Wóɖómà 5
5
À sɛ́ɖɛ́ìn dyí ɖé Gèɖèpɔ́ɔ̀ dyéɖéín
1Ɔ jèɛɛ, kà à hwìɖǐǐ-taɓa-taɓaɔ̀ ɖǎà nyu ké à ɖǎà dyí sɛ́ɖɛ́ìn nyɛɛ, à hwòɖǒ-dyùà ɓěɔ̀ mɛ dè dyi ɖé gìɖìǐ ɓɛ́ ɔ nìà ɓó à kè Gèɖèpɔ́ɔ̀ pṹa kɛɛ mú. Gìɖìǐɔ̀ dyììn ɖé à Bounɓo Jízɛ̀ Kɛ́ɖɛ́ì mú. 2Dyììn ɖé Jízɛ̀ múɛɛ, à ɖǎ kpé ɓéɖé ɓɛ́ à ké pá ɓɛ́ Gèɖèpɔ́ɔ̀ naɓaà à bìì nɔ̀mɔ̀ dyíin nyɛɛ mú nì. Ɔ mɔ̀ dɛ̀ ɓɛ́ à nyànàà dyi kàǔn wɛ̃. À kpá múàǔn, sepóɛɖé à dè Gèɖèpɔ́ɔ̀ dĩ́ín-dĩ̀ìnɔ̀ ɖò dyé jè hwòɖǒ kɔ̃. 3Ɔ seɛ ɖòùn, kɛɛ à kpá múàǔn ɖé à gǎ-dyé-dyé ɓěɔ̀ mú ɖekè, sepóɛɖé à dyuòɛ̀ kà gǎ-dyé-dyé nyuɛ ké à ɓéɖé hwòɖǒ-ku-ku kɛ. 4Ké hwòɖǒ-ku-ku nyuɛ ké à zi mú-dɔ̃̌-dɔ̃̌ mú, ké mú-dɔ̃̌-dɔ̃̌ mú-zi-zi dyà ɖɛ-hwòɖǒ-kɔ̃-dè-dè. 5Ké ɖɛ ɓɛ́ à dèà hwòɖǒ kɔ̃ɛɛ, ɔ ní nyùìn à dɛ̃, sepóɛɖé Gèɖèpɔ́ɔ̀ ɖɛ̀ɓɛ̀ǐn-ɖɛ̀ɓɛ̀ǐnɔ̀ dyíìn ɖé à hwòɖǒ-dyùàɔ̀ múin dyììn ɖé Zùù Hwɛ̀ǐn-hwɛ̀ǐn ɓɛ́ Gèɖèpɔ́ɔ̀ ɖǎ à nyíɛɛ mú.
6Ti ɓɛ́ à se ma kpé ɖò ɓéɖéɛɛ, ɓó ti déínɔ̀ ɓaɖaa, Kɛ́ɖɛ́ì mɛ́ ma ɓó nyɔ ɓě ɓɛ́ wa mɔ̀ Gèɖèpɔ́ɔ̀ ɖɛ-gbà-bũ̌-nyu-nyɔ̀ ɓěɛɛ bìì. 7Ké ɔ kàmàǔn, ɓɛ́ à ɖò ké dyí-sɛ́ɖɛ́ìn-nyɔ̀ ɖò bìì mɛ́ dyɛ mɔ̀ùn. Kɛɛ ti ɖòɛ̀ ɓaɖaín, nyɔ ɖò ɓɛ́ìn hwòɖǒ kuɛ, ɓɛ́ ɔ ké nyɔ kɔ̃̀ kpeɖe nɔ̀mɔ̀ dyíin nyɛɛ bìì mɛ́. 