Máfíò 18
18
Nyɔ mɔ̀ nyɔ kpa ɖɛ kɛ
(Máà 9:33-37; Ɖúù 9:46-48)
1Ɓó tia ɓaɖaa, ɖeín-nà-nyɔ̀ ɓěɔ̀ dyi ma Jízɛ̀ gbo, ké wa diè ma ɔ dyi, ké wa ɖá, “Nyɛ́ mɔ̀ nyɔ kpa ɖɛ mìɔ ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃ kɛ́?”
2Ké Jízɛ̀ ɖá ma dyú-gbɔ́ɔ́ ɖò, ké ɔ nyànàìn ma dyú-gbɔ́ɔ̀ ɓó wa hwìɛ̀ dyi, 3ké ɔ ɖá, “Ḿ cɛ̃ ɓě jǎà gbo, ɓě se ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃ muɛ ɓɛ́ìn, ɔ sèìn ké ɓě zĩàìn gbo, ké ɓě nì kà dyú-gbɔ́ɔ́ nìà kɛ hwɛ̀. 4Nyɔ mɔ̀ nyɔ kpa ɖɛ mìɔ ɖé Gèɖèpɔ́ɔ̀ kã́á-ɓòɖòɔ̀ kɔ̃ɛɛ mɔ̀ nyɔ ɓɛ́ ɔ dyà ɔ mìɔùn ɓíɖíi, ké ɔ nì kà dyú-gbɔ́ɔ́ wèɛ̀ nìà kɛ. 5Ké nyɔ mɔ̀ nyɔ ɓɛ́ ɔ kpɔ̃ dyú-gbɔ́ɔ́ nì kà kɛɛ jè dyi ɓó ní nyɛ́nɛ́ɔ̀ jèɛɛ, nìí, ɔ kpɔ̃ ní jè dyi.
Ɖɛ ɓě nyuɛ ɓɛ́ nyɔ dyi nàmàǔn nyuɛ
(Máà 9:42-48; Ɖúù 17:1-2)
6“Nyɔ mɔ̀ nyɔ ɓɛ́ ɔ muɛ nyuùn ɓɛ́ dyú-gbɔ́ɔ́ ɓě taɓaà ḿ hwìɖǐǐɛɛ ɖò ké hwìǐ sɔ̀ìn nyɛɛ, ɔ muɔ́ dyíin nɔ̀mɔ̀ùn ɓó nyɔɔ̀ bìì, ɓɛ́ wa kéɔ́ ɔ sɔ́ɔ́-kpò vɛ̀nɛ̀ ɖò ɖɔ ɓá, ɓɛ́ wa kéɔ́ ɔ dyóóɔ̀ dà tɔ̀mɔ̀ǔn-tɔ̀mɔ̀ǔn ɖò po. 7Ɓóɖó-kpàà jè mɔ̀ wìì-ɖɛ̀, sepóɛɖé ɖɛ ɓě nì ɖé, ké wa nyuɛ ké nyɔǔn sɔ̀ìn hwìǐ. Ɖɛ nì kà ɓěa mu kpáùn tee pū, kɛɛ nyɔ mɔ̀ nyɔ nyuɛ ké wa kpáà kɛɛ, gboò-wùɖù nì ɔ kɔ̃.
8“Ɔ jǔ ké nì sɔ̃ɔ̀ mɔɔ nì ɓoɔ̀ dyiɛ nyu ɓɛ́ m̀ ké hwìǐ sɔ̀ìn ní, nìí, m̀ mɛ cɛ̃ɛ ɓóɛ, ɓɛ́ m̀ kéɛ xwáɖáún po. Ɔ nɔ̀mɔ̀ dyíin ɓɛ́ m̀ ké sɔ̃ dyúáɖò mɔɔ ɓo dyúáɖò ɓéɖé, ɓɛ́ m̀ ké dyɔún mu, ɓɛ́ m̀ ké ɖé cĩ́, ké ɔ zi ɓɛ́ wa ké m̀ kè nì sɔ̃ sɔ̃́ɔ̀ mɔɔ nì ɓo sɔ̃́ɔ̀ ɖé dɛ̀ ɓɛ́ nyɛ seà mɔ́-mɔ́ kɔ̃̀ɛɛ nìà kɛ poɛɛ dyí. 9Ɔ jǔ ké nì dyéɖéɔ̀ dyiɛ nyu ɓɛ́ m̀ ké hwìǐ sɔ̀ìn ní, nìí, m̀ mɛ zàà ɖéɛ, ɓɛ́ m̀ kéɛ xwáɖáún po. Ɔ nɔ̀mɔ̀ dyíin ɓɛ́ m̀ ké dyéɖé dyúáɖò ɓéɖé, ɓɛ́ m̀ ké dyɔún mu, ɓɛ́ m̀ ké ɖé cĩ́, ké ɔ zi ɓɛ́ wa ké m̀ kè nì dyéɖé sɔ̃́ɔ̀ hɛ́ɛ̀-nyɛ̀ɔ̀ mú poɛɛ dyí.
