Zɛ́kɔ̀wáɖádyà 9
9
Gèɖèpɔ́ɔ̀ tò ɓóɖó-dù ɓě nì ɓó Éézùɖùɛ̀-ɓòɖòɔ̀ ɖeiɛɛ gǎ kɔ̃
1Wuɖu ɓɛ́ ɔ sɔ̀ìn ɖé Bounɓoɔ̀ gboɛɛ kɛà kɛ̀. Bounɓoɔ̀ hwòɖǒ ɖǎa gbɔ po, ɓɛ́ ɔ ké Hádàɖà-ɓòɖòɔ̀ kè Dìmásìkɔ̀-hwɔ̀ɖɔ̀ɔ̀ gǎ kɔ̃ tò, sepóɛɖé Éézùɖùɛ̀ɛ̀ xwéɖé-dù séín ɓěɔ̀ kè nyɔ tɔ̀ɔ̀ ɓěɛ̀ dyéɖé nì Bounɓoɔ̀ dya. 2Ké Bounɓoɔ̀ mu Hámà-hwɔ̀ɖɔ̀ ɓɛ́ ɔ kè Hádàɖà-ɓòɖòɔ̀ deìn bũ̌ɛɛ gǎ kɔ̃ tòùn ɖekè. Kà dyúáɖòɔ̀ kǎà Táà-hwɔ̀ɖɔ̀ɔ̀ kè Zíɖɔ̀ùn-hwɔ̀ɖɔ̀ɔ̀ mu nììn ɖekè, kɛbì wa mɛ fɔ̀nɔ̀ hwòɖǒ mìɔ kɛ. 3Táà-hwɔ̀ɖɔ̀ɔ̀ ɖǎ ɔ mìɔùn bìì to-pèɖèìn-naín ɖò po, ké ɔ ɖǎ séɓàɖà-kòò dyí gbǒìn kà ɓóɖó-kòò nìà kɛ, ké ɔ ɖǎ góò-kòò dyí gbǒìn kà ɓóɖó-kòò nìà ɖé hwìè ɓěɔ̀ gbaa nìà kɛ. 4Kɛɛ gmɔ̀ nɔ̄, Ɖɛɓíɔ́ɔ̀ mu ɔ kɔ̃̀ɔ̀-ɖɛ̀ ɓěɔ̀ ɔ xwai zàùn. Bounɓoɔ̀ mu ɔ kɔ́mɔ́-ɖɛ̀ ɓěɔ̀ ɖé dyóóɔ̀ kɔ̃ poùn, ké ɔ mu hwɔɖɔɔ̀ fɔ̃ùn.
5Àkéɖɔ̀ùn-hwɔ̀ɖɔ̀ɔ̀ muɛ dyéìn, ké fã̀à mu ɔ nyuùn. Ké Gázà-hwɔ̀ɖɔ̀ɔ̀ mu hwòɖǒ-dyií-gbǎìn-gbǎìn vɛ̀nɛ̀ ɓéɖéìn. Kà dyúáɖòɔ̀ kǎà Ɛ́kɔ̀nɔ̀-hwɔ̀ɖɔ̀ɔ̀ mu nììn ɖekè, sepóɛɖé ɔ se hwòɖǒ-po-naín ɖò ɓéɖé. Gázà-hwɔ̀ɖɔ̀ɔ̀ kã́áɔ̀ mu mɛ́ìn, ké Àkéɖɔ̀ùn-hwɔ̀ɖɔ̀ɔ̀ mu hwùɖùǎ jǔùn. 6Ké ɓóɖó-dù kà kò ɖò ɓěɛ̀ nyɔ ɓě mɔ̀ nyɔ mu ɖé Áɖò-hwɔ̀ɖɔ̀ɔ̀ mú cĩ́ìn. Bounɓoɔ̀ mu Féɖésìà-nyɔ̀ ɓěɔ̀ wa mìɔùn dyí-ɓúáìn-ɓúáìnɔ̀ ɓɔ́í poùn. 7Ɔ mu wa nyɔmɔɔ ɖi-ɖi wĩín zàùn, ké ɔ mu ɖɛ wa se ɓéɖé wa ké ɖiɛɛ wa wĩín zàùn. Wa nyɔ xwéɖé wè sè ɓíɖíiɛɛ mu ɔ nyɔ ɓě jǔùn. Wa mu nììn kà xwéɖé-dù ɖò nìà kɛ ɖé Júɖà-nyɔ̀ ɓěɔ̀ hwìɛ̀. Ɛ́kɔ̀nɔ̀-nyɔ̀ ɓěɔ̀ mu ɔ nyɔ ɓě jǔùn kà Jɛ́ɓù-nyɔ̀ ɓěɔ̀ nìà kɛ. 8Ké ɔ muá ɔ gbǒɔ̀ dyí gmɔ̀ùn kà sójà ɖò gmɔ̀à ɖɛ dyíɛ, nìí ɓɛ́ ɔ mú-nyɛ́-nyɔ̀ ɓěɔ̀ ní kɔ̃̀ ɖà ɖéɛ mú zĩ̀ìn ɖe. Ké nyɔ-dyi-pĩ́à-nyɔ̀ ɖò se ɔ nyɔ ɓěɔ̀ toún ɖuɛ́ mu ɖe, sepóɛɖé ɔ mìɔùn nìǎ ɔ nyɔ ɓěɔ̀ dyí gmɔ̀ǔn.
Kã́á mu nììn ɖé dyúa kɛ
9Ké Bounɓoɔ̀ cɛ̃ɛ, ké ɔ ɖá,
“Zádyɔún-nyɔ̀ ɓě, ɓě kpá múàǔn mìɔ!
Jùɖúsɛ̀ɖɛ̀ìn-nyɔ̀ ɓě, ɓě nyu múà-kùɖǔ-kuɖu!
Ɓě gmɔ̀ ɖéa kà ɓěɛ̀ kã́á hwɛ̀ǐn-hwɛ̀ǐnɔ̀ nì ɓě gbo dyiɛń nyɛ.
Ɔ nì dyiɛń to-ɖu-kà, kɛɛ ɔ dyà ɔ mìɔùn ɓíɖíi.
Ɔ kò jǎkasì ɖò kɔ̃ún.
Ɔ kò jǎkasì gmɔ̀ ɖò kɔ̃ún.
10Ní mu toún-vɔ̃̀ìn-hwíì-sǒ ɓěɔ̀ ɓó ɓě mɔ̀ Éézùɖùɛ̀-dyù ɓěɔ̀ kɛɛ bũ̌ zàùn,
ɓɛ́ ḿ ké toún-vɔ̃̀ìn-sǒ ɓěɔ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ mú zà.
Ní mu to-vɔ̃̀ìn-pɔ̀nɔ̀ ɓěɔ̀ dyi jaɖaìn.
Ké ɓěɛ̀ kã́áɔ̀ mu gìɖìǐ dyàùn ɓó ɓě kè ɓóɖó-dù kà kò ɖò ɓěɔ̀ pṹa,
ké ɔ mu ɓóɖó-dù séín ɓě sɔ̀ìn ɖé dyóó ɖò wĩín ké ɖò wĩín nyiniɛ, ɔ kè sɔ̀ìn ɖé Dyùféɖétì-nìɔ̀ wĩín ké ɖé ɓóɖóɔ̀ sèìn-naín nyiniɛɛ wuɖuí kɔ̃̀ùn.”
Gèɖèpɔ́ɔ̀ po ɔ nyɔ ɓěɔ̀ páún ɖe
11Ké Bounɓoɔ̀ cɛ̃ɛ ɖe, ké ɔ ɖá,
“Ní nyɔ ɓě, ní mu dèè-wùɖù nìà ɓó ḿ kè ɓě pṹa dyììn ɖé sáa-zàìn-ɖɛ̀ ɓěɔ̀ nyɔmɔɔ̀ múɛɛ jè hwòɖǒ gbo poùn,
ɓɛ́ ḿ ké ɓě toɛ̀-kpɔ̃-nyɔ̀ mú zà kà nyɔ zàà nyɔ ɓí dyɛ múin ɖò múɛ.
