Wólómà 11
11
Wálà e Éézɛ̀lɛ̀-mìà yéĩ̀ kṹ
1À mɔ́ɔ̀ wɔ̃̀ mɔ̀ɔ, ḿm̀ wɛ̃́ĩ́-lɔ̀ɔ kɛ̀ kélɛ̀, Wálà lɛ́ɛ̀ e wũ ɓo e dìè là míáa wì? Ye wá gbɛɛ ɓo kíli. Ƃii m dìè-tĩ́ m Éézɛ̀lɛ̀ mi ká. M Éɓɔ́lɔ́hã́ã̀ sùu là mì ká. Ɛ́ɛ̃́ zeĩ́, m góò lɛ Bɛ̃́zímà sùu là. 2Wálà lɛ̀ɛ́ e wũ ɓo nɛ́ mia lɛ́ aà o sí kpá líéa wì nɛ́. Kàá Wálà là kíía lɛ̀ yé Ìláyà e mɛ́ĩ́ ɓo yí Wálà lɛ̀ɛ Éézɛ̀lɛ̀-mìà gbĩ mɔ̀ɔ dɔ? 3A gèe kélɛ̀, “M Dàa-mì, waà ɓà dɔ̀-lé-là-mìà zɛ, ɛ̃́ɛ̃́ waà ɓà sálà-ɓòà-là-pɛ̀ɛ wí tã́ã̀ píé píé. M doó kpã́ã́ lɛ́ nɔ́ maà tóa. Ɛ́ɛ̃́ waa kɛ-zì naapìà ó m zɛ.” 4À là-nìɛ̀-wè kpɛɛ̀ lɛ́ Wálà a nɔ à lɛ̀ɛ? À là-nìɛ̀-wèa lɛ́ e kélɛ̀, “Maà mia wáá sálápèèlɛ lɛ́ òó gbini do kɛ̀ɛ̀-wɛ́lɛ́ lɛ́ ò si Béòa lɛ̀ɛ, pɛ̀ kɛ m dìè m lɛ̀ɛ.” 5Zi nɔ́ doóa lɛ́ laa ká pɛ́nɛɛ. Mia wɛ́lɛ́ ɓéĩ́ ɓɔ̀ɔ lɛ́ Wálà aà o sí e zì zò-kɛ̀-sɛ̀ɛ kolo là zàáa. 6É kɛ̀á à zì zò-kɛ̀-sɛ̀ɛ ye lɛ́ è o si à mɔ̀ɔ, kɛɛ ye wá mɔṹ wɔ̃́ wa kɛɛ mɔ̀. È gɔ̃̀á kɛɛ̀ kília, zò-kɛ̀-sɛ̀ lɛ̀ɛ́ gɔ̃̀ kɛɛ̀ gbɛɛ ɓo zò-kɛ̀-sɛ̀ ká.
7Mɛ́ e kɛ mɔṹ? Éézɛ̀lɛ̀-mìà òó gbaa pɛ́ o kɛ à naapìàa gɛ̃̀. Mia lɛ́ Wálà e o sía, lɛ́ wa gɛ̃̀ɛ. Kɛɛ mia yé o tóa, o zò píé kɛɛ̀ e kɛ à ká gbaa dímá-dìmà. 8Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké. “Wálà e o kɛ bíkɛ́-bìkɛ̀. Zéniía, e nyìɛ-wɛ̀lɛ̀ lɛ́ lɛ̀ɛ́ ló lɛ̀ gɛ̃̀ɛ, yà o mɔ̀. Ɛ́ɛ̃́ e tóó lɛ́ lɛ̀ɛ́ ló wɔ̃́ maàa, yà o mɔ̀ nɔ́ kíli. É tóá ká kíli, é ɓɔá pɛ́nɛɛ mɔ̀.” 9Dèɓé a gèe kélɛ̀,
“O zì kpílì lɛ́ ò kɛ̀ɛ, è kɛ pɛ́lɛ́ ɛ̃́ɛ̃́ líí ká o gɛ̀nɛ̀.
È o kɛ ó pèlè, ò kɛ wɔ̃́ nyɔ́ɔ̀ɔ gɛ̃̀-mìà ká.
10O nyìɛ è tilɛ̀ o wũ mɔ̀, yékɛ̀ ó lɛ̀ gɛ̃̀.
