Máfíò 6

Tɛ̀mɛ̀ìn-ɖɛ̀ ɓá nyɔ ɖɛ nyí jè dyíɛ

1“Ɓě mɛ ma mú ɓɛ́ ɓě ké se ɖɛ ɓě ɓá ɓěɛ̀ Gèɖèpɔ́ɔ̀ ɓiè-ɓièɔ̀ dyíɛɛ nyu ɓó nyɔǔn dyúa, ɓɛ́ nyɔǔn ké ɖɛ ɓě nyuà kɛɛ dyé jè. Ɓě dyi ɖɛ ɓě nìà kɛ nyu ɖé nyɔǔn dyúa ní, nìí, ɓě se pɛ́ɛ̀-ɖɛ̀ ɖò dyéɛ mu sɔ̀ìn ɖé ɓě Ɓǎ nìà ɖé dyɔún wɛ̃ɛ xwaún.

2“Ɔ jèɛɛ, ɔ jǔ ké ɓě dyi ɖɛ ɖò gǎ-dyé-nyɔ̀ ɖò nyí ní, nìí, ɓěǐn ɖá ɓɛ́ ɓě ké ɓɔ́ɖɔ́ kà dyéɖéi-nyu-nyɔ̀ ɓěɔ̀ nyuà ɖéɛ Júù-nyɔ̀ ɓěɔ̀ cɔ́cì-gbò ɓěɔ̀ mú, kè ɖé hwìè ɓěɔ̀ xwíníín nyɛ. Wa nyuɛ ɓɛ́ nyɔǔn ɓě ké wa ɓàìn. Ḿ cɛ̃ ɓě jǎà gbo, wa ɖǎ waà pɛ́ɛ̀-ɖɛ̀ dyé nɔ̀ɔ̀. 3Kɛɛ ɓě dyi ɖɛ ɖò gǎ-dyé-nyɔ̀ ɖò nyí ní, nìí, ɓěǐn ɖá ɓɛ́ ɓěɛ̀ kunuà-sɔ̃̀ɔ̀ ké ɖɛ ɓěɛ̀ ɖiaùn-sɔ̃̀ɔ̀ nyuà kɛɛ dyí dyuò, 4ɓɛ́ ɓěɛ̀ nyɔǔn-ɖɛ-nyí-nyí ké ɖé gã gbo nì. Ké ɓě Ɓǎ mɔ̀ nyɔ dyéà ɖé gã gboiɛɛ mu ɓě pɛ́ɛ̀ìn.

Tɛ̀mɛ̀ìn-ɖɛ̀ ɓá ɓaà jè dyíɛ

(Ɖúù 11:2-4)

5“Ké ɓě dyi ɓaà ní, nìí, ɓěǐn ɖá ɓɛ́ ɓě ké nì kà dyéɖéi-nyu-nyɔ̀ ɓěɔ̀ nìà kɛ. Wa ɖɛ̀ɓɛ̀ ɓɛ́ wa ké ɖé Júù-nyɔ̀ ɓěɔ̀ cɔ́cì-gbò ɓěɔ̀ múin nyànà, ɔ kè ɓɛ́ wa ké ɖé hwìè-gmǎà ɓěɔ̀ dyíin nyànà, ɓɛ́ wa ké ɓaà, ɓɛ́ nyɔ ɓě ké wa dyé. Ḿ cɛ̃ ɓě jǎà gbo, wa ɖǎ waà pɛ́ɛ̀-ɖɛ̀ dyé nɔ̀ɔ̀. 6Kɛɛ ɓě dyi ɓaà ní, ɓě mɛ mu ɖé ɓěɛ̀ ɓí-dyùɔ̀ mú, ɓɛ́ ɓě ké ɓí-dyùɔ̀ kã, ɓɛ́ ɓě ké ɓěɛ̀ Dyɔún-ɓǎ nìà ɖé gã gboɛɛ ɓaà. Ké ɓě Ɓǎ mɔ̀ nyɔ dyéà ɖé gã gboiɛɛ mu ɓě pɛ́ɛ̀ìn.

