1 SAMUEL 25

Marujung ngolu ni si Samuel

1Nada sadia honok nari marujung mangolu ni si Samuel. Marlagut ma sude Israel jana tumatangis. Dung i dikuburkon ma ia di bagasnia di Rama.

Si Daud dohot si Abigail

Dung i kehe ma si Daud tu Parhorsihan Paran. 2Di hatiha i adong do sada bayo di Maon, nampuna usaho di lambung kota Karmel. Na kayo do ia jana adong do tolu ribu biri-birinia dohot hambengnia saribu. Sanoli manggusting imbulu ni biri-birina do ibana di Karmel. 3Goarnia i ma si Nabal – si Abigail do goar ni dadaborunia. Na malo do si Abigail boti jeges. Hape anggo si Nabal, kasar do tabiatnia, jana jatjat do pangalahona. Sian horong ni si Kaleb do ibana. 4Di na tarbege i tu si Daud na di parhorsihan i, 5disuruhon ia ma sampulu halak doli-doli kehe tu Karmel, mandapotkon si Nabal laho palaluhon tabe ni si Daud tusia. 6Disuru ia ma halahi mandok songon on tu si Nabal, “Horas ma di ho, di dongan sabagasmu dohot di sude sinadonganmu. 7Hubege baritana, topet do ho manggusting imbulu ni biri-birimu. Jadi nada unjung hami hahua angka parmahanmu na adong di luat on jana na so jungada dope agoan bagi aha halahi salolot di Karmel. 8Sapai ma antong tu halahi, pasti parhatutuon ni halahi songon i. Antong, hara ni i, denggan ma jagit angka paranganku di bagasmu, dibaen di ari na godang on do hami ro. Laing lehen muse di angka naposomon dohot di au si Daud, sanga na aha ma na nionjar ni rohamu.”

9Songon i ma dipalalu parangan ni si Daud tona i tu si Nabal marhite goar ni si Daud, dung i paintehon ma halahi. 10Tapi dialusi si Nabal ma, “Si Daud? Ise dehe i? Nada unjung dope hubege taringot tu bayo i! Di hatiha na parpudi on, bahat do hatoban na lari sian tuanna di luat on! 11Dia ma tola buaton rotingku dohot aek inumonku dohot juhut na huparade di angka panggustingku laho mangalehen i sudena tu halak na so torang asal usulna!”

12Jadi mulak ma parangan ni si Daud i mandapotkon si Daud paboahon tusia angka hata na nidok ni si Nabal i. 13“Alitkon hamu ma podangmunu!” ning si Daud mamarenta jana marsibaen ma songon i. Si Daud pe dialitkon ia ma podangnia jana kehe ma ia dohot halahi hira-hira opat ratus halak bahatna, tapi anggo na dua ratus nari tinggal ma manjago barang-barang.

14Di hatiha i na dung adong do sada hatoban na paboahon tu si Abigail dadaboru ni si Nabal i, songon on, “Ma dibege hamu dehe ulaning? Disuru si Daud do piga-piga halak suruannia sian parhorsihan palaluhon tabe tu tuanta, hape dipalayas tuan i halahi. 15Hape nian burju sajo do halahi tu hami. Nada jungada hami hona ganggu, jana na so unjung do agoan bagi aha hami di na rap hami di padang-padang i. 16Arian na borngin diondihon halahi do hami salolot marmahan hambeng dohot biri-biri i hami donok tu halahi. 17Antong ditimbang nyonya i ma pangalaho on, jana diputuskon hamu ma sanga aha na tarpatupa hamu. Angke ro ma halahi mamaloskon tu tuan i dohot tu sude pangisi ni bagasna. Songon i ma jogal ni roha ni tuan i, na so ra do manangihon sanga na ise pe!”

18Jadi manigor dibuat si Abigail ma dua ratus roti, dohot dua gunsi anggur, dilompa ma lima biri-biri, dibuat ma lima harung gandum na disaok, saratus kue kismis dohot dua ratus kue ara. Dipaboankon ma sudena i di ginjang ni halode. 19Dung i didok ia ma hatania tu angka pangoloinia i, “Mardalan ma hamu parjolo sian au; huihutkon pe hamu.” Tapi nada bagi aha didok ia anggo tu halaklahinia i.

20Dilombut si Abigail ma halodenia i, jana di na lalu ia di pangeldohan na di lambung ni dolok, marsuo ma ia dohot si Daud bope paranganna i na marbaris giot mandapotkon ia. 21Marpikir do si Daud di hatiha i, “Parcuma do antong au manjago sinadongan ni bayo i di halongonan i! Saotik pe so adong mago sian sinadongannia; hape saonnari dibaloskon ia ma na denggan na hubaen i dohot hajahatan! 22Sai dibunu Debata ma au muda so hubunu sude halaklahi na adong disi painte so bincar mataniari!”

