Máfíò 12

Dyi-diè-ɖɛ̀ ɓá Gèɖèpɔ́ɔ̀ fɔ̀-wèɔ̀ jè dyíɛ

(Máà 2:23-28; Ɖúù 6:1-5)

1Wé ɖòɛ̀ ɓaɖaa, Jízɛ̀ nì ma hwítì-gèɖè ɖò gbo zĩ̀ɛ̌n ɓó Gèɖèpɔ́ɔ̀ fɔ̀-wèɔ̀ xwíníín. Mɔ́ nyu ma ɔ ɖeín-nà-nyɔ̀ ɓěɔ̀, ké wa ɖú ma hwítìɔ̀ dúi kɔɖɔ kpàǐ, ɓɛ́ wa kéɛ ɖi. 2Kɛɛ ti ɓɛ́ Fáɖòsíì-nyɔ̀ ɓěɔ̀ dyéɛ ma kɛɛ, wa cɛ̃ɛ ma ɔ gbo, ké wa ɖá, “Gmɔ̀ nɔ̄, nì ɖeín-nà-nyɔ̀ ɓěɔ̀ nì ɖɛ se dyíin nɔ̀mɔ̀ ɓɛ́ nyɔǔn ké nyu ɓó Gèɖèpɔ́ɔ̀ fɔ̀-wèɔ̀ xwíníín nyɛɛ nyuɛń.”

3Kɛɛ Jízɛ̀ cɛ̃ɛ ma wa gbo, ké ɔ ɖá, “Ɓě séè ɖɛ ɓɛ́ Dèɓé kè gàa ɓě nì zɔ̃̌ɔ̀ ɓó ɔ gboɛɛ nyu zɔ̃̌ɔ̀, ti ɓɛ́ mɔ́ nì zɔ̃̌ɔ̀ wa nyuɛń nyɛɛ jè wuɖuún zà ɖòò? 4Ɔ dyá zɔ̃̌ɔ̀ ɖé Gèɖèpɔ́ɔ̀ gbǒɔ̀ mú, ké ɔ kè nyɔ ɓě nì zɔ̃̌ɔ̀ ɓó ɔ gboɛɛ ɖi zɔ̃̌ɔ̀ bɛɖɛɛ̀ ɓɛ́ wa dè ma ɓó Gèɖèpɔ́ɔ̀ dyúa dyiɛ. Ɔ se ma dyíin nɔ̀mɔ̀ ɓɛ́ nyɔ ɖò kéɛ ma ɖi, ɔ sèìn sáa-zà-nyɔ̀ ɓěɔ̀ ɖòùn. 5Ké ɓě séèɛ̀ wuɖuún zà ɖò ɖé Mózèɛ̀ gma-cèè-ɖɛ̀ɔ̀ mú kà ɓɛ́ sáa-zà-nyɔ̀ ɓě nì Gèɖèpɔ́ɔ̀ gbǒɔ̀ múɛɛ, wa wáɖá gma ɓá Gèɖèpɔ́ɔ̀ fɔ̀-wèɔ̀ dyíɛɛ ɓó fɔ̀-wè séín ɓěɔ̀ ɓaɖa, ké zaa ní kpɔ̃ wa kɛɛ̀? 6Ḿ cɛ̃ɛ ɓě gbo, nyɔ ɖò nì dà, ké ɔ kpa ɖɛ ké ɔ zi Gèɖèpɔ́ɔ̀ gbǒɔ̀ dyí. 7Ɓě dyiɔ́ ɖɛ ɓɛ́ Gèɖèpɔ́ɔ̀ wuɖuɔ̀ cɛ̃à kɛɛ múin wɔ̃́ ní, nìí, ɓě seɔ́ nyɔ ɓě ɓɛ́ zaa se dúún wáɖáa zaa dúún wáɖáa mu. Gèɖèpɔ́ɔ̀ wuɖuɔ̀ mɔ̀, ‘Ɖɛ ní hwòɖǒ dèìn múin nyɛɛ mɔ̀ ɖɛ̀ɓɛ̀ǐn-ɖɛ̀ɓɛ̀ǐn ké ɔ zi sáa-zà-zà dyí.’ 8Sepóɛɖé mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ, mɔ̄ kɔ̃̀ Gèɖèpɔ́ɔ̀ fɔ̀-wèɔ̀ wuɖuí.”

