1 SAMUEL 20

Si Jonatan mangurupi si Daud

1Dung i lari ma si Daud sian Nayot jana kehe ma ia mandapotkon si Jonatan lalu manyapai, “Aha dehe salangku? Hajahatan dia do na hubaen jana apala aha do dosangku tu amanta umbaen na giot bunuonna au?”

2Dialusi si Jonatan ma, “Ulang dokkon songon i! Nada bunuon ho. Sai dipaboa amanta do tu au sude sangkapnia, bope na porlu bope na so porlu. Jadi nada ra ia manabunihon na songon i tu au. Jadi, nada tutu sude na nidokkonmi!”

3Dialusi si Daud ma, “Diboto amanta do na holong rohamu tu au. Hara ni i do umbaen na so ra ia paboahon na songon i anggo tu ho anso ulang marsak ho. Sanga na bia pe, mangasahon Tuhan Na Mangolu i, tutu do na hudok on: Gincip noma hosangku!”

4Dung i didok si Jonatan ma, “Sanga aha na nidokmu baenonku, hubaen pe.”

5Dialusi si Daud ma, “Ancogot Pesta Bulan Na Imbaru, jana somalna angkon rap mangan do au dohot raja i. Antong muda diloas ho do, kehe ma au anggo songon i martabuni di halongonan lopus tu haduan andospotang. 6Muda disapai amanta biasi nada disi au, dokkon ma, na dung marpaboa hian au tu ho na manigor mulak au tu Betlehem, hara ni na mambaen haul siganop taon disi hami na sabagas sudena. 7Muda didok amanta, ‘Denggan,’ gabe malua ma au, tapi muda gabe muruk do ia, botoonmu ma disi na dung mambaen haputusan amanta laho mangago au. 8Na mangido tolong ma au tu ho, dibaen na dung mamudun janji do hita di adopan ni Tuhan. Tapi haru songon i pe muda na marsala do au antong, bunu ma au, tapi ulang ma pasahat au tu amanta.”

9Dialusi si Jonatan ma, “Ulang pola ganggu rohamu disi! Muda dung torang do huboto na dung putus roha ni amanta laho mangago ho, torang do i paboaonku tu ho.”

10Dung i disapai si Daud mangulahi, “Ise ma paboahon tu au sugari umpamana muruk amanta mangalusi ho?”

11“Beta ma rap kehe hita tu halongonan,” ning si Jonatan. Jadi rap kehe ma halahi tu halongonan. 12Dung i didok si Jonatan ma tu si Daud, “Tuhan Debata ni Israel ma na gabe saksinta! Ancogot manyogot sanga haduan laing tarsongon on ma hatihana, huusahahon pe laho mamboto isi ni roha ni amanta. Muda denggan do antong rohana tu ho, hutongos pe barita paboahon tu ho. 13Muda na giot agoonna do ho, hupaboa pe tu ho anso tarbaen ho antong paluahon dirimu. Sai dibunu Tuhan ma au muda nada hupatulus i. Sai didongani Tuhan ma ho laing songon pandonganina di amanta najolo! 14Jana muda laing mangolu au, togu ma tiop janjinta on di adopan ni Tuhan jana burju ma ho antong tu au; tapi muda dung soada au, 15patuduhon ma tanda na burju ho tu pomparanku salolot-lolotna. Jana muda dironcohon Tuhan sude musumu, 16ulang antong gabe magotap parjanjianta antara hita na dua. Muda jabat magotap, sai Tuhan ma manguhumi ho.”#20:16 PATUDUHON ... MA MANGUHUMI HO: Di Bibel hata Ibrani, hurang torang do ayat on. 17Jadi paduanolihon ma disuru si Jonatan marjanji si Daud anso manghaholongi ia, angke holong ni rohania tu si Daud dos do dohot tu dirinia sandiri.

18Dung i didok si Jonatan ma tusia, “Ancogot Pesta Bulan Baru. Tangkasma habotoan na so tarida ho disi, harana gabe kosong ma ingananmu hian di meja makan; 19mur ma haduan! Jadi, kehe ma ho tu partabunianmu na salpu i jana dibalik ni batu na martimbun na disi i ma ho. 20Ancogot sanga haduan husiorkon pe mar tolu anak ni pana tu sabola batu i, paula-ula songon na mamendang sitembahon. 21Dung i husuru ma hatobanki manjomput angka anak ni pana i, jana muda hudok tusia, ‘Tar tuson do pana i, buat ma,’ i ma tandana bahaso na aman do ho jana tola ruar. Husumpahon ma mangasahon Tuhan Na Mangolu i paboa na so adong mara aha pe tu ho. 22Tapi muda hudok tu hatobanki, ‘Hoi, tar tu sadu do pana i,’ i ma tandana na disuru Tuhan ho kehe, anggo songon i kehe ma ho. 23Sai dijagohon Tuhan ma anso nian rap maniop hita tongtong di janjinta on antara hita na dua!”

