1 RAJA-RAJA 11

Ditadingkon si Salomo Debata

1Por ma roha ni si Salomo mida bahat dadaboru sian bangso na asing. Asing sian boru ni raja Mesir i, laing dibuat si Salomo do muse angka boru Het, boru Moab, boru Amon, boru Edom dohot boru Sidon. 2Hape madung ditonahon Tuhan na so tola anggo halak Israel marsibuatan dohot angka bangso na asing i, harana gabe dohot do halak Israel baenon ni i mangkaholongi angka debata na asing i. Hape, laing dipambuati si Salomo do angka boru na asing i. 3Adong do pitu ratus halak boru ni raja na nibuat ni si Salomo jana adong do tolu ratus halak radingnia. Angka boru na nibuatnia i ma mambaen si Salomo manadingkon Debata, 4jabat do tarela-ela ia dibaen pangelek-elek ni angka boru i marsomba tu angka debata na asing dung matobang ia. Anggo si Daud amang ni si Salomo, burju do mangoloi Tuhan, Debatana, hape anggo si Salomo nada songon amangna i. 5Disomba si Salomo do Astoret, dewi ni bangso Sidon, dohot muse Molok, debata na nihagigihon i na nisomba ni bangso Amon. 6Songon i ma pardosaon ni si Salomo maradopkon Tuhan. Anggo si Daud amang ni si Salomo, sian sandok rohana do mangihutkon Tuhan, hape anggo si Salomo nada songon i. 7Di ginjang ni dolok na di Habincaran ni Jerusalem i, dipajongjong ia do inganan parsombaan tu Kamos, debata ni Moab dohot tu Molok debata ni bangso Amon – na nihagigihon do debata na dua i. 8Laing dipajongjong si Salomo muse do angka inganan di boru na nibuatnia i sian bangso na asing baen panutungan ni hamonyan dohot parsombaan tu angka debata ni halahi mamelehon haul disi.

9-10Madung pola dua noli dipataridahon Tuhan diriNa tu si Salomo jana dipaboa tusia na so tola ia marsomba tu angka debata na asing i, hape nada dioloi si Salomo Tuhan i. Mur ditadingkon ia noma Tuhan, gabe hona muruk ia dibaen Tuhan. 11Didok Tuhan ma, “Hara ni na nisangajomu mangalaosi parjanjianmu na tu Au jana nada dioloi ho angka parentangKu, gabe rampasonKu ma sian ho harajaan i, jana lehenonKu ma tu sada halak pagawemu. 12Tapi haru songon i pe, hara ni amangmu si Daud, nada pola baenonKu i dompak di ngolumu. Dung anakmu pe mamarenta, anso patulusonKu i. 13Tapi nada sude harajaan i rampasonKu sian ia. Angke hara ni naposongKu si Daud, dohot hara ni Jerusalem na Hubaen gabe Hutangki, Hutadingkon ma samarga di anakmi.”

Angka musu ni si Salomo

14Jadi dibaen Tuhan ma si Hadad, i ma sahalak pomparan ni raja ni Edom marmusu tu si Salomo. 15-16Lolot dope taran so i, dung ditaluhon si Daud halak Edom, kehe ma si Joab panglima porang ni si Daud tu Edom laho manguburkon angka dongannia na mate. Onom bulan honokna tinggal ia di Edom rap dohot angka parangannia. Jadi di hatiha i, dibunu halahi ma sude halaklahi na disi, 17tapi anggo si Hadad na menek dope di hatiha i, kehe ma lari tu Mesir rap dohot piga-piga halak Edom, angka hatoban ni amangnia. 18Kehe ma halahi sian Midian, lalu ma tu Paran, jana disi ma marsuo halahi dohot halak na asing deba nari jadi udur ma halahi tu Mesir mandapotkon raja Mesir. Dilehen raja i ma tu si Hadad bagas dohot tano baen inganannia dohot haroroan ni ngolu-ngolunia. 19Jadi gabe ale-ale ni raja i ma si Hadad, jabat dilehen raja i parebanna sandiri, i ma anggi ni ratu Tahpenes di si Hadad gabe dongan sabagasna. 20Dung i ditubuhon dadaboru ni si Hadad i ma sada anak halaklahi na margoar si Genubat. Ratu i sandiri do pagodang-godangkon dakdanak i jana tinggal di bagas godang do i rap dohot angka dakdanak ni raja i.

21Jadi di na nijagit ni si Hadad barita na mandok na dung jumolo si Daud, jana si Joab panglima porang ni Israel i pe madung jumolo muse, didok si Hadad ma tu raja i, “Paloas ma mulak au tu tano hatubuanku.”

22“Biasi?” ning raja i manyapai. “Adong he na hurangan ho dison, umbaen na giot mulak ho tu tano hatubuanmu?”

“Nada nian,” ning si Hadad, mangalusi, “Tapi padiar ma songon i kehe au.” Jadi mulak ma ia tu tano hatubuannia.