Gàa ɖò kɔ̃̀ sɔ̃ kɔ́ɖɔ́ ma kɛ

(Máà 3:1-6; Ɖúù 6:6-11)

9Ké Jízɛ̀ sɔ̀ ma ɓó dyí, ké ɔ mu ma ɖé Júù-nyɔ̀ ɓěɔ̀ cɔ́cì-gbò ɓěɔ̀ ɖò mú, 10ké gàa ɖò kɔ̃̀ sɔ̃ kɔ́ɖɔ́ ma kɛɛ nì ma ɓó. Nyɔ ɖíɛ́ ɓě nì ma ɖé, ké wa mɔ́ ɓɛ́ wa kéɛ ma cɛ̃ kà ɓɛ́ Jízɛ̀ nyu ɖɛ gbà kɛ. Ɔ jèɛɛ, wa diè ma ɔ dyi, ké wa ɖá, “Ɔ nɔ̀mɔ̀ dyíin ɓɛ́ nyɔǔn ké nyɔ ɖò dyi kánáìn ɓó Gèɖèpɔ́ɔ̀ fɔ̀-wèɔ̀ ɓaɖaà?”

11Ké Jízɛ̀ cɛ̃ɛ ma wa gbo, ké ɔ ɖá, “Ɔ jǔ ké ɓě ɖò dyi ɓáɖáá ɖò ɓéɖé, ké ɓáɖááɔ̀ dyi ɓí tɔ̀mɔ̀ǔn-tɔ̀mɔ̀ǔn ɖò mú kpá ɓó Gèɖèpɔ́ɔ̀ fɔ̀-wèɔ̀ ɓaɖa ní, nìí, ɖɛ́ ɓě mu nyuùn wɛ̃́? Ɓě se ɔ dyí ɖúɛ mu, ɓɛ́ ɓě kéɛ ɖéɛ zàà? 12Nyɔǔn-dyù jè kpa ɖɛ mìɔ ké ɔ zi ɓáɖáá jè dyí. Ɔ jèɛɛ, ɔ nɔ̀mɔ̀ dyíin ɓɛ́ nyɔǔn ké nɔ̀mɔ̀ dyíin nyu ɓó Gèɖèpɔ́ɔ̀ fɔ̀-wèɔ̀ ɓaɖa.” 13Ké Jízɛ̀ cɛ̃ɛ ma gàaɔ̀ gbo, ké ɔ ɖá, “Pɛ́ɛ̀ nì sɔ̃ɔ̀ dyí.” Ké gàaɔ̀ pɛ́ɛ̀ ma ɔ sɔ̃ɔ̀ dyí, ké ɔ káná ma dyi, ké ɔ nì ma kà ɔ sɔ̃ tɔ̀ɔ̀ nì ma kɛ. 14Ké Fáɖòsíì-nyɔ̀ ɓěɔ̀ sí ma píé, ké wa sɔ́ ma Jízɛ̀ ɓó kà wa ké ma ɔ ɖáɓáa nyuɛɛ jè.

Gbo-nì-nyɔ̀ ɓɛ́ Gèɖèpɔ́ɔ̀ gã kɛ

15Ti ɓɛ́ Jízɛ̀ dyé ma ɖɛ wa nì ma nyuɛń nyɛɛ, ɔ sɔ̀ ma ɖé páɔ̀ mú, ké nyɔ pàɖǎ sí ma ɔ kíɖíí. Ké ɔ kánáìn ma wɛ́-nyɔ̀ séín ɓě dyi, 16ké ɔ cɛ̃ɛ ma wa gbo, ɓɛ́ wa ní kɔ̃̀ ɖà ɔ jè nyɔ ɖò gbo cɛ̃, 17ɓɛ́ ɖɛ ɓɛ́ Gèɖèpɔ́ɔ̀ cɛ̃ zɔ̃̌ɔ̀ dyììn ɖé kpáá-ɖɛ̀-cɛ̃-nyɔ̀ Àzédyà múɛɛ ké jǎà kpá. Ɖɛ ɔ cɛ̃ zɔ̃̌ɔ̀ kɛɛ, ɔ kɛà kɛ̀. Ɔ ɖá,

18“Ɓě gmɔ̀ nɔ̄, ní gbo-nì-nyɔ̀ mɔ̀ nyɔ ɓɛ́ ḿ ɖǎ gã kɛɛ kɛà kɛ̀.

Ɔ mɔ̀ nyɔ ɓɛ́ ḿ ɖɛ̀ɓɛ̀ mú, ké ní hwòɖǒ dèìn ɔ múin nyɛ.

Ní mu ní Zùùɔ̀ ɔ múin dyíìn,

ké ɔ mu dyí-sɛ́ɖɛ́ìn-ɖɛ̀ wɔ̃-po-po jè ɓóɖó-dù ɓěɔ̀ gbo cɛ̃ìn.

