Wɛ́ɖɛ́ 60
60
Ɓaà-wùɖù ɓá nyɔ póìn jè dyíɛ
Dèɓé céè ma wɛ́ɖɛ́ kpa ɖɛ nìà kɛ, ɓɛ́ ɔ kéɛ nyɔǔn tɛ̀mɛ̀ìn. Ɔ ɓeɖeɛ ma ti ɓɛ́ ɔ ɖǎ ma Áwàɖàùn-nyɔ̀ ɓě ɓɛ́ wa cĩ́ ma ɖé Nàháwàɖàìn-ɓòɖòɔ̀ kè Zóɓà-ɓòɖòɔ̀ kɔ̃ɛɛ gbo vɔ̃, ké Jóà ɖǎ ma mu, ké ɔ ɖǎ ma Íɖɔ̀ùn-nyɔ̀ táázĩ̀ìn ɓaɖa-bùè sè sɔ̃́ ɖáɓá ɖé Tɔ̃́ Bɔɔ-kpàɔ̀ kɔ̃ɛ. Wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo. Ɔ mɛ ɓèɖèɛ̀n wɛ́ɖɛ́-wùɖù mɔ̀à “Dèè-wùɖùɔ̀ Dòùn-dááɔ̀” kɛɛ mú.
1Gèɖèpɔ́ɔ̀, m̀ ɖǎ à ɓɔ́, ké m̀ ɖǎ à dyí-zĩ̀ìn-ɖɛ̀ ɓěɔ̀ à ɖei zà.
M̀ ɖǎ à dyoɖoún kpáìn dyɛo, ɓɔ̌ɔ̀,
kɛɛ gmɔ̀ìn nɔ̄ à gbo ɖe.
2M̀ ɖǎa nyu ké ɓóɖóɔ̀ ɖǎ kɔ̃in tɛɖɛ, ké ɔ ɖǎ mú fá.
Ɓó kàǔn wɛ̃ɛ, nyuɛ ɓɛ́ ɔ mú-fá-bɛ̃̀ hwɔìn jěɔ̀ ké ɓɔ́ ɖe, sepóɛɖé ɔ nì xwaún sɔ̀ǐn.
3M̀ ɖǎa nyu ké à mɔ̀à nì nyɔ ɓěɛɛ ɖǎ gǎ-ɖɛ̀ ku wɔ̃ ɓě dyí dyé.
M̀ nyuɛ ké à dyi nàǔn nìǐn, à nì ɓo kɔ̃in cɛ̃ǐn kà nyɔ ɓɛ́ nɔmɔɔ nyuɛɛ nàà kɛ.
4M̀ ɖǎ kɔ́ɖɔ̀ ɖò dyií po ɓó nyɔ ɓě ɓɛ́ wa fɛ̃̀ìn m̀ dyiɛɛ bìì,
ɓɛ́ ɔ ké dyí-tɛ̀mɛ̀ìn-ɖɛ̀ jǔ ɓá kà wa ké mú-nyɛ́-nyɔ̀ɔ̀ pɔnɔɔ̀ xwaún póɛ nyuɛɛ jè dyí.
5Nì nyɔ ɓě ɓɛ́ m̀ ɖɛ̀ɓɛ̀à múɛɛ ké pó jèɛɛ,
m̀ mɛ jǔ à ɓaà-wùɖù ɓěɔ̀ gɔ̃̌, ɓɛ́ m̀ ké à to-ɖu-ɖu nyí dyììn ɖé nì ɖiaùn-sɔ̃̀ɔ̀ mú.
6Gèɖèpɔ́ɔ̀ ɖǎ wùɖù ɖé ɔ pá hwɛ̀ǐn-hwɛ̀ǐnɔ̀ mú, ké ɔ ɖá,
“Ɖé to-ɖu-ɖu múɛɛ, ní mu Sɛ́kɛ̃̀ìn-hwɔ̀ɖɔ̀ɔ̀ kè Súkò Bɔɔ-kpàɔ̀ ní nyɔ ɓěɔ̀ múin geìn.
7Gíɖèà-ɓòɖòɔ̀ mɔ̀ ní kɔ̃̀ɔ̀-ɖɛ̀, ɔ kè Mànásì-ɓòɖòɔ̀ ɖekè.
Ífèɖèìn-ɓòɖòɔ̀ mɔ̀ ní to-mú-vɔ̃̀ìn-gbàǎ ɓɛ́ ḿ dèìn dú kɛ,
ké Júɖà-ɓòɖòɔ̀ mɔ̀ ní kã́á nyɔ-wuɖuí-kɔ̃̀ìn-kùì-kpà.
8Ḿ ɖǎ Móà-ɓòɖòɔ̀ ní mú-dèɖèìn-ɖɛ̀ mú nyuùn.
Ké ɓá Íɖɔ̀ùn-ɓòɖòɔ̀ mɔ̀ùn jè dyíɛɛ, ɔ nì ḿ ɓo xwíɖíi.
Ké ní mu mú pánáùn kà ḿ ɖǎ Féɖésìà-nyɔ̀ ɓěɔ̀ toún ɖuɛ.”
9Gèɖèpɔ́ɔ̀, nyɛ́ mu ɖé ḿ hwɔɖɔ cɛ̃̀ìn gmɔ ɖeiɔ̀ mú kpaùn wɛ̃́?
Nyɛ́ mu ɖé ḿ Íɖɔ̀ùn-ɓòɖòɔ̀ kɔ̃ kpaùn wɛ̃́?
10M̀ ɖǎ à ɓɔ́ jɛ́ɛ́ cáà, Gèɖèpɔ́ɔ̀?
M̀ se à sójà ɓěɔ̀ to gbo kpaá muù?
11Kpá à gbo ɓó à mú-nyɛ́-nyɔ̀ ɓěɔ̀ gbo vɔ̃ jè,
sepóɛɖé nyɔǔn-dyù nììn nyɔ-gbo-kpá-kpáɔ̀ se ɓó ɖɛ ɖò zàà ɓɛ́ìn.
12Gèɖèpɔ́ɔ̀, m̀ dyi ɓó à gbo nìǐn, à mu toɔ̀ ɖuùn,
sepóɛɖé mɔ̀ mɔ̀ nyɔ mu à mú-nyɛ́-nyɔ̀ ɓěɔ̀ kɔ̃in síìn.
Currently Selected:
Wɛ́ɖɛ́ 60: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
