EZRA 8
8
Ureuëng-ureuëng nyang teuböih nyang ka woe deungon Ezra
1Nyoe kheueh dafeutar bubena ulée kawöm nyang ka teuböih u Babel dan jiwoe lom deungon ulôn, Ezra u Yerusalem nibak watée Artahsasta geumat peurintah sibagoe raja:
2-14Gersom, nibak kawöm Pinehas
Daniel, nibak kawöm Itamar
Hatus bin Sekhanya, nibak kawöm Nabi Daud
Nabi Zakharia nibak kawöm Paros, meusajan deungon 150 droe ureuëng agam nibak kawöm gobnyan (na catetan keuhai silsilah awaknyan)
Elyoënai bin Zerahya, nibak kawöm Pahat-Moab, meusajan deungon 200 droe ureuëng agam
Sekhanya bin Yahaziel, nibak kawöm Zatu,#Saboh teujeumahan kuno: (kalon 2:8) Zatu, Ibrani hana nan nyan. meusajan deungon 300 droe ureuëng agam
Ebed bin Yonatan, nibak kawöm Adin, meusajan deungon 50 droe ureuëng agam.
Yesaya bin Atalya, nibak kawöm Elam, meusajan deungon 70 droe ureuëng agam
Zebaja bin Mikhael, nibak kawöm Sefaca, meusajan deungon 80 droe ureuëng agam
Obaja bin Yehiel, nibak kawöm Yoab, meusajan deungon 218 droe ureuëng agam
Selomit bin Yosifya, nibak kawöm Bani,#Saboh teujeumahan kuno (2:10) Bani, Ibrani hana nan nyan. meusajan deungon 160 droe ureuëng agam
Zakharia bin Bebai, nibak kawöm Bebai, meusajan deungon 28 droe ureuëng agam
Yohanan bin Hakatan, nibak kawöm Azgad, meusajan deungon 110 droe ureuëng agam
Elifelet, Yehiel dan Semaya, nibak kawöm Adonikam, meusajan deungon 60 droe ureuëng agam (awaknyoe teuka jih óh dudo teuma)
Utai dan Zabud, nibak kawöm Bigwai, meusajan deungon 70 droe ureuëng agam.
Ezra laju geupeusapat ureuëng-ureuëng Lewi mangat jeuet keu ureuëng peutimang Tuhan di Baét Tuhan
15Banmandum kawöm nyan ulôn peusapat nibak binéh krueng nyang ié jih ji-ile u banda Ahawa, laju kamoe peudong khimah disinan nyang treb jih lhée uroe. Óh ka lheueh ulôn peureksa, teunyata na meupadubdroe teungku imeum lamkawan awaknyan, teuma hana meusidroe pi nyang na nibak sukée Lewi. 16Laju ulôn hôi sikureueng droe lamkawan peumimpén, awaknyan na kheueh: Eliezer, Ariel, Semaya, Elnatan, Yarib, Elnatan, Zakharia, Mesulam dan na teuma dua droe gurée, na kheueh Yoyarib dan Elnatan. 17Óh lheueh nyan ulôn yuejak awaknyan mangat jijak meurumpok deungon Ido, pang ulée masyarakat di Kasifya, deungon jilakée mangat Ido dan rakan-rakan jih ureuëng nyang meubuet di Baét Tuhan, jikirém ubak kamoe ureuëng-ureuëng nyang meubuet di Baét Tuhan. 18Sabab murah até Po teu Allah, awaknyan geukirém ubak kamoe Serebya, ureuëng Lewi nyang malem nibak kawöm Mahli. Meusajan deungon gobnyan teuka cit teuma aneuëk miet dan syedara-syedara gobnyan, le jih na 18#18, atawa 17 droe. droe. 19Hasabya dan Yesaya nibak kawöm Merari, deungon dua ploh droe kawöm syedara gobnyan, geukirém cit keukamoe. 20Di sampeng nyan na teuma 220 droe ureuëng nyang meukeureuja di Baét Tuhan nyang na teudafeutar nan-nan awaknyan. Indatu awaknyan yohmasa ilée ka geupeuteutab lé Nabi Daud dan bubena ureuëng rayeuk lam keurajeuen nanggroe keu jitulông ureuëng Lewi.
