Zɛ́kɔ̀wáɖádyà 13
13
1Bounɓoɔ̀ cɛ̃ɛ ɖe, ké ɔ ɖá, “Ní-dù ɖò mu wɔ̃ kaàùn ɓó wéa ɓaɖa, ɓó Dèɓéɛ̀ gbǒ-xwíníínɔ̀ kè Jùɖúsɛ̀ɖɛ̀ìn-nyɔ̀ tɔ̀ɔ̀ ɓěɔ̀ bìì, ɓɛ́ ɔ ké wa mú hwɔ sɔ̀ìn ɖé waà nàmàǔn ɓěɔ̀ kè waà se-mú-hwɛ̀-ɖɛ̀ ɓěɔ̀ mú. 2Ké ɓó wéa ɓaɖaa, ní mu kũùn-kpò ɓěɛ̀ nyɛ́nɛ́ ɖé ɓóɖóɔ̀ kɔ̃ dyi sámáùn, ké wa jè se nyɔ ɖò hwìɖǐi dyiɛ́ mu ɖe sɔ̃̀ùn. Ké ní mu nyɔ ɓě ɓɛ́ wa ɖáìn wa mìɔùn kpáá-ɖɛ̀-cɛ̃-nyɔ̀ɛ kè zùù gbà ɓě ɖé ɓóɖóɔ̀ kɔ̃ dyi zàùn. 3Ɔ jǔ ké nyɔ ɖò dyi ɔ mìɔùn kpáá-ɖɛ̀-cɛ̃-nyɔ̀ ɖáìn ní, nìí, ɔ ɖe kè ɔ ɓǎ ɓɛ́ wa wóɖóìn ɔ kɛɛ mɛ cɛ̃ɛ ɔ gbo, ɓɛ́ wa ké níiń, ‘M̀ ɓéɖé m̀ ké mɛ́, sepóɛɖé m̀ nì se tɔ́mɔ́uń ɖé Bounɓoɔ̀ nyɛ́nɛ́ mú.’ Ti ɔ mu kpáá-ɖɛ̀ ɖò cɛ̃ìn nyɛɛ, nìí, ɔ ɖeɔ̀ kè ɔ ɓǎɔ̀ mɛ sṹ ɔ gàsíà mú, ɓɛ́ ɔ ké mɛ́. 4Ɓó wéa ɓaɖaa, dɛ̃ mu kpáá-ɖɛ̀-cɛ̃-nyɔ̀ ɓěɔ̀ ɖò-ɖò nyuùn ɓá dyí-tɛ̀mɛ̀ìn-ɖɛ̀ ɔ dyéɛɛ jè dyí. Ké ɔ se nimii-kùɖùù mɔ̀ kpáá-ɖɛ̀-cɛ̃-nyɔ̀ɛ̀ mú-po-ɖɔ̀ɛɛ mú poɛ́ mu, ɓɛ́ ɔ ké nyɔǔn cá. 5Kɛɛ ɔ muɛ cɛ̃ìn, ɓɛ́ ɔ ké níiń, ‘Ḿ se kpáá-ɖɛ̀-cɛ̃-nyɔ̀ ɖò. Ḿ mɔ̀ ɖɛ-ɓá-nyɔ̀, sepóɛɖé ɖɛ-ɓá-ɓá mɔ̀ ní kũ̀à sɔ̀ìn ɖé ní dyú-tìǐn.’ 6Ɔ jǔ ké nyɔ ɖò dyi ɔ dyi diè, ké ɔ dyi níiń, ‘Ɖɛ́ kɔ̃̀ jě ɓě nìà m̀ bũ̌ kɛ́?’ nìí, ɔ muɛ cɛ̃ìn, ɓɛ́ ɔ ké níiń, ‘Nyɔ ɖò puà ma ḿ ti ɓɛ́ ḿ nì ma ɖé ḿ ɓǎto ɓěɔ̀ ɓíɖí-taún wɛ̃.’ ”
Gèɖèpɔ́ɔ̀ ɓáɖáá-dyí-gmɔ̀-nyɔ̀ɔ̀ ɖáɓá-wùɖù ɓɛ́ wa tò kɛ
7Ké Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ɖe, ké ɔ ɖá, “Gàsíà wè, sɔ̀ dyí, ɓɛ́ m̀ ké ní ɓáɖáá-dyí-gmɔ̀-nyɔ̀ mɔ̀ nyɔ ɓɛ́ ɔ xwɛ̃́ìn ḿ bũ̌in nyɛɛ gbo vɔ̃. Ɖáɓá ɓáɖáá-dyí-gmɔ̀-nyɔ̀ɔ̀, ɓɛ́ ɓáɖáá ɓěɔ̀ ké dyi gbɛ̀ìn. Ɔ ɖǎ ná nìǐn, nìí, ní mu ɓáɖáá-dyù ɓěɔ̀ sɔ̃ kɔ̃ pɛ̃́ìn. 8Ní mu nyɔ séín ɓě ɓɛ́ wa nì ɖé ɓóɖóɔ̀ kɔ̃ɛɛ wáká tã mú geìn, ké ní mu wáká sɔ̃́ ɖáɓáùn, ɓɛ́ wáká dyúáɖò ké ɓó sè. 9Ké ní mu nyɔ ɓěɔ̀ wáká tã nììn sèà ɓíɖíiɛɛ dyéɖé poùn, ɓɛ́ ḿ ké wa zɛ̀nɛ̌ mú zà kà nyɔ poà séɓàɖà kè góò dyéɖé ní, nyɔ dyià wa zɛ̀nɛ̌ mú zà kɛ. Wa mu ḿ ɖáùn, ké ní mu wa gɔ̃̌ jǔùn. Ní muɛ cɛ̃ìn, ɓɛ́ ḿ ké níiń, ‘Wa mɔ̀ ní nyɔ ɓě.’ Ké wa mɔ̀ùn muɛ cɛ̃ìn, ɓɛ́ wa ké níiń, ‘Bounɓoɔ̀ mɔ̀ à Gèɖèpɔ́ɔ̀.’ ”
Currently Selected:
Zɛ́kɔ̀wáɖádyà 13: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
