Àpɔ́sɔ̀lɔ̀ 20
20
Pɔ́ɔ̀ e ló Masèdónà wà Gílíì
1Lɛ̀ lɛ́ wééa e tèá gbaa, Pɔ́ɔ̀ e e ɓɛ́ĩ̀ Wálà-mìà súo kɛ o kíe là. E o fã̀ã́-wàà-wè gèe o lɛ̀ɛ. E o làapíé dà gbaa. Lɛ̀ e kɛ kília, e gó gbaa o píé, áà lò Masèdónà. 2E ló gbaa sɛ́lɛ́ e kília yí píé, áà mia fã̀ã́-wàà-wè búnù-búnùzɛ̀ gèè mia lɛ̀ɛ. Lɛ̀ e kɛ kília, e nu gbaa Gílíì. 3E kɛ yí mɛnɛ yààka píé. E kɛ gbaa e dìè pɛ̀ kɛpìà kɛ é yà gɔɔ yí é ló Sílìà, lɛ̀ lɛ́ a yí dɔ kélɛ̀ Zúù-mìà o kɛ wààpìà à kìlì yía ká. A naa gbaa é táá tã́ã̀ é die Masèdónà kɛ é ló e mɛ̀ĩ́. 4Sòpétà lɛ́ è go Bòlíà, lɛ́ ò à dàa si Pélɔ̀ɔ, wà Pɔ́ɔ̀ o ló. E bɛ̀i, Alèsákà wà Sèkṹdà lɛ́ ò go Tɛsàlònákàaò, ɛ̃́ɛ̃́ Géyà lɛ́ è go Dábèa, wà Témɔ́tè, ɛ̃́ɛ̃́ zeĩ́ Tíkíkà wà Tɔ́lɔ́fímà, lɛ́ o kɛ Ésìà-mìà káa, wà Pɔ́ɔ̀ nì o ló nɔ́ kíli. 5O ló líé, o yà ko gɛ̀nɛ̀ Tólóyà pɛlɛí. 6Lɛ̀ belè lɛ́ belè-fɔ̀ɔ-pɛ̀ wá à bàa, zì Kpílì lúóa e diea, ko yà gɔɔ yí ko gó Félépà. Lɛ̀ lúó sɔ́ɔ́li e diea, ko dà gbaa o bà Tólóyà. Ko kɛ yí lɔ́ɔ́ doó píé.
Pɔ́ɔ̀ zì ɓɔ̀-mia-píé Tólóyà líé-nyɛ-mɔ̀
7Lɛ̀ lúó bèĩzɛ̀ lɛ́ e lɔ́ɔ́ yía e ɓɔɔ, ko pá ko kíe mɔ̀ kɛ kó Wálà là léɓèlèa ɓèlè. Pɔ́ɔ̀ e mɛ́ĩ́ ɓo bĩ́míà e kília ká. Lɛ̀ e kɛ à mɔ̀ kɛ é ló à lɛ̀-kpɛ̀iì káa, e tó mɛ́ĩ́ ɓopìà e tóá kíli bĩ́míà zèí e ɓɔ. 8Nábò búnùzɛ̀ e kɛ lɛ̀í-kà lɛ̀ yé ko páà e kɛá ko kíe mɔ̀ yia lɛ̀ mɔ̀. 9Gɔ̃-nɛ̀ lɛ́ ò si Yútékàa, e kɛ yàá lɛ̀í-kà e kília wénò là. Lɛ̀ Pɔ́ɔ̀ e kɛ lópìà e líé wɔ̃́ gèeè káa, Yútékà e gbɛ̃̀ áà yi zɛ̀ e wũ ká. Lɛ̀ e kɛ gbaa kília, yi-kɔ̀ e die gbaa ká. E gó gbaa lɛ̀í-kàa à kpolà yààka zɛ̀ɛ wénòa là, e dà tã́ã̀. Lɛ̀ o o kɔ̀ wàà à wìa, kɛɛ aà ga. 10Kɛɛ Pɔ́ɔ̀ e ló tã́ã̀, e wí à mɔ̀, e e kɔ̀ sɔ̃́ à bĩ̀ĩ̀. Pɔ́ɔ̀ a gèe kélɛ̀, “Yékɛ̀ ka zò é dà zízàá. Lɛ tĩã́ ɓéèe.” 11Lɛ̀ e kɛ kília, Pɔ́ɔ̀ e ló e mɛ̀ĩ́ lɛ̀í-kàa yí, o Wálà là belèa ɓèlè. Lɛ̀ e kɛ kília, Pɔ́ɔ̀ e ɓèlè-pɛ̀ gbɛɛ ɓèlè zeĩ́. Lɛ̀ e kɛ kília, wà ye nì o tó wéépìà ɓɛ̀lɛ̀-píé gbèkèni zɛ̀, e tóá kíli lɛ̀ e kpɛ̀i. Lɛ̀ e kɛɛ, Pɔ́ɔ̀ e là ló ɓo gbaa. 12Lɛ̀ e kɛ kília, o gɔ̃-nɛ̀fú e kília sí, o ló à ká e píé kɛ́ì e ɓéèe ká. O zò yàaà e kɛá kpó-kpó ɓo gbaa.
