Máfíò 7

Nyɔ kà kò ɖòɛ̀ zaa wɔ̃ po jè

(Ɖúù 6:37-38, 41-42)

1“Ɓěǐn ɖá ɓɛ́ ɓě ké nyɔ tɔ̀ɔ̀ ɓě zaa wɔ̃ po, ɓɛ́ Gèɖèpɔ́ɔ̀ ní kɔ̃̀ ɖà ɓě nììn zaa wɔ̃ po. 2Sepóɛɖé Gèɖèpɔ́ɔ̀ mu ɓěɛ̀ zaa wɔ̃ poùn kà ɓě poà nyɔ tɔ̀ɔ̀ ɓě nììn zaa wɔ̃ɛ. Kà ɓě mu nyɔ tɔ̀ɔ̀ ɓě nììn ɖɛ ɖàɓàìn nyuùn wɛ̃ɛ, kǎà Gèɖèpɔ́ɔ̀ mu ɓě nììn ɖɛ ɖàɓàìn nyuùn. 3Ɖɛ́ kɔ̃̀ jè m̀ se cu-kpóɖó nìà nì dyéɖéɔ̀ múɛɛ dyé, ké m̀ dyià sĩ̀ɔ̌ wè nìà m̀ ɖíí ɖò dyéɖéín nyɛɛ dyé kɛ́? 4Xwɛ̌ m̀ ɓɛ́ìn nì ɖííɔ̀ gbo cɛ̃ɛ, ɓɛ́ m̀ ké níiń, ‘Tòɛ̀, ɓɛ́ ḿ ké sĩ̀ɔ̌ wèa m̀ dyéɖéín zà,’ ké m̀ mìɔùn ɓéɖé cu-kpóɖó ɖò ɖé nì dyéɖéɔ̀ mú kɛ́? 5Dyéɖéi-nyu-nyɔ̀, zà cu-kpóɖóɔ̀ ɖé m̀ mìɔùn nììn dyéɖéɔ̀ mú kĩ́ín, nìí, nì mu dyi dyéìn nɔ̀mɔ̀ dyíin, ɓɛ́ m̀ ké sĩ̀ɔ̌ wè nìà ɖé nì ɖííɔ̀ dyéɖéɔ̀ múɛɛ ɖé zà.

6“Ɓěǐn ɖá ɓɛ́ ɓě ké ɖɛ kpa ɖɛ kɛɛ gbe ɓě nyí. Ké ɓěǐn ɖá ɓɛ́ ɓě ké ɓěɛ̀ sɔ́ɔ́ kpa ɖɛ ɓěɔ̀ ɓeé ɓěɔ̀ gbo wáɖá. Wa mu wa kɔ̃in síìn, pūín, wa mu ɖe gmɔ̀ùn, ké wa mu ɓě gbo vɔ̃ùn.

Tɛ̀mɛ̀ìn-ɖɛ̀ ɓá Gèɖèpɔ́ɔ̀ ɖɛ zɔ̀ìn jè dyíɛ

(Ɖúù 11:9-13)

7“Ɓě zɔ̀ɔ̀, ké ɓě muɛ dyéìn. Ɓě mɔ́ɔ dyi, ké ɓě muɛ dyéìn. Ɓě ɓaɖa gbǒɔ̀ kɔ̃ún, ké gbǒɔ̀ mu kaàùn ɓó ɓě bìì. 8Sepóɛɖé nyɔ séín ɓě ɓɛ́ wa zɔ̀ɔ̀ kɛɛ, wa muɛ dyéìn. Ké nyɔ mɔ́ɔ dyiɛɛ, ɔ muɛ dyéìn. Ké gbǒɔ̀ mu kaàùn ɓó nyɔ ɓaɖaa kɔ̃ún wɛ̃ɛ bìì. 9Ɓě mɔ̀ ɓǎ ɓěɛɛ, ɓěɛ̀ dyú ɓěɔ̀ dyi ɓě bɛɖɛɛ̀ zɔ̀ìn ní, nìí, ɓě mu wa sɔ́ɔ́-kpò nyíìne? 10Mɔɔ ɔ jǔ ké wa dyi ɓě zimii zɔ̀ìn ní, nìí, ɓě mu wa sɛ nyíìne? 11Ɓěɛ̀ kpeɖe nyìnììn dyíin dyɛo, kɛɛ ɓě dyuò ɓěɛ̀ dyú ɓěɔ̀ ɖɛ nɔ̀mɔ̀ dyíin nyíɛ. Kà ɔ nìà náa, nìí, ɓě Ɓǎ nìà ɖé dyɔún wɛ̃ɛ mu nyɔ ɓě ɓɛ́ wa zɔ̀ ɔ ɖɛ kɛɛ ɖɛ nɔ̀mɔ̀ dyíin ɓě nyíìn jǎà.