8Kɛɛ Kɛ́ɖɛ́ì mɛ́ ma ɓó à bìì ti ɓɛ́ à mɔ̀ ma nàmàǔn-nyɔ̀ keɛ. Ké kǎà Gèɖèpɔ́ɔ̀ nyu ma ɔ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ ɓéɖéà à bììɛɛ à dyí tɛ̀mɛ̀ìn. 9Ké kà ɓɛ́ Kɛ́ɖɛ́ì nyɔmɔɔ̀ ɖǎà à dyí sɛ́ɖɛ́ìn nyɛɛ, nìí, ɔ mu à Gèɖèpɔ́ɔ̀ dyoɖoɔ̀ xwaún póìn jɛ́ɛ́ cá. 10Gèɖèpɔ́ɔ̀ Dyú-gààɔ̀ mɛ́-mɛ́ɔ̀ zà ma bĩ̀ǎ ɓɛ́ ɔ nì ma kà à kè Gèɖèpɔ́ɔ̀ pṹa kɛɛ ɓó. Ɔ nyuɛ ma náa ti ɓɛ́ à mɔ̀ ma Gèɖèpɔ́ɔ̀ mú-nyɛ́-nyɔ̀ ɓěɛ. Ɔ dyi ná nìǐn, nìí, Kɛ́ɖɛ́ì fɛ̀ɛ̀ɔ̀ mu à póìn jɛ́ɛ́ cá, kà ɓɛ́ bĩ̀ǎ ɖò seà à kè Gèɖèpɔ́ɔ̀ pṹa nì ɖeɛ. 11Ɔ seɛ séín. À kpá múàǔn ɖé Gèɖèpɔ́ɔ̀ mú ɖekè, dyììn ɖé à Bounɓo Jízɛ̀ mú. Ɔ mɔ̀ nyɔ kɔ̃̀ mú ɓɛ́ à ɖǎà bĩ̀ǎ-zà-zà dyéìn kàǔn wɛ̃.
Áɖɔ̀ùn kè Kɛ́ɖɛ́ì
12Ɖɛ kɔó dyíɛɛ, ɔ kɛ̀. Gàa dyúáɖò dyà ma nàmàǔn ɓóɖó-kpàà kɔ̃, ké nàmàǔn dyà mɛ́-mɛ́. Ké kǎà mɛ́-mɛ́ nyu nyɔǔn séín kɔ̃ dyiɛ, sepóɛɖé nyɔǔn séín ɖǎ nàmàǔn nyu jè. 13Nàmàǔn nì ma ɓóɖó-kpàà kɔ̃ kĩ́ín, hwɛ̀ ké Gèɖèpɔ́ɔ̀ tò ma gmaɔ̀. Kɛɛ dɛ̀ ɓɛ́ gma ɖò se nìɛɛ, wa se nyɔ ɖò dyi kpɔ̃ɔ ɓɛ́ìn ɓó nàmàǔn nyu jè. 14Kɛɛ sɔ̀ìn Áɖɔ̀ùn nììn tiɔ̀ gbo, ɓɛ́ ɔ ké Mózè nììn tiɔ̀ gbo dyiɛɛ, mɛ́-mɛ́ kɔ̃̀ nyɔǔn wuɖuí. Ɔ kɔ̃̀ nyɔ ɓě ɓɛ́ wa se nàmàǔn kɔ̃̀ ɖò ɓɛ́ Áɖɔ̀ùn mɔ̀ùn nyu ma kà ɖé gmaɔ̀ wáɖá-wáɖá múɛɛ ɖò nyuɛɛ wuɖuí ɖekè.