7“Ké ɓě dyi ɓaàǔn nìǐn, ɓěǐn ɖá ɓɛ́ ɓě ké wuɖu fóɖóún kɔ̃in kpa, kà ɓɛ́ nyɔ ɓě seà Gèɖèpɔ́ɔ̀ dyí dyuò wɛɛ nyuà kɛ. Wa poɛ̀n hwìɖǐi kà ɓɛ́ Gèɖèpɔ́ɔ̀ mu waà wuɖuɔ̀ wɔ̃́ùn, sepóɛɖé wa kpaìn wuɖuɔ̀ kɔ̃in mìɔ jèɛ. 8Ɓěǐn ɖá ɓɛ́ ɓě ké nì kà wa nìà kɛ, sepóɛɖé ɓě Ɓǎɔ̀ dyuò ɖɛ ɓɛ́ ɓě kɔ̃̀ ɓě ké dyé kɛɛ dyí kĩ́ín, hwɛ̀ ké ɓě zɔ̀à kɛ̀. 9Ɓě dyi ɓaà ní, kǎà ɓě mɛ nyu kà ɓaà. Ɓě mɛ ɖá,

‘À ɓǎ, mɔ̀ nìà ɖé dyɔún wɛ̃ɛ,

nì nyɛ́nɛ́ɔ̀ hwɛ̀ mú.

10Nì kã́á-ɓòɖòɔ̀ mɛ dyi.

Wa mɛ nyu nì mɔ́ɔ́-ɖɛ̀ nɔ̄ ɓóɖó-kpàà kɔ̃,

kà ɔ nyuà nìɛ̀ ɖé dyɔún wɛ̃.

11Nyí à ɖii-ɖɛ̀ ɓɛ́ à kɔ̃̀ à ké ɖi ɓó zɛ̃̌ɛ̀ kɛ.

12À ɖɛ gbà ɓěɔ̀ jè mɛ hwɛ̀ m̀ hwìɖǐi,

kà ɓɛ́ ɖɛ gbà ɓě ɓɛ́ nyɔ ɓě nyuà à bũ̌ɛɛ jè hwɛ̀à à mɔ̀ùn hwìɖǐiɛ.

13Mɔ̀ǔn kpàìn à mú-dɔ̃̌-dɔ̃̌ mú,

kɛɛ m̀ mɛ póìn à Ɖɛ-gbà-nyu-nyɔ̀ɔ̀ xwaún.’

14“Ɔ jǔ ké ɖɛ gbà ɓě ɓɛ́ nyɔǔn nyu ɓě bũ̌ɛɛ jè dyi ɓě hwìɖǐi hwɛ̀ ní, nìí, ɓě nììn ɖɛ gbà ɓěɔ̀ jè mu ɓě Ɓǎ nìà ɖé dyɔún wɛ̃ɛ hwìɖǐi hwɛ̀ìn ɖekè. 15Kɛɛ ɔ jǔ ké ɖɛ gbà ɓě ɓɛ́ nyɔǔn ɓě nyu ɓě bũ̌ɛɛ jè se ɓě hwìɖǐi hwɛ̀ ní, nìí, ɓě nììn ɖɛ gbà ɓěɔ̀ jè se ɓě Ɓǎɔ̀ hwìɖǐi hwɛ̀ɛ̌ mu ɖekè.

Tɛ̀mɛ̀ìn-ɖɛ̀ ɓá wɔ̃ kɔ̃ hwèɖè jè dyíɛ

16“Ɔ jǔ ké ɓě dyi wɔ̃ kɔ̃ hwèɖè ní, ɓěǐn ɖá ɓɛ́ ɓě ké wìì-ɓò kò kà dyéɖéi-nyu-nyɔ̀ ɓěɔ̀ nyuà kɛ. Wa ɖáɓá dyúa, ɓɛ́ nyɔǔn kéɛ dyé kà ɓɛ́ wa nì wɔ̃ kɔ̃ hwèɖèɛ̌n nyɛ. Ḿ cɛ̃ ɓě jǎà gbo, wa ɖǎ waà pɛ́ɛ̀-ɖɛ̀ dyé nɔ̀ɔ̀. 17Kɛɛ ɓě dyi wɔ̃ kɔ̃ hwèɖè ní, ɓě mɛ dèɖè dyúa, ɓɛ́ ɓě ké ɓěɛ̀ míɔ̀ dya po, 18ɓɛ́ nyɔ tɔ̀ɔ̀ ɓě ní kɔ̃̀ɔ̀ ɖà dyí dyuò kà ɓě nì wɔ̃ kɔ̃ hwèɖèɛ̌n nyɛ. Ɓě Ɓǎ mɔ̀ nyɔ nìà ɖé gã gboɛɛ ɖòùn muɛ dyí dyuòùn. Ké ɓě Ɓǎ mɔ̀ nyɔ dyéà ɖé gã gboiɛɛ mu ɓě pɛ́ɛ̀ìn.

