Máà 1

Jɔ̃́ɔ́ nyɔ-níɔ-po-nyɔ̀ɔ̀ Gèɖèpɔ́ɔ̀-wùɖù wáɖá-wáɖá

(Máfíò 3:1-12; Ɖúù 3:1-18; Jɔ̃́ɔ́ 1:19-28)

1Bɔ̃̌ nɔ̀mɔ̀ dyíin ɓá Jízɛ̀ Kɛ́ɖɛ́ì mɔ̀à Gèɖèpɔ́ɔ̀ Dyú-gààɔ̀ kɛɛ jè dyíɛɛ gbɔ-dè-dè kɛà kɛ̀. 2Kà ɔ nyu kà céèɛ̀ ɖé Àzédyà mɔ̀à kpáá-ɖɛ̀-cɛ̃-nyɔ̀ɔ̀ kɛɛ céè-ɖɛ̀ɔ̀ mú. Ɔ ɖá,

“Gèɖèpɔ́ɔ̀ ɖá, ‘Gmɔ̀ nɔ̄, ḿ ɖoɓo ní kíáɔ̀ ɓó m̀ dyúa,

ɓɛ́ ɔ ké nì kpaa-hwìèɔ̀ zà.’

3À wɔ̃́ nyɔ ɖòɛ̀ wuɖu ɖé gbǎùn-fúɖúáɔ̀ kɔ̃, ké nyɔɔ̀ ɖá,

‘Ɓě nyu hwìè ɖò ɓó Bounɓoɔ̀ bìì.

Ɓě nyu hwìè sɛ́ɖɛ́ìn dyí ɓó ɔ bìì.’ ”

4Ɔ jèɛɛ, Jɔ̃́ɔ́ nyɔ-níɔ-po-nyɔ̀ɔ̀ wóɖóìn ma ɖé gbǎùn-fúɖúáɔ̀ kɔ̃, ké ɔ nì ma zio poɛń. Ɖɛ ɔ nì ma kà zio mú pòɛ̌n nyɛɛ mɔ̀ ɓɛ́ nyɔǔn ké waà nàmàǔn-kpèɖèɔ̀ dyi táà, ɓɛ́ wa ké níɔ kpá, ɓɛ́ Gèɖèpɔ́ɔ̀ ké waà nàmàǔn ɓěɔ̀ kɔ̃in zĩ̀ìn. 5Júɖìà-ɓòɖò gànáɔ̀ kè nyɔ séín nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ mu ma ɔ gbo. Wa wɔ̃́ìn ma waà nàmàǔn ɓěɔ̀ mú, ké Jɔ̃́ɔ́ po ma wa níɔ ɖé Jɔ́nì-nìɔ̀ kɔ̃.

6Ɖɔ Jɔ̃́ɔ́ po ma múɛɛ mɔ̀ sǒ-nì-gbu-kɔ̃únɛ̀ mí ɓɛ́ wa ɖaɓa ma ɖɔ múɛ, ké ɖɛ ɔ jìnììn ma gboɛɛ mɔ̀ kúɖúù-kpã̀. Ké ɔ ɖi ma kpã̌ùn kè ɖo. 7Ɔ po ma zio tee, ké ɔ ɖá, “Nyɔ mɔ̀ nyɔ ɓɛ́ ɔ muà ɓó ḿ ɖeín dyí kɔùn wɛ̃ɛ, ɔ kpé ɓúá dyí ké ɔ zi níǐn kpéɔ̀ dyí. Ḿ se ɖɛ kpa, ɓɛ́ ḿ ké kɔ̃ún dyi kíɖí, ɓɛ́ ḿ ké ɔ bǎ-ɖúú buɛ̀ dyɛ mɔ̀ùn. 8Ḿ po ɓě níɔ, kɛɛ ɔ mu ɓě níɔ poùn ɖé Zùù Hwɛ̀ǐn-hwɛ̀ǐnɔ̀ mú.”

Jízɛ̀ níɔ-po-po kè ɔ mú-dɔ̃̌-dɔ̃̌

(Máfíò 3:13–4:11; Ɖúù 3:21-22; 4:1-13)

9Ɓó tia ɓaɖaa, Jízɛ̀ sɔ̀ ma ɖé Názɛ̀ɖɛ̀-hwɔ̀ɖɔ̀ nìà ɖé Gáɖàɖíì-ɓòɖòɔ̀ kɔ̃ɛɛ mú, ké ɔ mu ma Jɔ̃́ɔ́ gbo, ké Jɔ̃́ɔ́ po ma ɔ níɔ ɖé Jɔ́nì-nìɔ̀ kɔ̃. 10Ti ɓɛ́ ɔ nì ma ɖé níɔ̀ gbo sɔ̀ǔn wɛ̃ɛ, wàɖà kɛɛ, ɔ dyéɛ ma ké dyɔɔ̀ kaà ma wɔ̃, ké Gèɖèpɔ́ɔ̀ Zùùɔ̀ nì ma ɔ kɔ̃ dyiɛń kà gbúɛ́ nìà kɛ. 11Ké wuɖu ɖò sɔ̀ìn ma ɖé dyɔún, ké wuɖuɔ̀ ɖá, “Mɔ̀ mɔ̀ ní hwòɖǒ-kɔ̃-dè-dyù. Ní hwòɖǒ dèìn m̀ múin.”