Ɛ́ɛ̃́ í o kɔ̃̀nɔ tã́ã̀ nɔ́ teele.”
11À mɔ́ɔ̀ wɔ̃̀ mɔ̀ɔ, ḿm̀ wɛ̃́ĩ́-lɔ̀ɔ kɛ̀ kélɛ̀, lɛ̀ Zúù-mìàa o sã́a, o pèlè o yí-sìè-zì píé? Gbàaò. Ye wá gbɛɛ ɓo kíli. Kɛ-wɔ̃̀ yɔɔ wa kɛɛ mɔ́ɔ̀ wɔ̃̀ mɔ̀ɔ, à mɔ́ɔ̀ la-ɓo aà mɔ́ɔ̀ nu ɓo sɛ́lɛ́ gbɛɛ yí-mìà píé, kɛ é Zúù-mìà kɛ kɛɛ ó dàa-gbe-là kɛ o gbĩ mɔ̀. 12Zúù-mìà zì kɛ-wɔ̃̀ yɔɔ lɛ́ wa kɛɛ, e nu lúà kpɔ̀-mia-mɔ̀ kpànazɛ̀ ká kpóṹ là zèe. Ɛ́ɛ̃́ o zì kɔ̃̀-wɔ̃́-mɔ̀ kolo là zàáa, a kɛ lúà e kpɔ́ sɛ́lɛ́ gbɛɛ yí-mìà mɔ̀ kpànazɛ̀. Yé lɛ mɔṹ kília, yé Zúù-mìà lé paàa zɛ̀ waà dà o bàa, zi sùu kpɛɛ̀ lɛ́ lúà kpɔ́ɔ̀ áá kɛɛ̀á mia mɔ̀ yí gbùò zɛ̀ ké.
Sɛ́lɛ́ gbɛɛ yí-mìà zì la-ɓo
13Wéé m̀ ɓoa, ḿm̀ ɓo gbaa sɛ́lɛ́ gbɛɛ yí-mìà ka lɛ̀ɛ. Yé nɔ́ m tĩã́ àpɔ́sɔ̀lɔ̀ ká sɛ́lɛ́ gbɛɛ yí-mìà lɛ̀ɛ, ḿm̀ lo m̀ yɛɓoa ɓɔ́-kpɔ́ yàà. 14Ḿ ɓɔ́-kpɔ́ yàáa, lɛ́ɛ̀ lo lèĩ fɔ̃̀ɔ̃́-là kɛɛ̀ dàà mia lɛ́ kò ye nì kò go sɛ́lɛ́ doó yía o gé, tó máà o dò là. 15Lɛ̀ Wálà e e wũ ɓo o wìa, kpóṹ là mìà wà Wálà nì o li gbaa. Yé Wálà aà e kɔ̀ yà o wìa, zi sùu kpɛɛ̀ lɛ́ è lo kɛɛ̀ à ká? Áá kɛɛ̀ kɛ̀ɓe ká ga-mìà lɛ̀ɛ.
16Yé waà belè-kpuú ɓo à líé waà nɔ Wálà lɛ̀ɛ, à kpo yé e tóa lɛ là pɛ ká nɔ́ kíli. Ɛ́ɛ̃́ yé waà yílí gáná lɛ́ a wìa nɔ Wálà lɛ̀ɛ, kɛɛ à kɔ̀ nì lɛ là pɛ ká nɔ́ kíli. 17Ɔ́lè-yìlìa waà à kɔ̀ dò yɛ́ à mɔ̀, waà ɔ́lè-yìlì yé e kɛ dɔ̀á luú ɓɔ̀ɔ mɔ̀ɔ, waà à kɔ̀ sí, wáà gbɛ̃̀ à yɛ́pìà. Ɔ́lè-yìlì yé e kɛ dɔ̀á luú ɓɔ̀ɔ mɔ̀ɔ, à kɔ̀ɔ lɛ́ e mia lɛ́ ka sɛ́lɛ́ gbɛɛ yí-mìà káa káa. Kɛɛ dɛɛ káa, kà ɔ́lè-yìlìa nì ka gáná aà kɛ gbaa doó, ɛ̃́ɛ̃́ ka gbaa à yí-yìì dɔ́ɔ́lɔ́ mipìà. 18À mɔ́ɔ̀ wɔ̃̀ mɔ̀ɔ, yékɛ̀ í lé-gbùò-là kɛ à kɔ̀ yé à yɛ́ɛ̀ lɛɛ mɔ̀. Í lé-gbùò-là kɛ̀áa, ì à yí dɔ kélɛ̀ ɓi wáá ká kɛ í kɛ dɔpìà ɔ́lè-yìlìa gáná là, kɛɛ à ye lɛ́ yee è dɔ i làa.
