Gɛ̀lésìà 3

Lɔ́ɔ̀ ɛ̃́ɛ̃́ zò-dɔ̀à-mɔ̀

1Gɛ̀lésìà-mìà, ka yí gínià lɛ. Dé e sɛ̀ɛɛ̀ kpɔ́ ka mɔ̀? Ka mia lɛ́ o Zízɛ̀ Kɛ́lɛ̀ì zì gá a ɓo kɔ́lɔ́sì mɔ̀ɔ wɔ̃̀ yí ɓo ka lɛ̀ɛ e yí púlú zɛ̀ ká ka nyìɛ mɔ̀ɔ káa ká. 2Kà wɔ̃́ doó e kéa gèe m lɛ̀ɛ. Wɔ̃́ lɛ́ Lɔ́ɔ̀ɔ à gèea kɛɛ̀ kolo là lɛ́ ka Wálà zì Gɛ̀ɛ̀ gɛ̃̀ɛ? Ɛ́ɛ̃́ kɛ̀ wɔ̃́ làṹ yièa maà tó káà ka zò dɔ̀ à mɔ̀ɔ lɛ? 3Mɛ́ e kɛ lɛ́ ka bè zɛ̀ ké? Ka gbɛ̃̀ wɔ̃́ kɛɛ̀ ká Wálà zì Gɛ̀ɛ̀ kpáá yí. Káà nàà ká wɔ̃́ kɛɛ̀ léĩ́ tó gbaa ka dìè zì yíkɛ̀ gáàa ká? 4Káà nàà ká gèe kélɛ̀ wɔ̃́ séĩ́ lɛ́ ka die à yía, lɛ wɔ̃́ dà tã́ã̀ zɛ̀ ká? E kɛ wɔ̃́ dà tã́ã̀ zɛ̀ ká nɔ́ ɓɔ̀ɔ? 5Wɔ̃́ lɛ́ Lɔ́ɔ̀ɔ à gèea kɛɛ̀ lɛ́ Wálà à mɔ́ɔ̀ Gɛ̀ɛ̀ Púlú nɔ ɓo ka lɛ̀ɛ, ɛ̃́ɛ̃́ lɛ́ à mɔ́ɔ̀ wɔ̃́ kpàlézɛ̀ kɛ ɓo ka fĩ̀ã̀a? Ɛ́ɛ̃́ wɔ̃́ làṹ yièa má ka ɓo lɛ́ ka ka zò dɔ à mɔ̀ɔ lɛ?

6Zí e kɛá Éɓɔ́lɔ́hã́ã̀ káa lɛ́ ɓɛ. “E e zò dɔ Wálà mɔ̀. À zì zò-dɔ̀à-mɔ̀ e kília kolo là zàáa, Wálà a sí gbaa é kɛ mi kpeĩ ká.” 7Kà à yí dɔ kélɛ̀ mia lɛ́ zò-dɔ̀à-mɔ̀ lɛ o yía, lɛ́ o Éɓɔ́lɔ́hã́ã̀ sùu-là-mìà kpó-kpó káa. 8Wálà kiia a zɔ̃̀ɔ̃̀ bèĩzɛ̀ mɔ́ kélɛ̀ Wálà lɛ́ɛ̀ lo sɛ́lɛ́ gbɛɛ yí-mìà kɛɛ̀ kpeĩ e dìè lɛ̀ɛ o zì zò-dɔ̀à-mɔ̀ kolo là zàá. Lɛ̀ e kɛ kília, Wálà kiia e wɔ̃́ làṹ yièa gèe mɔ́ bèĩzɛ̀ Éɓɔ́lɔ́hã́ã̀ lɛ̀ɛ weeá kélɛ̀, “Mia séĩ́ lɛ́ o kpóṹ làa, Wálà lɛ́ɛ̀ lo lúà kpɔ́ɔ̀ o mɔ̀ i tɔ́ yí zàá.” 9Zò-dɔ̀à-mɔ̀ e kɛ Éɓɔ́lɔ́hã́ã̀ yí. Lúà kpɔ́ɔ̀ e kɛá à mɔ̀. À mɔ́ɔ̀ wɔ̃̀ mɔ̀ɔ, mia séĩ́ lɛ́ zò-dɔ̀à-mɔ̀ lɛ o yía, lúà kpɔ́ɔ̀ lɛ o mɔ̀ lɛ̀ zí e kɛ à ká à mɔ̀ɔ lɛ́ ɓe.

