Àpɔ́sɔ̀lɔ̀ 18
18
Pɔ́ɔ̀ e ló Kɔ́lèĩ̀
1Lɛ̀ e kɛ kília, Pɔ́ɔ̀ e gó Átɛ̃̀, áà lò Kɔ́lèĩ̀. 2E ɓɔ Zúù mi doó lɛ́ ò si Àkólàa là à lɛ̀ mɔ̀. O à ye sɛ́lɛ́ lɛ́ ò si Pɔ̃́tɔ̀ɔ yí. Wà e na Pòlòsílà o góò e kɛá Ítálè nɔ́ dɛɛ, ɓii Kɔ́lɔ́dìà a gèe Zúù-mìà séĩ́ ó gó Wólóũ̀. Pɔ́ɔ̀ e ló ɓɔɔ̀ o píé. 3Pɔ́ɔ̀ e kɛ o píé wà ye nì wáà yɛɓo kɛ̀, ɓii wà ye nì o kɛ-yɛ̀ɓo e kɛ doó. Ye lɛ́ e kɛ sɔ-ká kɛɛ̀ káa. 4Pɔ́ɔ̀ e wéé dò gèe mia lɛ̀ɛ Zúù-mìà zì Wálà-kà wì fĩ́ĩ́-dɔ-lùò séĩ́ ká. E kɛ à kɛ-zì naapìà kɛɛ é Zúù-mìà wà Gílíì-mìà o kɛ ó wéé à wéè mɔ̀.
5Lɛ̀ Sálɛ̀ wà Témɔ́tè o gó gbaa Masèdónà, lɛ́ o ɓɔ lɛ̀ lɛ́ Pɔ́ɔ̀ e kɛ yía mɔ̀ɔ, Pɔ́ɔ̀ e e zì lúó séĩ́ nɔ wɔ̃́ làṹ yièa gèeè lɛ̀ɛ, áà zɔ̃̀ɔ̃̀ Zúù-mìàa lɛ̀ɛ kélɛ̀ Zízɛ̀ lɛ́ e Kɛ́lɛ̀ì káa. 6Lɛ̀ òó gbaa wéé à wéè mɔ̀, tó wáà wɔ̃́ yɔɔ̀ yɔɔ̀ gèè à gbĩ mɔ̀ɔ, Pɔ́ɔ̀ e e mɔ̀-sɔ̀ yí mɛ̀ mùnú ɓò-à-mɔ̀ zì píé, áà gèè kélɛ̀, “Ka dìè-tĩ́ léà wɔ̃̀ lɛ ka dìè wĩĩ́. Kɛɛ à wɔ̃̀ wá m wĩĩ́ gbaa. É kã́ pɛ́nɛɛ mɔ̀ é ló líéa, ḿm̀ lo m̀ ló ɓoò sɛ́lɛ́ gbɛɛ yí-mìà píé.” 7Lɛ̀ e kɛ kília, e ló gbaa gɔ̃ lɛ́ ò si Tásà Zátàa píé kɛ́ì. Gɔ̃́ e kília, e kɛ gbinipìà Wálà lɛ̀ɛ. Là ká e kɛ dɔ̀á Zúù-mìà zì Wálà-kàa sɔ́nɔ́ kpó-kpó mɔ̀. 8Kílísípà lɛ́ e kɛ Wálà-kà e kília wũ-là-mì káa, wà e píé-kɛ́ì-mìà séĩ́ o o zò dɔ ko Dàa-mì mɔ̀. Mia búnù-búnùzɛ̀ lɛ́ o kɛ Kɔ́lèĩ̀a o wɔ̃́ làṹ yièa ma, o o zò dɔ à mɔ̀ wáà o bàtáì kɛ̀.
9Bĩ́míà doó káa, Pɔ́ɔ̀ e pɛ lɛ́ e kɛ kélɛ̀ mɛ̀ĩ̀ lɛ́ ɓea zɛ. À zɛɛ̀ yía, ko Dàa-mì a gèe à lɛ̀ɛ kélɛ̀, “Yékɛ̀ í túó. Ì lo i líé wɔ̃́ gèeè ká, yékɛ̀ i fĩ́ĩ́ é nyɛ, 10ɓii m i píé. Bɛ̀i lɛ̀ɛ́ ló kɛɛ̀ mi nɔ́ɔ fé mɔ̀, kɛ é wɔ̃́ dò kɛ i ká. Ƃii mia búnùzɛ̀ o sɛ́lɛ́ e kéa yía, o m̀ mia nì ká.” 11À mɔ́ɔ̀ wɔ̃̀ mɔ̀ɔ, Pɔ́ɔ̀ e kɛ yí kɛ̀ɛ̀ doó wà e lé-gbú píé, áà wɔ̃́ lɛ́ Wálà a gèea, zɔ̃̀ɔ̃̀ mia lɛ̀ɛ.