12Wàɖà cá kɛɛ, Zùùɔ̀ kpa ma Jízɛ̀ ɖé gbǎùn-fúɖúáɔ̀ kɔ̃. 13Ké ɔ nyu ma ɖé wé kpáɖá-nyɔ sɔ̃́, ké Sétɔ̃̀ dɔ̃̌ ma ɖé ɔ mú. Ké Jízɛ̀ kè nimii ɓěɔ̀ nì ma ɖé, ké ínjà ɓěɔ̀ dyi ma, ké wa kpá ɔ gbo.

Jízɛ̀ ɖá zimii-ɖáɓá-nyɔ̀ hĩinyɛ

(Máfíò 4:12-22; Ɖúù 4:14-15; 5:1-11)

14Ti ɓɛ́ wa ɖǎ ma Jɔ̃́ɔ́ kpɔ̃, ké wa ɖǎ ma ɔ kpɔɖɔ ɖeín poɛɛ, Jízɛ̀ mu ma ɖé Gáɖàɖíì-ɓòɖòɔ̀ kɔ̃, ké ɔ nì ma zio poɛń, ké ɔ nì ma bɔ̃̌ nɔ̀mɔ̀ dyíin sɔ̀àìn ɖé Gèɖèpɔ́ɔ̀ gboɛɛ cɛ̃iń. 15Ké ɔ ɖá, “Tiɔ̀ ɖǎ nyini. Gèɖèpɔ́ɔ̀ kã́á-ɓòɖòɔ̀ ɖǎ dyi xwɛ̃́ìn. Ɓě táà ɓěɛ̀ nàmàǔn-kpèɖèɔ̀ dyi, ɓɛ́ ɓě ké bɔ̃̌ nɔ̀mɔ̀ dyíin ḿ nìà ɓě gbo cɛ̃iń nyɛɛ dyi kpɔ̃.”

16Ti ɓɛ́ Jízɛ̀ nì ma ɖé Gáɖàɖíì Dòùnɓìǎɔ̀ wĩin dyi téɛń nyɛɛ, ɔ dyé ma Sã́ɓò kè ɔ ɖíí-gàà Ã́dòɖò. Wa mɔ̀ ma zimii-ɖáɓá-nyɔ̀ ɓě, ké wa nì ma kpéɖé wáɖáuń ɖé dòùnɓìǎɔ̀ kɔ̃. 17Ké Jízɛ̀ cɛ̃ɛ ma wa gbo, ké ɔ ɖá, “Ɓě sí ḿ kíɖíí. Ní muɛ nyuùn ɓɛ́ ɓě ké nyɔǔn kpɔ̃ kà ɓě kpɔ̃à zimii nyɛ.” 18Ké wa táà ma waà kpéɖé ɓěɔ̀ dyi wàɖà, ké wa sí ma ɔ kíɖíí.

19Ké ti wa mu ma kpã́ún wɛ̃ɛ, Jízɛ̀ dyé ma Jĩ́ìn kè Jɔ̃́ɔ́ ɓɛ́ wa mɔ̀à Zɛ́ɓìɖíìɛ̀ dyú-gàà ɓěɔ̀ kɛ. Wa nì ma waà kpéɖé ɓěɔ̀ bũ̌in gmauń ɖé waà ɓáɖáàɔ̀ mú. 20Ɔ ɖá ma wa, ɓɛ́ wa ké dyi wàɖà, ɓɛ́ wa ké ɔ kíɖíí sí, ké wa sè ma wa ɓǎ Zɛ́ɓìɖíì kè kũ̀à-nyɔ̀ ɓěɔ̀ ɖé ɓáɖáàɔ̀ mú, ké wa sí ma Jízɛ̀ kíɖíí.