Ureuëng-ureuëng beukaih nyang teuböih jipuasa ngon meudoá
21Dan nibak binéh Krueng Ahawa nyan ulôn peusapat dan banmandum awaknyan harôh jipuasa dan jipeumiyueb droe dikeue Po teu Allah. Kamoe meudoá mangat Po teu Allah geupimpén kamoe nibak rot ueh raya, dan geulindong kamoe, aneuëk-aneuëk kamoe dan banmandum hareuta milék kamoe. 22Ulôn seugan keuneuk lakée tantra meuguda ubak raja keu teulindong kamoe nibak musoh bak rot ueh raya. Sabab ulôn ka lheueh ulôn peugah ubak gobnyan, bahwa Allah kamoe teuma geubri beureukat soe mantong nyang meubakti ubak Gobnyan dan geubanci meunan cit geuhuköm soe mantong ureuëng nyang hana seutia ubak Gobnyan. 23Lé sababnyan kheueh kamoe puasa sira meudoá ubak Allah dan kamoe lakée peulindongan Gobnyan dan doá kamoe nyan pi geudeungoe.
Peuseumahan-peuseumahan keu Baét Tuhan
24Lamkawan teungku-teungku imeum nyang paleng meusyeuhu ka ulôn piléh 12 droe: Serebya, Hasabya dan na 10 droe teuk. 25Óh lheuehnyan ulôn timang keu awaknyan pirak, méuh dan peukakaih-peukakaih nyang ka lheueh geusumbang lé raja, lé peunaseuhat meunan cit lé ureuëng-ureuëng rayeuk dan lé banmandum ureuëng Israel, mangat jeuet teupeuguna di dalam Baét Tuhan. Banmandum nyan ka lheueh ulôn jok ubak teungku-teungku imeum nyan. 26-27Nyoe kheueh dafeutar sumbangan-sumbangan nyan:
| pirak | – 22 ton |
| 100 boh peukakaih pirak | – 70 kilogram |
| méuh | – 3.400 kilogram |
| 20 boh cambông méuh | – 8,4 kilogram |
| 2 boh cambông peurunggu nyang paleng ceudah, nyang saban yuem jih deungon cambông méuh. |
28Ulôn peugah ubak teungku-teungku imeum nyan lagéenyoe, “Gatanyoe ka teupeukhusos keu Tuhan, Allah nyang geuseumah lé indatu geutanyoe, meunan cit deungon banmandum peukakaih pirak dan méuh nyang teusumbang ubak Tuhan nyan pi na kheueh khusos keu Tuhan. 29Gata jaga kheueh beunda-beunda nyan beu jroh-jroh sampoe gata trok u Baét Tuhan. Watée gata ka trok keudeh, gata harôh tatimang beunda-beunda nyan, dan gata jok laju ubak pang ulée-pang ulée imeum dan peumimpén-peumimpén ureuëng Lewi, meunan cit ubak peumimpén-peumimpén ureuëng Israel nyang na di Yerusalem.” 30Óh lheueh nyan lé teungku-teungku imeum dan ureuëng-ureuëng Lewi nyan geuteurimong pirak, méuh dan peukakaih-peukakaih nyan keu teuba u Baét Tuhan di Yerusalem.
Trok u Yerusalem
31Nibak tanggai 12 buleuen nyang phon kamoe tinggai Krueng Ahawa dan kamoe beurangkat u Yerusalem. Nibak rot ueh nyan kamoe geulindong lé Po teu Allah nibak seurangan dan jihampeueng lé musoh. 32Óh watée ka sampoe u Yerusalem, kamoe meureuhat na lhée uroe. 33Óh lheuehnyan nibak uroe nyang keu peuet barô kheueh kamoe jak u Baét Tuhan, disinan laju kamoe timang pirak, méuh dan peukakaih-peukakaih nyan. Óh lheueh nyan barô kheueh kamoe jok ubak Teungku Imeum Meremot bin Uria sira geusaksi lé Eleazar bin Pinehas dan dua droe ureuëng Lewi, na kheueh Yozabad bin Yesua dan Noaja bin Binui. 34Banmandum beunda nyan geu itong dan geutimang, laju geucetet deungon leungkab.
35Bak uroenyan cit teuma banmandum ureuëng nyang ka jiwoe nibak teumpat teuböih nyan, jipeuseumah keureubeuen nyang teutot ubak Allah Israel. Awaknyan jipeuseumah 12 boh leumô agam keu banmandum Israel, 96 boh bubiri agam dan 77 boh aneuëk bubiri; seulaén nibak nyan na teuma 12 boh kaméng keu keureubeuen peu amphon desya keu awaknyan keudroe. Banmandum beulatang nyan geutot sibagoe keureubeuen keu Tuhan. 36Dan dokumen nyang geubri lé raja keu awaknyan, geupeusampoe laju ubak bubena gubunur dan peujabat propinsi Efrat Barat. Dan peujabat-peujabat nyan laju geubri bantuan ubak rakyat mangat awaknyan teutab meuiébadat di Baét Tuhan.
Currently Selected:
EZRA 8: LAIACE
Highlight
Share
Compare
Copy
Want to have your highlights saved across all your devices? Sign up or sign in
Old and New Testament in Today's Aceh Language @ LAI, 1997.