12Ɓě mɔ̀ toɛ̀-kpɔ̃-nyɔ̀ ɓě ɓɛ́ ɓě ɖǎà hwòɖǒ-po-naín ɓéɖéɛɛ,
ɓě mu ɖé ɓěɛ̀ to-pèɖèìn-naínɔ̀ ɖe.
Ḿ ɖǎa cɛ̃ ɓó zɛ̃̌ɛ̀ kà ní mu ɓě páún poùn ɖeɛ.
Ní mu kɔ́mɔ́-ɖɛ̀ ɓɛ́ ɓě ɓéɖé ma kĩ́ín nyɛɛ dú sɔ̃́ ɓě nyíìn ɖe.
13Ní mu Júɖà-nyɔ̀ ɓě pɔnɔ mú nyuùn,
ɓɛ́ Éézùɖùɛ̀-dyù ɓěɔ̀ ké waà sé jǔ.
Ní mu Zádyɔún-nyɔ̀ nyuùn kà nyɔ nyuà gàsíà kɛ,
ɓɛ́ ḿ kéɛ Gíɖíì-nyɔ̀ ɓěɔ̀ gbo vɔ̃̀ìn.”
14Ké Bounɓoɔ̀ mu xwáɖáún wóɖóùn ɖé ɔ nyɔ ɓěɔ̀ kɔ̃in,
ké ɔ mu ɔ séɔ̀ poùn kà wɛ́ɖɛ́-wɛ́ɖɛ́ poà kɛ.
Bounɓo Ɖɛɓíɔ́ mu ɔ ɖɔ-kpaɔ̀ ɓaɖaùn,
ɓɛ́ ɔ ké wɔ́ɔ́-pìɔ̌ sɔ̀ìn ɖé zɔ̃̌in nyɛɛ mú mùìn kà sójà muà to gboɛ.
15Bounɓo mɔ̀ nyɔ nìà ɖɛ séín kɔ̃in nyɛɛ mu ɔ nyɔ ɓěɔ̀ dyí gmɔ̀ùn,
ké wa mu waà mú-nyɛ́-nyɔ̀ ɓěɔ̀ mú gbɔɔ̀ùn dyììn ɖé bǒ-ɖɛ̀-kpò mú.
Ké wa mu kuɖu-kuɖu nyuùn ɖé toɔ̀ gbo kà nɔmɔɔ-ná-nyɔ̀ ɓě nyuà kuɖu-kuɖuɛ,
ké wa mu waà mú-nyɛ́-nyɔ̀ ɓěɔ̀ nyɔmɔɔ dyi wáɖáìn.
Waà nyɔmɔɔ̀ mu dyi ziìn kà sáa-zàìn-ɖɛ̀ɔ̀ nyɔmɔɔ ɓɛ́ wa mɛ́nɛ́ìn sáa-kɔ̃-zàìn-gbààɔ̀ gã kɔ̃ dyiɛɛ zià dyiɛ.#9:15 Vɔ́sì nìà kɛ kpa kòɛ̀ ɖò-ɖò ɖé Báɓò ɖíɛ́ ɓě mú, sepóɛɖé ɔ Híìbúɖúù-wùɖùɔ̀ kàmà múin wɔ̃́uń jè.
16Bounɓo mɔ̀à waà Gèɖèpɔ́ɔ̀ kɛɛ mu wa póìn ɓó wéa ɓaɖa,
kà ɓáɖáá-dyí-gmɔ̀-nyɔ̀ ɖò póìn kà ɔ ɓáɖáá ɓě kɛ.
Wa mu fãùn ɖé ɔ ɓóɖóɔ̀ kɔ̃,
kà sɔ́ɔ́ kpa ɖɛ ɓě nyuà fãa ɖé kã́á-gbàǎ ɖò múɛ.
17Ǹdye, wa mu dyíin nɔ̀mɔ̀ǔn ziìn, ké wa mu ɖɛ kpaùn mìɔ cá!
Ɖii-ɖɛ̀ kè wã́ìn muɛ nyuùn ɓɛ́ gàa-dyù gmɔ̀ ɓěɔ̀ kè màa-dyù gmɔ̀ ɓěɔ̀ ké dyi ku.