Nɔ́ɔ́ ɓá ɓáɖáá sè xwáɖáún jè dyíɛ
(Ɖúù 15:3-7)
10“Ɓěǐn ɖá ɓɛ́ ɓě ké se dyú-gbɔ́ɔ́ ɓě nìà kɛ ɖò ɖɛ ɖá. Ḿ cɛ̃ɛ ɓě gbo, ínjà ɓě ɓɛ́ wa nì ɓó wa bìì ɖé dyɔún wɛ̃ɛ, wa nì ɖé ḿ Ɓǎ nìà ɖé dyɔún wɛ̃ɛ dyúa tee. [ 11Sepóɛɖé mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ dyi ma, ɓɛ́ ḿ ké nyɔ ɓě sèà xwáɖáún wɛ̃ɛ póìn.]
12“Ɖɛ́ ɓě poìn hwìɖǐiɛ́? Gàa ɖò dyi ɓáɖáá hɔ̃dɛ̀ɖɛ̀ ɖò ɓéɖé, ké waà dyúáɖò dyi xwáɖáún sè ní, nìí, ɖɛ́ ɔ mu nyuùn wɛ̃́? Ɔ mu ɓáɖáá kpáɖá-nyɔ hĩinyɛ ɓaɖa-bùè sè mɛ̀nɛ̌ìn-hĩinyɛ ɓěɔ̀ toɖo ɓěɔ̀ dya sèìn, ké ɔ mu ɔ nyɔ sèà xwáɖáún wɛ̃ɛ dyi mɔ́ùn. 13Ḿ cɛ̃ ɓě jǎà gbo, ɔ dyi ɔ dyéín, ɔ mu múàǔn kpáùn mìɔ ɓó ɔ jè, ké ɔ mu kà ɔ nyu múàǔn kpáa ɓó ɓáɖáá kpáɖá-nyɔ hĩinyɛ ɓaɖa-bùè sè mɛ̀nɛ̌ìn-hĩinyɛ ɓɛ́ wa mɔ̀ùn seà xwáɖáún sè kɛ jèɛɛ dyí ziìn. 14Kà dyúáɖòɔ̀ kǎà ɓě Ɓǎ nìà ɖé dyɔún wɛ̃ɛ se mɔ́ ɓɛ́ dyú-gbɔ́ɔ́ ɓěɛ̀ ɖò ké xwáɖáún sè.”
Kà nyɔ ké nyɔ ɖíí Kɛ́ɖɛ́ì ɖeín-sí-nyɔ̀ ɓɛ́ ɔ nyu nàmàǔn wɛ̃ɛ gbo kpáa nyuɛ
15Sɔ̀ìn ɓóɛ gboɛɛ, Jízɛ̀ cɛ̃ɛ ma ɖeín-nà-nyɔ̀ ɓěɔ̀ ɖò gbo ɖe, ké ɔ ɖá, “Ɔ jǔ ké nì ɖíí Kɛ́ɖɛ́ì ɖeín-sí-nyɔ̀ dyi m̀ ɖɛ gbà bũ̌ nyu ní, nìí, mu ɔ gbo, ɓɛ́ m̀ kéɛ ɔ gbo cɛ̃ kà ɓɛ́ ɔ ɖǎ m̀ ɖɛ gbà ɖò bũ̌ nyu kɛ. Nyɔ kà kò ɖò ní ɖá ɓɛ́ ɔ ké ɓó nì. Ɔ dyi nì wuɖuɔ̀ gbo ɖùǔ tò ní, nìí, m̀ ɓɛ́ìn ɔ ɖíí ɖáìn ɖe. 16Kɛɛ ɔ jǔ ké ɔ se nì wuɖuɔ̀ ɖùǔ gbo tò ní, nìí, m̀ mɛ kpa nyɔ-kpò dyúáɖò mɔɔ nyɔ-kpò sɔ̃́, ɓɛ́ ɓě ké ɖé ɔ gbo mu. M̀ mɛ nyuɛ náa, ɓɛ́ nyɔ-kpò sɔ̃́ mɔɔ nyɔ-kpò tã ké zàse nyu ɓó ɖɛ séín nì mu cɛ̃ìn nyɛɛ jè. 17Ɔ se waà wuɖuɔ̀ gbo ɖùǔ tò ní, nìí, m̀ mɛ zaìn ɖɛ séínɔ̀ cɔ́cì-nyɔ̀ ɓěɔ̀ gbo kɔ̃in. Ɔ jǔ ké ɔ se wɔ̃́ ɓɛ́ ɔ ké wa nììn wuɖuɔ̀ gbo ɖùǔ tò ní, nìí, ɓě mɛ kpɔ̃ ɔ kà nyɔ kpɔ̃à se-Gèɖèpɔ́ɔ̀-dyí-dyuò-nyɔ̀ mɔɔ tácì-kpɔ̃-nyɔ̀ kɛ.”
