Wólómà 15
15
Kɔ̀à mia gbɛɛ zò-kṹ-wɔ̃̀ kɛ, kɛɛ yékɛ̀ kɔ́á kɔa dìè zò-kṹ-wɔ̃̀ kɛ
1Mia lɛ́ kɔa yí lɛ gáàa, lɛ kɔa mɔ̀ kɔ́á kɔ̀ dà mia lɛ́ o yí wá gáàa zì, wɔ̃́ lɛ́ lɛ o kɔ̀ làa kɛɛ̀ yí. Ɛ́ɛ̃́ yékɛ̀ kɔ́á kɔa dìè zò-kṹ-wɔ̃̀ kɛ. 2Kɛɛ lɛ sɛ̀ kɔa séĩ́ kɔ́á wɔ̃́ lɛ́ è lo kɔa lèe-gé zò dàà, ɛ̃́ɛ̃́ lɛ́ e à dìè-tĩ́ là wɔ̃́ yiè káa kɛ, kɛɛ é à mɛ́ kɛ gágà. 3Ƃii Kɛ́lɛ̀ì lɛ̀ɛ́ gbaa e dìè zò-kṹ-wɔ̃̀ kɛ. Kɛɛ zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké. “Mia lɛ́ o wéé yɔɔ gèe i gbĩ mɔ̀ɔ, wéé yɔɔ lɛ́ wa gèea, ma lɛ́ à tóò lɛ m wũ mɔ̀ɔ.” 4Pɛ séĩ́ lɛ́ à bɛ̃̀ɛ̃ɛ̃̀ e kɛá mɔ́ Wálà là kíía yía, à bɛ̃̀ɛ̃ɛ̃̀ e kɛá kɛ é wɔ̃́ zɔ̃̀ɔ̃̀ ko lɛ̀ɛ, kɛɛ pɛ é kɛ ɓe kó ko zò kɛ à mɔ̀, zò-kũ̀-tã́ã̀ wà fã̀ã́-wàà lɛ́ Wálà zì kíía à nɔ ko lɛ̀ɛ kolo là zàá. 5Wálà lɛ́ è zò-kũ̀-tã́ã̀ wà fã̀ã́-wàà nɔ mia lɛ̀ɛ, è à kɛ ká wɔ̃́ ma ka kíe wè là, kɛ ká kɛ lɛ̀ zí Kɛ́lɛ̀ì Zízɛ̀ e kɛáa lɛ́ ɓe. 6È à kɛ kíli, kɛɛ ka séĩ́ ka wéè é tó doó, ká Wálà lɛ́ e ko Dàa-mì Zízɛ̀ Kɛ́lɛ̀ì Dàa káa, tɔ́ kɛ gbùò ka kíe là.
Wɔ̃́ làṹ yièa yé è lo sɛ́lɛ́ gbɛɛ yí-mìà píéa
7À mɔ́ɔ̀ wɔ̃̀ mɔ̀ɔ, kà ka kɔ̀ yà ka kíe nì wì, lɛ̀ zí lɛ́ Kɛ́lɛ̀ì aà e kɔ̀ yàá ka wìa lɛ́ ɓe, kɛɛ Wálà é tɔ́-ɓɔ sɔ̀lɔ̀ ɓo. 8Ƃii ḿm̀ gèe ka lɛ̀ɛ kélɛ̀ Kɛ́lɛ̀ì e kɛ Zúù-mìà wà yɛɓo-kɛ-mì ká, kɛɛ é Wálà zì kɛ̀-wánà-zɛ̀ kɔ̀ɔ zɔ̃̀ɔ̃̀ mia lɛ̀ɛ, ɛ̃́ɛ̃́ kɛɛ Wálà zì wè lɛ́ a dɔ mɔ́ ko dàa nì bɛ̃̀ɛ̃ zì dàa nì lɛ̀ɛ, kɛ à kɛɛ̀ é kɛ à ká. 9Ɛ́ɛ̃́ zeĩ́, a kɛ kíli kɛɛ sɛ́lɛ́ gbɛɛ yí-mìà ó Wálà tɔ́ kɛ gbùò à zì mia yéĩ̀ kṹũ̀a wɛ̃́ĩ̀. Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké.
