Fèɖópĩ̀à 1
1
Nyíɔún-zà-zà
1Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ḿ kè Tímétè mɔ̀à Kɛ́ɖɛ́ì Jízɛ̀ɛ̀ gbo-nì-nyɔ̀ ɓěɛɛ zà ɓě mɔ̀à Gèɖèpɔ́ɔ̀-nyɔ̀ séín ɓě nìà ɖé Kɛ́ɖɛ́ì Jízɛ̀ mú ɖé Féɖópà-hwɔ̀ɖɔ̀ɔ̀ múɛ kè cɔ́cìɔ̀ kɔ̃in-gmɔìn-nyɔ̀ ɓěɔ̀ ɔ kè ɔ gbo-nì-nyɔ̀ ɓěɔ̀ nyíɔún.
2Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.
Pɔ́ɔ̀ ɓaà ɓó Féɖópà-nyɔ̀ ɓěɔ̀ jè
3Ti séín ɓɛ́ ɓě jè dyi ḿ hwìɖǐiɛɛ, ḿ po ní Gèɖèpɔ́ɔ̀ zùo. 4Ké ti séín ɓaɖa ɓɛ́ ḿ ɓaà ɓó ɓě jèɛɛ, ḿ ɓaà ɖé múà mú, 5sepóɛɖé ɓě ɖǎ ḿ gbo kpá ɓó bɔ̃̌ nɔ̀mɔ̀ dyíinɔ̀ kũ̀à mú nyùìn jè, sɔ̀ìn ɖé wé kĩ́ín-kĩ́ínɔ̀ gbo, ɓɛ́ ɔ ké ti nìà kɛ gbo dyiɛ. 6Ké ḿ dyuò kà ɖɛ ní muà cɛ̃ìn nyɛɛ mɔ̀ jǎà jɛ́ɛ́ kɛ. Ɔ mɔ̀, kà ɓɛ́ Gèɖèpɔ́ɔ̀ mɔ̀ nyɔ dèà kũ̀à nìà kɛ gbɔ ɖé ɓě múɛɛ, ɔ muɛ dyúa kpaùn tee ɓɛ́ ɔ ké hwɛ̀ ɖé Jízɛ̀ Kɛ́ɖɛ́ì nììn wéɔ̀ múɛ. 7Ɓě jè kpɔ̃ ḿ hwòɖǒ mìɔ. Ɔ jèɛɛ, ɔ sɛ́ɖɛ́ìn dyí ɓɛ́ ḿ ké kà ná ɓě jè hwìɖǐi poìn. Sepóɛɖé ḿ kè ɓě ɖǎ mana-ɖɛ̀ ɓɛ́ Gèɖèpɔ́ɔ̀ ɖǎà ḿ nyíɛɛ mú peɖeìn, kà ɓɛ́ ḿ nìà kpɔɖɔ ɖeín kàǔn wɛ̃, ɔ kè ti ɓɛ́ ḿ zaìn bɔ̃̌ nɔ̀mɔ̀ dyíinɔ̀ jè kɔ̃in, ké ḿ kùìn ɔ dyiɛ. 8Gèɖèpɔ́ɔ̀ dyuò kà ɓěɛ̀ tó nyu ḿ mìɔ kɛ, ké ɖɛ nìà kɛ sɔ̀ìn ɖé Kɛ́ɖɛ́ì Jízɛ̀ mìɔùn mú.
9Ɖɛ kɔ̃̀ jè ḿ ɓaà kɛɛ, ɔ kɛ. Ɔ mɔ̀, ɓɛ́ ɓěɛ̀ ɖɛ̀ɓɛ̀ǐn-ɖɛ̀ɓɛ̀ǐnɔ̀ kè ɓěɛ̀ ɖɛ-dyí-dyuò-dyuòɔ̀ ɔ kè ɓěɛ̀ ɖɛ séín múin-wɔ̃́-wɔ̃́ɔ̀ ké kɔ̃ kpáuń nì tee, 10ɓɛ́ ɓě ké ɖɛ mɔ̀ ɖɛ nɔ̀mɔ̀ dyíin nyɛɛ dyí dyuòɛ̀ ɓɛ́ìn. Nìí, bɛ̃̌ kè kɛɛ ɖò se ɓě bũ̌ nìɛ̌ mu ɖé Kɛ́ɖɛ́ì nììn wéɔ̀ mú. 11Dyí-sɛ́ɖɛ́ìn-ɖɛ̀ ɓě nyu-nyu ɓɛ́ ɔ dyììn ɖé Jízɛ̀ Kɛ́ɖɛ́ì múɛɛ mu ɖé ɓě mú bãùn mìɔ, ɓɛ́ Gèɖèpɔ́ɔ̀ ké dĩ́ín-dĩ̀ìn kè ɓàìn-ɓàìn ɓéɖé.
