Zɛ́kɔ̀wáɖádyà 8
8
Bounɓoɔ̀ ɖáìn nyɔ ɓěɔ̀ nyɛ́nɛ́ín kà ɔ mu Jùɖúsɛ̀ɖɛ̀ìn-hwɔ̀ɖɔ̀ɔ̀ poùn ɖeɛ
1Ké Bounɓo mɔ̀ nyɔ nìà ɖɛ séín kɔ̃in nyɛɛ wùɖù ma ḿ gbo ɖe, ké ɔ ɖá, 2“Jùɖúsɛ̀ɖɛ̀ìn-hwɔ̀ɖɔ̀ɔ̀ jè kpɔ̃ ḿ hwòɖǒ mìɔ. Ḿ ɖɛ̀ɓɛ̀ ɔ mú jèɛɛ, ḿ kpáìn ɔ mú-nyɛ́-nyɔ̀ ɓěɔ̀ dyoɖoún mìɔ. 3Ní mu ɖé Jùɖúsɛ̀ɖɛ̀ìn-hwɔ̀ɖɔ̀ mɔ̀à Zádyɔún-hwɔ̀ɖɔ̀ɔ̀ kɛɛ mú ɖe dyiìn, ɓɛ́ ḿ ké ɖéɛ mú cĩ́. Ɔ mu hwɔɖɔ kɔ̃̀ mú ɓɛ́ dyí-sɛ́ɖɛ́ìn-ɖɛ̀ nyu-nyu nìɛɛ jǔùn, ké wa mu ní toɖo kɔ̃̀ dya ɓɛ́ Jùɖúsɛ̀ɖɛ̀ìn-hwɔ̀ɖɔ̀ɔ̀ nìà kɛɛ Toɖo Hwɛ̀ǐn-Hwɛ̀ǐn ɖáìn. 4Gàa sùà kè nyɔ́nɔ́ sùà ɓě mu Jùɖúsɛ̀ɖɛ̀ìn-hwɔ̀ɖɔ̀ɔ̀ gboi hwìè ɓěɔ̀ wĩin koìn ɖe. Waà nyɔ sùà kùì-kpà ɓěɔ̀ mu wa xwa nììn ɖe. 5Ké gàa-dyù kè màa-dyù ɓě mu hwɔɖɔ-gboi-hwìè ɓěɔ̀ gba dyíìn, ɓɛ́ wa ké péé nyuɛń nì. 6Ɖɛ nìà kɛ ɓɛ́ìn ɖɛ dĩ́ín-dĩ̀ìn jǔɛ ɖé ɓě mɔ̀ ní nyɔ xwéɖé wè sèà ɓíɖíiɛɛ dyéɖéín. Ɓó kàǔn wɛ̃ɛ, ɔ mɔ̀ ɖɛ dyùwè ɖé ḿ dyéɖéín. 7Ní mu ɓě póìn sɔ̀ìn ɖé ɓóɖó-dù séín xwaún. 8Ké ní mu ɓě ɖe dyàùn, ɓɛ́ ɓě ké Jùɖúsɛ̀ɖɛ̀ìn-hwɔ̀ɖɔ̀ɔ̀ mú cĩ́ ɖe. Ké ɓě mu ní nyɔ ɓě jǔùn, ké ní mu ɓěɛ̀ Gèɖèpɔ́ɔ̀ jǔùn ɖé jǎà kè dyí-sɛ́ɖɛ́ìn-sɛ́ɖɛ́ìn mú. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.