Kpé ɖeín-nà-nyɔ̀ ɓěɔ̀ mu ɓéɖéìn nyɛ
18Ké Jízɛ̀ cɛ̃ɛ ma wa gbo ɖe, ké ɔ ɖá, “Ḿ cɛ̃ ɓě jǎà gbo, Gèɖèpɔ́ɔ̀ nìà ɖé dyɔún wɛ̃ɛ mu ɖɛ séín ɓě wɔ̃́ìn gbo nɔ̄ ɓóɖó-kpàà kɔ̃ɛɛ gbo wɔ̃́ìn, ké ɔ mu ɖɛ séín ɓě po ɓɔ́í kɛɛ ɓɔ́í poùn ɖekè.
19“Ké ɖɛ ní mɔ́ ḿ ké ɓě gbo cɛ̃ ɖeɛɛ kɛà kɛ̀. Ɔ jǔ ké ɓěɛ̀ nyɔ-kpò sɔ̃́ hwòɖǒ dyi wɔ̃́ ɓó ɖɛ ɓě zɔ̀ìn Gèɖèpɔ́ɔ̀ kɛɛ jè ní, nìí, ḿ Ɓǎ nìà ɖé dyɔún wɛ̃ɛ muɛ ɓě bìì nyuùn. 20Sepóɛɖé dɛ̀ nyɔ-kpò sɔ̃́ kè tã poìn dyí ɖé ní nyɛ́nɛ́ múɛɛ, ní mu ɖé wa hwìɛ̀ nììn.”
Nɔ́ɔ́ ɓá nyɔ mǔè ɖò kɔ̃in zĩ̀ìn jè dyíɛ
21Hwɛ̀ ké Píɖɛ̀ mu ma Jízɛ̀ gbo, ké ɔ diè ma ɔ dyi, ké ɔ ɖá, “Bounɓo, ḿ ɖíí ɖò dyi ḿ ɖɛ gbà bũ̌ nyuɛń nì kánáá pū ní, nìí, kpa jĩ̀ xwɛ̌ ḿ mɛ zĩ̀ìn ɔ kɔ̃in nyɛ́? Ɔ mɛ mɔ̀ kpa mɛ̀nɛ̌ìn-sɔ̃́ɔ̀?”
22Ké Jízɛ̀ jǔ ma ɔ gɔ̃̌, ké ɔ ɖá, “Ḿ seɛ m̀ gbo cɛ̃, ɓɛ́ m̀ ké ɔ kɔ̃in zĩ̀ìn kpa mɛ̀nɛ̌ìn-sɔ̃́, kɛɛ m̀ mɛ nyu ɔ kɔ̃in-zĩ̀ìn-kpà kpáɖá-nyɔ tã ɓaɖa-bùèɛ̀ dú mɛ̀nɛ̌ìn-sɔ̃́. 23Sepóɛɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ nì kà kã́á ɖò ɓɛ́ ɔ mɔ́ ɓɛ́ ɔ ké ma ɖɛ ɓɛ́ ɔ sè ma ɔ gbo-nì-nyɔ̀ ɓěɔ̀ gboɛɛ dyí gbɛ̌ìn nyɛɛ jè nìà kɛ. 24Ɔ dèɛ̀ ma nyuɛ gbɔ nyɛ̀nɛ̀ɛ̀ pū, ké wa dyà ma ɔ gbo-nì-nyɔ̀ ɖò ɓɛ́ ɔ ɓéɖé ma dáɖà méɖìɔ̀ùn pàɖǎ múɛɛ ɔ gbo. 25Gàaɔ̀ se ma wíɖí ɖò ɓéɖé, ɓɛ́ ɔ ké ma ɔ kpaɔ̀ pɛ́ɛ̀. Ɔ jèɛɛ, ɔ kã́áɔ̀ cɛ̃ɛ ma, ɓɛ́ wa ké ma ɔ kè ɔ gmàà kè ɔ dyú ɓě ɔ kè ɖɛ séín ɔ ɓéɖé ma kɛɛ peɖe, ɓɛ́ ɔ kpaɔ̀ ké ma pɛ́ɛ̀. 26Ké gàaɔ̀ jìɖǐ ma kã́áɔ̀ ɓo zɔ̃̌in, ké ɔ ɓaà ma ɔ, ké ɔ ɖá, ‘Ɓɔ̌ɔ̀, m̀ mɛ ku hwòɖǒ. Ní mu nì wíɖíɔ̀ séín pɛ́ɛ̀ìn.’ 27Wìì nyu ma kã́áɔ̀, ké ɔ buɛ̀ ma gàaɔ̀, ké ɔ táà ma kpaɔ̀ jè dyi.
