AYUB PEU INTAT HABA
PEU INTAT HABA
Kitab Nabi Ayub nyoe na kheueh kisah keuhai sidroe ureuëng nyang jroh budoe, gobnyan geurasa musibah nyang lumpah brat; gobnyan gadôh banmandum aneuëk-aneuëk dan hareuta beunda geuh, dan keunong teuma peunyakét kulét nyang cukob parah ngon luwat that sabab mubée lagée bée bangké. Lam lhée boh rangkaian tutoe nariet nyang meusajak, nyang tuléh geulukéh haba geuh pakriban rakan-rakan Nabi Ayub, dan Nabi Ayub keudroe geuteurimong bala nyang teuka nyan. Hai nyang peunteng lam hai meututoe haba nyan na kheueh nyang geusinggong cara Po teu Allah geupeu saneut ateueh manusia. Bak bagian keuneulheueh, Allah keudroe geupeugah droe Geuh ubak Nabi Ayub.
Rakan-rakan Nabi Ayub geucalitra keuhai peunyakét nyang geudeurita lé Nabi Ayub nyan meunurot ajaran agama nyang meutradisi. Nibak sangka awaknyan, Allah sabe geubila ureuëng nyang jroh dan geuhuköm ureuëng nyang jeuhet. Jadi, deurita Nabi Ayub nyan jeuet teuboh makna bahwa gobnyan ka le that desya. Teuma lé Nabi Ayub keudroe peundapat nyang lagée nyan geunilai lumpah that deue; hana sipantaih jih gobnyan meuteumé huköman nyang keujam nyan, sabab gobnyan sidroe ureuëng nyang paleng gét dan jujoe. Gobnyan hana hasa geupuphom pakon Po teu Allah geupeubiyeu ureuëng nyang lagée gobnyan harôh geurasa deurita beuncana nyang lumpah le, dan deungon beurani gobnyan geulawan Po teu Allah. Nabi Ayub hana gadôh peucaya nibak Po teu Allah, teuma gobnyan bit-bit meuheuet that keuneuk peubeutôi lé Allah dan mangat meuteumé lom keuhoreumatan gobnyan sibagoe ureuëng nyang jroh.
Allah hana geujaweueb ateueh peue nyang ka geutanyong lé Nabi Ayub, teuma Allah geudeungoe keupeucayaan Nabi Ayub deungon cara geubri cuntoh-cuntoh keuhai kuasa dan hikeumat Gobnyan. Cuntoh-cuntoh nyan geulukéh deungon sanjak atawa puisi. Óh lheuehnyan deungon sigala keureundahan até, Nabi Ayub geuaku keubijaksanaan dan keu agongan Po teu Allah, dan gobnyan meunyeusai keu tutoe haba geuh nyang kreueh dan peunoh deungon beungéh.
Bagian nyang paleng akhé nibak kisah nyoe, nyang teutuléh deungon basa biasa, disinan na teutuléh pakriban Nabi Ayub nyan teupeuriwang ubak keuadaan gobnyan lagée awai, deungon keukayaan nyang jiôh leubeh le nibak keukayaan gobnyan sigohlom nyan. Allah geubeungéh keu rakan-rakan Nabi Ayub sabab awaknyan hana muphom makna deurita nyang geurasa lé Nabi Ayub nyan. Teuma Nabi Ayub kheueh nyang bit-bit sada bahwa Allah leubeh rayeuk nibak nyang ka teupeurunoe lam agama nyang tradisi nyan.
Asoe jih
Haba phon 1:1–2:13
Nabi Ayub dan rakan-rakan gobnyan 3:1–31:40
a. Nabi Ayub apoh apah 3:1-26
b. Peugah haba nyang keuphon 4:1–14:22
c. Peugah haba nyang keudua 15:1–21:34
d. Peugah haba nyang keu lhée 22:1–27:23
e. Teupujoe keu hikeumat 28:1-28
f. Nariet Nabi Ayub nyang keuneulheuh 29:1–31:40
Wejangan Elihu 32:1–37:24
Tuhan geujaweueb Nabi Ayub 38:1–42:6
Peunutôb 42:7-17
Currently Selected:
AYUB PEU INTAT HABA: LAIACE
Highlight
Share
Copy
Want to have your highlights saved across all your devices? Sign up or sign in
Old and New Testament in Today's Aceh Language @ LAI, 1997.