Áɖɔ̀ùn mɔ̀ ma nyɔ ké ma kà dyiɛɛ hwɔìn-ɖɛ̀. 15Kɛɛ ɖɛ ɓɛ́ Gèɖèpɔ́ɔ̀ nyíà nyɔǔn pídyiɛɛ, ɔ se nì kà ɖɛ gbà ɓɛ́ Áɖɔ̀ùn nyu ma kà kɛɛ nìà kɛ. Gàa dyúáɖòɛ̀ ɖɛ gbà nyu jè nyuɛ ké nyɔ ɓáún-ɓáún mɛ́. Ɖɛa mɔ̀ jǎà, kɛɛ ɖɛ mɔ̀ jǎà jɛ́ɛ́ cáa, ɔ kɛà kɛ̀. Ɔ mɔ̀, Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ zi kpéín ɓúáuń mìɔ, ké ɖɛ ɓɛ́ nyɔǔn ɖǎ dyé pídyi dyììn ɖé gàa dyúáɖò mɔ̀à Jízɛ̀ Kɛ́ɖɛ́ì kɛɛ kpeɖe nɔ̀mɔ̀ dyíinɔ̀ múɛɛ zi dyí vòɛ̌n ɓó nyɔ ɓáún-ɓáún bìì. 16À se ɖɛ ɓɛ́ Gèɖèpɔ́ɔ̀ nyíà nyɔ pídyiɛ kè gàa dyúáɖòɛ̀ nàmàǔn dyí poɛ̀n ɓɛ́ìn, sepóɛɖé zaa-wɔ̃-po-po ɓɛ́ ɔ kɔ ma ɓó ɖɛ gbà dyúáɖòɔ̀ gbo dyíɛɛ, ɔ dyà ma zaa-dúún-wáɖá-wáɖá, kɛɛ ɖɛ ɓɛ́ Gèɖèpɔ́ɔ̀ nyí nyɔǔn pídyi, ɓɛ́ ɔ kɔ ɓó ɖɛ gbà pàɖǎ gbo dyíɛɛ, ɔ dyà zaa-xwaún-buɛ̀-buɛ̀. 17Ɓó gàa dyúáɖòɛ̀ ɖɛ gbà nyu jèɛɛ, gĩɔ kɔ̃̀ nyɔǔn wuɖuí dyììn ɖé gàa dyúáɖò nìàǒ wɛɛ mú. Ɖɛa mɔ̀ jǎà, kɛɛ ɖɛ mɔ̀ jǎà jɛ́ɛ́ cáa kɛà kɛ̀. Ɔ mɔ̀, nyɔ ɓě ɓɛ́ Gèɖèpɔ́ɔ̀ ɖǎà ɔ kpeɖe nɔ̀mɔ̀ dyíin zià kpéín ɓúáuń wɛ̃ ɔ kè ɖɛ ɓɛ́ ɔ nyí nyɔǔn pídyi ɓɛ́ ɔ mɔ̀à ɔ dyí-sɛ́ɖɛ́ìn-sɛ́ɖɛ́ìnɔ̀ kɛ nyíɛɛ, wa mu cĩ́ìn, ɓɛ́ wa ké ɖɛ wuɖuí kɔ̃̀ dyììn ɖé gàa dyúáɖò mɔ̀à Jízɛ̀ Kɛ́ɖɛ́ì kɛɛ mú.
18Kà dyúáɖò kà ɖɛ gbà dyúáɖò mɔ̀ nyɔ dyàà zaa-dúún-wáɖá-wáɖá ɓó nyɔǔn séín bììɛɛ, kǎà dyí-sɛ́ɖɛ́ìn-ɖɛ̀ ɓɛ́ gàa dyúáɖò nyuɛɛ, ɔ mɔ̀ nyɔ dyà zaa-xwaún-buɛ̀-buɛ̀ kè fɛ̀ɛ̀ ɓó nyɔǔn séín bìì. 19Sepóɛɖé gàa dyúáɖòɛ̀ se wuɖu nyu jè nyuɛ ké nyɔ ɓáún-ɓáún jǔ ma nàmàǔn-nyɔ̀, ké kǎà gàa dyúáɖòɛ̀ wuɖu nyu jè muɛ nyuùn ɓɛ́ nyɔ ɓáún-ɓáún ké dyí-sɛ́ɖɛ́ìn-nyɔ̀ jǔ ɓó Gèɖèpɔ́ɔ̀ gbo.
20Gmaɔ̀ dyi ma, ɓɛ́ ɔ ké ɖɛ gbà kɔ̃ po. Kɛɛ dɛ̀ ɓɛ́ nàmàǔn kpá kɔ̃ɛɛ, Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ zi ɓó dyí vòɛ̌n mìɔ. 21Ɔ nyuɛ ma náa, ɓɛ́ kà nàmàǔn kɔ̃̀ ma nyɔ wuɖuí, ké ɔ dyà ma mɛ́-mɛ́ɛ, kǎà Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ mɛ kɔ̃̀ nyɔ wuɖuí ɖé dyí-sɛ́ɖɛ́ìn-sɛ́ɖɛ́ìn mú, ɓɛ́ ɔ ké sè-ná-sèɛ̀ fɛ̀ɛ̀ dyà dyììn ɖé Jízɛ̀ Kɛ́ɖɛ́ì mɔ̀à à Bounɓoɔ̀ kɛɛ mú.
