1 TAWARIKH 11
11
Nabi Daud jeuet keuraja ateueh Israel dan Yehuda
(2Sam. 5:1-10)
1Banmandum peumimpén bansa Israel jijak ubak Nabi Daud dan laju jipeugah lagéenyoe, “Kamoe nyoe rakan Teungku Amphon. 2Phon yoh masa ilée, dan hainyoe kana phon yohmantong Raja Saul geumat peurintah ateueh kamoe, Teungku Amphon kheueh nyang pimpén tantra Israel pajan mantong awaknyan jimaju u mideuen prang. Lom teuma Tuhan Po teu Allah Teungku Amphon ka geumeujanji bahwa Teungku Amphon kheueh nyang pimpén umat Gobnyan dan jeuet keuraja awaknyan.” 3Dan óhban geudeungoe habanyan lé Nabi Daud laju geupeugét peujanjian deungon dumna peumimpén bansa Israel nyan. Lé awaknyan geulanték Nabi Daud jeuet keuraja Israel lagée nyang ka geupeujanji lé Tuhan meulalu Samuel.
4 #
Yos. 15:63; Hak. 1:21 Bak saboh watée Nabi Daud deungon bala tantra gobnyan geujak prang banda Yerusalem. Bak watéenyan banda nyan mantong nan jih Yebus, dan jiduek lé ureuëng Yebus, peunduduek aseuli banda nyan. 5-7Ureuëng-ureuëng Yebus ka jipeugah ubak Nabi Daud, bahwa gobnyan hana mungken hase geutamong u dalam banda nyan. Teuma Nabi Daud meuhase geureubot kuta awaknyan nyang nan jih Sion. Bak watéenyan Nabi Daud ka geupeumaklum ubak aneuëk buah gobnyan bahwa ureuëng nyang phon that nyang poh ureuëng Yebus nyang kheueh nyang teuangkat jeuet keu panglima. Dan lé sababnyan Yoab kheueh nyang phon-phon that jak prang Yebus, gobnyan laju teuangkat jeuet keu panglima. (Mak Yoab nan jih Zeruya.) Óh ka lheueh geureupah kuta Sion, Nabi Daud laju tinggai disinan. Nyang kheueh sabab jih kuta nyan phon watéenyan geuboh nan, “Banda Daud”. 8Nabi Daud laju geupeudong lom banda nyan geupeuphon nibak teumpat nyang teupeumanyang deungon tanoh disiblaih utimu bukét; óh lheuehnyan peumbangunan nyan geulanjutkan teuma lé Yoab sampoe seuleusoe. 9Nabi Daud maken treb maken teuga, sabab Tuhan Nyang Maha Kuasa nyang tulông gobnyan.
Peujuang-peujuang Nabi Daud nyang paleng meugah
(2Sam. 23:8-39)
10Nyoe kheueh nan-nan banmandum peuwira Nabi Daud nyang paleng meusyeuhu. Meusajan-sajan deungon banmandum rakyat Israel awaknyan ka jimeujuang mangat Nabi Daud jeuet keuraja lagée nyang ka geupeujanji lé Tuhan. Dan awaknyan hana putôh-putôh jisokong keurajeuen gobnyan.
11Peuwira nyang awaiphon na kheueh Yasobam ureuëng Hakhmoni, geuhnyan geupimpén “Triwira”.#Triwira: Makna jih “lhée droe peuwira”. Na teujadi nibak saboh mideuen prang gobnyan geulawan 300 droe dan banmandum ureuëng nyan maté jiheuntam ngon kapak. 12Ureuëng nyang keudua dalam Triwira nyan na kheueh Eleazar aneuëk si Dodo nibak kawöm Ahohi. 13-14Dalam mideuen prang di Pas-Damim jimeujuang blaih Nabi Daud jilawan ureuëng Filistin. Bak watée tantra Israel ka jipeuphon peuplueng droe, geuhnyan dan aneuëk buah jih jimeuteun di teungoh-teungoh lampôh gandom dan disinan kheueh jimeu heungkoe meuhabéh-habéh deungon ureuëng Filistin. Laju Tuhan geupeumeunang nyang paleng rayeuk keu gobnyan.