Kɛ́ɖɛ́ì jè kpa ɖɛ ɖé Pɔ́ɔ̀ gbo
12Ḿ ɖíí ɓě, ḿ mɔ́ ɓɛ́ ɓě kéɛ dyuò kà ɖɛ ɓě ɓɛ́ wa ɖǎ ḿ gbo kpáa, wa ɖǎ bɔ̃̌ nɔ̀mɔ̀ dyíinɔ̀ gbo kpá jɛ́ɛ́, ɓɛ́ ɔ ké dyúa muɛ. 13Sójà séín ɓě gmɔ̀à gɔ̌mànà vɛ̀nɛ̀ɔ̀ gbǒɔ̀ dyíɛ ɔ kè nyɔ tɔ̀ɔ̀ séín ɓě nìà nɔ̄ kɛɛ dyuò kà ḿ nì kpɔɖɔ ɖeín ɓó Kɛ́ɖɛ́ì jèɛ. 14Ní kpɔɖɔ ɖeín kpá jèɔ̀ nyuɛ ké à ɖíí ɓěɔ̀ pàɖǎ dè Bounɓoɔ̀ hwòɖǒ kɔ̃ mìɔ, ké wa ɓéɖé gàa-hwòɖò-dyùà, ɓɛ́ wa ké se fɛ̃̀ìn, ɓɛ́ wa ké Gèɖèpɔ́ɔ̀-wùɖùɔ̀ cɛ̃.
15Wa ɖíɛ́ ɓě nì Kɛ́ɖɛ́ì jè cɛ̃iń, sepóɛɖé wa kpá hwɛ̀nɛ̌ǐn, ké wa mɔ̀ zàǔn-zàǔn-nyɔ̀ ɓě jǎà. Kɛɛ wa ɖíɛ́ ɓě ɓéɖé hwòɖǒ nɔ̀mɔ̀ dyíin, ké wa cɛ̃ ɔ jè. 16Ɖɛ̀ɓɛ̀ǐn-ɖɛ̀ɓɛ̀ǐn nyuɛ ké nyɔ ɓě nìà kɛ nyuɛ náa, sepóɛɖé wa dyuòɛ̀ dyí kà Gèɖèpɔ́ɔ̀ ɖǎ ḿ kũ̀à mɔ̀à bɔ̃̌ nɔ̀mɔ̀ dyíinɔ̀ kɔ̃in zaìn jèɛɛ ḿ nyíɛ. 17Nyɔ tɔ̀ɔ̀ ɓěɔ̀ se Kɛ́ɖɛ́ì jèɔ̀ zio po ɖé hwòɖǒ wáɖáá mú, kɛɛ wa nyuɛ, sepóɛɖé wa vɔ̃ wa mìɔùn jè. Wa poìn hwìɖǐi kà ɓɛ́ wa mu ḿ bìì fũ̀à-fṹá-ɖɛ̀ pàɖǎ nyuùn kà ḿ nìà kpɔɖɔ ɖeín keɛ.
