KEUJADIAN 49
49
Tutoe haba Nabi Yakub nyang keuneulheueh
1Óh lheuehnyan Nabi Yakub laju geutawök banmandum aneuëk-aneuëk geuh watée awaknyan ka meusapat keunan laju geupeugah lagée nyoe, “Meusapat kheueh gata mandum disinoe, bak binéh ulôn. Jinoe ulôn peugah ubak gata peue nyang teuma gata rasa bak saboh watée singoh:
2Meusapat kheueh hei aneuëk-aneuëk Nabi Yakub,
deungoe kheueh Israel, ayah gata.
3Ruben aneuëk lôn nyang tuha,
gata kheueh teunaga ulôn,
boh keuphon nyang peujeuet ulôn peukasa.
Gata nyang gagah dan nyang teuga
lamkawan mandum aneuëk ulôn.
4Gata bagaih meuguncang saban lagée ié,
sampoe bukon nyang paleng phon;
sabab gata éh ngon gundek ulôn,
gata peukuto teumpat éh ayah gata.
5Simeon dan Lewi nyang meusyedara;
sinjata awaknyan alat keukerasan.
6Ulôn hana rôh sajan bak buet meurok pakat awaknyan,
meunan cit hana rôh sajan lamkawan awaknyan.
Sabab awaknyan jiseumeupoh maté lam watée beungéh,
jipeuhanco kuta deumi keumangat droe.
7Teukutok kheueh ubak beungéh awaknyan,
kareuna dahsyat jih.
Teukutok kheueh ubak keujam awaknyan,
sabab keujam jih nyang luwa biasa.
Ulôn teuma lôn peu crebre awaknyan
bansaboh nanggroe Israel.
Ulôn teuma lôn peuhambo awaknyan
lamkawan meubagoe bansa.
8Yehuda, gata teuma tateugom takue musoh gata;
bubena syedara gata teuma jipujoe gata
dan jisujut dikeue gata.
9 #
Teu. 24:9; Why. 5:5 Yehuda lagée singa muda;
jihnyan jipoh maté musoh jih, laju jiwoe lam eumpueng jih;
jihnyan teubot laju teuéh,
dan hana meusidroe pi nyang jijeuet peukaru jihnyan.
10Yehuda teuma geumat tungkat keurajeuen,
keuturonan gobnyan geumat peurintah siumu masa.
Bansa-bansa jibayeue upeti,#Bansa-bansa … upeti, keumungkenan that nyan makna jih.
dan sujut ngon taklok dikeue gobnyan.
11Aneuëk keuleudée gobnyan ji-ikat nibak kayée,
bak anggô nyang paleng gét.
Gobnyan geurhah peukayan gobnyan ngon anggô,
anggô mirah lagée darah.
12Mirah mata geuh sabab geujieb ié anggô,
putéh gigoe geuh sabab geujieb ié susu.#Mirah … susu; atawa matajih leubeh mirah nibak anggô; gigoe jih leubeh putéh nibak susu.
13Zebulon teuma tinggai bak binéh laôt;
kapai-kapai laju meusaôh bak panté geuhnyan;
trok u Sidon bataih wilayah geuhnyan.
14Isakhar nyan na lagée keuleudée teuga
nyang teu-éh lamkawan raga barang jih.
15Jikalon padubna gét jih teumpat nyan
dan padub na ceudah jih nanggroe nyan,
dan jitukui kheueh jihnyan dan rila droe jih teupeudieng beuban,
dan jipaksa mubuet sibagoe namiet.
16Gata Dan, teuma gata peusidang bansa gata,
gata jeuet keusukée saban lagée sukée laén di Israel.
17Gata lagée uleue bakbinéh rot ueh,
uleue beubisa bak binéh jurong,
nyang jikab bak tumet guda
sampoe teugeutieb ureuëng ateueh guda nyan.
18Ya Tuhan, seulamat nyang Droeneueh bri nyan,
nyan kheueh nyang ulôn preh-preh,
19Gata Gad, gata teuma jiheuntam lé peurampok,
teuma gata tagisa jak rampok awaknyan.