Dyi-dè-ɖɛ̀ nì ɖé dyɔún wɛ̃ɛ jè

(Ɖúù 12:33-34)

19“Ɓěǐn ɖá ɓɛ́ ɓě ké ɓěɛ̀ bã-ɖɛ̀ ɓě dyi dè nɔ̄ ɓóɖó-kpàà kɔ̃, dɛ̀ ɓɛ́ nyaa-ɓéɖé kè kɛɛ nyìnìàìn ɖɛ dyíin, ké dyíɖíí-nyɔ̀ wa gbǒ, ké wa dyíɖíà ɖɛ kɛ. 20Kɛɛ ɓě mɛ dè ɓěɛ̀ bã-ɖɛ̀ ɓě dyi ɖé dyɔún. Nyaa-ɓéɖé kè kɛɛ ní nyìnììn ɖé ɖɛ dyíin, ké dyíɖíí-nyɔ̀ ní wa ɖé gbǒ, ké wa ní dyíɖí ɖé ɖɛ. 21Sepóɛɖé ɓěɛ̀ hwòɖǒ mu dɛ̀ ɓɛ́ ɓěɛ̀ bã-ɖɛ̀ ɓě nìɛɛ nììn tee.

Kpóɖó-dyùàɔ̀ ce

(Ɖúù 11:34-36)

22“Nyɔǔn-dyùɛ̀ dyéɖéɔ̀ nì kà ɖáùnpò nìà kɛɛ ɓó ɔ kpóɖó-dyùàɔ̀ bìì. Ɔ jǔ ké nì dyéɖé-dyùàɔ̀ dyi dyíin nɔ̀mɔ̀ ní, nìí, nì kpóɖó-dyùà gànáɔ̀ ɓéɖé ce. 23Kɛɛ ɔ jǔ ké nì dyéɖé-dyùàɔ̀ dyi dyíin nyìnììn ní, nìí, nì kpóɖó-dyùà gànáɔ̀ mu tíe-kpò mú nììn. Ɔ jèɛɛ, ce nìà ɖé m̀ múɛɛ dyi tíe-kpò jǔ ní, nìí, tíe-kpòɔ̀ zi kpé wɔ̃ ɓúáuń mìɔ.

Gèɖèpɔ́ɔ̀ kè kɔ̃̀ɔ̀-ɖɛ̀ jè

(Ɖúù 16:13; 12:22-31)

24“Nyɔ ɖò se wuɖuí-kɔ̃̀-nyɔ̀ sɔ̃́ gǐì jǔɛ ɓɛ́ìn. Ɔ mu dyúáɖò mú nyɛ́ìn, ɓɛ́ ɔ ké nyɔ tɔ̀ɔ̀ mú ɖɛ̀ɓɛ̀. Mɔɔ ɔ mu dyúáɖò jè dyi kpɔ̃ùn, ɓɛ́ ɔ ké se nyɔ tɔ̀ɔ̀ ɖɛ ɖá. Ɓě se Gèɖèpɔ́ɔ̀ gǐì jǔɛ ɓɛ́ìn, ɓɛ́ ɓě ké bãa-ɖɛ̀ ɓě nììn gǐì jǔ ɖekè.

25“Ɔ jèɛɛ, ḿ cɛ̃ɛ ɓě gbo, ɓěǐn ɖá ɓɛ́ ɓě ké ɖii-ɖɛ̀ ɓɛ́ ɓě ké ɖi kè ɖɛ ɓě ké ná, ɓɛ́ ɔ ké nyu ɓɛ́ ɓě ké cĩ́ɛɛ jè hwòɖǒ dyií gbǎìn. Ké ɓěǐn ɖá ɓɛ́ ɓě ké ɖɔ ɓɛ́ ɓě ké mú poɛɛ jè hwòɖǒ dyií gbǎìn. Fɛ̀ɛ̀ɔ̀ jè kpa ɖɛ mìɔ ké ɔ zi ɖii-ɖɛ̀ jè dyí, ké kpóɖó-dyùàɔ̀ jè kpa ɖɛ mìɔ ké ɔ zi ɖɔ jè dyí. Ɔ se ná nìì? 26Ɓě dyé naà ɓě nìà ɖé dyiíɛ. Wa ní ɓá ɖɛ, ké wa ní poìn ɖii-ɖɛ̀ dyí. Ké wa ní dè ɖɛ dyi ɖé sáɖáún. Kɛɛ ɓě Ɓǎ nìà ɖé dyɔún wɛ̃ɛ nyí wa ɖii-ɖɛ̀. Má, ɓě kpa ɖɛ ké ɓě zi naà ɓěɔ̀ dyíe? 27Ké ɓěɛ̀ nyɛ́ ɓɛ́ìn ɓěɛ̀ fɛ̀ɛ̀ɔ̀ wé dyúáɖò kɔ̃in poɛ dyììn ɖé ɓěɛ̀ fɛ̀ɛ̀ɔ̀ jè hwìɖǐi-poìn-poìn mú kɛ́?