28“Ti ɓɛ́ gàaɔ̀ sí ma píé nyɛ̀nɛ̀ɛ̀ kɛɛ, ɔ kè ɔ mǔè ɓɛ́ ɔ mɔ̀ùn mɔ̀ ma gbo-nì-nyɔ̀ ɖekèɛɛ gmɔ̌ìn ma. Ɔ ɓéɖé ma ɔ mǔèɔ̀ dáɖà-gbɛ̀ǐ-gbɛ̀ǐ-kpà mú. Ɔ kpɔ̃̀ìn ma ɔ mǔèɔ̀ bùnù, ké ɔ ɖá, ‘Pɛ́ɛ̀ ní kpa nìà m̀ múɛ.’ 29Ké ɔ mǔèɔ̀ jìɖǐ ma ɔ ɓo zɔ̃̌in, ké ɔ ɓaà ma ɔ, ké ɔ ɖá, ‘M̀ mɛ ku hwòɖǒ. Ní mu nì kpaɔ̀ pɛ́ɛ̀ìn.’ 30Kɛɛ gàaɔ̀ nɔ́ɔ̀ ma. Ɔ nyuɛ ké wa po ma ɔ mǔèɔ̀ kpɔɖɔ ɖeín, ɓɛ́ ɔ ké ma ɖé dyi gã̀, ɓɛ́ ɔ ké ɔ kpaɔ̀ séín pɛ́ɛ̀ hwɛ̀. 31Ti ɓɛ́ gbo-nì-nyɔ̀ tɔ̀ɔ̀ ɓěɔ̀ dyé ɖɛ kpá ma kà kɛɛ, wa zi ma wìǐn kpáuń mìɔ, ké wa mu ma ɖé kã́áɔ̀ gbo, ké wa cɛ̃ ma ɔ ɖɛ séín ɓěɔ̀ gbo. 32Ké kã́áɔ̀ ɖá ma gbo-nì-nyɔ̀ɔ̀, ké ɔ cɛ̃ɛ ma ɔ gbo, ké ɔ ɖá, ‘M̀ mɔ̀ gbo-nì-nyɔ̀ kɔ̃̀ kpeɖe zi dyíin nyìnìɛ̌n nyɛ. M̀ ɓaà ma ḿ, ké ḿ táà ma kpa séín nì ma m̀ múɛɛ jè dyi. 33Kà ɓɛ́ ḿ dyéɔ́ má kà mɔ̀ùn wìǐn nyɛɛ, kǎà mɔ̀ùn ɓéɖé ɓɛ́ m̀ kéɔ́ m̀ mǔèɔ̀ mɔ̀ùn wìǐn dyé ɖekè.’ 34Ké kã́áɔ̀ kpá ma dyoɖoún mìɔ, ké ɔ po ma gbo-nì-nyɔ̀ɔ̀ kpɔɖɔ ɖeín, ɓɛ́ wa ké ma ɔ gǎ dyéìn, ɓɛ́ ɔ ké ma kpa séín nì ma kà ɔ múɛɛ pɛ́ɛ̀ hwɛ̀.
35“Kà ḿ Ɓǎ nìà ɖé dyɔún wɛ̃ɛ mu kàa ɓě kpɔ̃ɔ nyuùn, ɔ jǔ ké ɖɛ gbà ɓɛ́ ɓě ɖíí ɖò nyu ɓě bũ̌ɛɛ jè se ɓě hwìɖǐi hwɛ̀ gàná cá ní.”
Currently Selected:
Máfíò 18: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