12“Ɖɛ ɓě mɔ́ ɓɛ́ nyɔ ɖò ké ɓě bũ̌ nyuɛɛ, ɖéɛ̀ ɓě mɛ nyu nyɔ tɔ̀ɔ̀ ɓě mɔ̀ùn bũ̌. Ɖɛ nìà kɛ mɔ̀ Mózèɛ̀ gmaɔ̀ xwíníín, ké ɔ mɔ̀ ɖɛ ɓɛ́ kpáá-ɖɛ̀-cɛ̃-nyɔ̀ ɓěɔ̀ tɛ̀mɛ̀ìn nyɔǔn wɛ̃.

Gmɔ-wɔ̃̀ ɓíè gboiɔ̀

(Ɖúù 13:24)

13“Ɓě dyáìn gmɔ-wɔ̃̀ ɓíè gboiɔ̀ mú, sepóɛɖé gmɔ-wɔ̃̀ ɓɛ́ ɔ nìà hwìè ɓɛ́ ɔ muà ɖé mú-gbɔɔ̀-naínɔ̀ dyíɛɛ ɓúá gboi, ké hwìèɔ̀ se kpauń kàmà, ké nyɔ pàɖǎ nìɛ̀ kpauń. 14Kɛɛ gmɔ-wɔ̃̀ nìà hwìè muà ɖé dɛ̀ ɓɛ́ nyɔǔn ɓéɖéà fɛ̀ɛ̀ kɛ dyíɛɛ ɓíè gboi, ké hwìèɔ̀ kàmà kpauń, ké nyɔ xwéɖé wè mɔ̀ nyɔ dyéɛ.

Cu kè ɔ ɓo

(Ɖúù 6:43-44)

15“Ɓě mɛ ma mú ɓó nyɔ ɓě ɓɛ́ wa ɖáìn wa mìɔùn kpáá-ɖɛ̀-cɛ̃-nyɔ̀ ɓě, ké wa seà mɔ̀ kɛɛ jè. Wa hwɔìn ɓáɖáá ɓě, kɛɛ ɖé wa hwòɖǒ-dyùàɔ̀ múɛɛ, wa nì kà ji ɓɛ́ ɔ nì kpɔ̃ɔ-ɖɛ̀ dyi mɔ́uń wɛ̃ɛ nìà kɛ. 16Waà nyuu-ɖɛ̀ ɓěɔ̀ muɛ nyuùn ɓɛ́ ɓě ké wa dyí dyuò. Nyɔ ní kpã́ géɖéè-ɓò wí-cù dya, ké nyɔ ní kpã́ féè-ɓò cu-gbɔ̌ ɓéɖé wí kɛɛ dya. 17Cu-gɔ̃̀ nɔ̀mɔ̀ dyíin tòɖò ɓo nɔ̀mɔ̀ kɔ̃in, kɛɛ cu-gɔ̃̀ nyìnììn dyíin tòɖò ɓo nyìnììn kɔ̃in. 18Cu-gɔ̃̀ nɔ̀mɔ̀ dyíin ní tòɖò ɓo nyìnììn kɔ̃in, ké cu-gɔ̃̀ nyìnììn dyíin ní tòɖò ɓo nɔ̀mɔ̀ kɔ̃in. 19Wa ɖaɓa cu séín ɓɛ́ wa se ɓo nɔ̀mɔ̀ kɔ̃in tòɖòɛɛ, ké wa po wa dyéɖé. 20Ɔ jèɛɛ, nyɔ ɓě ɓɛ́ wa ɖáìn wa mìɔùn kpáá-ɖɛ̀-cɛ̃-nyɔ̀ ɓě, ké wa seà mɔ̀ kɛɛ, waà nyuu-ɖɛ̀ ɓěɔ̀ muɛ nyuùn ɓɛ́ ɓě ké wa dyí dyuò.