19Ɔ se ɖɛín zàǎ mu, ké ɔ se mú pánáa mu,

Nyɔǔn-dyù se ɔ mú-páná-wùɖù wɔ̃́ɔ mu ɖé hwɔɖɔ-gboi-hwìè ɓěɔ̀ gba.

20Ɔ se nyɔ ɓě hwɛ̀ kpéíɛɛ dyi wàǐn mu,

ké ɔ se nyɔ ɓě se hwòɖǒ-po-naín ɓéɖéɛɛ hwòɖǒ ɖé ɖei poɛ́ mu.

Ɔ muɛ nyuùn ɓɛ́ jǎà-ɖɛ̀-wɔ̃-po-po ké ɖɛ séín toún ɖu.

21Ké ɓóɖó-dù kà kò ɖò ɓěɛ̀ nyɔ ɓěɔ̀ mu ɔ hwòɖǒ kɔ̃ dèìn.”

Nyɔ ɓěɔ̀ ɖá Jízɛ̀ mɔ̀ Bíɔ̀zɛ́ɓà

(Máà 3:20-30; Ɖúù 11:14-23)

22Sɔ̀ìn ɓóɛ gboɛɛ, wa dyà ma gàa ɖò ɓɛ́ ɔ ɓéɖé zùù gbà, ké zùù gbàɔ̀ nyuɛ ké ɔ kpè dyéɖéín dyi, ké ɔ se wùɖùɛ̀ ɓɛ́ìn nyɛɛ Jízɛ̀ gbo. Ké Jízɛ̀ kánáìn ma gàaɔ̀ dyi, ké ɔ ɓɛ́ìn ma wùɖùɛ̀, ké ɔ ɓɛ́ìn ma dyi dyéɛ ɖe. 23Ké nyɔ séín ɓěɔ̀ giniìn ma dyi, ké wa cɛ̃ɛ ma, ké wa ɖá, “Gàa nìà kɛ ɓɛ́ìn Dèɓéɛ̀ Dyú-gààɔ̀ jǔɛ wɛ̃́ɛ́o.”

24Kɛɛ ti Fáɖòsíì-nyɔ̀ ɓěɔ̀ wɔ̃́ ma ɖɛ ɓɛ́ nyɔ ɓěɔ̀ cɛ̃ ma kà kɛɛ, wa ɖá, “Bíɔ̀zɛ́ɓà mɔ̀à zùù gbà ɓěɔ̀ ɓǎ vɛ̀nɛ̀ɔ̀ kɛɛ nyí ɔ kpé jè, ké ɔ zàà zùù gbà nyɔǔn múɛ̀.”

25Jízɛ̀ dyuò ma waà hwìɖǐi-poìn-ɖɛ̀ ɓěɔ̀ dyí jèɛɛ, ɔ cɛ̃ɛ ma wa gbo, ké ɔ ɖá, “Kã́á-ɓòɖò ɖò dyi ɔ mìɔùn gbo vɔ̃ ní, nìí, ɔ mu wáɖáùn. Ké hwɔɖɔ ɖòɛ̀ nyɔ ɓě mɔɔ gbǒ-xwíníín ɖò dyi gbo vɔ̃ìn ní, nìí, wa se dúi kuɛ ɓɛ́ìn. 26Ɔ jǔ ké Sétɔ̃̀ dyi Sétɔ̃̀ nyɔǔn mú zà ní, nìí, ɔ kpéɔ̀ ge mú. Ɔ dyi ná nìǐn, nìí, xwɛ̌ ɔ kã́á-ɓòɖòɔ̀ ɓɛ́ìn dúi kuɛ kɛ́? 27Ɔ jǔ ké Bíɔ̀zɛ́ɓà mɔ̀ nyɔ dyi ḿ kpé nyí, ɓɛ́ ḿ ké zùù gbà nyɔǔn mú zà ní, nìí, xwɛ̌ ɓě nììn nyɔ ɓěɔ̀ nyu zùù gbà nyɔǔn mú zàà kɛ́? Wa mɔ̀ nyɔ muɛ nyɔǔn dyí tɛ̀mɛ̀ìn kà ɓɛ́ ɓě bĩ ɖɛ xwaa. 28Kɛɛ ɔ jǔ ké Gèɖèpɔ́ɔ̀ Zùùɔ̀ mɔ̀ nyɔ dyi ḿ kpé nyí, ɓɛ́ ḿ ké zùù gbà nyɔǔn mú zà ní, nìí, Gèɖèpɔ́ɔ̀ kã́á-ɓòɖòɔ̀ ɖǎ ɓě gbo dyi nɔ̀ɔ̀.