Currently Selected:
Wóɖómà 5: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Wóɖómà 5
5
À sɛ́ɖɛ́ìn dyí ɖé Gèɖèpɔ́ɔ̀ dyéɖéín
1Ɔ jèɛɛ, kà à hwìɖǐǐ-taɓa-taɓaɔ̀ ɖǎà nyu ké à ɖǎà dyí sɛ́ɖɛ́ìn nyɛɛ, à hwòɖǒ-dyùà ɓěɔ̀ mɛ dè dyi ɖé gìɖìǐ ɓɛ́ ɔ nìà ɓó à kè Gèɖèpɔ́ɔ̀ pṹa kɛɛ mú. Gìɖìǐɔ̀ dyììn ɖé à Bounɓo Jízɛ̀ Kɛ́ɖɛ́ì mú. 2Dyììn ɖé Jízɛ̀ múɛɛ, à ɖǎ kpé ɓéɖé ɓɛ́ à ké pá ɓɛ́ Gèɖèpɔ́ɔ̀ naɓaà à bìì nɔ̀mɔ̀ dyíin nyɛɛ mú nì. Ɔ mɔ̀ dɛ̀ ɓɛ́ à nyànàà dyi kàǔn wɛ̃. À kpá múàǔn, sepóɛɖé à dè Gèɖèpɔ́ɔ̀ dĩ́ín-dĩ̀ìnɔ̀ ɖò dyé jè hwòɖǒ kɔ̃. 3Ɔ seɛ ɖòùn, kɛɛ à kpá múàǔn ɖé à gǎ-dyé-dyé ɓěɔ̀ mú ɖekè, sepóɛɖé à dyuòɛ̀ kà gǎ-dyé-dyé nyuɛ ké à ɓéɖé hwòɖǒ-ku-ku kɛ. 4Ké hwòɖǒ-ku-ku nyuɛ ké à zi mú-dɔ̃̌-dɔ̃̌ mú, ké mú-dɔ̃̌-dɔ̃̌ mú-zi-zi dyà ɖɛ-hwòɖǒ-kɔ̃-dè-dè. 5Ké ɖɛ ɓɛ́ à dèà hwòɖǒ kɔ̃ɛɛ, ɔ ní nyùìn à dɛ̃, sepóɛɖé Gèɖèpɔ́ɔ̀ ɖɛ̀ɓɛ̀ǐn-ɖɛ̀ɓɛ̀ǐnɔ̀ dyíìn ɖé à hwòɖǒ-dyùàɔ̀ múin dyììn ɖé Zùù Hwɛ̀ǐn-hwɛ̀ǐn ɓɛ́ Gèɖèpɔ́ɔ̀ ɖǎ à nyíɛɛ mú.
6Ti ɓɛ́ à se ma kpé ɖò ɓéɖéɛɛ, ɓó ti déínɔ̀ ɓaɖaa, Kɛ́ɖɛ́ì mɛ́ ma ɓó nyɔ ɓě ɓɛ́ wa mɔ̀ Gèɖèpɔ́ɔ̀ ɖɛ-gbà-bũ̌-nyu-nyɔ̀ ɓěɛɛ bìì. 7Ké ɔ kàmàǔn, ɓɛ́ à ɖò ké dyí-sɛ́ɖɛ́ìn-nyɔ̀ ɖò bìì mɛ́ dyɛ mɔ̀ùn. Kɛɛ ti ɖòɛ̀ ɓaɖaín, nyɔ ɖò ɓɛ́ìn hwòɖǒ kuɛ, ɓɛ́ ɔ ké nyɔ kɔ̃̀ kpeɖe nɔ̀mɔ̀ dyíin nyɛɛ bìì mɛ́. 