9“Ɓěɛ̀ hwòɖǒ mɛ kpá kpéí, ɓě mɔ̀ nyɔ ɓě wɔ̃́ zɔ̃̌ɔ̀ kà wuɖu ɓěɛ̀ kpáá-ɖɛ̀-cɛ̃-nyɔ̀ ɓěɔ̀ wĩín ti ɓɛ́ ní gbǒɔ̀ hìɖì-kpà nìǒ zɔ̃̌ɔ̀ kà dèɛ̌n nyɛɛ dyɛ̀ìn ɓó kàǔn wɛ̃. Wuɖuɔ̀ mɔ̀ kà ɓɛ́ ní gbǒɔ̀ ɓéɖé ɔ ké poɛ. 10Hwɛ̀ ɓɛ́ tia ké ma ɓó nyiniɛɛ, pɛ́ɛ̀-ɖɛ̀ ɖò se ma nì ɓó kũ̀à ɓɛ́ nyɔ ɖò mɔɔ nyúà-ɖɛ̀ ɖò nyuɛɛ jè. Kɛbì nyɔ ɖò mɛ sɔ̀ ma hwɔɖɔɔ̀ mú, ɓɛ́ ɔ ké píé síɛ, mɔɔ kɛbì ɔ mɛ dyá ma hwɔɖɔɔ̀ múɛɛ, ɔ se ma ɔ mú-nyɛ́-nyɔ̀ɔ̀ xwaún póɛ ɓɛ́ìn, sepóɛɖé ḿ nyuɛ ké nyɔ ɖò-ɖò séín nì ma gbo vɔ̃ǐn vɔ̃̀ǐn. 11Kɛɛ ɓó kàǔn wɛ̃ɛ, ḿ se ɖɛ ḿ nyu zɔ̃̌ɔ̀ kà wa bũ̌ɛɛ ɓě mɔ̀ nyɔ xwéɖé wè sèà ɓíɖíiɛɛ bũ̌ nyuɛ́ mu. 12Ɓě muá ɓěɛ̀ ɓáá-ɖɛ̀ ɓěɔ̀ ɓáùn ɖé gìɖìǐ mú. Ɓěɛ̀ géɖéè-gbǎ ɓěɔ̀ muá tòɖòùn, ké ɓóɖóɔ̀ muá bùɛ̀-bùɛ̀ nììn, ké dyɔɔ̀ muá ní tòùn. Ní muɛ nyuùn ɓɛ́ ɓě mɔ̀ nyɔ xwéɖé wè sèà ɓíɖíiɛɛ ké ɖɛ séín ɓěa kɔ̃̀. 13Ɓě mɔ̀à Júɖà-nyɔ̀ ɓě kè Éézùɖùɛ̀-dyù ɓěɛɛ, kà ɓɛ́ ɓě mɔ̀ ma kà ɓóɖó-dù ɓěɔ̀ dyí-gboò-ɖɛ̀ kɛɛ, kà dyúáɖòɔ̀ kǎà ní mu ɓě póìn, ké nyɔ ɓáún-ɓáún mu jĩ́á-jè dyéìn dyììn ɖé ɓě mú. Ɔ ná nì jèɛɛ, ɓěǐn ɖá ɓɛ́ ɓě ké fɛ̃̀ìn, kɛɛ ɓěɛ̀ hwòɖǒ mɛ kpá kpéí. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.
14“Ti ɓɛ́ ɓě ɓǎ nììn ɓǎ ɓěɔ̀ po zɔ̃̌ɔ̀ kà ḿ dyoɖoún wɛ̃ɛ, kà ɓɛ́ ní hwòɖǒ nyuɛ zɔ̃̌ɔ̀ kà gbɔ poɛ, ɓɛ́ ḿ ké ma kà ɓě gǎ kɔ̃ tò, ké ḿ se ma kà ɓě wìǐn dyéɛɛ, 15kà dyúáɖòɔ̀ kǎà ní hwòɖǒ ɖǎa gbɔ po ɓó kàǔn, ɓɛ́ ḿ ké ɓě mɔ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ nyɔ ɓě kè Júɖà-nyɔ̀ tɔ̀ɔ̀ ɓěɛɛ nɔ̀mɔ̀ dyíin dyí nyu. Ɓěǐn ɖá ɓɛ́ ɓě ké fɛ̃̀ìn. 16Kɛɛ ɖɛ ɓě mɛ nyuɛɛ kɛà kɛ̀. Ɓě mɛ cɛ̃ìn cɛ̃̀ìn jǎà gbo. Ɓě mɛ po dyí-sɛ́ɖɛ́ìn-ɖɛ̀ ɓě ɓɛ́ wa ɓɛ́ìn gìɖìǐ dyàà kɛɛ wɔ̃ ɖé ɓěɛ̀ zɔ̃́ín-cɛ̃̀ìn-naín ɓěɔ̀. 17Nyɔ ɖò ní ɖá ɓɛ́ ɔ ké ɖɛ gbà ɖò ɔ ké ɔ mǔè ɖò bũ̌ nyuɛɛ dyí sɔ́ ɖé ɔ hwòɖǒ bũ̌. Nyɔ ɖò ní ɖá ɓɛ́ ɔ ké se tɔ́mɔ́ hwɛ̀ ɓɛ́ ɔ ké gboò ɓóɛ jè ɖe, sepóɛɖé ḿ nyɛ́ ɖɛ séín ɓěɛ̀ mú. Mɔ̄ Bounɓoɔ̀ mɔ̀ nyɔ cɛ̃à kɛ̀.”
