2 Kɔ̀léĩ́tĩ̀ã̀ 13

Lìè-wè dɔɔ̀ léĩ́-tó-mɔ̀

1M zì ɓɔ̀-ka-píé kpolà yààka zɛ̀ lɛ́ e kéa. Wɔ̃́ nɔ́ɔ fé lɛ́ ò kpɔ mia wĩĩ́a lɛ à mɔ̀ à kélá é kɛ pèèlɛ, é gɔ̃̀á kɛɛ̀ pèèlɛɛ è kɛ yààka. 2Mia lɛ́ kaà kɛ-wɔ̃̀ yɔɔ kɛ lúó zààle lɛ́ aà diea píé, ɛ̃́ɛ̃́ zeĩ́ mia séĩ́ yé o tóa, ḿm̀ nàà ḿ wɔ̃́ dò gèe ka lɛ̀ɛ. M zì ɓɔ̀-ka-píé kpolà pèèlɛ zɛ̀ɛ, maà wɔ̃́ nɔ́ doóa gèe do ka lɛ̀ɛ à lúó ká. Yé ma wá ka píéa, ḿm̀ lo à gèeè zeĩ́. Nu yé aà tó ḿ ɓoa, mi dò lɛ̀ɛ́ ló laà m kɛ̀lɛ̀. 3Pɛ lɛ́ kà nààa, káà lo à sɔ̀lɔ̀ ɓoò. Pɛ́ e kília lɛ́ e kélɛ̀, pɛ lɛ́ è lo à zɔ̃̀ɔ̃̀ kélɛ̀ Kɛ́lɛ̀ì lɛ́ɛ̀ mɛ́ĩ́ kàà m lé máà gèèa káa. Yé aà e kɔ̀ sí ka píéa, à mɛ́ wá yɔ̃́ṹ-yɔ̃̀ũ̀. Kɛɛ lɛ́ɛ̀ e zì yíkɛ̀ gáàa zɔ̃̀ɔ̃̀ ka bà. 4Yé bɛ̃̀ɛ̃ à mɛ́ e kɛ yɔ̃́ṹ-yɔ̃̀ũ̀ wáà pà nélè ká kɔ́lɔ́sì mɔ̀ɔ, lɛ ɓe Wálà zì yíkɛ̀ gáàa kolo là zàá. Kò ye nì ko kɛ̀ doó yí zàáa, kò ye nì kóò dɔ à zì kɛ̀ yɔ̃́ṹ-yɔ̃̀ũ̀ kɔ̀ɔ yí. Kɛɛ ko zì kɔ̀ sì ka píéa, kò ye nì kóò lo kɛɛ̀ ɓe Wálà zì yíkɛ̀ gáàa kolo là zàá.

5Kà lɛ̀ gɛ̃̀ ka dìè là, ká ka dìè yí dã́, kɛɛ é kɛ̀á ka ɓe zò-dɔ̀à-mɔ̀ yí zàáa, kɛ ká à yí dɔ. Kàá yí dɔ kélɛ̀ Zízɛ̀ Kɛ́lɛ̀ì lɛ ka yí? Yé nɔ́ kaà kɔ̃́ wɔ̃́ e kília mɔ̀ɔ, lɛ́ nɔ́ Kɛ́lɛ̀ì wá ka yía. 6M zò lɛ à mɔ̀ kélɛ̀ káà lo à yí dɔɔ̀ kélɛ̀ ko wá kɔ̃̀-wɔ̃́-mɔ̀ mìà ká. 7Kóò sɛ̀nɛ ɓo Wálà lɛ̀ɛ kélɛ̀ kàá ló wɔ̃́ niìa gbɛɛ kɛɛ̀. Kòó à kɛ kɛɛ á zɔ̃̀ɔ̃̀ kélɛ̀ ko wɔ̃́ kpeĩ kɛ-mìà ká. Kɛɛ kóò à kɛ̀ kɛɛ ká wɔ̃́ lɛ́ lɛ kpeĩa kɛ, yé bɛ̃̀ɛ̃ ko kélɛ̀ kɔ̃̀-wɔ̃́-mɔ̀ mìà lɛ́ ɓea ká. 8Ƃii kòó bɛ̀i à mɔ̀ kɛ kó wɔ̃́ gbɛɛ kɛ kɛ é gèlè gbini wɔ̃́ wánà zɛ̀ɛ mɔ̀, kɛɛ wɔ̃́ lɛ́ nɔ́ kò bɛ̀i à mɔ̀ kó kɛ wɔ̃́ wánà zɛ̀ɛ lɛ̀ɛ. 9Ko gé lɛ́ɛ̀ li yé kɔaà kɛ yɔ̃́ṹ-yɔ̃̀ũ̀, lɛ́ ka mɛ́ lɛ gágàa ká. Kóò sɛ̀nɛ ɓo nɔ́ zeĩ́, kɛɛ ka mɛ́ é kpálà. 10Pɛ́ e kɛ lɛ́ ma mɔ́ɔ̀ pɛ́ e kéa bɛ̃̀ɛ̃ ɓo lɛ̀ lɛ́ ma wá ka píéa káa lɛ́ ɓɛ. À kɛɛ̀ lɛ kíli kɛɛ yékɛ̀ ḿ nùáa, ḿ ka kṹ gágà yíkɛ̀ gáàa lɛ́ ko Dàa-mì a nɔ m lɛ̀ɛ ká. Yíkɛ̀ gáàa e kília, lɛ ɓe é ka dɔ ka gã̀ mɔ̀, kɛɛ ye wá ɓe kɛ é ka wí tã́ã̀.

11Ɛ̀ɛ̀, m lèe-gé vɔ̀, kɔa làa píé-èé. Ka mɛ́ kpálà è kɛ à ká. Kà ka tóó dɔ wɔ̃́ lɛ́ m̀ gèe ka lɛ̀ɛ mɔ̀. Kà wéé ka kíe nì wéè mɔ̀, ká kɛ ɓe zò-yà-gé yí zàá. Ɛ́ɛ̃́ Wálà lɛ́ lɔ̀-kɛ̀à-mɔ̀ wà zò-yà-gé è go à kɛ̀lɛ̀ɛ, lɛ́ɛ̀ lo kɛɛ̀ ka píé.

12Kà wéé ka kíe nì píé ka bè gbɛ̃̀ ka kíe nì kpéĩ́ mɔ̀ ká lɛ̀ zí wáá kɛɛ̀áa ká.

13Wálà-mìà séĩ́ óò wèè ka bà.

14Ko Dàa-mì Zízɛ̀ Kɛ́lɛ̀ì zì zò-kɛ̀-sɛ̀, wà Wálà zì mia lɔ̀-kpɔ̀à-mɔ̀, e bɛ̀i tàà-kíe-píé lɛ́ kɔ̀à kɛ̀, lɛ́ è go Gɛ̀ɛ̀ Púlú kɛ̀lɛ̀ɛ, é kɛ ka séĩ́ ka píé.

Currently Selected:

2 Kɔ̀léĩ́tĩ̀ã̀ 13: MNT

Highlight

Copy

Compare