“À mɔ́ɔ̀ wɔ̃̀ mɔ̀ɔ, ḿm̀ lo i tɔ́ ɓɔɔ̀ sɛ́lɛ́ gbɛɛ yí-mìà fĩ̀ã̀.
Ḿm̀ lo tã́ ɓoò i tɔ́ ká.”
10Zéniía, à bɛ̃̀ɛ̃ɛ̃̀ lɛ kélɛ̀,
“Sɛ́lɛ́ gbɛɛ yí-mìà, kà Wálà là mia lɛ́ aà o sía, kà ye nì kà géli kɛ.”
11E bɛ̀i zeĩ́,
“Mia séĩ́ lɛ́ ka sɛ́lɛ́ gbɛɛ yí-mìà ká ɓɛ, kà ko Dàa-mì tɔ́ ɓɔ.
Sɛ́lɛ́ séĩ́ yí-mìà ka bɛ̃̀ɛ̃, kà à tɔ́ ɓɔ nɔ́ kíli.”
12Zéniía, Ààzáyà a gèe kélɛ̀,
“Zɛ́sè sùu-là-mì dò lɛ́ɛ̀ lo nuù.
À wɛ̀lɛ̀ lɛ́ɛ̀ lo kɛɛ̀ à ká, kɛɛ é tó sɛ́lɛ́ gbɛɛ yí-mìà là dɔ-mì ká.
O zò lɛ́ɛ̀ lo kɛɛ̀ à mɔ̀.”
13Wálà lɛ́ è zò-kɛ̀-pɛ-mɔ̀ nɔ mia lɛ̀ɛ, è ka pa géli wà zò-yà-gé ká, ka zì zò-dɔ̀à-mɔ̀ kolo là zàá, kɛɛ Wálà là Gɛ̀ɛ̀ Púlú zì yíkɛ̀ gáàa á kɛ kɛɛ pɛ lɛ́ ka zò lɛ à mɔ̀ɔ, é kɛ à là kpɔ́pìà.
Pɛ́ e kɛ lɛ́ Pɔ́ɔ̀ lɛ̀ɛ́ gbaa kɛ wɔ̃́ mɛ́ kpɔ̀ɔpìàa
14M lèe-gé vɔ̀, m dìè-tĩ́ ḿm̀ yí dɔ wánà ká kélɛ̀ ka paà lɛ wɔ̃́ yiè kɛɛ̀ ká tĩĩ-tĩĩ le, ɛ̃́ɛ̃́ ka paà lɛ wɔ̃́ séĩ́ yí-dɔ-kɔ̀ ká, ɛ̃́ɛ̃́ káà bɛ̀i à mɔ̀ ká pɛ zɔ̃̀ɔ̃̀ ka kíe nì lɛ̀ɛ. 15Kɛɛ maà ka zò vùò wɔ̃́ dò ká kíí e kéa bɛ̃̀ɛ̃ɛ̃̀ yí, ɛ̃́ɛ̃́ à bɛ̃̀ɛ̃ ma ɓoa, m̀ḿ gbaa wɔ̃́ nɔ́ɔ fé mɛ́ kpɔ̀ɔ. Ma kɛ kíli wɔ̃́ yiè lɛ́ Wálà aà nɔ m lɛ̀ɛ mɔ́ɔ̀ wɔ̃̀ mɔ̀. 