18Ɖɛ́ ɔ kpáún wɛ̃́? Ɖɛ kɔ̃̀ jè wa cɛ̃à ɔ jèɛɛ, kɛbì ɔ mɛ jǔ jǎà, mɔ̀ɔ̀ ɔ mɛ se jǎà kɛɛ, wɛ̃́ɛ́ kɛɛ, nyɔǔn cɛ̃ Kɛ́ɖɛ́ì jè ɖé hwìè séín mú. Ké ḿ kpá múàǔn ɓóɛ jè. Ké ní mu múàǔn kpáùn kánáá pū, 19sepóɛɖé ḿ dyuò kà ɓěɛ̀ ɓaà-wùɖùɔ̀ kè gbo-kpá-kpá ɓɛ́ ɔ sɔ̀àìn ɖé Jízɛ̀ Kɛ́ɖɛ́ì Zùùɔ̀ múɛɛ muɛ nyuùn ɓɛ́ ḿ ké póɛ. 20Sepóɛɖé ɖɛ kpɔ̃ ḿ hwòɖǒ mìɔ kɛ kè ɖɛ ḿ dè hwòɖǒ kɔ̃ɛɛ, ɔ mɔ̀, ɓɛ́ dɛ̃ ké se ḿ nyu ɖé ɖɛ ɖò mú, ɓɛ́ ḿ ké se fɛ̃̀ìn fɔɔ ɓó kàǔn ɔ kè ti séín ɓaɖa, ɓɛ́ Kɛ́ɖɛ́ì ké dya-dè-dè ɓéɖé dyììn ɖé ḿ mìɔùn mú, kɛbì ḿ mɛ cĩ́ mɔɔ ḿ mɛ mɛ́ɛ. 21Sepóɛɖé ɖé ḿ gboɛɛ, ɔ nì kà ḿ kè Kɛ́ɖɛ́ìɛ̀ fɛ̀ɛ̀ɔ̀ gmaìnɔ̌ kà dyíɛ. Ké ḿ dyi mɛ́ín, nìí, ɔ mɔ̀ ní kpánáa. 22Kɛɛ ɔ jǔ ké ní ɓóɖó-kpàà kɔ̃-sè-sèɔ̀ xwíníín dyi ɓɛ́ ḿ ké kũ̀à ɖò nyu, ɓɛ́ ḿ kéɛ pɛ́ɛ̀-ɖɛ̀ kɔ̃ún dyéín, nìí, ḿ se nyɔ ɓɛ́ ḿ ké gãa dyuò. 23Ɖɛ sɔ̃́ kpɔ̃ ḿ hwòɖǒ. Ḿ mɔ́ ɓɛ́ ní fɛ̀ɛ̀ɔ̀ ké ḿ mú sɔ̀, ɓɛ́ ḿ ké ɖé Kɛ́ɖɛ́ì gbo nì. Ɔ mɔ̀ ɖɛ zi dyíin nɔ̀mɔ̀ǔn wɛ̃. 24Kɛɛ ɓó ɓě jè, ɔ nɔ̀mɔ̀ dyíin mìɔ ɓɛ́ ní fɛ̀ɛ̀ɔ̀ ké ḿ mú nì. 25Ḿ dè ɖɛa hwòɖǒ kɔ̃. Ɔ jèɛɛ, ḿ dyuòɛ̀ dyí kà ní mu hwèɖèìn nyɛ. Ní mu nɔ̄ ɓě séín gbo nììn, ɓɛ́ ɓě ké dyúa mu, ɓɛ́ ɓě ké múà ɓéɖé ɖé hwìɖǐǐ-taɓa-ɖɛ̀ ɓěɔ̀ mú. 26Ɔ nì ná, ɓɛ́ ḿ dyi ɖé ɓě gbo dyi ɖe ní, ɓě ké ɖɛ kɔ̃̀ jè ɓě ké ɓɔ́ɖɔ́ mìɔ ɖé ɓěɛ̀ cĩ́-cĩ́ ɓɛ́ ɓě cĩ́à ɖé Kɛ́ɖɛ́ì Jízɛ̀ múɛɛ ɓéɖé ɓó ní jè.