28“Ɖɛ́ kɔ̃̀ jè ɓě gbǎìn hwòɖǒ dyií ɓó mú-po-ɖɔ̀ jèɛ́? Ɓě mɛ poìn kà cu-bùè ɓě nìà xwáɖá xwíɖíiɛɛ nyu mɛɛ kɛɛ jè hwìɖǐi. Wa ní nyu kũ̀à, ké wa ní ɖaɓa wa mìɔùn nììn mú-po-ɖɔ̀. 29Kɛɛ ḿ cɛ̃ɛ ɓě gbo, Sã́ɖómà ɓéɖé ma dĩ́ín-dĩ̀ìn pàɖǎ dyɛo, kɛɛ ɔ mú-po-ɖɔ̀ ɓěɔ̀ se ma kɔ̃in nɔ̀mɔ̀, ɓɛ́ ɔ ké ma cu-bùè ɓěa ɖò dyɛ̀ìn. 30Gèɖèpɔ́ɔ̀ mɔ̀ nyɔ poà pìǐɔ̀ ɖɔún wɛ̃̀. Ké pìǐɔ̀ nì ɖé xwáɖá xwíɖíi ɓó zɛ̃̌ɛ̀, kɛɛ ɔ kéá gàɖàà nyu ní, wa ɖǎ ɔ dyéɖé po. Ɔ jǔ ké Gèɖèpɔ́ɔ̀ dyi wa mɔ̀ùn ɖɔ nyí ní, ɔ se ɓě mɔ̀ùn ɖɔ nyíɛ mu mìɔ cáà? Ɓěɛ̀ hwìɖǐǐ-taɓa-taɓaɔ̀ ɓíè dyí mìɔ cá wà!

31“Ɔ jèɛɛ, ɓěǐn ɖá ɓɛ́ ɓě ké hwìɖǐi poìn, ɓɛ́ ɓě ké níiń, ‘Dɛ̌ à mu ɖii-ɖɛ̀ dyéìn nyɛ́?’ mɔɔ ‘Dɛ̌ à mu ɖɛ à ké ná kɛɛ zàùn wɛ̃́?’ mɔɔ ‘Dɛ̌ à mu ɖɔ dyéìn nyɛ́?’ 32Nyɔ ɓě ɓɛ́ wa se Gèɖèpɔ́ɔ̀ dyí dyuò wɛɛ nì ɖɛ ɓěɛ̀ jè kíɖíí mìɔ. Ɓě Ɓǎ nìà ɖé dyɔún wɛ̃ɛ dyuòɛ̀ dyí kà ɓɛ́ ɓě kɔ̃̀ ɓɛ́ ɓě ké wa séín ɓéɖéɛ. 33Kɛɛ ɖɛ mɛ kpɔ̃ ɓě hwòɖǒɛɛ mɛ mɔ̀ Gèɖèpɔ́ɔ̀ kã́á-ɓòɖòɔ̀ ɔ kè ɓɛ́ nyɔǔn ké ɖɛ ɓě ɓɛ́ Gèɖèpɔ́ɔ̀ mɔ́ɛɛ nyu, ké ɔ mu ɓě ɖɛ séín ɓě nìà kɛ nyíìn. 34Ɔ jèɛɛ, ɓěǐn ɖá ɓɛ́ ɓě ké gàɖàà jè hwìɖǐi poìn, sepóɛɖé gàɖàà mu ɔ nììn ɖɛ ɓě jè hwìɖǐi poìn. Wé séín ɓéɖé ɔ nììn fũ̀à-fṹá-ɖɛ̀, ké à se ɓéɖé ɓɛ́ à ké ɖò ɓó kɔ̃in po ɖe.

Currently Selected:

Máfíò 6: ƁB02

Highlight

Copy