23Dung diida si Abigail si Daud, manigor mijur ma ia sian halodenia i lalu manungkap 24di pat ni si Daud, jana mandok hata tusia, “Tuannami, tangihon ma jolo! Padiar ma au sandiri mananggung hasalaan i! 25Ulang dipikirkon tuan i si Nabal, jolma na so hasaya i! Jolma na bodo i – laing songon goarna i. Na so huida do angka utusan na nisuru ni tuan i. 26Madung diantahi Debata palalu hosom tuan i dohot mamunu angka musu ni tuan i. Jana saonnari ale tuan, husumpahon ma mangasahon Tuhan na mangolu i, sai songon bagian ni angka musu ni tuan i ma dohot bagian ni sude na sai giot mangagohon ngolu ni tuan i ma bagian ni si Nabal. 27Dijagit tuan i ma silua na huoban on di tuan i, jana dibagihon tuan i ma on, di parangan ni tuan i. 28Anju ma jolo hahurangankon. Angke tuan i dohot pomparan ni tuan i do baenon ni Tuhan gabe raja di Israel, angke na marporang di Tuhan do antong tuan i; jana nada tompuon ni hajahatan tuan i salolot mangolu. 29Sugari sura adong sada halak na mangaroro mangalo tuan i jana na mancubo mamunu tuan i, ingkon do jagohonon ni Tuhan Debata tuan i songon arta na nijagohon ni nampunasa. Tapi anggo musu ni tuan i ambungkonon ni Tuhan do dao-dao, songon batu na didanggurkon dohot ambalang. 30Muda dung dipatulus Tuhan i angka na denggan na dung nijanjihonNa i tu tuan i, jana muda dung dibaen ho gabe raja di Israel, 31ingoton ni tuan i ma di hatiha i, na so mamunu tuan i di na so adong dalanna sanga mangasahon gogo lopus nada porlu mararsak ni roha sanga manyosal. Jana muda dung mamasumasu Tuhan tu tuan i, ulang nian lupa tuan i di au.”

32Dung i didok si Daud ma tusia, “Nipuji ma Tuhan, Debata ni Israel na marsuru ho mandapotkon au di ari sadari on! 33Tarimakasi ma di Debata hara ni pikiranmu na torang mangambati au patuluskon pamunuon dohot na mangasahon gogo. 34Madung diantahi Tuhan au mambaen hajahatan maradopkon ho. Mangasahon Tuhan, Debata ni Israel na mangolu i, sugari nada manigor ro ho mandapotkon au, na pasti mate noma sude halak ni si Nabal di habibincar ni mataniari!” 35Dung i dijagit si Daud ma sanga aha na nioban ni si Abigail i disia, lalu didok ma tusia, “Mulak ma ho tu bagasmu jana ulang be gamang ho. Huoloi do pangidoanmi.”

36Dung mulak si Abigail mandapotkon si Nabal, hapengani masa do pesta godang di bagasnia i songon horja ni raja. Jadi dibaen na mabuk jana marmoga-moga do si Nabal, nada dipaboa dadaborunia i tusia sanga na aha lopus tu ancogotna i. 37Ancogotna i dung nada be mabuk si Nabal, dipaboa dadaborunia i ma taringot tu sude na masa i. Jadi taroktohon ma si Nabal jana gabe so noma jantungnia jana lumpuon ma pamatangnia. 38Hira-hira sampulu ari nari taroktohon muse ma si Nabal sian Tuhan gabe lopus mate.

39Dung tarbege tu si Daud na dung jumolo si Nabal, didok ia ma, “Nipuji ma Tuhan! Madung dibaloskon Ia habilean na nibaen ni si Nabal tu au, jana diantahi Ia naposona on mambaen hajahatan. Madung diuhum Tuhan si Nabal hara ni hajahatannia i.”

Dung i disuru si Daud ma suruannia tu si Abigail laho manyapaisa gabe dadaborunia. 40Jadi lalu ma suruannia i tu anakboru i di Karmel jana didok ma tusia, “Na nisuru ni si Daud do hami mandapotkon ho, harana, por do rohania manyapai hamu gabe daborunia.”

41Jadi jongjong ma si Abigail lalu manungkap mandok, “Naposo ni si Daud do au, rade do au mamasu pat ni angka naposonia.” 42Dung i manigor diompoti ia ma marhobas. Manaek ma ia tu halodenia, diihutkon lima halak dadaboru naposonia, kehe ma ia mangihutkon suruan ni si Daud i, jadi gabe dadaboru ni si Daud ma ia.

43Painte so i, na dung dibuat si Daud do si Ahinoam sian Jisreel gabe dadaborunia, jana saonnari dohot muse ma si Abigail gabe dadaborunia. 44Laing di hatiha i madung dilehen si Saul borunia si Mikal dadaboru ni si Daud i tu si Palti anak ni si Lais na sian kota Galim.

Currently Selected:

1 SAMUEL 25: LAIAKB

Highlight

Copy

Compare