12Lɛ̀ Wólómà-mìà o Gálíò kɛ Àkéyà-sɛ̀lɛ̀ wũ-là-mì káa, Zúù-mìà o pá o kíe mɔ̀ o Pɔ́ɔ̀ kṹ, o ló à ká mɛ̀ĩ́-sà ɓo-mìà wɛlɛ mɔ̀. 13Wa gèe kélɛ̀, “Gɔ̃́ e kéa lɛ à kɛ-zì naapìà kɛ mia ó wéé à wéè mɔ̀, kɛɛ ó gbini Wálà lɛ̀ɛ zi gbɛɛ lɛ́ è à kɛ̀, tó mi ɓáà lɔ́ɔ̀ɔ sìèa ká.”
14Lɛ̀ Pɔ́ɔ̀ e kɛ à kɛpìà é wɔ̃́ dò gèea, Gálíò a gèe Zúù-mìà lɛ̀ɛ, “È kɛ̀á wɔ̃́ e kéa lɛ wɔ̃́ yɔɔ, ɛ̃́ɛ̃́ lɛ wɔ̃́ yɛ̀ì-yɛ́í zɛ̀ dò káa, áá kɛɛ̀ kpeĩ kɛ zò-kũ̀-tã́ã̀ é kɛ m kɛ̀lɛ̀ Zúù-mìà ka mɔ́ɔ̀ wɔ̃̀ mɔ̀. 15Kɛɛ yé lɛ wéé lɛ́ à gbɛ̃̀ɛ̃̀ lɛ mia lé-wè, wà mia tɔ́, ɛ̃́ɛ̃́ ka dìè-tĩ́ kà lɔ́ɔ̀ɔ mɔ̀ɔ, ka dìè kà à yí-bɛ̀i-zì naa. M̀ḿ ló kɛɛ̀ mɛ́ĩ́ sùua ɓo-mì ká.” 16Lɛ̀ e kɛ kília, e o yí lúó o gó mɛ̀ĩ́-sà ɓo-pìà e kília mɔ̀. 17O séĩ́ o Sɔ́sénì lɛ́ e kɛ o zì Wálà-kà wũ-là-mì káa kṹ, wa mɛ̀ mɛ̀ĩ́-sà ɓo-pìàa mɔ̀. Kɛɛ à míní lɛ̀ɛ́ gbaa kɛ Gálíò là.
Pɔ́ɔ̀ e ló e mɛ̀ĩ́ Ã́téɔ̀
18Pɔ́ɔ̀ wà e ɓɛ́ĩ̀ Wálà-mìà o kɛ Kɔ́lèĩ̀ lúó búnùzɛ̀ píé. Lɛ̀ e kɛ kília, Pɔ́ɔ̀ e gó gbaa o píé. Pɔ́ɔ̀ wà Pòlòsílà ɛ̃́ɛ̃́ Àkólà o yà gɔɔ yí wáà lò Sílìà. Kɛ ó tĩã́ yàà gɔɔ e kília yía, Pɔ́ɔ̀ e e wè ɓèlè Wálà lɛ̀ɛ Sɛ̃̀kílíyà-pɛlɛí. Lɛ̀ a kɛ kília, o à wĩĩ́-wũ̀ káá. 19O ɓɔ gbaa Ɛ́fɔ́sɔ̀. À lɛ̀ mɔ̀ lɛ́ Pɔ́ɔ̀ e Pòlòsílà wà Àkólà o tó yia. E ló Zúù-mìà zì Wálà-kàa wì, wà Zúù-mìà o kɛ wɔ̃́ gèepìà o kíe nì lɛ̀ɛ. 20Wa gèe à lɛ̀ɛ wà ye nì ó kɛ yí ɓéĩ́ ɓo lúó gbèĩ píé. Kɛɛ lɛ̀ɛ́ gbaa wéé à mɔ̀. 21Kɛɛ lɛ̀ e kɛ gópìà yia, a gèe o lɛ̀ɛ, “Wálà é wèèá mɔ̀ɔ, ḿm̀ lo nuù m mɛ̀ĩ́ ka píé.” Lɛ̀ e kɛ kília, e yà gbaa gɔɔ yí, e gó gbaa Ɛ́fɔ́sɔ̀.
