Zɛ́kɔ̀wáɖádyà 12
12
Bounɓoɔ̀ mu Jùɖúsɛ̀ɖɛ̀ìn-hwɔ̀ɖɔ̀ɔ̀ póìn
1Ɖɛ ɓɛ́ Bounɓoɔ̀ cɛ̃ ɓá Éézùɖùɛ̀-nyɔ̀ ɓěɔ̀ jè dyíɛɛ kɛà kɛ̀. Ɔ mɔ̀ Bounɓo mɔ̀ nyɔ pɛ́ɛ̀ kà dyɔɔ̀ kɔ̃in, ké ɔ mɛà ɓóɖó-kpàà, ké ɔ poà nyɔǔn-dyùɛ̀ zùùɔ̀ ɖé ɔ múɛ. Ɔ cɛ̃ɛ, ké ɔ ɖá, 2“Ní mu Jùɖúsɛ̀ɖɛ̀ìn-hwɔ̀ɖɔ̀ɔ̀ náá-ɖɛ̀ mú nyuùn ɓó nyɔ séín nì ɓó ɔ ɖeiɛɛ bìì. Mú-nyɛ́-nyɔ̀ ɓěɔ̀ mu dyiìn, ɓɛ́ wa ké Jùɖúsɛ̀ɖɛ̀ìn-hwɔ̀ɖɔ̀ɔ̀ wɔ̃ gbǎìn, ké kǎà wa mu Júɖà-hwɔ̀ɖɔ̀ tɔ̀ɔ̀ ɓěɔ̀ nyuùn ɖekè. 3Ké ní mu Jùɖúsɛ̀ɖɛ̀ìn-hwɔ̀ɖɔ̀ɔ̀ sɔ́ɔ́-kpò ku xwa mú nyuùn ɓó nyɔ séín ɓěɔ̀ bìì, ɓó wéa ɓaɖa. Nyɔ kã̀ìn séín ɓɛ́ wa muɛ dyí ɖúùn wɛ̃ɛ, wa mu wa mìɔùn puàùn mìɔ. Ɓóɖó-dù séín ɓě nì toɖo-kpàà kɔ̃ɛɛ, wa mu dyí poìn, ɓɛ́ wa ké ɔ to kɔ̃ dyà. 4Ɓó wéa ɓaɖaa, ní muɛ nyuùn ɓɛ́ sǒ séín ké fɛ̃̀ìn, ɓɛ́ sã̀à ké sǒ ɓěɔ̀ kɔ̃ún-kò-nyɔ̀ ɓěɔ̀ nyu. Ní mu Júɖà-nyɔ̀ ɓěɔ̀ dyéɖé gbo dèìn, kɛɛ ní mu waà mú-nyɛ́-nyɔ̀ ɓěɔ̀ sǒ ɓěɔ̀ nyuùn, ɓɛ́ wa ké dyéɖéín dyi kpè. 5Ɔ ɖǎ ná nìǐn, nìí, Júɖà-nyɔ̀ vɛ̀nɛ̀ ɓěɔ̀ muɛ cɛ̃ìn, ɓɛ́ wa ké níiń, ‘Nyɔ ɓě ɓɛ́ wa cĩ́à ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ ɓéɖé gana dyììn ɖé Bounɓo mɔ̀à waà Gèɖèpɔ́ɔ̀ mɔ̀ nyɔ nìà ɖɛ séín kɔ̃in nyɛɛ mú.’
6“Ɓó wéa ɓaɖaa, ní mu Júɖà-nyɔ̀ vɛ̀nɛ̀ ɓěɔ̀ nyuùn, ɓɛ́ wa ké nì kà nyɛ-kpĩ̀ǐn ɖò ɓɛ́ ɔ nì ɖé nyɛ-kòò hwìɛ̀ kɛɛ, mɔɔ kà dɔ̀ɔ̀-kpà nì wãuń ɖò ɓɛ́ ɔ nì ɖé mɔɔ́-jũ̌ ɓě hwìɛ̀ kɛɛ nìà kɛ, ké wa mu nyɔ séín ɓě nì ɓó wa ɖei dà séín nyɛɛ ɓó dyi fɔ̃ùn nyɛ̀nɛ̀ɛ̀. Kɛɛ Jùɖúsɛ̀ɖɛ̀ìn-hwɔ̀ɖɔ̀ɔ̀ mu ɓó ɔ páɔ̀ mú nììn ke kánáá pū, ké nyɔǔn-dyù mu ɖéɛ mú cĩ́ìn ke.
