUEL 10: LAIAKB

Highlight

Copy

Compare