O gó Tólóyà, o ló Màlétà
13Ko dɔ líé ko ló gɔɔ yí, ko ló gbaa Ásɔ̀. À lɛ̀ mɔ̀ lɛ́ ko kɛ lópìà Pɔ́ɔ̀ síì yia. A gèe ko lɛ̀ɛ kó à kɛ kíli, ɓii a naa é táá tã́ã̀ é ló à lɛ̀ mɔ̀. 14Lɛ̀ e gbɛ̃̀ ko mɔ̀ Ásɔ̀ɔ, kɔa yà gbaa gɔ́ɔ́ɔ yí, kò ye nì ko ló gbaa Mitìlínì. 15Ko gó yi gɔ́ɔ́ɔ ká, ko ló ko ɓɔ gbaa Káyà à lɛ̀-kpɛ̀iì ká. Lɛ̀ lúó doó e diea, ko ɓɔ gbaa Sémɔ̀. À lúó tò-ko-mɔ̀ zɛ̀ɛ, ko ɓɔá gbaa Màlétà. 16Pɔ́ɔ̀ aà yà e gé kɛ é tó gɔ́ɔ́ɔ yí, é Ɛ́fɔ́sɔ̀ mɛ́ kpɔ́ à ká, ɓii yékɛ̀ é lúó káá tã́ã̀ Ésìà. E kɛ wɔ̃́ kɛpìà tíè-tíèe, kɛɛ wɔ̃́ kɛ-zì é kɛ̀á ɓea, é ɓɔ Zùlúsàlɛ̀ kɛɛ Pɛ̃́tékɔ̀ lúó é tĩã́ ɓɔɔ̀.
Pɔ́ɔ̀ e mia làapíé-dà-wè gèe mia dìè-dìè vɔ̀ lɛ́ ò go Ɛ́fɔ́sɔ̀ɔ lɛ̀ɛ
17Lɛ̀ Pɔ́ɔ̀ e kɛ Màlétàa, e wè-vɔ dɔ Wálà-mìà lɛ́ o kɛ Ɛ́fɔ́sɔ̀ɔ o píé, mia dìè-dìè vɔ̀ lɛ́ o kɛ yía o súo kɛɛ̀ ká. 18Lɛ̀ o ɓɔ à mɔ̀ɔ, Pɔ́ɔ̀ a gèe o lɛ̀ɛ kélɛ̀, “É kã́ lúó lɛ́ m m gã̀-kpo gbɛ̃̀á Ésìàa mɔ̀ɔ, zi lɛ́ m zì kɛ-kɔ̀ e kɛá ka bà yia, káà à dɔ. 19M kɛ yɛɓo kɛpìà ko Dàa-mì lɛ̀ɛ dìè-sì-péĩ́ ká, tó m nyìɛ-yíí áà kàà à kɛɛ̀ yí. M kɛ yɛɓoa kɛpìà zí e kéa ká kíli wàa lɛ́ à kpɔ́ɔ̀ e kɛá m mɔ̀ wàà lɛ́ Zúù-mìà wa ɓo m kílí yía mɔ́ɔ̀ wɔ̃̀ mɔ̀. 20Káà yí dɔ kélɛ̀ m̀ḿ gbaa gbũ̀-ka-mɔ̀ pɛ̀ nɔ́ɔ fé bĩ̀ĩ̀ ka mɔ̀ lɛ̀ m kɛ wɔ̃́ gèepìà, tó máà pɛ zɔ̃̀ɔ̃̀ ka lɛ̀ɛ mia nyìɛ mɔ̀, ɛ̃́ɛ̃́ ka dìè-tĩ́ ka píé kɛ́ì píéa ká. 21M kɛ wɔ̃́ nɔ́ doóa gèepìà Zúù-mìà wà sɛ́lɛ́ gbɛɛ yí-mìà o lɛ̀ɛ. M kɛ lìè-wè dɔpìà o lɛ̀ɛ kélɛ̀ lɛ o mɔ̀ ó o sɔ̃̀ɔ̃ yɔɔ mɛ́ vɔ̀ɔ, ó nìɛ̀ Wálà píé, ɛ̃́ɛ̃́ ó o zò dɔ ko Dàa-mì Zízɛ̀ mɔ̀. 