1 SAMUEL 29
29
Si Daud ditulak halak Pilistin
1Dipalagut halak Pilistin ma sude tentarana di Afek, jana halak Israel marbandar di lambung ni mual na di Rura Jisreel. 2Maju ma raja ni Pilistin na lima i marbaris rap dohot punguan na marsasaratus dohot marsasaribu halak; si Daud dohot parangannia i marbaris ma di pudi rap dohot Raja Akhis. 3Jadi di na niida ni angka panglima halahi, sapa-sapa ma angka panglima i, “Na mahua do angka halak Ibrani i dison?”
Dialusi si Akhis ma, “Si Daud do on, pagawe ni Raja Saul humani sian Israel. Madung tar lolot ia tinggal rap dohot au. Mamungka sian na ro ia tu au lopus tu sadari on, nada adong dapot au dope hasalaannia.”
4Tapi muruk ma angka panglima ni Pilistin i tu si Akhis jana didok ma tusia, “Suru ma halahi mulak tu kota na nilehenmi di halahi. Nada tola ia marporang rap dohot hita; nada sai binoto marbalik ia mangalo hita di tonga-tonga ni parporangan i. Nada he hatiha hadenggananna on disia anso mardame mangulahi marhite na mamunu paranganta? 5Nada he si Daud do i, disia ma angka dadaboru na manortori jana na marendei,
‘Madung dibunu si Saul marribu-ribu musu,
tapi anggo si Daud marpulu-pulu ribu.’ ”
6Dung i dipio si Akhis ma si Daud jana didok ia ma, “Huoku do mangasahon Tuhan na mangolu i, anggo ho burju do tu au. Jop sajo do rohangku sugari tarbaen ho dohot mandongani au di parporangan on. Angke mamungka sian mulana na ro ho mandapotkon ahu lopus tu sadarion, nada adong dapot ahu dope hasalaanmu. Tapi anggo angka pamimpin na asing i nada por roha ni halahi tu ho. 7Antong mulak ma ho di bagasan dame, jana ulang baen sanga aha na mangalap-alapi rimas ni halahi.”
8Dialusi si Daud ma, “Aha dehe hasalaan na hubaen, tuannami? Muda songon na nidok ni tuan i do, na so adong dapot tuan i hasalaan di au mamungka huoloi tuan i lopus tu hatiha on, biasi nada dipatola au marporang mangalo musu ni raja i lakna?”
9Dialusi si Akhis ma, “Diboto ho do, na huetong do ho burju songon surusuruan ni Debata. Tapi madung diputuskon angka raja-raja na asing i do na so tola ho kehe marporang rap dohot hami. 10Jadi hara ni i, Daud, ancogot, hamu sude na dung manadingkon si Saul jana ro mandapotkon au, angkon sogot ma hamu ngot jana manigor kehe ma disi bincar mataniari.”
11Jadi hara ni i, sogot dope ancogotna i, kehe ma si Daud dohot parangannia i mulak tu Luat Pilistin tapi anggo parangan ni Pilistin i kehe ma tu Jisreel.
Currently Selected:
1 SAMUEL 29: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