8Kɛɛ Kɛ́ɖɛ́ì mɛ́ ma ɓó à bìì ti ɓɛ́ à mɔ̀ ma nàmàǔn-nyɔ̀ keɛ. Ké kǎà Gèɖèpɔ́ɔ̀ nyu ma ɔ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ ɓéɖéà à bììɛɛ à dyí tɛ̀mɛ̀ìn. 9Ké kà ɓɛ́ Kɛ́ɖɛ́ì nyɔmɔɔ̀ ɖǎà à dyí sɛ́ɖɛ́ìn nyɛɛ, nìí, ɔ mu à Gèɖèpɔ́ɔ̀ dyoɖoɔ̀ xwaún póìn jɛ́ɛ́ cá. 10Gèɖèpɔ́ɔ̀ Dyú-gààɔ̀ mɛ́-mɛ́ɔ̀ zà ma bĩ̀ǎ ɓɛ́ ɔ nì ma kà à kè Gèɖèpɔ́ɔ̀ pṹa kɛɛ ɓó. Ɔ nyuɛ ma náa ti ɓɛ́ à mɔ̀ ma Gèɖèpɔ́ɔ̀ mú-nyɛ́-nyɔ̀ ɓěɛ. Ɔ dyi ná nìǐn, nìí, Kɛ́ɖɛ́ì fɛ̀ɛ̀ɔ̀ mu à póìn jɛ́ɛ́ cá, kà ɓɛ́ bĩ̀ǎ ɖò seà à kè Gèɖèpɔ́ɔ̀ pṹa nì ɖeɛ. 11Ɔ seɛ séín. À kpá múàǔn ɖé Gèɖèpɔ́ɔ̀ mú ɖekè, dyììn ɖé à Bounɓo Jízɛ̀ mú. Ɔ mɔ̀ nyɔ kɔ̃̀ mú ɓɛ́ à ɖǎà bĩ̀ǎ-zà-zà dyéìn kàǔn wɛ̃.
Áɖɔ̀ùn kè Kɛ́ɖɛ́ì
12Ɖɛ kɔó dyíɛɛ, ɔ kɛ̀. Gàa dyúáɖò dyà ma nàmàǔn ɓóɖó-kpàà kɔ̃, ké nàmàǔn dyà mɛ́-mɛ́. Ké kǎà mɛ́-mɛ́ nyu nyɔǔn séín kɔ̃ dyiɛ, sepóɛɖé nyɔǔn séín ɖǎ nàmàǔn nyu jè. 13Nàmàǔn nì ma ɓóɖó-kpàà kɔ̃ kĩ́ín, hwɛ̀ ké Gèɖèpɔ́ɔ̀ tò ma gmaɔ̀. Kɛɛ dɛ̀ ɓɛ́ gma ɖò se nìɛɛ, wa se nyɔ ɖò dyi kpɔ̃ɔ ɓɛ́ìn ɓó nàmàǔn nyu jè. 14Kɛɛ sɔ̀ìn Áɖɔ̀ùn nììn tiɔ̀ gbo, ɓɛ́ ɔ ké Mózè nììn tiɔ̀ gbo dyiɛɛ, mɛ́-mɛ́ kɔ̃̀ nyɔǔn wuɖuí. Ɔ kɔ̃̀ nyɔ ɓě ɓɛ́ wa se nàmàǔn kɔ̃̀ ɖò ɓɛ́ Áɖɔ̀ùn mɔ̀ùn nyu ma kà ɖé gmaɔ̀ wáɖá-wáɖá múɛɛ ɖò nyuɛɛ wuɖuí ɖekè.
