1 SAMUEL 8

Mangido sada raja rayat i

1Dung matobang si Samuel, diangkat ia ma angka dakdanaknia gabe hakim di Israel. 2Anaknia siangkaan margoar si Joel, jana na paduahon si Abia. Halahi ma gabe hakim di Berseba. 3Tapi nada diihutkon halahi pangalaho ni amang ni halahi, hum hauntungan tu dirina sajo do na dipikirkon ni halahi. Manjagit hepeng sogok do halahi jana nada tigor dibaen halahi mamutuskon angka parkaro.

4Jadi gabe marlagut ma sude pamimpin ni Israel, lalu kehe mandapotkon si Samuel di Rama, 5jana didok halahi ma tusia, “Tangihon ma amang, ma matobang ho jana angka dakdanakmu nada diihutkon halahi pangalahomu. Jadi dumenggan ma angkat sada halak raja anso adong rajanami songon angka bangso na asing i.” 6Tapi nada tumbuk di roha ni si Samuel pangidoan ni halahi i. Gabe martangiang ma ia tu Tuhan, 7jana didok Tuhan ma, “Oloi ma sude pangidoan ni bangso i tu ho. Angke nada ho na nitulak ni halahi, tapi Au do. Nada dihagioti halahi be marrajahon Au. 8Mamungka sian na Huoban halahi sian Mesir sai na marbalik do halahi sian Au jana marsomba tu angka debata na asing, jana na nibaen ni halahi saonnari tu ho, i ma na nibaen ni halahi tu Au. 9Jadi hara ni i, oloi ma na nipangido ni halahi i; tapi tangkas sajo paingot halahi jana patorang sanga na songon dia sanoli on na giot baenon ni raja tu halahi.”

10Sude na nidok ni Tuhan i dipalalu si Samuel do tu angka halak na mangidohon anso adong sada rajana, ning ia ma, 11“Songon on ma baenon ni rajamunu i tu hamu,” songon i ma dipatorang si Samuel, “Paksaonna ma angka dakdanakmunu masuk tentara; deba ma i gabe parangan na markareta, deba gabe parangan na markudo, jana na asing i gabe parangan na mardalan pat. 12Deba ma i angkatonna gabe pamimpin tu saribu halak, jana na asing i tu lima pulu halak. Paksaon ni raja ma angka dakdanakmunu mamangkur ladangna, palagutkon suhana, mambaen angka sinjatana dohot parkokas ni karetana. 13Angka borumunu suruonna ma i mambaen miak na huskus disia dohot markarejo gabe pardahanna dohot pature rotina. 14Buatonna ma ladangmunu, kobun anggurmunu dohot kobun zetunmunu na dumenggan jana parlehenanna ma i tu angka pagawena. 15Baenonna ma pajak ni ladang dohot kobun anggurmunu saparsampulu sian suhana, jana lehenonna ma i tu angka parpangkat dohot tu angka pagawena. 16Buatonna ma hatobanmunu, pahan-pahananmunu na dumenggan dohot halodemunu pakeon di karejona. 17Saparsampulu sian hambengmunu dohot biri-birimunu buatonnia ma i. Jana hamu sandiri gabe hatobanna. 18Jadi muda ro hatihana i, humolos-holos ma hamu hara ni raja na nipilimunu i, hape nada tangihonon ni Tuhan be holosmunu i.”

19Tapi nada ditangihon bangso i hata ni si Samuel i, mur didok halahi noma, “Padiar ma! Sanga na bia pe por do rohanami marraja. 20Por rohanami sarupa dohot angka bangso na asing i, angkon rajanami do mamarenta hami dohot mamimpin hami di parporangan.” 21Dung dibege si Samuel sude hata ni halahi i, dipalalu ia ma i tu Tuhan. 22Dialusi Tuhan ma, “Ihutkon sajo ma na nidok ni halahi i jana angkat ma sada halak raja di halahi.” Dung i disuru si Samuel ma marmulahan angka halak Israel i tu bagasna be.

Currently Selected:

1 SAMUEL 8: LAIAKB

Highlight

Copy

Compare