16Wɔ̃́ yiè e kília lɛ́ e tɔ́ m kɛ́ a ɓo Kɛ́lɛ̀ì Zízɛ̀ là yɛɓo-kɛ-mì ká, máà lò yɛɓo kɛ̀á sí sɛ́lɛ́ gbɛɛ yí-mìà lɛ̀ɛ ká. Ḿm̀ yɛɓo kɛ̀ lɛ̀ sálà-ɓò-Wálà-mɔ̀-mìà lɛ́ ɓe wɔ̃́ làṹ yiè lɛ́ è go Wálà píéa gèeè ká, kɛɛ á kɛ sɛ́lɛ́ gbɛɛ yí-mìà ó kɛ sálà-ɓo-pɛ̀ lɛ́ Wálà è bɛ̀i à mɔ̀ á naa à káa ká, kɛ ó kɛ à doó là mia nì ká Gɛ̀ɛ̀ Púlú kɔ̀ yí zàá. 17À mɔ́ɔ̀ wɔ̃̀ mɔ̀ɔ, kò Kɛ́lɛ̀ì Zízɛ̀ ko kɛ̀ doó yí zàáa, ḿm̀ bɛ̀i à mɔ̀ ḿ lé-gbùò-là kɛ Wálà là yɛɓo m̀ kɛ̀ɛ wɛ̃́ĩ̀. 18Ḿm̀ lo nyìɛ-kɛ̀-gágà là kɛɛ̀, tó máà wɔ̃́ nɔ́ lɛ́ Kɛ́lɛ̀ì e kpɔ́ m yí zàá lɛ́ a kɛɛ wɔ̃̀ gèè. Wɔ̃́ e kília lɛ́ e kélɛ̀, a kɛ sɛ́lɛ́ gbɛɛ yí-mìà wáà Wálà wéè kɛ̀. A kɛ mɛ́ĩ́ ɓoò wà wɔ̃́ kɛɛ̀ kolo là zàá. 19Ɛ́ɛ̃́ a kɛ yíkɛ̀ gáàa lɛ́ è go lé-pa-wɔ̃̀ wà wɔ̃́ kpàlézɛ̀ kɛɛ̀ kolo là zàáa ká. Ɛ́ɛ̃́ zeĩ́, a kɛ Gɛ̀ɛ̀ Púlú zì yíkɛ̀ gáàa nì ká. Wɔ̃́ e kéa lɛ́ a kɛ lɛ́ maà mɔ́ɔ̀ wɔ̃́ làṹ yièa gèe ɓo lòũ̀ ká kpó-kpó ɓo, máà gòá Zùlúsàlɛ̀ máà lòá Ilèlíkàa. 20Wɔ̃́ nɔ́ e m zò mɔ̀ɔ lɛ́ e kélɛ̀, kɛ ḿ wɔ̃́ làṹ yièa gèe lɛ̀ lɛ́ òó wɔ̃́ ma nɛ́ kɛ é gbɛ̃̀ Kɛ́lɛ̀ì mɔ̀ yia, lɛ̀ mɔ̀ɔ káa. Ḿm̀ à kɛ̀ kíli, ɓii yékɛ̀ ḿ ká dɔ ká gã̀ lɛ́ mi gbɛɛ aà dɔɔ là. 21Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké.
“Mia lɛ́ òó wɔ̃́ ma nɛ́ é gbɛ̃̀ à mɔ̀ɔ, óò lo à gɛ̃̀ɛ̃̀.
Mia lɛ́ òó à wɔ̃̀ ma nɛ́ɛ, óò lo à wɔ̃̀ yí maà.”