Currently Selected:
Zɛ́kɔ̀wáɖádyà 9: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Zɛ́kɔ̀wáɖádyà 9
9
Gèɖèpɔ́ɔ̀ tò ɓóɖó-dù ɓě nì ɓó Éézùɖùɛ̀-ɓòɖòɔ̀ ɖeiɛɛ gǎ kɔ̃
1Wuɖu ɓɛ́ ɔ sɔ̀ìn ɖé Bounɓoɔ̀ gboɛɛ kɛà kɛ̀. Bounɓoɔ̀ hwòɖǒ ɖǎa gbɔ po, ɓɛ́ ɔ ké Hádàɖà-ɓòɖòɔ̀ kè Dìmásìkɔ̀-hwɔ̀ɖɔ̀ɔ̀ gǎ kɔ̃ tò, sepóɛɖé Éézùɖùɛ̀ɛ̀ xwéɖé-dù séín ɓěɔ̀ kè nyɔ tɔ̀ɔ̀ ɓěɛ̀ dyéɖé nì Bounɓoɔ̀ dya. 2Ké Bounɓoɔ̀ mu Hámà-hwɔ̀ɖɔ̀ ɓɛ́ ɔ kè Hádàɖà-ɓòɖòɔ̀ deìn bũ̌ɛɛ gǎ kɔ̃ tòùn ɖekè. Kà dyúáɖòɔ̀ kǎà Táà-hwɔ̀ɖɔ̀ɔ̀ kè Zíɖɔ̀ùn-hwɔ̀ɖɔ̀ɔ̀ mu nììn ɖekè, kɛbì wa mɛ fɔ̀nɔ̀ hwòɖǒ mìɔ kɛ. 3Táà-hwɔ̀ɖɔ̀ɔ̀ ɖǎ ɔ mìɔùn bìì to-pèɖèìn-naín ɖò po, ké ɔ ɖǎ séɓàɖà-kòò dyí gbǒìn kà ɓóɖó-kòò nìà kɛ, ké ɔ ɖǎ góò-kòò dyí gbǒìn kà ɓóɖó-kòò nìà ɖé hwìè ɓěɔ̀ gbaa nìà kɛ. 4Kɛɛ gmɔ̀ nɔ̄, Ɖɛɓíɔ́ɔ̀ mu ɔ kɔ̃̀ɔ̀-ɖɛ̀ ɓěɔ̀ ɔ xwai zàùn. Bounɓoɔ̀ mu ɔ kɔ́mɔ́-ɖɛ̀ ɓěɔ̀ ɖé dyóóɔ̀ kɔ̃ poùn, ké ɔ mu hwɔɖɔɔ̀ fɔ̃ùn.
5Àkéɖɔ̀ùn-hwɔ̀ɖɔ̀ɔ̀ muɛ dyéìn, ké fã̀à mu ɔ nyuùn. Ké Gázà-hwɔ̀ɖɔ̀ɔ̀ mu hwòɖǒ-dyií-gbǎìn-gbǎìn vɛ̀nɛ̀ ɓéɖéìn. Kà dyúáɖòɔ̀ kǎà Ɛ́kɔ̀nɔ̀-hwɔ̀ɖɔ̀ɔ̀ mu nììn ɖekè, sepóɛɖé ɔ se hwòɖǒ-po-naín ɖò ɓéɖé. Gázà-hwɔ̀ɖɔ̀ɔ̀ kã́áɔ̀ mu mɛ́ìn, ké Àkéɖɔ̀ùn-hwɔ̀ɖɔ̀ɔ̀ mu hwùɖùǎ jǔùn. 6Ké ɓóɖó-dù kà kò ɖò ɓěɛ̀ nyɔ ɓě mɔ̀ nyɔ mu ɖé Áɖò-hwɔ̀ɖɔ̀ɔ̀ mú cĩ́ìn. Bounɓoɔ̀ mu Féɖésìà-nyɔ̀ ɓěɔ̀ wa mìɔùn dyí-ɓúáìn-ɓúáìnɔ̀ ɓɔ́í poùn. 7Ɔ mu wa nyɔmɔɔ ɖi-ɖi wĩín zàùn, ké ɔ mu ɖɛ wa se ɓéɖé wa ké ɖiɛɛ wa