Wólómà 13
13
Zí kɔ́áá wɔ̃́ kɛɛ̀á sɛ́lɛ́ wũ-là-mìà wéè káa
1Lɛ mia séĩ́ mɔ̀ ó wà sɛ́lɛ́ wũ-là-mìà wéè kɛ. Ƃii mia wũ-là-mì kɛ̀ɓe-wɔ̃̀ wá ɓe yé Wálà lɛ̀ɛ́ wéé nɛ́ à mɔ̀ɔ ká. Ɛ́ɛ̃́ mia wũ-là-mìà yé o ɓe dɛɛ káa, Wálà lɛ́ e o yà yia. 2Mi lɛ́ è lo gèlè gɔ̃ɔ̃̀ e là-mì káa, kɛɛ lɛ gèlè gɔ̃pìà pɛ lɛ́ Wálà aà sía ká. Mi lɛ́ è lo à kɛɛ̀ kília, kɛɛ lɛ nupìà mɛ̀ĩ́-sà-kàà-wĩĩ́ ká e dìè wũ mɔ̀. 3Ƃii mia líé-sí-mìà òó túó dà mi lɛ́ è wɔ̃́ yiè kɛ̀ɛ gé. Kɛɛ mi lɛ́ è wɔ̃́ yɔɔ kɛ̀ɛ, lɛ́ ò à dà à géa. Lɛ́ɛ̀ lo kɛɛ̀ i lɛ̀ɛ sɛ̀, yé ìí túó i zì wũ-là-mì lɛ̀ɛ ká? É kɛ̀á lɛ kília, ì wɔ̃́ mɔṹ lɛ́ lɛ sɛ̀ɛ kɛ. Ƃá kɛ̀á kília, lɛ́ɛ̀ lo i tɛ̀nɛɛ̀. 4Ƃii lɛ Wálà dìè zì yɛɓo-kɛ-mì ká i dìè-tĩ́ i zì wɔ̃́ yiè wɛ̃́ĩ̀. Kɛɛ í wɔ̃́ yɔɔ kɛ̀áa, ì túó à lɛ̀ɛ, ɓii làà-wɛ́lɛ́ɛ yɔ́lɔ̀ wá à ká ɓɔ̀ɔ. Lɛ Wálà là yɛɓo-kɛ-mì ká, áà lò Wálà zì wɔ̃́à-wàa-kɔ̀ ká píé mia lɛ́ ò wɔ̃́ yɔɔ kɛ̀ɛ o píé píé. 5Wɔ̃́ e kéa mɔ́ɔ̀ wɔ̃̀ mɔ̀ɔ, lɛ sɛ̀ ká ka wũ-là-mìà wéè kɛ. Ɛ́ɛ̃́ ye wá zeĩ́ Wálà zì wɔ̃́à-wàa-kɔ̀ doó wɛ̃́ĩ̀, kɛɛ lɛ ka zì zò píé kɛ̀ púlú wɛ̃́ĩ̀ kíli.
6Wɔ̃́ e kéa nì séĩ́ lɛ́ wa kɛ lɛ́ kà ɓo-pɛ̀ ɓoa. Ƃii yɛɓo lɛ́ mia wũ-là-mìàa ò kɛ̀ɛ, óò à kɛ̀ Wálà lɛ̀ɛ, yé o wɔ̃́ lɛ́ lɛ o mɔ̀ ó kɛɛ kɛpìàa ká. 7Yé lɛ kília, pɛ lɛ́ o séĩ́ ò bɛ̀i à mɔ̀ ó sɔ̀lɔ̀ ɓoa, kà nɔ o lɛ̀ɛ. Pɛlèe lɛ́ ò kã ka mɔ̀ ká ɓoaò, e bɛ̀i à yé ò kã ka mɔ̀ pɔɔ̀ e ka kɛ̀lɛ̀ɛ wɛ̃́ĩ̀a, kà séĩ́ ɓo. Kà túó mia lɛ́ ò bɛ̀i à mɔ̀ ó túó o lɛ̀ɛ lɛ̀ɛ, ɛ̃́ɛ̃́ kà ɓɛ̀lɛyà nɔ mia lɛ́ ò bɛ̀i à mɔ̀ ó ɓɛ̀lɛyà sɔ̀lɔ̀ ɓoa lɛ̀ɛ.