7“Mɔ̄ Bounɓoɔ̀ mu Júɖà-nyɔ̀ ɓěɔ̀ to-ɖu-ɖu nyíìn kĩ́ín, nìí ɓɛ́ dya-dè-dè ɓɛ́ ɔ mu Dèɓéɛ̀ gbǒ-xwíníínɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ gbo dyiìn nyɛɛ ní kɔ̃̀ ɖà Júɖà nììn dya-dè-dèɔ̀ kɔ̃ zi. 8Ɓó wéa ɓaɖaa, mɔ̄ Bounɓoɔ̀ mu Jùɖúsɛ̀ɖɛ̀ìn-nyɔ̀ ɓěɔ̀ dyí gmɔ̀ùn. Ké nyɔ hwɛ̀ kpéí mìɔ nì ɖé wa hwìɛ̀ kɛɛ mu kpé dyéìn, ɓɛ́ ɔ ké dyi ku kà Dèɓé nì ma kà kɛ. Ké Dèɓéɛ̀ gbǒ-xwíníínɔ̀ mu wa nàìn kà mɔ̄ Bounɓo Gèɖèpɔ́ɔ̀ kè ní ínjàɔ̀ nyuà nyɔ nàìn nyɛ. 9Ké ní mu ɓóɖó-dù séín ɓě ɓɛ́ wa mu Jùɖúsɛ̀ɖɛ̀ìn-hwɔ̀ɖɔ̀ɔ̀ to kɔ̃ dyàùn wɛ̃ɛ mú gbɔɔ̀ùn ɓó wéa ɓaɖa.
10“Ké hwòɖǒ-dyùà ɓɛ́ ní mu Dèɓéɛ̀ gbǒ-xwíníínɔ̀ kè Jùɖúsɛ̀ɖɛ̀ìn-nyɔ̀ tɔ̀ɔ̀ ɓěɔ̀ xwíníín dèìn nyɛɛ mɔ̀ nyɔ-wìǐn-dyé-hwòɖò-dyùà kè ɓaà-hwòɖò-dyùà. Ké wa mu nyɔ ɓɛ́ wa taɓa ɖíɛɛ dya gmɔ̀ùn, ké wa mu vĩ̌ìn ɓó ɔ jè kà nyɔ vĩ̌à ɓó nyɔ dyú-kpò dyúáɖò jèɛ. Wa mu kpé poùn hwòɖǒɛ̀-nɛɛ̀-kà kà nyɔ poà kpé ɓó nyɔ nyíɔ́-dyù-gàà jèɛ. 11Vĩ̌-vĩ̌ ɓɛ́ ɔ mu ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú nììn ɓó wéa ɓaɖaa mu wɔ̃ kuùn mìɔ cá kà vĩ̌-vĩ̌ nì ma kà ɓó Háɖà-Wíɖímɔ̀ bìì ɖé Mɛ̀gíɖò Bɔɔ-kpàɔ̀ kɔ̃ɛɛ nyuà nìɛ̀ kɛ. 12Gbǒ-xwíníín ɖò-ɖò séín nì ɖé ɓóɖóɔ̀ kɔ̃ɛɛ mu vĩ̌ìn. Dèɓé nììn gbǒ-xwíníínɔ̀ mu wáká kpáùn, ɓɛ́ ɔ ké vĩ̌. Waà gmàà ɓě mu wáká kpáùn, ɓɛ́ wa ké vĩ̌. Nétɔ̃̀ nììn gbǒ-xwíníínɔ̀ mu wáká kpáùn, ɓɛ́ ɔ ké vĩ̌. Waà gmàà ɓě mu wáká kpáùn, ɓɛ́ wa ké vĩ̌. 13Ɖíìváà nììn gbǒ-xwíníínɔ̀ mu wáká kpáùn, ɓɛ́ ɔ ké vĩ̌. Waà gmàà ɓě mu wáká kpáùn, ɓɛ́ wa ké vĩ̌. Símì nììn gbǒ-xwíníínɔ̀ mu wáká kpáùn, ɓɛ́ ɔ ké vĩ̌. Waà gmàà ɓě mu wáká kpáùn, ɓɛ́ wa ké vĩ̌. 14Gbǒ-xwíníín tɔ̀ɔ̀ séín ɓě sè ɓóɛɛ ɖò-ɖò mu wáká kpáùn, ɓɛ́ ɔ ké vĩ̌. Waà gmàà ɓě mu wáká kpáùn, ɓɛ́ wa ké vĩ̌ ɖekè.”
Currently Selected:
Zɛ́kɔ̀wáɖádyà 12: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