Gàa ɖò ɓɛ́ zùù gbà nì ma múɛ

(Ɖúù 4:31-37)

21Ké wa nyini ma ɖé Kɔ̀pánìà-hwɔ̀ɖɔ̀ɔ̀ mú. Ti ɓɛ́ Gèɖèpɔ́ɔ̀ fɔ̀-wèɔ̀ dyi ma nyɛ̀nɛ̀ɛ̀ kɛɛ, Jízɛ̀ mu ma ɖé Júù-nyɔ̀ ɓěɔ̀ cɔ́cì-gbòɔ̀ mú, ké ɔ dè ma nyɔ ɓěɔ̀ ɖɛ tɛ̀mɛ̀ìn gbɔ. 22Ké kà ɔ nyu ma wa ɖɛ tɛ̀mɛ̀ìn nyɛɛ, ɔ tàɓàìn ma wa díɖí, sepóɛɖé ɔ nì ma wa ɖɛ tɛ̀mɛ̀ǐn ɖé kpé mú, ké ɔ seɛ ma nyu kà Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ nyuà kɛ.

23Púɛɛ, gàa ɖò ɓɛ́ zùù gbà nì ma múɛɛ wóɖóìn ma ɖé cɔ́cì-gbòɔ̀ mú, 24ké ɔ páná ma mú, ké ɔ ɖá, “Jízɛ̀ sɔ̀ìn Názɛ̀ɖɛ̀, ɖɛ́ kɔ̃̀ jè m̀ nì à fũ̀à-fṹá nyùɛ̌n nyɛ́? M̀ dyi, ɓɛ́ m̀ ké à mú gbɔɔ̀? Ḿ dyuò nyɔ m̀ jǔɛɛ dyío. M̀ mɔ̀ Gèɖèpɔ́ɔ̀ mú-hwɛ̀-nyɔ̀ɔ̀.”

25Ké Jízɛ̀ cɛ̃ɛ ma zùù gbàɔ̀ gbo gana-kà, ké ɔ ɖá, “Ɓɔ́ wùɖùɛ̀, ɓɛ́ m̀ ké ɔ mú sɔ̀.”

26Ké zùù gbàɔ̀ po ma gàaɔ̀ kṹún, ké ɔ páná ma mú, ké ɔ sɔ̀ ma gàaɔ̀ mú. 27Dĩin-dɔ̃ kpɔ̃ ma nyɔ séín ɓěɔ̀ kɔ̃ mìɔ, ké wa dièìn dìèìn ma dyi, ké wa ɖá, “Ɖɛ́ mɔ̀ cɛ̃́ɛ́-ɖɛ̀ nìà kɛ xwíníín nyɛ́? Dyéɛ, ɔ zà ɖɛ wuɖu kɔ̃ ɖé kpé mú, dè zùù gbà ɓě kɔ̃ ɖekè, ké wa nyu ɔ wuɖu wà!”

28Wàɖà kɛɛ, Jízɛ̀ɛ̀ bɔ̃̌ ɓeìn ma dyi ɖé Gáɖàɖíì-ɓòɖòɔ̀ ɖei dà séín.

Jízɛ̀ kánáìn nyɔ pàɖǎ dyi

(Máfíò 8:14-17; Ɖúù 4:38-41)

29Púɛɛ, Jízɛ̀ sɔ̀ ma ɖé Júù-nyɔ̀ ɓěɔ̀ cɔ́cì-gbòɔ̀ mú, ké ɔ kè Jĩ́ìn kè Jɔ̃́ɔ́ mu ma ɖé Sã́ɓò kè Ã́dòɖò ɓíɖí-taún. 30Ké Sã́ɓòɛ̀ gmààɔ̀ ɖeɛ̀ dyɔɔ̀ sùmù ma, ké ɔ pɛ̃́ ma dyi. Ké wa cɛ̃ ma ɔ jè Jízɛ̀ gbo wàɖà. 31Ké Jízɛ̀ xwɛ̃́ìn ma ɔ bũ̌in, ké ɔ kpɔ̃ ma ɔ sɔ̃ɔ̀ dyi, ké ɔ sɔ̀ìn ma ɔ dyí. Púɛɛ, màaɔ̀ dyɔɔ̀ ɓɔ́ ma sùmùɛ̀, ké ɔ nyí ma wa ɖii-ɖɛ̀.

32Ti ɓɛ́ dyóɖóɔ̀ ɖǎ ma dyi kpáa, nyɔ ɓě nì ma ɖé páɔ̀ múɛɛ nì ma waà wɛ́-nyɔ̀ séín ɓěɔ̀ kè nyɔ séín ɓě ɓɛ́ zùù gbà nì ma múɛɛ Jízɛ̀ gbo dyàǔn. 33Ké hwɔɖɔ gànáɔ̀ poìn ma ɓó gbǒɔ̀ wĩín dyí. 34Ké Jízɛ̀ kánáìn ma nyɔ ɓě ɓɛ́ wa ɓéɖé ma wɛ́-dù kò-kò ɓěɛɛ dyi, ké ɔ zà ma nyɔ pàɖǎ zùù gbà mú. Jízɛ̀ se ma wɔ̃́ɔ ɓɛ́ìn ɓɛ́ zùù gbà ɓěɔ̀ ké wùɖù, sepóɛɖé wa dyuò ma ɔ dyí.