27Ɖɛ dyúáɖò ɓě mɛ nyuɛɛ, ɔ mɔ̀, ɓě mɛ cĩ́ kà Kɛ́ɖɛ́ìɛ̀ bɔ̃̌ nɔ̀mɔ̀ dyíinɔ̀ nyuà cɛ̃ɛ kɛ, ɓɛ́ kɛbì ḿ mɛ dyi ɓɛ́ ḿ ké ɓě dyé, mɔɔ ɓɛ́ ḿ ké se dyiɛɛ, ḿ mɛ wɔ̃́ ɖé ɓě gbo bɔ̃̌ kà ɓɛ́ ɓě ɓéɖé hwòɖǒ dyúáɖò, ké ɓě nyànà dyi gãun-gãun wɛ̃, ɔ kè kà ɓɛ́ ɓě séín wɔ̃́, ké ɓě vɔ̃ ɓó bɔ̃̌ nɔ̀mɔ̀ dyíinɔ̀ hwìɖǐǐ-taɓa-ɖɛ̀ ɓěɔ̀ jèɛ. 28Ɓěǐn ɖá ɓɛ́ ɓě ké ɓěɛ̀ gbo-vɔ̃-nyɔ̀ ɓěɔ̀ dyi fɛ̃̀ìn fɔɔ. Ɖɛ nìà kɛ mu dyí-tɛ̀mɛ̀ìn-ɖɛ̀ ɖò jǔùn ɖé wa gbo, kà ɓɛ́ wa mu mú gbɔɔ̀ùn wɛ̃. Kɛɛ ɔ mɔ̀ dyí-tɛ̀mɛ̀ìn-ɖɛ̀ kà ɓɛ́ ɓě mɔ̀ùn mu póùn wɛ̃, ké Gèɖèpɔ́ɔ̀ mɔ̀ nyɔ muɛ nyuùn. 29Ɖɛ nɔ̀mɔ̀ dyíin ɓɛ́ ɓě ɖǎà dyé kɛɛ, ɔ se Kɛ́ɖɛ́ì hwìɖǐǐ taɓa jè ɖòùn, kɛɛ ɔ mɔ̀, ɓɛ́ ɓě ké gǎ dyé ɓó ɔ jè ɖekè. 30Ḿ kè ɓě nì to dyúáɖòɔ̀ vɔ̃uń. Ɔ mɔ̀ to ɓɛ́ ɓě dyé ma kà ḿ vɔ̃ɔ kĩ́ín, ké ɔ mɔ̀ nyɔ ḿ nìà vɔ̃uń ke kɔ̃̀ bɔ̃̌ ɓě wɔ̃́à kɛ.
Currently Selected:
Fèɖópĩ̀à 1: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Fèɖópĩ̀à 1
1
Nyíɔún-zà-zà
1Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ḿ kè Tímétè mɔ̀à Kɛ́ɖɛ́ì Jízɛ̀ɛ̀ gbo-nì-nyɔ̀ ɓěɛɛ zà ɓě mɔ̀à Gèɖèpɔ́ɔ̀-nyɔ̀ séín ɓě nìà ɖé Kɛ́ɖɛ́ì Jízɛ̀ mú ɖé Féɖópà-hwɔ̀ɖɔ̀ɔ̀ múɛ kè cɔ́cìɔ̀ kɔ̃in-gmɔìn-nyɔ̀ ɓěɔ̀ ɔ kè ɔ gbo-nì-nyɔ̀ ɓěɔ̀ nyíɔún.
2Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.
Pɔ́ɔ̀ ɓaà ɓó Féɖópà-nyɔ̀ ɓěɔ̀ jè
