1 SAMUEL 2

Tangiang ni si Hanna

1Dung i martangiang ma si Hanna, ning ia ma,

“Dipajop Tuhan do rohangku,

pambaenanNia do na pasonang tondingku.

Huincahi musungku; gabe martua ma au,

angke tutu do na dung diurupi Debata au.

2Nada adong na badia songon Tuhan,

nada adong na gogo songon Ia,

nada adong na songon Ia na bisa gabe parondingan.

3Antak ma hata-hatamu na rumar i,

paujung ma burasmu na teal i!

Angke Debata Na Sun Mamboto do Tuhan

na manguji sude pambaenan ni jolma.

4Madung maponggol sior ni parporang

tapi halak na gale mur marhagogoan.

5Halak na butongan hian najolo i

hara ni sipanganon na marlobi.

Saonnari gabe pangomo-omo

hum anso dapotan sipanganon sajo.

Halak na tangkuraparon najolo,

saonnari marsonang-sonang, tuk panganonna.

Dadaboru na so maruntungan, saonnari marhamogaan,

manubuhon pitu dakdanak!

Hape anggo ina sibahat anak,

ditadingkon, dipadiar marsak.

6 Tuhan do mamatehon

Ia muse do na pangoluhon.

Na paijurkon jolma tu tanoman

jana mangangkatsa sian i.

7Adong do halak na bile dibaen Ia,

adong muse na mora dibaen Ia.

Adong do halak na dipatorukNia

adong muse na dipatuginjangNia.

8Sian abuan diangkat Ia halak na so mararta

sian pardangolan halak na bile dipalua Ia.

Dibaen Ia halahi dongan ni angka na mora-mora,

jana dilehen muse juguhan na sangap.

Debata do nampuna ojahan ni portibi on

dipajongjong Ia di ginjangna tano on.

9Halak na tigor do na sai sonang

di bagasan pangaramotion ni Tuhan.

Tapi anggo na jahat sai na sarsar do i mago

di bagasan hagolapan na marimpot-impot.

Gogona sandiri so tarpangasahon,

so tarlehen gogo ni jolma hamonangan.

10Maronco angka musu ni Tuhan,

mabiar be; mangaronggur Ia sian langit an.

Na giot manguhumi ma Tuhan

tu sandok tano on.

Jana lehenonNia ma kuaso na marmulia

tu raja na nitodoNia.”

11Dung i mulak ma si Elkana tu Rama, tapi anggo si Samuel anaknia i, tinggal ma di Silo jana disi ma ia mangoloi Tuhan di bagasan pangajarion ni si Eli.

Pangalaho ni angka anak ni si Eli

12Na jahat situtu do angka anak ni si Eli. Nada diantureskon halahi Tuhan, 13jana songon malim, marroha-roha do halahi maradopkon bangso Israel. Muda adong halak na manghaulkon haul, ro ma pangurupi ni malim i maroban garpu sitolu mata. Dompak mangalompa juhut i, 14disusukkon ma garpu i tu bagasan hudon pangalompaan i, sanga aha na tartarik garpu i tu ruar, gabe nampuna ni malim i ma i. Songon i ma dibaen tu sude halak Israel na ro manghaulkon haul tu Silo. 15Huhul, dompak so dipaasing dope tabo-tabo situtungon i, ma pola ro pangurupi ni malim i mandok tu halak na manghaulkon haul i, “Lehen ma antong juhut na mata i di malim i anso adong panggangonnia; nada ra ia manjagit juhut na dibolgang.”

16Muda dialusi halak i, “Dumenggan ma da tapadalan paraturan, jana tatutung jolo tabo-tabo i; dung i buat ma sanga na dia por ni rohamu,” jadi gabe dokkonon ni pangurupi ni malim i do, “Nada, angkon saonnari do lehenonmu, muda nada, maradu gogo pe buatonku do.”

17Songon i ma anak ni si Eli na dua i mardosa godang di adopan ni Tuhan, hara ni na so adong be sangap ni halahi tu haul na nihaulkon tu Tuhan.

Si Samuel di Silo

18Anggo si Samuel anak ni si Hanna i, dipupu ia do mangoloi Tuhan. Mamake baju efod do ia na dibaen sian abit linen, songon baju parkobas ni angka malim. 19Ganop taon do dibaen inangnia baju juba na menek disia lalu dilehen ma i di si Samuel muda hatiha ro anak boru i rap dohot halaklahina manghaulkon haul siganop taon. 20Jadi dipasupasu si Eli ma si Elkana dohot dadaborunia i jana didok ia ma tu si Elkana, “Sai dilehen Tuhan ma anak muse di ho sian dadaborumon laho manggonti anak na dung nilehenmon tu Tuhan.”