22Gɛ̀ɛ̀ Púlú zì tíé kpàà m là yí zàáa, ye gɛ̃̀, m̀ mɔ́ɔ̀ ló ɓo Zùlúsàlɛ̀ e ké. Wɔ̃́ è lo kɛɛ̀ m ká yia, m̀ḿ à dɔ. 23Kɛɛ wɔ̃́ nɔ́ m̀ à yí dɔɔ, ye lɛ́ e kélɛ̀, Gɛ̀ɛ̀ Púlú aà gèe m lɛ̀ɛ sɛ́lɛ́ séĩ́-séĩ́ yí kélɛ̀ bĩ́-kà síì wà wɔ̃́ nyɔ́ɔ̀ɔ gɛ̃̀ɛ̃ɛ̃̀ o yàá m gɛ̀nɛ̀. 24Kɛɛ m̀ḿ m zì kɛ̀ ɓéèe gɛ̃̀ wɔ̃́ kpànazɛ̀ ká m dìè lɛ̀ɛ, kɛ ḿ nyɛ m zì bàlà síì mɔ̀ téé-tèè, ɛ̃́ɛ̃́ kɛ ḿ nyɛ yɛɓo lɛ́ ko Dàa-mì Zízɛ̀ aà nɔ m lɛ̀ɛ ḿ à kɛɛ, kɛɛ̀ mɔ̀. Yɛɓo e kília lɛ́ e wɔ̃́ làṹ yiè lɛ́ à gbɛ̃̀ɛ̃̀ lɛ Wálà zì zò-kɛ̀-sɛ̀ mɔ̀ɔ gèeè lòũ̀ ká káa.
25“Maà die píé ka séĩ́ ka fĩ̀ã̀, máà wɔ̃́ lɛ́ à gbɛ̃̀ɛ̃̀ lɛ Wálà zì tò-mia-là mɔ̀ɔ gèè lòũ̀ ká. Ɛ̀ɛ̀, dɛɛ káa, ḿm̀ yí dɔ kélɛ̀ ka dò nɔ́ɔ fé lɛ̀ɛ́ ló gbaa e nyìɛ yàà m mɔ̀. 26À mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ lúó e kéa ká kélɛ̀ ka dò nɔ́ɔ fé léà wɔ̃̀ wá gbaa m wĩĩ́. 27Ƃii m̀ḿ gbaa m dìè tèá wɔ̃́ séĩ́ lɛ́ Wálà aà yà e gé á kɛɛ, gèeè mɔ̀ ka lɛ̀ɛ. 28Kà ka yɛ́lɛ́ kɛ ka dìè mɔ̀, ɛ̃́ɛ̃́ kà ka yɛ́lɛ́ kɛ ɓáá vɔ̀ séĩ́ lɛ́ Gɛ̀ɛ̀ Púlú aà kpɔ́ ka kɔ̀ làa mɔ̀. Zi lɛ́ mi è e nyìɛ kɛ̀á là ɓáá vɔ̀ mɔ̀ɔ, kà ka nyìɛ kɛ à ká Wálà là mia nì séĩ́ lɛ́ aà o kɛ e dìè-tĩ́ là pɛ ká à dìè zì gbe léà kolo là zàáa mɔ̀. 29Ḿm̀ yí dɔ kélɛ̀ ḿ gòá nɔ́ ka bàa, wìì nyaàa lɛ́ɛ̀ lo nuù ka bà, ɛ̃́ɛ̃́ ɓáá vɔ̀ɔ yéĩ́ lɛ̀ɛ́ ló o kɛɛ̀. 30Ɛ́ɛ̃́ lɛ́ɛ̀ lo kɛɛ̀ lúó dò káa, mia dò óò lo góò ka bà, tó wáà wɔ̃́ wánà zɛ̀ɛ kpɛ̀nɛ̀, tó wáà gèè. À kɛ́ ò ɓoa yí lɛ́ e kélɛ̀, kɛ ó tò-Zízɛ̀-píé-mìàa kɛ ó o wũ nìɛ̀ o píé zàá. 31Yé lɛ kília, kà ka yɛ́lɛ́ kɛ ka dìè píé. Ɛ́ɛ̃́ ka zò è vùò kélɛ̀ m lìè-wè dɔ ka séĩ́ ka lɛ̀ɛ kɛ̀ɛ̀ yààka píé bĩ́ã́ ɛ̃́ɛ̃́ nyɛ́nɛ́ĩ́, tó m nyìɛ-yíí áà dìè à kɛɛ̀ yí.