23Laing dibaen Debata muse ma si Reson anak ni si Elada marmusu tu si Salomo. Hatoban na lari sian tuanna do si Reson, i ma Raja Hadadeser sian Zoba, 24jana gabe kapala ni garombolan ma ia. (Di hatiha na nitaluhon ni si Daud ma si Hadadeser, jana di na nibununia halak Siria angka dongan ni si Hadadeser, disi ma parlarinia.) Kehe ma si Reson dohot angka parangannia i tu Damaskus, disi ma ia maringanan. Laing disi ma diangkat angka parangannia i ia gabe raja Siria. 25Laing songon si Hadad, marmusu muse ma Raja ni Siria tu Israel di hatiha ngolu ni si Salomo jana manggaori halahi di luat i.

Janji ni Debata tu si Jerobeam

26Halak na asing na mangalo tu si Salomo, i ma sada halak pagawenia na margoar si Jerobeam. Anak ni si Nebat sian Zareda na di Efraim do ia. Madung mabalu anggo inangnia, na margoar si Zerus. 27Barita taringot tu si Jerobeam na mangalo noma na mangihut on.

Dompak manimbun tano na di Habincaran ni Jerusalem dohot na padenggan-denggankon angka tembok ni kota i, 28dohot do si Jerobeam markarejo disi. Di na niida ni si Salomo na lingkas bope na ringgas do si Jerobeam, dilehen ma disia tanggung jawab laho manjago karejo paksa na di luat ni Marga Manase dohot Efraim. 29Sanoli hatiha mardalan si Jerobeam laho ruar sian Jerusalem, ro ma Panurirang Ahia na sian Silo mandapotkon ia di tonga dalan di padang-padang i. Hum halahi na dua sajo do disi. 30Dibuka panurirang i ma baju juba na imbaru na nipakenia i, lalu disibak-sibak ia gabe dua bolas sibak. 31Dung i didok ia ma tu si Jerobeam, “Buat ma i di ho sampulu sibak. Angke didok Tuhan, Debata ni Israel do tu ho, ‘RampasonKu ma harajaan on sian si Salomo, jana sampulu marga lehenonKu tu ho. 32Samarga nari laing di si Salomo, hara ni naposongKu si Daud dohot hara ni Jerusalem, i ma kota na dung Hutodo sian sude kota ni Israel gabe kotangKu. 33Giot songon i ma baenonKu hara ni na nitadingkon ni si Salomo Au jana marsomba ia tu angka debata: I ma Astoret, debata boru-boru na sian Sidon; Kamos, debata ni Moab, dohot Milkom, debata ni Amon. Madung mardosa si Salomo jana dilaosi ia angka na Huparentahon. Anggo amangnia si Daud diihutkon do angka tona dohot parentangKu, hape anggo si Salomo, nada. 34Tapi haru songon i pe, nada sude harajaan i buatonKu sian ia; padiaronKu dope ia markuaso salolot ngolunia. Songon i ma baenonKu hara ni naposongKu si Daud na dung Hutodo i jana na mangihutkon angka uhumKu bope na mangoloi angka na Huparentahon. 35BuatonKu noma harajaan i sian anak ni si Salomo jana sampulu marga ma lehenonKu di ho. 36Tapi anggo samarga padiaronKu do disia, anso laing tongtong adong sahalak sian pomparan ni naposongKu si Daud na mamarenta di Au di Jerusalem, kota na Hutodo i baen inganan marsomba tu Au. 37Jana anggo ho Jerobeam, baenonKu ma ho raja ni Israel jana paloasonKu ma ho mamarenta sude luat sanga dia por ni rohamu. 38Muda laing songon naposongKu si Daud i do ho mangoloi tu Au sian sude rohamu jana ngolumu marguru tu angka uhumKu, jana pasonangonmu rohangKu markite-hite na patuluskon sandok na Huparentahon tu ho, sai na donganKu do ho sanga andigan. JaminonKu ma, pomparanmu do na gabe raja ni Israel manggontihon ho, laing songon na Hubaen tu si Daud. 39Hara ni na mardosa si Salomo, gabe uhumanKu noma pomparan ni si Daud tapi nada sapanjangna.’ ”

40Di na tarbege barita i tu si Salomo, diusahahon ia ma laho mamunu si Jerobeam, tapi kehe ma si Jerobeam tu Raja Sisak di Mesir, jana disi ma ia lopus mate si Salomo.

Hamamate ni si Salomo

(2 Juj. 9:29-31)

41Barita na asing taringot tu si Salomo, sude halobian ni karejo dohot parbinotoannia, madung disuratkon di Buku Parsorion Ni si Salomo. 42Maringanan di Jerusalem do ia gabe raja, opat pulu taon honokna diparenta ia sude Israel. 43Dung i marujung ma ngolunia jana dikuburkon ma ia di Kota Ni si Daud. Anaknia na margoar si Rehabeam ma gabe raja manggonti ia.

Currently Selected:

1 RAJA-RAJA 11: LAIAKB

Highlight

Copy

Compare