Áɖɔ̀ùn mɔ̀ ma nyɔ ké ma kà dyiɛɛ hwɔìn-ɖɛ̀. 15Kɛɛ ɖɛ ɓɛ́ Gèɖèpɔ́ɔ̀ nyíà nyɔǔn pídyiɛɛ, ɔ se nì kà ɖɛ gbà ɓɛ́ Áɖɔ̀ùn nyu ma kà kɛɛ nìà kɛ. Gàa dyúáɖòɛ̀ ɖɛ gbà nyu jè nyuɛ ké nyɔ ɓáún-ɓáún mɛ́. Ɖɛa mɔ̀ jǎà, kɛɛ ɖɛ mɔ̀ jǎà jɛ́ɛ́ cáa, ɔ kɛà kɛ̀. Ɔ mɔ̀, Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ zi kpéín ɓúáuń mìɔ, ké ɖɛ ɓɛ́ nyɔǔn ɖǎ dyé pídyi dyììn ɖé gàa dyúáɖò mɔ̀à Jízɛ̀ Kɛ́ɖɛ́ì kɛɛ kpeɖe nɔ̀mɔ̀ dyíinɔ̀ múɛɛ zi dyí vòɛ̌n ɓó nyɔ ɓáún-ɓáún bìì. 16À se ɖɛ ɓɛ́ Gèɖèpɔ́ɔ̀ nyíà nyɔ pídyiɛ kè gàa dyúáɖòɛ̀ nàmàǔn dyí poɛ̀n ɓɛ́ìn, sepóɛɖé zaa-wɔ̃-po-po ɓɛ́ ɔ kɔ ma ɓó ɖɛ gbà dyúáɖòɔ̀ gbo dyíɛɛ, ɔ dyà ma zaa-dúún-wáɖá-wáɖá, kɛɛ ɖɛ ɓɛ́ Gèɖèpɔ́ɔ̀ nyí nyɔǔn pídyi, ɓɛ́ ɔ kɔ ɓó ɖɛ gbà pàɖǎ gbo dyíɛɛ, ɔ dyà zaa-xwaún-buɛ̀-buɛ̀. 17Ɓó gàa dyúáɖòɛ̀ ɖɛ gbà nyu jèɛɛ, gĩɔ kɔ̃̀ nyɔǔn wuɖuí dyììn ɖé gàa dyúáɖò nìàǒ wɛɛ mú. Ɖɛa mɔ̀ jǎà, kɛɛ ɖɛ mɔ̀ jǎà jɛ́ɛ́ cáa kɛà kɛ̀. Ɔ mɔ̀, nyɔ ɓě ɓɛ́ Gèɖèpɔ́ɔ̀ ɖǎà ɔ kpeɖe nɔ̀mɔ̀ dyíin zià kpéín ɓúáuń wɛ̃ ɔ kè ɖɛ ɓɛ́ ɔ nyí nyɔǔn pídyi ɓɛ́ ɔ mɔ̀à ɔ dyí-sɛ́ɖɛ́ìn-sɛ́ɖɛ́ìnɔ̀ kɛ nyíɛɛ, wa mu cĩ́ìn, ɓɛ́ wa ké ɖɛ wuɖuí kɔ̃̀ dyììn ɖé gàa dyúáɖò mɔ̀à Jízɛ̀ Kɛ́ɖɛ́ì kɛɛ mú.
18Kà dyúáɖò kà ɖɛ gbà dyúáɖò mɔ̀ nyɔ dyàà zaa-dúún-wáɖá-wáɖá ɓó nyɔǔn séín bììɛɛ, kǎà dyí-sɛ́ɖɛ́ìn-ɖɛ̀ ɓɛ́ gàa dyúáɖò nyuɛɛ, ɔ mɔ̀ nyɔ dyà zaa-xwaún-buɛ̀-buɛ̀ kè fɛ̀ɛ̀ ɓó nyɔǔn séín bìì. 19Sepóɛɖé gàa dyúáɖòɛ̀ se wuɖu nyu jè nyuɛ ké nyɔ ɓáún-ɓáún jǔ ma nàmàǔn-nyɔ̀, ké kǎà gàa dyúáɖòɛ̀ wuɖu nyu jè muɛ nyuùn ɓɛ́ nyɔ ɓáún-ɓáún ké dyí-sɛ́ɖɛ́ìn-nyɔ̀ jǔ ɓó Gèɖèpɔ́ɔ̀ gbo.
20Gmaɔ̀ dyi ma, ɓɛ́ ɔ ké ɖɛ gbà kɔ̃ po. Kɛɛ dɛ̀ ɓɛ́ nàmàǔn kpá kɔ̃ɛɛ, Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ zi ɓó dyí vòɛ̌n mìɔ. 21Ɔ nyuɛ ma náa, ɓɛ́ kà nàmàǔn kɔ̃̀ ma nyɔ wuɖuí, ké ɔ dyà ma mɛ́-mɛ́ɛ, kǎà Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ mɛ kɔ̃̀ nyɔ wuɖuí ɖé dyí-sɛ́ɖɛ́ìn-sɛ́ɖɛ́ìn mú, ɓɛ́ ɔ ké sè-ná-sèɛ̀ fɛ̀ɛ̀ dyà dyììn ɖé Jízɛ̀ Kɛ́ɖɛ́ì mɔ̀à à Bounɓoɔ̀ kɛɛ mú.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.