Jízɛ̀ wáɖá Gèɖèpɔ́ɔ̀-wùɖù ɖé Gáɖàɖíì-ɓòɖòɔ̀ kɔ̃

(Ɖúù 4:42-44)

35Jízɛ̀ sɔ̀ ma nyíɔún ɓó zɔ̃ wĩín vɛ̀nɛ̀, ké ɔ sí ma píé, ké ɔ mu ma gìɖìǐ-dà ɖò, ké ɔ ɓaà ma. 36Ké Sã́ɓò kè ɔ mǔè ɓěɔ̀ mu, ɓɛ́ wa ké ma Jízɛ̀ dyi mɔ́, 37ké wa dyé ma ɔ da, ké wa cɛ̃ɛ ma ɔ gbo, ké wa ɖá, “Nyɔ séín nì m̀ dyi mɔ́uńo.”

38Ké Jízɛ̀ cɛ̃ɛ ma wa gbo, ké ɔ ɖá, “Ɓěà mu ɖé hwɔɖɔ-kpàǎ ɓěɔ̀ kɔ̃, ɓɛ́ ḿ ké ɖé Gèɖèpɔ́ɔ̀-wùɖù wáɖá ɖekè. Xwíníín nìà kɛ kɔ̃̀ jè ḿ dyià kɛ̀.”

39Ké ɔ dɛ́ɖɛ́ ma Gáɖàɖíì-ɓòɖòɔ̀, ké ɔ nì ma Gèɖèpɔ́ɔ̀-wùɖù wáɖáuń ɖé Júù-nyɔ̀ ɓěɔ̀ cɔ́cì-gbò ɓěɔ̀ mú, ké ɔ nì ma zùù gbà nyɔ ɓě mú zàǔn.

Jízɛ̀ kánáìn gàa ɖò dyi

(Máfíò 8:1-4; Ɖúù 5:12-16)

40Ké gàa ɓéɖé caà-wɛ̀ ɖò dyi ma Jízɛ̀ gbo, ké ɔ taɓa ma kɔ́-dù hwuɖu ɓó ɔ dyúa, ké ɔ ɖá, “Ɓɔ̌ɔ̀, m̀ dyi mɔ́ ɓɛ́ m̀ ké ḿ dyi kánáìn ní, ḿ dyuòɛ̀ kà m̀ ɓɛ́ìn nyuɛ kɛ.”

41Ké gàaɔ̀ jè nyùìn ma Jízɛ̀ wìì, ké Jízɛ̀ pɛ́ɛ̀ ma sɔ̃, ké ɔ tìnììn ma ɔ dyi, ké ɔ cɛ̃ɛ ma ɔ gbo, ké ɔ ɖá, “Ḿ mɔ́ ɓɛ́ m̀ ké dyi káná, ɓɛ́ m̀ ké mú-hwɛ̀-nyɔ̀ jǔ ɖe.” 42Wàɖà cáa, wɛ́ɔ̀ sɔ̀ ma ɔ mú, ké ɔ káná dyi. 43Ké Jízɛ̀ po ma ɔ náún kóɖó-kóɖó, ké ɔ kúmú ma ɔ wàɖà. 44Ɔ ɖá, “Mɔ̀ǔn ɖá ɓɛ́ m̀ ké ɖɛ ɖò nyɔ ɖò gbo cɛ̃. Kɛɛ mu, ɓɛ́ m̀ ké m̀ mìɔùn sáa-zà-nyɔ̀ɔ̀ dyí tɛ̀mɛ̀ìn, ɓɛ́ m̀ ké nyíí-ɖɛ̀ kɔ̃̀ jè ɓɛ́ Mózè dèìn ma gmaún wɛ̃ɛ tò. Ɔ muɛ nyɔǔn dyí tɛ̀mɛ̀ìn kà ɓɛ́ m̀ ɖǎ dyi kánáa.”

45Kɛɛ gàaɔ̀ mu ma, ké ɔ kpa ma Jízɛ̀ jè nyɔ ɓě gbo cɛ̃ɛ. Ɔ ɓeìn ma ɔ bɔ̃̌ dyi. Ɔ jèɛɛ, Jízɛ̀ se ma hwɔɖɔ ɖò dyáa ɓɛ́ìn ɓó nyɔǔn dyéɖé waí, ké ɔ nì ma hwɔɖɔ ɓěɔ̀ pṹa dyi. Ké nyɔǔn ɓě nì ma ɔ gbo dyiɛń sɔ̀ìn dà séín.

Currently Selected:

Máà 1: ƁB02

Highlight

Copy