24Dung i martabuni ma si Daud di halongonan. Di Pesta Bulan Baru i, ro ma Raja Saul tu pesta parmanganan i. 25Songon somalna juguk di lambung dingding do raja i; dibuat si Jonatan ma inganannia di jolona i, si Abner di lambung ni raja i, tapi anggo inganan ni si Daud i laing kosong do. 26Tapi nada ditaringoti si Saul taringot tusi anggo di na sadari i, harana dipikir ia, “Aropku na adong do sanga na aha na masa tusia gabe nada ias ia.” 27Di ari na mangihut, i ma ari paduahon Bulan Baru, laing kosong dope inganan ni si Daud humani. Gabe marsapa ma si Saul tu si Jonatan, “Biasi nada ro natuari dohot sadari on si Daud tu pesta on?”

28Dialusi si Jonatan ma, “Marpaboa do ia tu au laho kehe tu Betlehem. 29Pandoknia, ‘Paloas au jolo kehe, harana mambaen pesta haul hami na sabagas di Betlehem, jana disuru angkang au ro. Jadi hara ni i, muda tumbuk do rohamu, padiar au jolo kehe anso marsuo dohot koum sisolkotku.’ I ma dalanna umbaen na so tarida ia ro di pesta parmanganon ni amang on.”

30Umbege i, manigor gilap ma dihilala si Saul tu si Jonatan jana didok ma tusia, “Anak gampang ho! Saonnari ma huboto hape na mamihak tu si Daud do ho jana dipaila ho dirimu sandiri dohot inangmu! 31Na so diboto ho dehe anggo salolot mangolu si Daud na so tarbaen ho gabe raja di luat on? Saonnari suruhon ma halak manjalahi dohot maroban ia tuson, harana angkon mate do ia!” 32Jadi dialusi si Jonatan ma, “Biasi angkon sai mate ia? Aha dosania?”

33Umbege i, didanggurkon si Saul ma tombaknia tu si Jonatan laho mamunusa. Jadi diboto si Jonatan ma torang na marsitutu amangnia i laho mamunu si Daud. 34Mardongan muruk na marpiar-piar ditadingkon si Jonatan ma meja parjamuan i jana nada mangan bagi aha ia di ari paduahon Pesta Bulan Baru i. Sun dokdok ni rohania pasari-sari si Daud na nipalayas ni si Saul amangnia i.

35Ancogotna i kehe ma si Jonatan tu halongonan laho marsuo dohot si Daud songon na nitahihon ni halahi hian. Dioban ia ma sada hatobanna dakdanak halaklahi, 36jana didok ia ma tu dakdanak i, “Tole, jomput ma angka pana na giot tembakkononku.” Dompak marlojong dope dakdanak i dipalua si Jonatan ma sada pana lewat dakdanak i. 37Dung lalu dakdanak i di hadabuan ni pana i, pio-pio ma si Jonatan tusia, “Hoi, tar tu sadu dope! 38Pahipas saotik, ulang ho lalap!” Dijomput dakdanak i ma pana i jana didapotkon ia tuannia i. 39Saotik pe nada diboto ia sanga na aha maksud ni hata ni si Jonatan i, hum si Jonatan do dohot si Daud na mangastui i. 40Dung i dilehen si Jonatan ma siornia i tu dakdanak i jana disuru ia ma mulak tu kota.

41Dung kehe dakdanak i, ruar ma si Daud sian balik ni batu na martimbun i, lalu manungkap ma ia tolu noli. Tangis ma ia, songon i muse dohot si Jonatan di na marsiummaan halahi. Gumodang dope arsak ni si Daud ulang pado si Jonatan. 42Dung i didok si Jonatan ma tu si Daud, “Sai didongani Debata ma ho. Jagohonon ni Tuhan do anso togu hita maniop janjinta na dua dohot pomparanta di adopan ni Debata.” Dung salpu i, kehe ma si Daud, jana si Jonatan pe mulak ma tu kota.

Currently Selected:

1 SAMUEL 20: LAIAKB

Highlight

Copy

Compare