3Ti séín ɓɛ́ ɓě jè dyi ḿ hwìɖǐiɛɛ, ḿ po ní Gèɖèpɔ́ɔ̀ zùo. 4Ké ti séín ɓaɖa ɓɛ́ ḿ ɓaà ɓó ɓě jèɛɛ, ḿ ɓaà ɖé múà mú, 5sepóɛɖé ɓě ɖǎ ḿ gbo kpá ɓó bɔ̃̌ nɔ̀mɔ̀ dyíinɔ̀ kũ̀à mú nyùìn jè, sɔ̀ìn ɖé wé kĩ́ín-kĩ́ínɔ̀ gbo, ɓɛ́ ɔ ké ti nìà kɛ gbo dyiɛ. 6Ké ḿ dyuò kà ɖɛ ní muà cɛ̃ìn nyɛɛ mɔ̀ jǎà jɛ́ɛ́ kɛ. Ɔ mɔ̀, kà ɓɛ́ Gèɖèpɔ́ɔ̀ mɔ̀ nyɔ dèà kũ̀à nìà kɛ gbɔ ɖé ɓě múɛɛ, ɔ muɛ dyúa kpaùn tee ɓɛ́ ɔ ké hwɛ̀ ɖé Jízɛ̀ Kɛ́ɖɛ́ì nììn wéɔ̀ múɛ. 7Ɓě jè kpɔ̃ ḿ hwòɖǒ mìɔ. Ɔ jèɛɛ, ɔ sɛ́ɖɛ́ìn dyí ɓɛ́ ḿ ké kà ná ɓě jè hwìɖǐi poìn. Sepóɛɖé ḿ kè ɓě ɖǎ mana-ɖɛ̀ ɓɛ́ Gèɖèpɔ́ɔ̀ ɖǎà ḿ nyíɛɛ mú peɖeìn, kà ɓɛ́ ḿ nìà kpɔɖɔ ɖeín kàǔn wɛ̃, ɔ kè ti ɓɛ́ ḿ zaìn bɔ̃̌ nɔ̀mɔ̀ dyíinɔ̀ jè kɔ̃in, ké ḿ kùìn ɔ dyiɛ. 8Gèɖèpɔ́ɔ̀ dyuò kà ɓěɛ̀ tó nyu ḿ mìɔ kɛ, ké ɖɛ nìà kɛ sɔ̀ìn ɖé Kɛ́ɖɛ́ì Jízɛ̀ mìɔùn mú.
9Ɖɛ kɔ̃̀ jè ḿ ɓaà kɛɛ, ɔ kɛ. Ɔ mɔ̀, ɓɛ́ ɓěɛ̀ ɖɛ̀ɓɛ̀ǐn-ɖɛ̀ɓɛ̀ǐnɔ̀ kè ɓěɛ̀ ɖɛ-dyí-dyuò-dyuòɔ̀ ɔ kè ɓěɛ̀ ɖɛ séín múin-wɔ̃́-wɔ̃́ɔ̀ ké kɔ̃ kpáuń nì tee, 10ɓɛ́ ɓě ké ɖɛ mɔ̀ ɖɛ nɔ̀mɔ̀ dyíin nyɛɛ dyí dyuòɛ̀ ɓɛ́ìn. Nìí, bɛ̃̌ kè kɛɛ ɖò se ɓě bũ̌ nìɛ̌ mu ɖé Kɛ́ɖɛ́ì nììn wéɔ̀ mú. 11Dyí-sɛ́ɖɛ́ìn-ɖɛ̀ ɓě nyu-nyu ɓɛ́ ɔ dyììn ɖé Jízɛ̀ Kɛ́ɖɛ́ì múɛɛ mu ɖé ɓě mú bãùn mìɔ, ɓɛ́ Gèɖèpɔ́ɔ̀ ké dĩ́ín-dĩ̀ìn kè ɓàìn-ɓàìn ɓéɖé.
Kɛ́ɖɛ́ì jè kpa ɖɛ ɖé Pɔ́ɔ̀ gbo
12Ḿ ɖíí ɓě, ḿ mɔ́ ɓɛ́ ɓě kéɛ dyuò kà ɖɛ ɓě ɓɛ́ wa ɖǎ ḿ gbo kpáa, wa ɖǎ bɔ̃̌ nɔ̀mɔ̀ dyíinɔ̀ gbo kpá jɛ́ɛ́, ɓɛ́ ɔ ké dyúa muɛ. 13Sójà séín ɓě gmɔ̀à gɔ̌mànà vɛ̀nɛ̀ɔ̀ gbǒɔ̀ dyíɛ ɔ kè nyɔ tɔ̀ɔ̀ séín ɓě nìà nɔ̄ kɛɛ dyuò kà ḿ nì kpɔɖɔ ɖeín ɓó Kɛ́ɖɛ́ì jèɛ. 14Ní kpɔɖɔ ɖeín kpá jèɔ̀ nyuɛ ké à ɖíí ɓěɔ̀ pàɖǎ dè Bounɓoɔ̀ hwòɖǒ kɔ̃ mìɔ, ké wa ɓéɖé gàa-hwòɖò-dyùà, ɓɛ́ wa ké se fɛ̃̀ìn, ɓɛ́ wa ké Gèɖèpɔ́ɔ̀-wùɖùɔ̀ cɛ̃.
