YEHEZKIEL 21
21
Peudeueng Tuhan
1 Tuhan meufeureuman ubak ulôn, kheun Gobnyan, 2“He manusia fana, kutôk kheueh Yerusalem. Kutôk kheueh teumpat-teumpat iébadat nyang na disinan. Peuingat kheueh tanoh Israel, 3bahwa Ulôn, Tuhan, Lôn peugah lagée nyoe, ‘Ulôn nyoe musoh gata. Ulôn Lôn suet peudeueng lam saröng dan Lôn cang bumaté gata bube nyang na, bah kheueh nyan nyang jeuhet meunan cit nyang jroh. 4Deungon peudeueng Lôn kulawan bandum ureuëng di utara sampoe seulatan. 5Dan bandum ureuëng jiteupeue bahwa Ulôn, Tuhan, Lôn suet peudeueng Lôn dan hana Lôn pasoe lam saröng le.’
6He manusia fana, Meu óe-óe kheueh dan apoh apah kheueh dikeue ureuëng Israel, siulah-ulah gata patah até dan putôh asa. 7Meunyoe awaknyan jitanyong pakon gata áh éuh, peugah kheueh laju bahwa gata seudeh sabab haba nyang teuma teuka. Deungon na haba nyan teuka yo lam até awaknyan, jaroe awaknyan leumoh, dan teuöt awaknyan yo meugám-gám, awaknyan patah seumangat. Keubit that watée jih ka teuka, dan bandum nyan teujadi. Ulôn Tuhan Nyang Mahamanyang ka Lôn peugah haba.”
8 Tuhan meufeureuman ubak ulôn, 9“He manusia fana, meuramai kheueh! Jak bri tée kheueh ubak dumna ureuëng bahwa Ulôn, Tuhan, Lôn peugah lagée nyoe,
‘Na sikrak peudeueng,
peudeueng nyang teugeusok dan teuasah.
10Peudeueng nyan teuasah mangat jeuet teupeumaté peue nyang na,
teu uet óh gleh mangat meukilat.
Nibak umat Lôn hana le keugeumbiraan
sabab bandum peu ingatan dan huköman awaknyan anggab hana.#Rayeuk that keumungkenan makna jih: Nibak … hana.
11Peudeueng nyan teuasah mangat siab óh watée teupeuguna
laju jijok bak sidroe-sidroe ureuëng tukang seumeusie.
12He manusia fana, meuratok kheueh dan tameuhôi kheueh!
Sabab peudeueng nyan ka siab jilawan umat Lôn.
Bandum peumimpén Israel meusajan silurôh bansa
jitob lé peudeueng nyan sampoe binasa.
Teuma tapéh kheueh dada gata ngon até nyang gulana,
13sabab Ulôn teungoh Lôn ujoe umat Lôn,
meunyoe awaknyan hán jitem ubah peurangoe,
bandum nyan teujadi ateueh awaknyan.’#Ayat 13 lam basa Ibrani hana trang.
14Nyan, he manusia fana, meuramai kheueh. Péh kheueh paleuet jaroe gata, sibagoe tanda keu peudeueng nyan keu teupeuphon seumeusie. Peudeueng nyan lumpah teumakot.#Padub-padubboh teujeumahan kuno: lumpah teumakot. 15Peudeueng nyan ka jipeujeuet bansa Ulôn gadôh ceubeueh jih dan reubah meugantoh. Di Ulôn ancam banda awaknyan ngon peudeueng#Rayeuk that keumungkenan makna jih: ancam … peudeueng. nyan nyang meuble-ble lagée kilat, dan nyang ka siab keu peumaté. 16He peudeueng nyang tajam, ceumeucang kheueh u uneuen dan ublah wie, dan ho homantong nyang gata galak.#Ayat 16 lam basa Ibrani hana trang. 17Ulôn Lôn péh cit paleuet jaroe, laju beungéh Ulôn seungab. Ulôn, Tuhan, ka Lôn peugah haba.”