22Lɛ̀ e ɓɔ Sízàlíàa, e ló Zùlúsàlɛ̀, kɛ é wéé Wálà-mìà lɛ́ o kɛ yía bà. Yé e kɛ kília, e ló Ã́téɔ̀. 23Lɛ̀ e kɛ yí lúó dò píéa, e gó gbaa yí. E die gbaa sɛ́lɛ́ lɛ́ ò si Gɛ̀lésìà wà Fílízìàa o lɛ̀ séĩ́ mɔ̀, áà lò tò-Zízɛ̀-píé-mìàa mɛ́ kɛ̀á sí gágà.
Àpɔ́lɔ̀ e pɛ zɔ̃̀ɔ̃̀ mia lɛ̀ɛ
24Zúù gɔ̃ doó lɛ́ ò si Àpɔ́lɔ̀, lɛ́ wa ye sɛ́lɛ́ lɛ́ ò si Ɛ́lèzánìàa yía, e nu Ɛ́fɔ́sɔ̀. E kɛ gɔ̃ lɛ́ è mɛ́ĩ́-ɓo-zì dɔɔ ká. Ɛ́ɛ̃́ e wɔ̃́ lɛ́ lɛ Wálà kii yía, dɔ kpó-kpó ɓo. 25Aà wɔ̃́ lɛ́ à gbɛ̃̀ɛ̃̀ lɛ ko Dàa-mì là Zía mɔ̀ɔ, dã́ do e yiè ká. E wé gèe fã̀ã́-wàà kpó-kpó ká, áà wɔ̃́ lɛ́ à gbɛ̃̀ɛ̃̀ lɛ Zízɛ̀ mɔ̀ɔ, zɔ̃̀ɔ̃̀ mia lɛ̀ɛ kpeĩ le. É kɛ bɛ̃̀ɛ̃ kília, mia bàtáì-kɛ-wɔ̃̀ yé a yí dɔɔ, lɛ́ nɔ́ e kɛ Zɔ̃̀ɔ̃́ zìa káa. 26E gbɛ̃̀ gbaa, áà wɔ̃́ gèè nyìɛ gágà là ká Zúù-mìà zì Wálà-kàa wì. Lɛ̀ Pòlòsílà wà Àkólà wa wéè maa, o à sí, o ló à ká o píé kɛ́ì. Ɛ́ɛ̃́ o gbɛ̃̀ gbaa, wáà wɔ̃́ lɛ́ à gbɛ̃̀ɛ̃̀ lɛ Wálà là Zía mɔ̀ɔ, yí ɓò à lɛ̀ɛ dóo kpeĩ le. 27Àpɔ́lɔ̀ e à yà gbaa e gé kɛ é ló Àkéyà. Lɛ̀ e kɛ kília, à ɓɛ́ĩ̀ Wálà-mìàa o gbũ à mɔ̀ kii bɛ̃̀ɛ̃ɛ̃̀ ká. O kíí e kília bɛ̃̀ɛ̃ tò-Zízɛ̀-píé-mìà lɛ́ o Àkéyàa píé. Wa gèe o lɛ̀ɛ ó o kɔ̀ yà Àpɔ́lɔ̀ wì. Lɛ̀ e ɓɔ yía, e gbũ kpó-kpó ɓo mia lɛ́ waà o zò dɔ Zízɛ̀ mɔ̀ Wálà zì zò-kɛ̀-sɛ̀ kolo là zàáa mɔ̀. 28Ƃii à zì wɔ̃́ gèeè lé-gáàa-lɛ̀ káa yí zàáa, à kɔ̀ e die à ká Zúù-mìà là wɔ̃́ o kɛ à gèepìà mia nyìɛ mɔ̀ɔ yí. E kɛ wɔ̃́ zɔ̃̀ɔ̃̀pìà Wálà kiia ká kélɛ̀ Zízɛ̀ lɛ́ e Kɛ́lɛ̀ì káa.
Mann New Testament © Bible Society in Liberia, 1978.