15Wa ɖíɛ́ ɓě nì Kɛ́ɖɛ́ì jè cɛ̃iń, sepóɛɖé wa kpá hwɛ̀nɛ̌ǐn, ké wa mɔ̀ zàǔn-zàǔn-nyɔ̀ ɓě jǎà. Kɛɛ wa ɖíɛ́ ɓě ɓéɖé hwòɖǒ nɔ̀mɔ̀ dyíin, ké wa cɛ̃ ɔ jè. 16Ɖɛ̀ɓɛ̀ǐn-ɖɛ̀ɓɛ̀ǐn nyuɛ ké nyɔ ɓě nìà kɛ nyuɛ náa, sepóɛɖé wa dyuòɛ̀ dyí kà Gèɖèpɔ́ɔ̀ ɖǎ ḿ kũ̀à mɔ̀à bɔ̃̌ nɔ̀mɔ̀ dyíinɔ̀ kɔ̃in zaìn jèɛɛ ḿ nyíɛ. 17Nyɔ tɔ̀ɔ̀ ɓěɔ̀ se Kɛ́ɖɛ́ì jèɔ̀ zio po ɖé hwòɖǒ wáɖáá mú, kɛɛ wa nyuɛ, sepóɛɖé wa vɔ̃ wa mìɔùn jè. Wa poìn hwìɖǐi kà ɓɛ́ wa mu ḿ bìì fũ̀à-fṹá-ɖɛ̀ pàɖǎ nyuùn kà ḿ nìà kpɔɖɔ ɖeín keɛ.
18Ɖɛ́ ɔ kpáún wɛ̃́? Ɖɛ kɔ̃̀ jè wa cɛ̃à ɔ jèɛɛ, kɛbì ɔ mɛ jǔ jǎà, mɔ̀ɔ̀ ɔ mɛ se jǎà kɛɛ, wɛ̃́ɛ́ kɛɛ, nyɔǔn cɛ̃ Kɛ́ɖɛ́ì jè ɖé hwìè séín mú. Ké ḿ kpá múàǔn ɓóɛ jè. Ké ní mu múàǔn kpáùn kánáá pū, 19sepóɛɖé ḿ dyuò kà ɓěɛ̀ ɓaà-wùɖùɔ̀ kè gbo-kpá-kpá ɓɛ́ ɔ sɔ̀àìn ɖé Jízɛ̀ Kɛ́ɖɛ́ì Zùùɔ̀ múɛɛ muɛ nyuùn ɓɛ́ ḿ ké póɛ. 20Sepóɛɖé ɖɛ kpɔ̃ ḿ hwòɖǒ mìɔ kɛ kè ɖɛ ḿ dè hwòɖǒ kɔ̃ɛɛ, ɔ mɔ̀, ɓɛ́ dɛ̃ ké se ḿ nyu ɖé ɖɛ ɖò mú, ɓɛ́ ḿ ké se fɛ̃̀ìn fɔɔ ɓó kàǔn ɔ kè ti séín ɓaɖa, ɓɛ́ Kɛ́ɖɛ́ì ké dya-dè-dè ɓéɖé dyììn ɖé ḿ mìɔùn mú, kɛbì ḿ mɛ cĩ́ mɔɔ ḿ mɛ mɛ́ɛ. 21Sepóɛɖé ɖé ḿ gboɛɛ, ɔ nì kà ḿ kè Kɛ́ɖɛ́ìɛ̀ fɛ̀ɛ̀ɔ̀ gmaìnɔ̌ kà dyíɛ. Ké ḿ dyi mɛ́ín, nìí, ɔ mɔ̀ ní kpánáa. 22Kɛɛ ɔ jǔ ké ní ɓóɖó-kpàà kɔ̃-sè-sèɔ̀ xwíníín dyi ɓɛ́ ḿ ké kũ̀à ɖò nyu, ɓɛ́ ḿ kéɛ pɛ́ɛ̀-ɖɛ̀ kɔ̃ún dyéín, nìí, ḿ se nyɔ ɓɛ́ ḿ ké gãa dyuò. 23Ɖɛ sɔ̃́ kpɔ̃ ḿ hwòɖǒ. Ḿ mɔ́ ɓɛ́ ní fɛ̀ɛ̀ɔ̀ ké ḿ mú sɔ̀, ɓɛ́ ḿ ké ɖé Kɛ́ɖɛ́ì gbo nì. Ɔ mɔ̀ ɖɛ zi dyíin nɔ̀mɔ̀ǔn wɛ̃. 