32“Maà ka nɔ gbaa dɛɛ ká Wálà lɛ̀ɛ. Ɛ́ɛ̃́ maà ka nɔ wɔ̃́ làṹ lɛ́ à gbɛ̃̀ɛ̃̀ lɛ à zì zò-kɛ̀-sɛ̀ mɔ̀ɔ lɛ̀ɛ. Bɛ̀i lɛ à mɔ̀ kɛ é ka mɛ́ kɛ gágà, ɛ̃́ɛ̃́ kɛ é pɔɔ̀ séĩ́ lɛ́ lɛ à kɛ̀lɛ̀, lɛ́ lɛ à kpɔ́lɔ̀ bɛ̀ipìà mia séĩ́ lɛ́ o là mia nì káa lɛ̀ɛ, bɛ̀i lɛ à mɔ̀ kɛ é à nɔ ka lɛ̀ɛ. 33Mi dò fé mɔ̀-sɔ̀ wà à kɛ̀lɛ̀ pɛlèe lɔ̀ lɛ̀ɛ́ m kɛ do. 34Ka dìè káà à yí dɔ kélɛ̀ m dìè-tĩ́ kɔ̀ e kéa maà yɛɓo kɛ à ká, ɛ̃́ɛ̃́ aà pɛ séĩ́ lɛ́ e kɛ kò mia nì lɛ́ kò ye nì ko kɛ táápìàa, ko mɔ̀ kó sɔ̀lɔ̀ ɓoa, a nɔ ko lɛ̀ɛ. 35Maà zɔ̃̀ɔ̃̀ ka lɛ̀ɛ wɔ̃́ séĩ́ kɛɛ̀ yí kélɛ̀ yɛɓo kɛ̀ gágà zì e kéa káa, lɛ ko mɔ̀ kó gbũá mia yé o yɔ̃́ṹ-yɔ̃̀ũ̀a o mɔ̀. Wɔ̃́ e kéa kɛɛ̀ yía, wɔ̃́ lɛ́ ko Dàa-mì Zízɛ̀ a gèea, kɔa zò áá ni à ká. A gèe kélɛ̀, ‘Géli lɛ pɛ nɔ̀ mia lɛ̀ɛ yí gbùò, é dieá mi dìè ɓà pɛ sɔ̀lɔ̀ ɓoò là.’ ”
36Lɛ̀ Pɔ́ɔ̀ e nyɛ mɛ́ĩ́ ɓò o lɛ̀ɛ mɔ̀ɔ, o káá gbaa o kpuò là, Pɔ́ɔ̀ áà sɛ̀nɛ ɓò. 37O séĩ́-séĩ́ o kɛ gbóó ɓopìà lɛ̀ lɛ́ o kɛ káápìà Pɔ́ɔ̀ mɔ̀, wáà o bè gbɛ̃̀ à kpéĩ́ mɔ̀ɔ ká. 38Pɛ kpó-kpó lɛ́ a kɛ lɛ́ o zò e dà zízàáa lɛ́ e kélɛ̀, à gèe a ɓo kélɛ̀ òó ló gbaa o nyìɛ dɔɔ̀ à mɔ̀ɔ káa. Yé e kɛ kília, o ló gbaa à ká gɔɔ lé-mɔ̀.
Mann New Testament © Bible Society in Liberia, 1978.