19Kɛɛ íì lo à gèeè kélɛ̀, “À kɔ̀ɔ e yɛ́ kɛɛ m gbɛ̃̀pìà é kɛ ɓe à mɔ̀.” 20Lɛ kíli. O o yɛ́ à mɔ̀, ɓii zò-dɔ̀à-mɔ̀ lɛ̀ɛ́ gbaa kɛ o yí. Kɛɛ ɓie i dɔɔ̀ lɛ i dɔ̀lɔ̀ mɔ̀, ɓii zò-dɔ̀à-mɔ̀ kɛ̀ i yía mɔ́ɔ̀ wɔ̃̀ mɔ̀. Kɛɛ yékɛ̀ í i dìè sí gbùò à mɔ́ɔ̀ wɔ̃̀ mɔ̀, kɛɛ ì túó. 21Ƃii yé Wálà lɛ̀ɛ́ gbaa yílía dìè-tĩ́ kɔ̀ yéĩ́ yea, ɓáà yí dɔ lɛ́ɛ̀ lo ɓie i yéĩ́ yeè? 22Zi lɛ́ Wálà sɔ̃̀ɔ̃ lɛ mia ká sɛ̀, ɛ̃́ɛ̃́ zi lɛ́ è mia kũá gágàa, káà gɛ̃̀. Lɛ́ɛ̀ mia lɛ́ o pèleè lɛɛ kũ gágà. Kɛɛ à sɔ̃̀ɔ̃ lɛ sɛ̀ i ká, yé ɓaà tó à zì sɔ̃̀ɔ̃-kɛ̀-sɛ̀ɛ píéa ká. Í gɔ̃̀á à kɛɛ̀ kília, óò lo nɔ́ ɓi bɛ̃̀ɛ̃ i kã́ã̀ nɔ́ kíli. 23Kɛɛ yé waà gó zi lɛ́ ò to à píéa píé, lɛ́ zò-dɔ̀à-mɔ̀ aà kɛ o yía, óò lo o gbɛ̃̀ɛ̃̀ o mɛ̀ĩ́ lɛ̀ lɛ́ o kɛ yía mɔ̀. Ƃii Wálà lɛ́ɛ̀ bɛ̀i à mɔ̀ é o gbɛ̃̀ o gbɛ̃̀pìà zeĩ́. 24Mia lɛ́ ka sɛ́lɛ́ gbɛɛ yí-mìà káa, o ka yɛ́ ɔ́lè-yìlì yé e kɛ dɔ̀á luú ɓɔ̀ɔ mɔ̀ɔ mɔ̀. Ye lɛ́ o ka sí, o ka gbɛ̃̀ ɔ́lè-yìlì yé wa taa mɔ̀ɔ. Kɛɛ wɔ̃́ lɛ́ à kɛɛ̀ lɛ ɔ́lè-yìlìa káa, mi làá kɛ do. Yé lɛ kília, áá kɛɛ̀ dóo lɔ́ɔ́-lɔ̀ɔ̀ Wálà mɔ̀ é Ɔ́lè-yìlìa dìè-tĩ́ kɔ̀ɔ sí, á gbɛ̃̀ e mɛ̀ĩ́ e dìè-tĩ́ yìlì mɔ̀.
Wálà à mia yéĩ̀ kṹũ̀ lɛ mia séĩ́ wɛ̃́ĩ̀
25M lèe-gé vɔ̀, ḿm̀ nàà ká wɔ̃́ e kéa yí ma, ɓii yékɛ̀ ká ka dìè sí gbùò. Lɛ pɛ́ à bĩ̀ĩĩ̀ e kɛáa ká. Ye lɛ́ e ké ɓɛ. Kɛ̀ dímá-dìmà kɔ̀ lɛ́ Éézɛ̀lɛ̀-mìà waa káa, lɛ̀ɛ́ ló tóò nɔ́ kíli teele. Lɛ́ɛ̀ lo tóò nɛ́ kíli sɛ́lɛ́ gbɛɛ yí-mìà nyáá pà-kíe-mɔ̀ zɛ̀ ó nu Wálà píé. 26Zi lɛ́ Éézɛ̀lɛ̀-mìà séĩ́ laà è lo kɛɛ̀áa, ye lɛ́ ɓɛ. Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké.