wĩín zàùn. Wa nyɔ xwéɖé wè sè ɓíɖíiɛɛ mu ɔ nyɔ ɓě jǔùn. Wa mu nììn kà xwéɖé-dù ɖò nìà kɛ ɖé Júɖà-nyɔ̀ ɓěɔ̀ hwìɛ̀. Ɛ́kɔ̀nɔ̀-nyɔ̀ ɓěɔ̀ mu ɔ nyɔ ɓě jǔùn kà Jɛ́ɓù-nyɔ̀ ɓěɔ̀ nìà kɛ. 8Ké ɔ muá ɔ gbǒɔ̀ dyí gmɔ̀ùn kà sójà ɖò gmɔ̀à ɖɛ dyíɛ, nìí ɓɛ́ ɔ mú-nyɛ́-nyɔ̀ ɓěɔ̀ ní kɔ̃̀ ɖà ɖéɛ mú zĩ̀ìn ɖe. Ké nyɔ-dyi-pĩ́à-nyɔ̀ ɖò se ɔ nyɔ ɓěɔ̀ toún ɖuɛ́ mu ɖe, sepóɛɖé ɔ mìɔùn nìǎ ɔ nyɔ ɓěɔ̀ dyí gmɔ̀ǔn.
Kã́á mu nììn ɖé dyúa kɛ
9Ké Bounɓoɔ̀ cɛ̃ɛ, ké ɔ ɖá,
“Zádyɔún-nyɔ̀ ɓě, ɓě kpá múàǔn mìɔ!
Jùɖúsɛ̀ɖɛ̀ìn-nyɔ̀ ɓě, ɓě nyu múà-kùɖǔ-kuɖu!
Ɓě gmɔ̀ ɖéa kà ɓěɛ̀ kã́á hwɛ̀ǐn-hwɛ̀ǐnɔ̀ nì ɓě gbo dyiɛń nyɛ.
Ɔ nì dyiɛń to-ɖu-kà, kɛɛ ɔ dyà ɔ mìɔùn ɓíɖíi.
Ɔ kò jǎkasì ɖò kɔ̃ún.
Ɔ kò jǎkasì gmɔ̀ ɖò kɔ̃ún.
10Ní mu toún-vɔ̃̀ìn-hwíì-sǒ ɓěɔ̀ ɓó ɓě mɔ̀ Éézùɖùɛ̀-dyù ɓěɔ̀ kɛɛ bũ̌ zàùn,
ɓɛ́ ḿ ké toún-vɔ̃̀ìn-sǒ ɓěɔ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ mú zà.
Ní mu to-vɔ̃̀ìn-pɔ̀nɔ̀ ɓěɔ̀ dyi jaɖaìn.
Ké ɓěɛ̀ kã́áɔ̀ mu gìɖìǐ dyàùn ɓó ɓě kè ɓóɖó-dù kà kò ɖò ɓěɔ̀ pṹa,
ké ɔ mu ɓóɖó-dù séín ɓě sɔ̀ìn ɖé dyóó ɖò wĩín ké ɖò wĩín nyiniɛ, ɔ kè sɔ̀ìn ɖé Dyùféɖétì-nìɔ̀ wĩín ké ɖé ɓóɖóɔ̀ sèìn-naín nyiniɛɛ wuɖuí kɔ̃̀ùn.”
Gèɖèpɔ́ɔ̀ po ɔ nyɔ ɓěɔ̀ páún ɖe
11Ké Bounɓoɔ̀ cɛ̃ɛ ɖe, ké ɔ ɖá,
“Ní nyɔ ɓě, ní mu dèè-wùɖù nìà ɓó ḿ kè ɓě pṹa dyììn ɖé sáa-zàìn-ɖɛ̀ ɓěɔ̀ nyɔmɔɔ̀ múɛɛ jè hwòɖǒ gbo poùn,
ɓɛ́ ḿ ké ɓě toɛ̀-kpɔ̃-nyɔ̀ mú zà kà nyɔ zàà nyɔ ɓí dyɛ múin ɖò múɛ.