24Kɛɛ ɓó ɓě jè, ɔ nɔ̀mɔ̀ dyíin mìɔ ɓɛ́ ní fɛ̀ɛ̀ɔ̀ ké ḿ mú nì. 25Ḿ dè ɖɛa hwòɖǒ kɔ̃. Ɔ jèɛɛ, ḿ dyuòɛ̀ dyí kà ní mu hwèɖèìn nyɛ. Ní mu nɔ̄ ɓě séín gbo nììn, ɓɛ́ ɓě ké dyúa mu, ɓɛ́ ɓě ké múà ɓéɖé ɖé hwìɖǐǐ-taɓa-ɖɛ̀ ɓěɔ̀ mú. 26Ɔ nì ná, ɓɛ́ ḿ dyi ɖé ɓě gbo dyi ɖe ní, ɓě ké ɖɛ kɔ̃̀ jè ɓě ké ɓɔ́ɖɔ́ mìɔ ɖé ɓěɛ̀ cĩ́-cĩ́ ɓɛ́ ɓě cĩ́à ɖé Kɛ́ɖɛ́ì Jízɛ̀ múɛɛ ɓéɖé ɓó ní jè.
27Ɖɛ dyúáɖò ɓě mɛ nyuɛɛ, ɔ mɔ̀, ɓě mɛ cĩ́ kà Kɛ́ɖɛ́ìɛ̀ bɔ̃̌ nɔ̀mɔ̀ dyíinɔ̀ nyuà cɛ̃ɛ kɛ, ɓɛ́ kɛbì ḿ mɛ dyi ɓɛ́ ḿ ké ɓě dyé, mɔɔ ɓɛ́ ḿ ké se dyiɛɛ, ḿ mɛ wɔ̃́ ɖé ɓě gbo bɔ̃̌ kà ɓɛ́ ɓě ɓéɖé hwòɖǒ dyúáɖò, ké ɓě nyànà dyi gãun-gãun wɛ̃, ɔ kè kà ɓɛ́ ɓě séín wɔ̃́, ké ɓě vɔ̃ ɓó bɔ̃̌ nɔ̀mɔ̀ dyíinɔ̀ hwìɖǐǐ-taɓa-ɖɛ̀ ɓěɔ̀ jèɛ. 28Ɓěǐn ɖá ɓɛ́ ɓě ké ɓěɛ̀ gbo-vɔ̃-nyɔ̀ ɓěɔ̀ dyi fɛ̃̀ìn fɔɔ. Ɖɛ nìà kɛ mu dyí-tɛ̀mɛ̀ìn-ɖɛ̀ ɖò jǔùn ɖé wa gbo, kà ɓɛ́ wa mu mú gbɔɔ̀ùn wɛ̃. Kɛɛ ɔ mɔ̀ dyí-tɛ̀mɛ̀ìn-ɖɛ̀ kà ɓɛ́ ɓě mɔ̀ùn mu póùn wɛ̃, ké Gèɖèpɔ́ɔ̀ mɔ̀ nyɔ muɛ nyuùn. 29Ɖɛ nɔ̀mɔ̀ dyíin ɓɛ́ ɓě ɖǎà dyé kɛɛ, ɔ se Kɛ́ɖɛ́ì hwìɖǐǐ taɓa jè ɖòùn, kɛɛ ɔ mɔ̀, ɓɛ́ ɓě ké gǎ dyé ɓó ɔ jè ɖekè. 30Ḿ kè ɓě nì to dyúáɖòɔ̀ vɔ̃uń. Ɔ mɔ̀ to ɓɛ́ ɓě dyé ma kà ḿ vɔ̃ɔ kĩ́ín, ké ɔ mɔ̀ nyɔ ḿ nìà vɔ̃uń ke kɔ̃̀ bɔ̃̌ ɓě wɔ̃́à kɛ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.