20Gata Asyer, peunajoh gata meulimpah ngon meuwáh,
gata teuma takeubah peunajoh keuraja-raja.
21Gata Naftali, gata lagée rusa nyang lheueh,
lumpah that ceudah bubena aneuëk-aneuëk gata.#Naftali, … aneuëk-aneuëk gata; atawa Naftali lagée bak kayée luhue deungon cabeueng-cabeueng nyang gét.
22Nabi Yusuf lagée keuleudée muda,
keuleudée kleuet nyang rab ngon mata ié,
jiplueng-plueng bak gaki gunong.#Nabi Yusuf … bak gaki gunong, atawa Nabi Yusuf lagée bak kayée nibak mata ié, bak kayée-bak kayée meuboh nyang meubeunteung nibak beuton.
23Musoh jiseurang deungon hebat that,
jipeucrok gobnyan ngon ali-ali dan aneuk panah.
24Teuma Nabi Yusuf teutab teuga kukoh jaroe gobnyan,#Teuma … jaroe gobnyan, atawa teuma panah awaknyan patah dan hanco, utot-utot jaroe jih beukah teupriek-priek.
teutab teuga aneuk panah gobnyan,
sabab kuasa Tukang Rabe Nyang Maha Teuga,
Po teu Allah Nabi Yakub, Nyang Lindong Israel.
25Allah ayah gata geutulông gata;
Nyang Mahakuasa geubri beureukat keu gata
deungon ujeuen jitreun di langét
dan ié dimiyueb tanoh.
Deungon aneuëk dan leumô,
26gandom dan bungöng.#Mungken that ayat nyoe meumakna: Gandom dan bungöng; Ibrani indatu gata leubeh peukasa nibak.
Beureukat Allah bapa gata leubeh
jai nibak kaya gunong-gunong nyang leubeh tuha.#Saboh teujeumahan kuno: gunong-gunong nyang leubeh tuha; Ibrani indatu lôn ubak.
Seumoga jitreun kheueh banmandum beureukat nyan
u ateueh ulée Nabi Yusuf,
u ateueh keunéng gobnyan.
Jihnyan kheueh nyang paleng istimewa
lamkawan syedara-syedara jihnyan.
27Benyamin na kheueh srigala nyang juwah.
Watée beungoh uroe laju jiteugom mangsa.
Óh watée malam laju jibagi-bagi atra nyang jiteugom nyan.”
28Nyan kheueh ban dua blah sukée Israel, dan tutoe haba nyang geupeugah lé ayah awaknyan watée geubri saleuem seulamat meupisah ubak awaknyan maséng-maséng.
Nabi Yakub meuninggai donya dan laju teupeukubu
29-30 #
Keuj. 23:3-20
Óh lheuehnyan Nabi Yakub geupeugah ubak aneuëk-aneuëk gobnyan, “Sikeujab teuk ulôn teuma meuninggai lagée mandum indatu lôn. Kubu kheueh ulôn bak binéh awaknyan lam guha di Makhpela, siblaih u timu Mamre nibak tanoh Kanaan, Nabi Ibrahim ka geubloe guha ngon ladang nyang na nibak teumpat nyan bak Efron ureuëng Het keugeupeujeuet keu lampôh jrat. 31#Keuj. 25:9-10, 35:29 Nibak teumpat nyan teukubu Nabi Ibrahim ngon Sara, Nabi Ishaq ngon Ribka; dan nibak teumpat nyan cit teuma ulôn peukubu Lea. 32Ladang ngon guha nyang na nibak teumpat nyan ka geubloe nibak ureuëng Het. Kubu kheueh ulôn nibak teumpat nyan.” 33#Kis. 7:15 Óh ka lheueh Nabi Yakub geupeusan banmandum nyan ubak aneuëk-aneuëk gobnyan, laju geu-éh dan meuninggai kheueh gobnyan.
Currently Selected:
KEUJADIAN 49: LAIACE
Highlight
Share
Copy
Want to have your highlights saved across all your devices? Sign up or sign in
Old and New Testament in Today's Aceh Language @ LAI, 1997.