Ḿ se ɓě dyí dyuò

(Ɖúù 13:25-27)

21“Ɔ se ɖɛ ɓɛ́ nyɔǔn séín ɓě ɓɛ́ wa ɖáìn ḿ ‘Bounɓo, Bounɓo,’ kɛɛ ké ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃ muɛ. Kɛɛ ɔ mɔ̀ nyɔ ɓě ɓɛ́ wa mu ɖɛ ɓɛ́ ḿ Ɓǎ nìà ɖé dyɔún wɛ̃ɛ mɔ́ ɓɛ́ wa ké nyuɛɛ nyuùn wɛ̃ɛ ɖòùn. 22Ti zaa-wɔ̃-po-wèɔ̀ mu dyiìn nyɛɛ, nyɔ pàɖǎ muɛ ḿ gbo cɛ̃ìn, ɓɛ́ wa ké níiń, ‘Bounɓo, Bounɓo, má, à cɛ̃ ma Gèɖèpɔ́ɔ̀-wùɖù ɖé nì nyɛ́nɛ́ɔ̀ mú, ké à zà ma zùù gbà nyɔǔn ɓě mú ɖé nì nyɛ́nɛ́ɔ̀ mú, ké à nyu ma zɛ̃̀ìn-ɖɛ̀ pàɖǎ ɖé nì nyɛ́nɛ́ɔ̀ múe.’ 23Nìí, ní muɛ wa gbo cɛ̃ìn, ɓɛ́ ḿ ké níiń, ‘Ḿ se ɓě dyí dyuò fɔɔ. Ɓě mɔ̀ ɖɛ-gbà-nyu-nyɔ̀ ɓěɛ̀ kɛɛ, ɓě sɔ̀ dà ɓó ḿ dyúa.’

Gbǒ-po-nyɔ̀ sɔ̃́ ɓě

(Ɖúù 6:47-49)

24“Nyɔ séín ɓě ɓɛ́ wa wɔ̃́ ní wuɖu ɓě nìà kɛ, ké wa nyu wa kɛɛ mu nììn kà hwòɖǒ-fɔ̀nɔ̀-nyɔ̀ ɓɛ́ ɔ po ma ɔ gbǒ sɔ́ɔ́-pìɔ̌ ɖò kɔ̃ɛɛ nìà kɛ. 25Ní ɖaɓa ma, ké níɔ̀ dyí, ké dìì dyi ma, ké ɔ dè ma gbǒɔ̀ dyí mìɔ. Kɛɛ ɔ se ma wáɖá, sepóɛɖé gàaɔ̀ po ma ɔ gbǒɔ̀ sɔ́ɔ́-pìɔ̌ kɔ̃ jè. 26Kɛɛ nyɔ séín ɓě ɓɛ́ wa wɔ̃́ ní wuɖu ɓě nìà kɛ, ké wa se wa nyuɛɛ mu nììn kà zuɖuu-nyɔ̀ ɓɛ́ ɔ po ma ɔ gbǒ ɓó pĩ́ɔ kɔ̃, ké gbǒɔ̀ se dyi kuɛɛ nìà kɛ. 27Ní ɖaɓa ma, ké níɔ̀ dyí, ké dìì dyi ma, ké ɔ dè ma gbǒɔ̀ dyí mìɔ. Ké ɔ wáɖá ma, ké ɖɛ ɖò se ma ɓó sè.”

Jízɛ̀ɛ̀ kpéɔ̀

28Jízɛ̀ hwɔ ma ɖɛ ɓě nìà kɛ cɛ̃ɛ, ké kà ɔ nyu ma wa ɖɛ tɛ̀mɛ̀ìn nyɛɛ tàɓàìn ma nyɔ kúɖúú ɓěɔ̀ díɖí. 29Sepóɛɖé ɔ nì ma wa ɖɛ tɛ̀mɛ̀ìn ɖé kpé mú, ké ɔ seɛ ma nyu kà Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ nyuà kɛ.

Currently Selected:

Máfíò 7: ƁB02

Highlight

Copy