10Mia lɛ́ o zò dɔɔ̀ lɛ Lɔ́ɔ̀ɔ kũ̀ tã́ã̀ wɔ̃̀ mɔ̀ɔ, náá lɛ o mɔ̀. Ƃii à bɛ̃̀ɛ̃ɛ̃̀ lɛ Wálà kiia yí weeá kélɛ̀, “Mi nɔ́ɔ fé lɛ́ lɛ̀ɛ́ wɔ̃́ séĩ́ lɛ́ à bɛ̃̀ɛ̃ɛ̃̀ lɛ Lɔ́ɔ̀-kiia yía kṹ tã́ã̀ teelea, náá lɛ à mɔ̀.” 11Dɛɛ ká gbaa, lɛ dóo séŋé-sèŋè kélɛ̀ mi gbɛɛ kɛɛ̀ wá kpeĩ Wálà lɛ̀ɛ Lɔ́ɔ̀ɔ kolo là zàá, ɓii “Mi lɛ́ à zì zò-dɔ̀à-mɔ̀ kolo là zàáa lɛ Wálà lɛ̀ɛ kpeĩa, lɛ́ɛ̀ lo kɛ̀ɓe sɔ̀lɔ̀ ɓoò.” 12Kɛɛ Lɔ́ɔ̀ɔ zò dɔɔ̀ wá zò-dɔ̀à-mɔ̀ mɔ̀. Kɛɛ “Mi nɔ́ɔ fé lɛ́ è wɔ̃́ lɛ́ Lɔ́ɔ̀ɔ à gèea kɛ̀ɛ, lɛ́ɛ̀ lo kɛɛ̀ ɓe Lɔ́ɔ̀ɔ yí zàá.”

13Kɛɛ Kɛ́lɛ̀ì aà ko la náá lɛ́ Lɔ́ɔ̀ɔ è nu à káa kɛ̀lɛ̀. Aà náá e kília sí e mɔ̀ gbaa ko lɛ̀ɛ. Ƃii à bɛ̃̀ɛ̃ɛ̃̀ lɛ Wálà là kíía yí kélɛ̀, “Mi nɔ́ɔ fé lɛ́ ò dũ yílí mɔ̀ɔ, náá lɛ à mɔ̀.” 14Kɛ́lɛ̀ì a kɛ kíli kɛɛ lúà lɛ́ Wálà e e wè dɔ à ká Éɓɔ́lɔ́hã́ã̀ lɛ̀ɛ, kɛɛ à nɔɔ̀ é kɛá sɛ́lɛ́ gbɛɛ yí-mìà lɛ̀ɛ Kɛ́lɛ̀ì Zízɛ̀ yí zàá, kɛɛ zò-dɔ̀à-mɔ̀ yí zàáa kó Gɛ̀ɛ̀ Púlú lɛ́ Wálà e e wè dɔ à káa sɔ̀lɔ̀ ɓo.