18Ké Bounɓo mɔ̀ nyɔ nìà ɖɛ séín kɔ̃in nyɛɛ wùɖù ma ḿ gbo ɖe, ké ɔ ɖá, 19“Ɓěɛ̀ dɛ̀nɛ̀ hĩinyɛ nììnɔ̀ wɔ̃-kɔ̃-hwèɖè-hwèɖèɔ̀ kè ɓěɛ̀ dɛ̀nɛ̀ hm̀m̌ nììnɔ̀ wɔ̃-kɔ̃-hwèɖè-hwèɖèɔ̀ kè ɓěɛ̀ dɛ̀nɛ̀ mɛ̀nɛ̌ìn-sɔ̃́ nììnɔ̀ wɔ̃-kɔ̃-hwèɖè-hwèɖèɔ̀ ɔ kè ɓěɛ̀ dɛ̀nɛ̀ ɓaɖa-bùè nììnɔ̀ wɔ̃-kɔ̃-hwèɖè-hwèɖèɔ̀ muá múà-tì jǔùn ɓó ɓě mɔ̀ Júɖà-nyɔ̀ ɓěɛɛ bìì. Ɔ mu hwɔ-pa-tì ɓě jǔùn. Ɓó kàǔn wɛ̃ɛ, ɓě mɛ ɖɛ̀ɓɛ̀ jǎà kè gìɖìǐ mú.
20-21“Ɓó tia ɓaɖaa, nyɔ ɓáún-ɓáún ɓɛ́ wa cĩ́ ɖé hwɔɖɔ-dù kò-kò ɓě múɛɛ mu gbo poìn, ɓɛ́ wa ké níiń, ‘Ɓěà mu, ɓɛ́ ɓěà ké Bounɓo mɔ̀ nyɔ nìà ɖɛ séín kɔ̃in nyɛɛ ɓaà, ɓɛ́ ɓěà ké ɔ ɖɛ zɔ̀ìne. Ɓěà mue.’ 22Nyɔ ɓáún-ɓáún mu ɓóɖó-dù vɛ̀nɛ̀ ɓéɖé kpé ɓě kɔ̃ sɔ̀ùn, ɓɛ́ wa ké ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyi, ɓɛ́ wa ké mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ ɓaà, ɓɛ́ wa ké ḿ ɖɛ zɔ̀ìn. 23Ɓó tia ɓaɖaa, nyɔ ɓaɖa-bùè mu ɓóɖó-dù ɓě ɓɛ́ wa mɔ̀ wuɖu-dù-kò-kò-po-nyɔ̀ ɓěɛɛ hwìɛ̀ sɔ̀ùn, ké wa mu dyiìn, ɓɛ́ wa ké Júɖà-nyɔ̀ ɖòɛ̀ gã́ùn dyi kpɔ̃, ɓɛ́ wa ké níiń, ‘À kè mɔ̀ mu, sepóɛɖé à wɔ̃́ɔ kà Gèɖèpɔ́ɔ̀ nì ɓó m̀ gboɛ.’ ”
Currently Selected:
Zɛ́kɔ̀wáɖádyà 8: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