Peudeueng raja Babel
18 Tuhan meufeureuman ubak ulôn, kheun Gobnyan, 19-20“He manusia fana, gamba kheueh dua boh rot nyang jeuet jijak lé raja Babel nyang teungoh jiba peudeueng gobnyan. Bandua boh rot nyan harôh meuuboe nibak nanggroe nyang saban; rot nyang saboh teutuju u Raba, banda Amon; nyang saboh teuk u Yerusalem, banda meu kuta di Yehuda. Peugöt kheueh papeuen peutunyok rot dipat rot nyan ka jipeuphon meucabeueng.#Peugöt kheueh … meucabeueng. Ibrani hana trang. 21Raja Babel laju geudong bak papeuen peutunyok rot ueh nyan. Mangat jiteupeue rot nyang toh nyang harôh jijak, laju lé raja Babel nyan jilakée peutunyok bak beurala-beurala jihnyan, jiguncang panah dan jipeureksa até beulatang#jiguncang panah dan jipeureksa até beulatang: Meunyoe harôh teucok keuputosan, ureuëng jamén ilée kadang-kadang jikocok sulie teumpat keubah beude panah jih lheueh nyan deungon hana jikalon jicok laju saboh lamkawan beude panah nyan. Cara laén na kheueh deungon jingieng tanda-tanda nyang na nibak até beulatang keureubeuen. nyang ban lheueh jikeureubeuen. 22Teunyata panah nyang teucok bak jaroe jihnyan teutunyok arah u Yerusalem! Nyan tanda jih raja harôh jiprang banda Yerusalem, jidumpék prang meuhubo dan jiyue sipa-i jihnyan mangat jisuson alat-alat peundobrak, geuyue pasang bak pintoe-pintoe geureubang Yerusalem, geuyue tamon tanoh jeuet keu kuta teukeupong dan geuyue khueh lhueng-lhueng. 23Peunduduek Yerusalem hana jipeucaya bahwa awaknyan keunong seurang, sabab awaknyan ka jipeugét janji deungon Babel. Teuma ramaian nyoe teupeu ingat ubak awaknyan bahwa awaknyan teudrob ngon sabab desya-desya awaknyan keudroe. 24Ulôn, Tuhan Nyang Mahamanyang Lôn peugah ubak awaknyan, ‘Desya-desya gata ka teuteupeue dan bandum ureuëng jiteupeue bahwa gata meusalah. Keujeuhetan gata nyan leumah bak tieb-tieb buet gata. Jinoenyoe ka trok watée jih gata teuhuköm dan gata Lôn seurah ubak musoh gata.’
25Dan ubak raja Israel Ulôn peugah, ‘He raja nyang jeuhet dan doraka! Watée keu teuhuköm gata nyang keuneulheueh ka tô that. 26Ulôn, Tuhan Nyang Mahamanyang ka Lôn peugah haba. Peuhah kheueh mahkota gata dan peulheueh kheueh seureuban gata. Jinoenyoe, keuadaan ka meu ubah. Beuôt kheueh keududuekan ureuëng gasien dan bri kheueh bak awaknyan kuasa! Peutron kheueh dumna peunguasa nibak martabat jih! 27Banda nyoe Lôn peuhanco sapan sapa, sampoe dipat mantong na rungka-rungka. Teuma hainyan barô kheueh teujadi meunyoe ureuëng nyang Ulôn piléh keu teuhuköm banda nyoe ka teuka. Keu ureuëng nyan Ulôn jok banda nyoe.’ ”
Peudeueng dan ureuëng Amon
28 #
Yer. 49:1-6; Yeh. 25:1-7; Am. 1:3-15; Zef. 2:8-11 “He manusia fana, meuramai kheueh! Jak peugah kheueh ubak ureuëng Amon nyang ka jihina Israel, bahwa Ulôn, Tuhan Nyang Mahamanyang Lôn peugah, ‘Sipucok peudeueng ka siab keu teumeucang; peudeueng nyan ka teuasah meuble-ble lagée kilat, mangat jeuet siab keu teupeumaté. 29Nyang deuh gata ngieng nyan na kheueh peuleusu, dan ramaian nyang gata peugah nyan na kheueh buhak dan sulet. Gata jeuhet dan doraka, dan saát keu teuhuköm gata nyang keuneulheueh ka tô that. Peudeueng nyan jikoh takue gata.
30He ureuëng Amon, peutamong kheueh peudeueng gata nyan dalam saröng! Gata Lôn peusidang di teumpat gata teucebta dan teupeulahé. 31Ulôn Lôn peulheueh u ateueh gata beungéh Ulôn nyang hana ngon peusa. Dan gata Ulôn jok ubak ureuëng-ureuëng keujam nyang ka teulateh keu jipeubinasa. 32Gata habéh tutong jipajoh lé apui. Darah gata rô di nanggroe gata keudroe, dan hana meusidroe pih nyang na mantong teuingat keu gata. Ulôn, Tuhan ka Lôn peugah haba.’ ”
Currently Selected:
YEHEZKIEL 21: LAIACE
Highlight
Copy
Compare
Share
Want to have your highlights saved across all your devices? Sign up or sign in
Old and New Testament in Today's Aceh Language @ LAI, 1997.