12Ɓě mɔ̀ toɛ̀-kpɔ̃-nyɔ̀ ɓě ɓɛ́ ɓě ɖǎà hwòɖǒ-po-naín ɓéɖéɛɛ,
ɓě mu ɖé ɓěɛ̀ to-pèɖèìn-naínɔ̀ ɖe.
Ḿ ɖǎa cɛ̃ ɓó zɛ̃̌ɛ̀ kà ní mu ɓě páún poùn ɖeɛ.
Ní mu kɔ́mɔ́-ɖɛ̀ ɓɛ́ ɓě ɓéɖé ma kĩ́ín nyɛɛ dú sɔ̃́ ɓě nyíìn ɖe.
13Ní mu Júɖà-nyɔ̀ ɓě pɔnɔ mú nyuùn,
ɓɛ́ Éézùɖùɛ̀-dyù ɓěɔ̀ ké waà sé jǔ.
Ní mu Zádyɔún-nyɔ̀ nyuùn kà nyɔ nyuà gàsíà kɛ,
ɓɛ́ ḿ kéɛ Gíɖíì-nyɔ̀ ɓěɔ̀ gbo vɔ̃̀ìn.”
14Ké Bounɓoɔ̀ mu xwáɖáún wóɖóùn ɖé ɔ nyɔ ɓěɔ̀ kɔ̃in,
ké ɔ mu ɔ séɔ̀ poùn kà wɛ́ɖɛ́-wɛ́ɖɛ́ poà kɛ.
Bounɓo Ɖɛɓíɔ́ mu ɔ ɖɔ-kpaɔ̀ ɓaɖaùn,
ɓɛ́ ɔ ké wɔ́ɔ́-pìɔ̌ sɔ̀ìn ɖé zɔ̃̌in nyɛɛ mú mùìn kà sójà muà to gboɛ.
15Bounɓo mɔ̀ nyɔ nìà ɖɛ séín kɔ̃in nyɛɛ mu ɔ nyɔ ɓěɔ̀ dyí gmɔ̀ùn,
ké wa mu waà mú-nyɛ́-nyɔ̀ ɓěɔ̀ mú gbɔɔ̀ùn dyììn ɖé bǒ-ɖɛ̀-kpò mú.
Ké wa mu kuɖu-kuɖu nyuùn ɖé toɔ̀ gbo kà nɔmɔɔ-ná-nyɔ̀ ɓě nyuà kuɖu-kuɖuɛ,
ké wa mu waà mú-nyɛ́-nyɔ̀ ɓěɔ̀ nyɔmɔɔ dyi wáɖáìn.
Waà nyɔmɔɔ̀ mu dyi ziìn kà sáa-zàìn-ɖɛ̀ɔ̀ nyɔmɔɔ ɓɛ́ wa mɛ́nɛ́ìn sáa-kɔ̃-zàìn-gbààɔ̀ gã kɔ̃ dyiɛɛ zià dyiɛ.#9:15 Vɔ́sì nìà kɛ kpa kòɛ̀ ɖò-ɖò ɖé Báɓò ɖíɛ́ ɓě mú, sepóɛɖé ɔ Híìbúɖúù-wùɖùɔ̀ kàmà múin wɔ̃́uń jè.
16Bounɓo mɔ̀à waà Gèɖèpɔ́ɔ̀ kɛɛ mu wa póìn ɓó wéa ɓaɖa,
kà ɓáɖáá-dyí-gmɔ̀-nyɔ̀ ɖò póìn kà ɔ ɓáɖáá ɓě kɛ.
Wa mu fãùn ɖé ɔ ɓóɖóɔ̀ kɔ̃,
kà sɔ́ɔ́ kpa ɖɛ ɓě nyuà fãa ɖé kã́á-gbàǎ ɖò múɛ.
17Ǹdye, wa mu dyíin nɔ̀mɔ̀ǔn ziìn, ké wa mu ɖɛ kpaùn mìɔ cá!
Ɖii-ɖɛ̀ kè wã́ìn muɛ nyuùn ɓɛ́ gàa-dyù gmɔ̀ ɓěɔ̀ kè màa-dyù gmɔ̀ ɓěɔ̀ ké dyi ku.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.