AYUB 38
38
Jaweueb Tuhan ubak Nabi Ayub
1Óh lheueh nyan rot lam angén badée Tuhan meututoe ubak Nabi Ayub, lagée nyoe kheun Gobnyan:
2“Soe gata nyan, sampoe gata jeuet ragu ubak hikeumat Ulôn
deungon haba gata nyang bangai dan soh nyan?
3Jinoe, lawan kheueh Ulôn sibagoe ureuëng agam,
dan jaweueb kheueh peue-peue nyang Ulôn tanyong nyoe.
4Peu kheueh gata ka lahé watée bumoe Ulôn peujeuet?
Dan meunyoe gata biet-biet lhok peungeutahuan gata peugah laju!
5Soe kheueh nyang peuteuntée luwah donya nyoe?
Soe kheueh nyang ulue talo sineupat ubak gobnyan?
Peu kheueh gata teupeue jaweueb jih?
6Pakriban kheueh taméh-taméh#taméh-taméh: Kalon 9:6. ngon tumpang bumoe teudong cot?
Soe nyang peuduek batée peunjuru donya deungon kukôh,
7bak watée bintang-bintang beungoh meunyanyoe meusajan
dan makhlok-makhlok syeuruga#makhlok-makhlok syeuruga: Kalon 1:6. meusurak-surak geumbira.
8 #
Yer. 5:22
Soe kheueh nyang tôb babah pintoe keu teuhampeueng laôt raya#teuhampeueng laôt raya: Kalon 26:12.
watée lam pruet bumoe jiteubiet meubok-bok ié jih?
9Ulôn kheueh nyang peupayông laôt ngon awan
dan nyang bungkôh nyan deungon seupôt buta.
10Ulôn nyang peuteuntée bataih keue laôt raya
dan deungon pintoe teupalang Ulôn hampeueng nyan.
11Kheun Ulôn ubak jihnyan, ‘Nyoe kheueh bataih jih, bék gata liengkeue!
Disinoe kheueh umbak-umbak gata nyang teuga harôh jipiôh.’
12Hei Nabi Ayub, peu kheueh ka lheueh gata bahpi meusigoe,
gata yuejak teungoh malam?
13Peu kheueh na gata yue mata uroe beungoh jimat bumoe
dan gata kipaih ureuëng jeuhet
nibak teumpat jih musöm?
14Trang uroe teupeuleumah gunong dan pantôn
lagée cab nibak tanoh kliet dan lipat nibak saboh jubah.
15Trang uroe lumpah that peungeuh nibak ureuëng hana meutuhan,
dan teupeuteun awaknyan bék jipeubuet nyang jeuhet lom.
16Peu kheueh ka lheueh gata tron ubak asai ié laôt, jiôh lam tuwie jih?
Peu kheueh ka lheueh gata jak-jak bak aleue laôt raya?
17Peu kheueh ka lheueh lé gob jitunyok ubak gata pintoe geureubang
dikeue álam mawöt nyang seupôt buta?
18Peu kheueh hase gata duga padubna luwaih donya nyoe?
Jaweueb kheueh meunyoe gata tateupeue.
19Peu kheueh gata teupeue rot pat teuka trang,
dan dipat nyang sibeuna jih punca seupôt?
20Peu kheueh hase gata peuteuntée bataih seupôt ngon trang?
Atawa teuyue awaknyan jiwoe óh ka lheueh jiteuka?
21Teuntée gata hase, sabab gata ka tuha,
dan watée donya teucebta, gata kana!
22Peu kheueh ka lheueh gata saweue gudang-gudang Lôn
teumpat salju dan ujeuen batée,
23nyang Ulôn keubah keu watée teuka sosah,
keu watée muprang dan uroe-uroe teungoh muprang?
24Peu kheueh gata teupeue dipat teumpat mata uroe tinggai?
Atawa rot pat asai angén timu na?
25Soe kheueh nyang kueh luéng keu teumpat ié ujeuen raya
dan nyang bri rot ueh keu gogo dan kilat?
26Soe kheueh nyang peutron ujeuen lam padang beulantara,
dan u ateueh tanoh nyang hana jikeumiet lé manusia?
27Soe kheueh nyang sibu ngon ié ateueh bumoe nyang tho kreng dan meurana
sampoe naleueng meutuneh mandum?
28Peu kheueh ujeuen na ayah droe?
Soe ayah nibak titek-titek iémbon?
29Peu kheueh ié éeh na ma jih?
Soe nyang peulahé iémbon beuku?
30Soe nyang ubah ié jeuet keu batée,
dan nyang peujeuet ié laôt keu kaku?
31 #
Ayb. 9:9; Am. 5:8 Peu kheueh hase ikat bintang Kartika gata beureukah?
Atawa ranté bintang Belantik gata peuglah?
32Peu kheueh hase gata bimbeng bintang-bintang tieb-tieb musém jih,
dan bintang Peurahô rayeuk ngon ubit, gata peuteuntée rot jih?
33Peu kheueh gata teupeue huköm-huköm di cakrawala?
Dan peu kheueh hase gata teurab nyan lam donya?
34Peu kheueh hase gata klik sira gata peurintah ubak awan,
dan gata yue awan nyan jipeubulut gata ngon ié ujeuen?
35Dan meunyoe gata yue geulanteue-geulanteue seumama keudeh keunoe,
peu kheueh jihnyan teuka ubak gata sira jipeugah, “Ulôn, Amphon!”?
36Bak soe jiteupeue lé cicém ibis#ibis: Cicém di nanggroe Meusé kuno. Meunurot keupeucayaan kuno, cicém nyan hase jiramai watée Krueng Nil jiek ié beuna. pajan Krueng Nil meugeunang?
Soe nyang britée manok agam bahwa ujeuen teuma jiteuka?
37Soe kheueh nyang seb áreh keu ji-itong awan
dan jibalek sampoe jitron ujeuen,
38ujeuen nyang peukreueh abée sampoe jeuet meugeucai
dan tanoh jeuet meuleukek-leukek teuma?
39Peu kheueh hase gata peucrok beulatang laén keu uempeun singa-singa
dan teupeutroe pruet aneuëk-aneuëk jih,
40meunyoe awaknyan jimusöm lam guha
atawa jibatom lam uempeueng jih?
41Soe nyang tulông cicém gagak nyang deuk
dan jijak keudeh keunoe jimita peunajoh
soe kheueh teuma nyang tulông
meunyoe aneuëk-aneuëk jih jirawôk Ulôn jilakée uempeuen.
Currently Selected:
AYUB 38: LAIACE
Highlight
Share
Copy
Want to have your highlights saved across all your devices? Sign up or sign in
Old and New Testament in Today's Aceh Language @ LAI, 1997.