Lɔ́ɔ̀ɔ wà wè-dɔ-wèa

15M lèe-gé vɔ̀, ḿm̀ lo wɔ̃́ gɔ̃̀á lɛ́ à gbɛ̃̀ɛ̃̀ lɛ mia kɛ-kɔ̀ mɔ̀ɔ zɔ̃̀ɔ̃̀ ka lɛ̀ɛ. Yé mia pèèlɛ waà wéé wɔ̃́ mɔ̀, lɛ́ waà kii kɛ wɔ̃́ e kília mɔ́ɔ̀ wɔ̃̀ mɔ̀ɔ, mi gbɛɛ lɛ̀ɛ́ bɛ̀i wɔ̃́ lɛ́ wa mɔ́ɔ̀ kii kɛ kília yí sìè, ɛ̃́ɛ̃́ kɛ bɛ̃̀ɛ̃ é à là kpɔ́ zi nɔ́ɔ fé ká. 16Kɛɛ Wálà e e wè dɔ Éɓɔ́lɔ́hã́ã̀ wà e sùu-là-mì lɛ̀ɛ. Wálà kiia lɛ̀ɛ́ à gèe Wálà e e wè dɔ Éɓɔ́lɔ́hã́ã̀ wà e sùu-là-mìà lɛ́ e kélɛ̀ mia kù gbùò zɛ̀ɛ lɛ̀ɛ. Kɛɛ lɛ́ɛ̀ à gèe sùu-là-mì, lɛ́ e mi doó káa lɛ̀ɛ. Mi doó e kília lɛ́ e Kɛ́lɛ̀ì káa. 17Wɔ̃́ m̀ gèea gɛ̃̀ e ké. Wálà e e wè dɔ, ɛ̃́ɛ̃́ e à gèe kélɛ̀ lɛ́ɛ̀ lo ɓɔɔ̀ e wè-dɔ-wèa mɔ̀. Lɔ́ɔ̀ lɛ́ e nu kɛɛ kɛ̀ɛ̀ aà die wè-dɔ-wè e kília là wũ yììsɛ là vũ̀ yààkaa, lɛ̀ɛ́ bɛ̀i wè-dɔ-wè e kília yí sìè, ɛ̃́ɛ̃́ kɛ é kɛ wɔ̃́ dà tã́ã̀ zɛ̀ ká bɛ̃̀ɛ̃. 18Ƃii è kɛ̀á pɛ lɛ́ Wálà è à nɔɔ lɛ́ɛ̀ nu Lɔ́ɔ̀ɔ mɔ́ɔ̀ wɔ̃̀ mɔ̀ɔ, kɛɛ lɛ̀ɛ́ nu mɔṹ à wè a dɔɔ wɛ̃́ĩ̀. Kɛɛ Wálà a nɔ Éɓɔ́lɔ́hã́ã̀ lɛ̀ɛ, ɓii aà e wè dɔ à ká kília mɔ́ɔ̀ wɔ̃̀ mɔ̀.

19Yé aà kɛ kília, mɛ́ e Lɔ́ɔ̀ɔ kɛ-yɛ̀ɓo ká? O nu Lɔ́ɔ̀ɔ ká kɛ é zi lɛ́ wɔ̃́ yɔɔ kɛɛ̀ lɛ à káa zɔ̃̀ɔ̃̀. E kɛ à mɔ̀ Lɔ́ɔ̀ɔ é tó ɓe é tóá kíli Éɓɔ́lɔ́hã́ã̀ sùu-là-mì lɛ́ o o wè e kília dɔ à lɛ̀ɛ é nu. Wálà là vɔ-mìà lɛ́ o Lɔ́ɔ̀ɔ nɔ tã́ã̀ zèea. Gɔ̃ doó e kɛ yí gbɛ̃̀-fĩ̀ã̀ kɛ-mì ká. 20Kɛɛ òó naa gbɛ̃̀-fĩ̀ã̀ kɛ-mì ká yé mí è wɔ̃́ kɛ̀ɛ lɛ doóa ká. Wálà lɛ nɔ́ doó.