“Mia La-mìa lɛ́ɛ̀ lo góò Záyɔ̃̀-pɛlɛí.
Lɛ́ɛ̀ lo wɔ̃́ yɔɔ kɛɛ̀ séĩ́ ɓoò Zékɔ̀ sùu là mìà fĩ̀ã̀.
27Kò ye nì ko wè kò lo à dɔɔ̀ yé maà o kɛ-wɔ̃̀ yɔɔ ɓo o wũ mɔ̀ɔ káa, ye lɛ́ ɓɛ.”
28É ló é gbɛ̃̀á wɔ̃́ làṹ yièa mɔ̀ɔ, Zúù-mìà o Wálà dàa-gbe ká ka mɔ́ɔ̀ wɔ̃̀ mɔ̀. Kɛɛ Wálà zì mia síì yía, o Wálà là lɔ̀-kɛ̀á-mìà ká o dàa nì bɛ̃̀ɛ̃ zì dàa nì mɔ́ɔ̀ wɔ̃̀ mɔ̀. 29Wálà lɛ̀ɛ́ e zì yɛ́lɛ́-táá mɛ́ vɔ̀ɔ mi lɛ́ aà súo kɛ, ɛ̃́ɛ̃́ lɛ́ aà nɔ̀-lɛ̀ɛ-pɛ̀ nɔ à lɛ̀ɛ ɓɔ̀ɔ wɛ̃́ĩ̀. 30Kàá gbaa Wálà wéè kɛ bèĩ-bèĩzɛ̀. Kɛɛ dɛɛ káa, Wálà aà ka yéĩ̀ kṹ, ɓii Zúù-mìà òó gbaa Wálà wéè kɛɛ wɛ̃́ĩ̀. 31Zi nɔ́ doóa káa, Zúù-mìà òó Wálà wéè kɛ gbaa dɛɛ ká. Óò à kɛ̀ kíli kɛɛ Wálà é o bɛ̃̀ɛ̃ o yéĩ̀ kṹ gbaa, lɛ̀ zí e ka yéĩ̀ kṹáa lɛ́ ɓe. 32Ƃii Wálà wéè tóò lɛ kélɛ̀ bĩ́-kà lɛ́ ɓe. Wálà aà mia séĩ́ wàà à wì, kɛ é e zì mia yéĩ̀ kṹũ̀ zɔ̃̀ɔ̃̀ o séĩ́ o lɛ̀ɛ.
Kɔ̀à Wálà tɔ́ ɓɔ
33Zi sùu kpɛɛ̀ zɛ̀ lɛ́ Wálà zì kɛ̀-kpànazɛ̀-kɔ̀, ɛ̃́ɛ̃́ à zì gíkã́, e bɛ̀i là wɔ̃́ yí-dɔ-kɔ̀ lɛ à ká yí gbùò zɛ̀ ké. Dé è bɛ̀i à mɔ̀ é Wálà zì wɔ̃́ à yà e gé á kɛɛ yí ɓo? Dé è bɛ̀i à mɔ̀ é à zì kɛ-kɔ̀ dɔ?
34“Dé è wɔ̃́ lɛ́ e ko Dàa-mì géa dɔ?
Deĩ̀ lɛ́ aà gíkã́ zɔ̃̀ɔ̃̀ do à lɛ̀ɛ?
35Deĩ̀ lɛ́ aà pɛ nɔ do Wálà lɛ̀ɛ kɛ á kèlè ɓo?”
36Ƃii pɛ séĩ́ kpɔ́ɔ̀ e kɛá Wálà kɔ̀ yí. Ɛ́ɛ̃́ pɛ séĩ́ lɛ ɓe à tɔ́ yí zàá, ɛ̃́ɛ̃́ lɛ zeĩ́ là pɛ ká. Wálà é tɔ́-ɓɔ sɔ̀lɔ̀ ɓo tòá kíli ká. É kɛ kíli.
Mann New Testament © Bible Society in Liberia, 1978.