Pɔ́ɔ̀ a yà e gé é ló ɓɔɔ̀ Wólóũ̀
22Wɔ̃́ e kéa mɔ́ɔ̀ wɔ̃̀ mɔ̀ɔ, wɔ̃́ doò do aà m tèá nù ka píé mɔ̀ kpolà búnùzɛ̀. 23Kɛɛ dɛɛ káa, lɛ̀ m̀ yɛɓo kɛpìà aà nyɛ gbaa sɛ́lɛ́ yé e kéa kɔ̀ pɔ̃́ũ̀ séĩ́ mɔ̀, lɛ́ nù ka píé lɔ̀ aà m kɛ kɛ̀ɛ̀ búnù-búnùzɛ̀ píéa, 24ḿm̀ yí dɔ ḿm̀ nàà gbaa ḿ kɛ kíli. Ḿm̀ lo à naà ḿ ka gɛ̃̀, yé maà kɛ lópìà Sèpéĩ̀a ká. Yé maà ka lɔ̀ ɓo e ɓéĩ́ káa, tó ka ló gbaa m dɔɔ̀ zuú máà lò Sèpéĩ̀. 25Kɛɛ dɛɛ káa mɔ̀ɔ, m lópìà Zùlúsàlɛ̀ Wálà-mìà yé o yía píé gbũ̀-o-mɔ̀ wɔ̃̀ dò wɛ̃́ĩ̀. 26Ƃii Wálà-mìà yé o Masèdónà, e bɛ̀i o yé o Àkéyàa, o zò wéè lɛ à mɔ̀ kɛ ó nɔ̀-lɛ̀ɛ-pɛ̀ dò nɔ mia lɛ́ pɛ wá o kɛ̀lɛ̀, lɛ́ o Wálà-mìà lɛ́ o Zùlúsàlɛ̀ɛ o bàa, o lɛ̀ɛ. 27O dìè o zò e wéé à mɔ̀ kɛ ó kɛ kíli. Kɛɛ gbũ̀ míá o kília mɔ̀ wɔ̃̀ lɛ o wĩĩ́. Ƃii lúà lɛ́ Wálà a kpɔ́ Zúù-mìà zì gɛ̀ɛ̀ mɔ̀ɔ, wa yí gìnì kɛɛ sɛ́lɛ́ gbɛɛ yí-mìà ó dò sɔ̀lɔ̀ ɓo. À mɔ́ɔ̀ wɔ̃̀ mɔ̀ɔ, lɛ sɛ́lɛ́ gbɛɛ yí-mìà mɔ̀ kɛ ó gbũ Zúù-mìà mɔ̀ o zì kpóṹ là zèe pɔ̀ɔ̀ ká. 28Yé maà nyɛ wɔ̃́ e kília kɛɛ̀ mɔ̀, ɛ̃́ɛ̃́ lɛ́ pɛlèe lɛ́ wa kɛ ó nɔ o lɛ̀ɛ, yé maà nyɛ à nɔ̀ o lɛ̀ɛ mɔ̀ɔ, ḿm̀ lo ɓɔɔ̀ ka píé yé maà kɛ lópìà Sèpéĩ̀a ká. 29Ḿm̀ yí dɔ kélɛ̀ ḿ nùá ka píéa, ḿm̀ lo nuù lúà lé paàa zɛ̀ lɛ́ è go Kɛ́lɛ̀ì píéa ká.
30M lèe-gé vɔ̀, kà kpé lɛ sɛ̀, ko Dàa-mì Zízɛ̀ Kɛ́lɛ̀ì wà lɔ̀-kpɔ̀à-mɔ̀ lɛ́ Gɛ̀ɛ̀ Púlúa à nɔɔ yí zàáa, kà dà m píé sɛ̀nɛ ɓoò Wálà lɛ̀ɛ ká mɛ́ gágà zɛ̀ m mɔ́ɔ̀ wɔ̃̀ mɔ̀. 31Kà sɛ̀nɛ ɓo kélɛ̀ Wálà é m la mia lɛ́ òó Wálà wéè kɛ lɛ́ o Zùdíàa o kɛ̀lɛ̀. Ɛ́ɛ̃́ kɛɛ gbũ̀-mɔ̀ wɔ̃̀ lɛ́ ma mɔ́ɔ̀ ló ɓo Zùlúsàlɛ̀ɛ, kɛɛ Wálà-mìà lɛ́ o yía ó wɔ̃̀ kṹ o zɔ̃̀ɔ̃̀ ká. 32Yé aà kɛ kília, ḿm̀ lo nuù ka píé géli ká, yé lɛ Wálà wèèà-mɔ̀-wɔ̃̀ káa ká, tó m zì ɓɔ̀ ka píé e kília, áà m nìíì nù m là. 33Wálà lɛ́ è zò-yà-gé nɔ mia lɛ̀ɛ, é kɛ ka séĩ́ ka píé. É kɛ kíli.
Mann New Testament © Bible Society in Liberia, 1978.