Pɛ́ Lɔ́ɔ̀ɔ lɛ à wɛ̃́ĩ̀ ɓea

21À yí lɛ́ e kélɛ̀, Lɔ́ɔ̀ɔ lɛ́ɛ̀ gèlè gɔ̃ Wálà zì wè-dɔ-wè nìa ká? Ye wá kíli gbɛɛ ɓo. Ƃii è kɛ̀á lɔ́ɔ̀ lɛ́ è nu kɛ̀ɓe ká mia lɛ̀ɛ waà nɔɔ, bɛ̀i áá kɛɛ̀ mia mɔ̀ tó wáà kɛ̀ kpeĩ Wálà lɛ̀ɛ lɔ́ɔ̀ɔ kolo là zàá. 22Kɛɛ Wálà kiia aà gèe kélɛ̀ kpóṹ là zèe séĩ́ lɛ kɛ-wɔ̃̀ yɔɔ là yíkɛ̀ gáàa wì, kɛɛ nɔ̀-lɛ̀ɛ-pɛ̀ lɛ́ Wálà e e wè dɔ à ká lɛ́ à gã̀ gbɛ̃̀ɛ̃̀ lɛ zò-dɔ̀à-mɔ̀ là Zízɛ̀ Kɛ́lɛ̀ì yía, kɛɛ à nɔɔ̀ é kɛá mia lɛ́ zò-dɔ̀à-mɔ̀ lɛ o yía lɛ̀ɛ.

23Kɛɛ zò-dɔ̀à-mɔ̀ zì lúó é tĩã́ ɓɔɔ̀ɔ, ko kɛ lɛ̀ pɛ lɛ́ ko bĩ́-kɛ̀ì, tó Lɔ́ɔ̀ɔ áà e nyìɛ kɛ̀ ko mɔ̀ teele é tóá kíli zò-dɔ̀à-mɔ̀ e ké, lɛ́ e kɛ nupìàa, lɛ́ɛ́ é ɓo à là. 24À mɔ́ɔ̀ wɔ̃̀ mɔ̀ɔ, ko kpɔ́ɔ̀ e kɛá Lɔ́ɔ̀ɔ kɔ̀ là teele é tóá kíli Kɛ́lɛ̀ì é nu kɛɛ ko kɛɛ̀ é kɛá kpeĩ Wálà lɛ̀ɛ zò-dɔ̀à-mɔ̀ kolo là zàá. 25Lɛ̀ mɔṹ lɛ́ zò-dɔ̀à-mɔ̀ zì lúó aà ɓɔɔ, ko kpɔ́ɔ̀ wá gbaa Lɔ́ɔ̀ɔ kɔ̀ là.

26Zò-dɔ̀à-mɔ̀ kolo là zàá lɛ́ ka séĩ́ ka Wálà gbe nì ká, kà Kɛ́lɛ̀ì Zízɛ̀ nì ka kɛ̀ doó kolo là zàáa. 27Míá ka bàtáì kɛɛ̀ lɛ, tó áà kɛ̀ kà Kɛ́lɛ̀ì nì káà kɛ̀ doóa, kaà Kɛ́lɛ̀ì dà ka mɔ̀ sɔ ká. 28À mɔ́ɔ̀ wɔ̃̀ mɔ̀ɔ, mia kɛ̀ doò do zì gbɛɛ wá ɓe Zúù-mìà wà sɛ́lɛ́ gbɛɛ yí-mìà, ɛ̃́ɛ̃́ lùò vɔ̀, e bɛ̀i mia yé o wá lùò káa o fĩ̀ã̀, e bɛ̀i gɔ̃ã̀ wà loà nì o fĩ̀ã̀ nɔ́ kíli. Ka séĩ́-séĩ́ ka doó kà Kɛ́lɛ̀ì Zízɛ̀ nì ka zì kɛ̀ doó yí zàá. 29É kɛ̀á Kɛ́lɛ̀ì là pɛ lɛ́ e ka káa, kɛɛ ka mɔṹ Éɓɔ́lɔ́hã́ã̀ sùu-là-mìà ká. Ɛ́ɛ̃́ káà lo pɛ lɛ́ Wálà e e wè dɔ à káa gɛ̃̀ɛ̃̀.

Currently Selected:

Gɛ̀lésìà 3: MNT

Highlight

Compare

Copy