15-16Bak siuroe na 3 droe nibak 30 droe peuwira Nabi Daud nyang paleng meugah, jijak meurumpok deungon Nabi Daud di saboh teumpat nyang meukuta nibak saboh gunong batée nyang tô ngon binéh Guha Adulam. Bak watéenyan ureuëng Filistin jipeudong khimah di Pantôn Refaim, dan saboh pasokan nibak awaknyan laju jireubot Betlehem. 17Nabi Daud gét that meucén keugampông droe geuh sira geupeugah, “Ah, meunyoe keu ulôn geubri lôn jieb ié nyang na didalam mon bak binéh pintoe geureubang di Betlehem.” 18Ban jideungoe habanyan, ban lhée droe peuwira nyan laju jiseureubu ubak khimah-khimah ureuëng Filistin dan laju jicrong ié nyang na didalam mon nyan, óh lheueh nyan ié nyang ka lheueh jicrong nyan laju jiba ubak Nabi Daud. Teuma Nabi Daud hana geutem jieb ié mon nyan, teuma laju geuro sibagoe geupeuseumah keu Tuhan. 19Nabi Daud geupeugah, “Deumi Allah, ulôn hana ulôn jieb ié mon nyoe! Meunyoe iémon nyoe ulôn jieb, siulah-ulah saban cit lagée ulôn jieb darah ureuëng nyang ka jisabong nyawöng bak jijak cok ié nyoe!” Deungon nyan Nabi Daud meubacut pih hana geutem jieb ié mon nyan. Nyang kheueh jasa-jasa ban lhée droe peujuang nyang peukasa nyan.
20-21Ban lhée ploh droe peuwira nyang paleng meusyeuhu nyan na cit teuboh nan nyang laén deungon nan “Tridasawira”. Awaknyan jipimpén lé Abisai adoe Yoab. Ka lheueh jicang sampoe maté 300 droe deungon kapak jihnyan, dan kareuna nyan gobnyan meutamah meusyeuhu. Teuma geuhnyan hana saban hebat jih deungon Triwira nyan.
22Na sidroe peuwira nyang meusyeuhu nyang laén nyang nan jih Benaya aneuëk Yoyada, ureuëng Kabzeel. Gobnyan lumpah ceubeuh ngon beurani. Dua droe pahlawan nyang paleng rayeuk nibak Moab ka jipoh maté. Ka lheueh teujadi bak siuroe nyang meusalju geuhnyan geutamong u dalam saboh guha óh trok lam guha nyan laju geupoh maté saboh singa nyang na didalam guha nyan. 23Meunan cit gobnyan ka lheueh geupoh maté sidroe ureuëng nibak nanggroe Meusé nyang lumpah rayeuk badan jih; panyang ureuëng Meusé nyan leubeh dua metée. Ureuëng nyan meuseunjata kapak nyang paleng raya, teuma lé Benaya jilawan ureuëng nyan ngon kayée puntong. Kapak nyang na nibak jaroe ureuëng Meusé nyan geuteumé reubot dan ngon kapak nyan kheueh geupoh maté ureuëng Meusé nyan. 24Nyan kheueh jasa-jasa Benaya, sidroe lamkawan Tridasawira. 25Lamkawan nyan, Benaya kheueh nyang paleng meugah, teuma gobnyan hana saban hebat jih deungon Triwira. Nabi Daud laju geuangkat geuhnyan jeuet keu ulée peungawai pribadi.
26-47Lheueh nyan nyoe na kheueh peuwira-peuwira nyang laén nyang paleng meusyeuhu:
Asael adoe Yoab
Elhanan aneuëk Dodo ureuëng Betlehem
Samot ureuëng Harod
Heles ureuëng Peloni
Ira aneuëk Ikes ureuëng Tekoa
Abiezer ureuëng Anatot
Sibkhai ureuëng Husa
Ilai ureuëng Ahoni
Maharai ureuëng Netofa
Heled aneuëk Baana ureuëng Netofa
Itai aneuëk Ribai ureuëng Gibea diwilayah sukée Benyamin
Benaya ureuëng Piraton
Hurai ureuëng pantôn-pantôn Gaas
Abiel ureuëng Araba
Azmawet ureuëng Bahurim
Elyahba ureuëng Saalbon
Hasyem ureuëng Gizon
Yonatan aneuëk Sage ureuëng Harari
Ahiam aneuëk Sakhar ureuëng Harari
Elifar aneuëk Ur
Hefer ureuëng Mekherati
Ahia ureuëng Peloni
Hezrai ureuëng Karmel
Naarai aneuëk Ezbai
Yoël syedara Natan
Mibhar aneuëk Hagri
Zelek ureuëng Amon
Naharai ureuëng Beerot, nyang ba sinjata Yoab
Ira dan Gareb ureuëng Yetri
Uria ureuëng Het
Zabad aneuëk Ahlai
Adina aneuëk Siza (sidroe tokoh lam sukée Ruben nyang na pasokan 30 droe)
Hanan aneuëk Maakha
Yosafat ureuëng Mitni
Uzia ureuëng Asytarot
Syama dan Yeiel, aneuëk-aneuëk Hotam, ureuëng Aroër
Yediael dan Yoha, aneuëk-aneuëk Simri, ureuëng Tizi
Eliel ureuëng Mahawim
Yeribai dan Yosawya, aneuëk-aneuëk Elnaam
Yitma ureuëng Moab
Eliel, Obed dan Yaasiel ureuëng Mezobaya.
Currently Selected:
1 TAWARIKH 11: LAIACE
Highlight
Share
Compare
Copy
Want to have your highlights saved across all your devices? Sign up or sign in
Old and New Testament in Today's Aceh Language @ LAI, 1997.