Dung salpu i mulak ma halahi tu Rama.

21Dipasupasu Debata do si Hanna, gabe sorang ma muse tolu anaknia halaklahi dohot dua anak dadaboru. Si Samuel pe mur magodang ma di jolo ni Debata.

Si Eli dohot angka dakdanakna

22Madung matobang situtu si Eli. Sai torus do marpupu dibege ia barita taringot tu pangalaho ni dakdanaknia i maradopkon halak Israel. Diboto si Eli muse do na modom angka anaknia i dohot angka dadaboru na markobas di jolo ni pintu ni Bandar Parmianan Ni Tuhan i. 23Jadi hara ni i didok ia ma tu dakdanaknia i, “Madung hujagit barita sian sude bangso i taringot tu pangalahomunu na jahat. Biasi ma he dibaen hamu songon i? 24Ulang be baen hamu songon i, ale dakdanakku. Majatjattu do na hubege dihatahon bangso ni Tuhan i salaho tu hamu! 25Muda mardosa halak tu jolma, tarampini Debata do i; tapi muda mardosa tu Tuhan do halak, ise be tarbaen manolongsa?”

Tapi nada diantureskon halahi sipaingot ni si Eli, amang ni halahi i, madung diputuskon Tuhan do laho mamunu halahi.

26Tapi anggo si Samuel dakdanak i, mur magodang ma ia boti mur pajop roha ni Tuhan bope roha ni jolma sudena.

Hasurirangon taringot tu isi ni bagas ni si Eli

27Sanoli ro ma sahalak panurirang tu si Eli jana dilehen ma tona tusia sian Tuhan, “Dompak na gabe naposo ni raja ni Mesir ompungmu si Harun dohot isi ni bagasna, Hupatidahon do diringKu tusia. 28Sian sasude marga ni Israel Hupili do horong ni si Harun gabe malim di Au, laho mangkobasi di langgatan, manutung dupa, dohot mamake baju efod muda mangkobari dohot Au. Jana Hulehen do tu halahi hak laho mambuat deba sian haul parhaulan na ditutung di langgatan i. 29Antong, biasi dope laing maradu songkal ho mida angka haul na dihaulkon ni bangsongKi tu Au? Eli, biasi sumangap dibaen ho angka anakmi ulang pado Au, jana dipadiar ho pamokmok dirina halahi marhite bagian na dumenggan sian sandok na nihaulkon ni bangsongKu tu Au? 30Au Tuhan Debata ni Israel, na dung Hujanjihon do najolo, horongmu dohot margamu do na giot parkobas di Au gabe malim sapanjangna. Tapi saonnari Au mandok, nada Huhagioti be na songon i! Angka na pasangapkon Au do na giot pasangaponKu tapi anggo na palayas Au, palayasonKu do. 31Satutuna, na giot ro ma hatihana, bunuonKu ma sude doli-doli sian horongmu dohot margamu, lopus nada adong sahalak pe doli-doli sian horongmu marumur na ginjang. 32Marsak ma ho jana mangiburu mida sude pasupasu na giot lehenonKu tu angka halak na asing di Israel, hape anggo di bagasan horongmu sandiri mate poso ma sudena. 33Tapi sada sian pomparanmu giot paluaonKu jana oloannia ma Au, songon malim. Tapi gabe mapitung ma ho jana mangolu di bagasan pandelean. Sudena pomparanmu na asing i bunuonKu. 34Na gabe tanda paboa na tutu giot tarjadi na Hudokkon i, mate di sada ari ma anakmu na dua i si Hofni dohot si Pinehas. 35Dung i todoonKu ma malim na burju tu Au dohot na patuluskon sanga aha na Huparentahon tusia. Sai torus ma markarejo pomparannia songon malim di adopan ni angka raja na Hutodo. 36Ganop pomparanmu na mangolu, kehe ma tu malim i jana pangidoonna ma hepeng sanga panganon. Pangidoonna ma, ‘Paloas ma au mangurupi angka malim, anso laing mangan au bope hum sampohul pe.’ ”

Currently Selected:

1 SAMUEL 2: LAIAKB

Highlight

Copy

Compare