Zi kɔ́áá wɔ̃́ kɛɛ̀á ko kíe nì káa
8Yékɛ̀ mi dò là kèle é kɛ ka mɔ̀. Kèle nɔ́ è bɛ̀i à mɔ̀ é kɛ ka mɔ̀ɔ, lɛ́ ka lɔ̀-kpɔ̀ ka kíe nì mɔ̀ kèlè káa. Ƃii mi lɛ́ à yà-sɔ́nɔ́-mìà lɔ̀ è lo kpɔ́ɔ̀ à mɔ̀ɔ, kɛ aà wɔ̃́ lɛ́ Lɔ́ɔ̀ɔ a gèea kɛ. 9Lɔ́ɔ̀ɔ a gèe kélɛ̀, “Yékɛ̀ í wàà i ɓɛ́ĩ̀ gbɛɛ na píé kɛ́ì. Yékɛ̀ í mi zɛ. Yékɛ̀ í kã̀ã ɓo. Yékɛ̀ wɔ̃́ yɔɔ kɛ-lɔ̀ é i kɛ.” Wɔ̃́ lɛ́ Lɔ́ɔ̀ɔ a gèe e kéa séĩ́, é dàà ká à yé e tóa bàa, à séĩ́ lóò lɛ e kíe là lɔ́ɔ̀ doó e kéa yí, wáà gèè, “I yà-sɔ́nɔ́-mìà zì lɔ̀-kpɔ̀ i mɔ̀ɔ, lɛ à mɔ̀ é kɛ lɛ̀ zí i dìè lɔ̀ kpɔ́ɔ̀ lɛ à ká i mɔ̀ɔ lɛ́ ɓe.” 10Mi nɔ́ɔ fé lɛ́ à yà-sɔ́nɔ́-mìà lɔ̀ è lo kpɔ́ɔ̀ à mɔ̀ɔ, lɛ̀ɛ́ ló wɔ̃́ yɔɔ gbɛɛ kɛɛ̀ e ɓɛ́ɛ e kília ká. À mɔ́ɔ̀ wɔ̃̀ mɔ̀ɔ, lɔ̀-kpɔ̀à-mɔ̀ lɛ́ nɔ́ e Lɔ́ɔ̀ɔ séĩ́ kɛɛ̀ káa.
11Lɛ sɛ̀ ká wɔ̃́ e kéa kɛ, ɓii lúó lɛ́ lɛ à káa, káà dɔ. Lúó aà ɓɔ à mɔ̀, kɛ ká vùò yi bà. Ƃii lúó lɛ́ kò lo la-ɓo sɔ̀lɔ̀ ɓoò à káa, aà ɓɔ kɔ̀ɛ́ gbaa, é diá lúó lɛ́ ko ko zò dɔ à ká Wálà mɔ̀ɔ là. 12Bĩ́míà ɓɛ̀lɛ̀-píé aà ló gbèĩ, ɛ̃́ɛ̃́ lɛ̀-kpɛ̀iì aà ko kṹ nɔ́ kɔ̃̀ɛ̃̀ɛ̃̀ le. Kɔ̀à tèá gbaa wɔ̃́ lɛ́ lɛ bĩ́míà là pɛ káa kɛɛ̀ ká, kɔ́á gèlè-gɔ̃-pɔ̀ɔ̀ lɛ́ mia ò gèlè gɔ̃ à ká lɛ̀-fɔ̀nɔɔ̀ɔ káa sí. 13Kɔa zì wɔ̃́ kɛ-kɔ̀ è kɛ lɛ̀ zí wáá wɔ̃́ kɛɛ̀á, ɛ̃́ɛ̃́ lɛ̀ zí mia lɛ́ o lɛ̀-fɔ̀nɔɔ̀ɔ bàa waa káa lɛ́ ɓe. Yékɛ̀ kɔ́á kɛ kpílì yɔɔ kɛ-mìà ká. Yékɛ̀ kɔ́á tó yɔ kɔ̀ é die kɔa là. Yékɛ̀ kɔ́á kɛ sɔ̃̀ɔ̃ yɔɔ kɛ-mìà ká, ɛ̃́ɛ̃́ yékɛ̀ kɔ́á kɛ nɛ́ĩ̀ wà mànaà o zɛ-mìà ká. Yékɛ̀ kɔ́á gèlè gɔ̃. Yékɛ̀ kɔ́á dàa-gbe là kɛ. 14Kɛɛ kà ko Dàa-mì Zízɛ̀ Kɛ́lɛ̀ì là gèlè-gɔ̃-pɔ̀ɔ̀ɔ sí, ɛ̃́ɛ̃́ yékɛ̀ ká ka zò kɛ ka gbĩ-kpàla wɔ̃̀ píé, yékɛ̀ ká kɛ wɔ̃́ à nàà à káa kɛ-mìà ká.
Mann New Testament © Bible Society in Liberia, 1978.