29“Nyɔ ɖò se gana-nyɔ̀ ɖò ɓíɖí-gbǒǔn dyáa ɓɛ́ìn, ɓɛ́ ɔ kéɛ hwu, ɔ sèìn ké ɔ sã dyɛ gana-nyɔ̀ɔ̀ kĩ́ín hwɛ̀. Nìí, ɔ ɓɛ́ìn ɖé ɔ gbǒɔ̀ mú dyáa, ɓɛ́ ɔ kéɛ hwu.

30“Nyɔ mɔ̀ nyɔ ɓɛ́ ɔ se ní wáká kɔ̃ nìɛɛ, ɔ vɔ̃ ḿ gbo. Ké nyɔ mɔ̀ nyɔ ɓɛ́ ɔ se ḿ gbo kpá, ɓɛ́ à ké ɖɛ dyí poìn nyɛɛ, ɔ ɓeìn ɖɛ dyi. 31Ɔ jèɛɛ, ḿ cɛ̃ɛ ɓě gbo, nàmàǔn séín ɓɛ́ nyɔǔn nyuɛ kè ɖɛ gbà séín ɓɛ́ nyɔǔn cɛ̃ kɛɛ jè ɓɛ́ìn Gèɖèpɔ́ɔ̀ hwìɖǐi hwɛ̀ɛ̀. Kɛɛ ɖɛ gbà ɓě ɓɛ́ nyɔǔn cɛ̃ Zùù Hwɛ̀ǐn-hwɛ̀ǐnɔ̀ kɔ̃ún wɛ̃ɛ jè se Gèɖèpɔ́ɔ̀ hwìɖǐi hwɛ̀ɛ̀ ɓɛ́ìn. 32Nyɔǔn séín ɓɛ́ wa cɛ̃ wuɖu gbà ɖò mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ kɔ̃ún wɛ̃ɛ, ɔ jè mu Gèɖèpɔ́ɔ̀ hwìɖǐi hwɛ̀ìn. Kɛɛ nyɔ mɔ̀ nyɔ ɓɛ́ ɔ cɛ̃ ɖɛ gbà Zùù Hwɛ̀ǐn-hwɛ̀ǐnɔ̀ kɔ̃ún wɛ̃ɛ, ɔ jè se Gèɖèpɔ́ɔ̀ hwìɖǐi hwɛ̀ɛ̌ mu fɔɔ cá.

Cu kè ɔ ɓo

(Ɖúù 6:43-45)

33“Ɓě dyi cu-ɓò nɔ̀mɔ̀ kɔ̃in ɓéɖéɛ mɔ́ ní, nìí, cu-gɔ̃̀ɔ̀ mɛ nɔ̀mɔ̀ dyíin. Ɓě dyi cu-gɔ̃̀ nyìnììn dyíin ɓéɖé ní, nìí, ɔ ɓo nyìnììn kɔ̃in. Nyɔǔn dyuò cu dyí dyììn ɖé ɓo ɓɛ́ ɔ tòɖò kɛɛ mú. 34Ɓě mɔ̀à sɛɛ̀ dyú ɓěɛɛ, xwɛ̌ ɓě ɓɛ́ìn ɖɛ nɔ̀mɔ̀ dyíin ɖò cɛ̃ɛ kɛ́? Sepóɛɖé ɖɛ dyíìn ɖé nyɔ ɖò hwòɖǒ bũ̌in nyɛɛ, ɖéɛ̀ ɔ cɛ̃. 35Nyɔ kɔ̃̀ kpeɖe nɔ̀mɔ̀ dyíin nyɛɛ dè ɔ kpeɖe nɔ̀mɔ̀ dyíinɔ̀ dyi kà nyɔ dèà ɖɛ ɖò dyiɛ. Ɔ jèɛɛ, ɔ nyu ɖɛ nɔ̀mɔ̀ dyíin nyɛ. Ké nyɔ kɔ̃̀ kpeɖe nyìnììn dyíin nyɛɛ dè ɔ kpeɖe nyìnììn dyíinɔ̀ dyi kà nyɔ dèà ɖɛ ɖò dyiɛ, ké ɔ nyu ɖɛ nyìnììn dyíin nyɛ.

36“Ḿ cɛ̃ɛ ɓě gbo, zaa-wɔ̃-po-wèɔ̀ xwíníín nyɛɛ, nyɔǔn séín mu wuɖu fóɖóún séín ɓě ɓɛ́ wa ɖǎ ma cɛ̃ kɛɛ jè kɔ̃in zaìn. 37Sepóɛɖé ɓěɛ̀ wuɖu ɓěɔ̀ ɖé Gèɖèpɔ́ɔ̀ mu gbo mùìn, ɓɛ́ ɔ ké ɓěɛ̀ zaa wɔ̃ po, ɓɛ́ zaaɔ̀ ké ɓě dúún wáɖá, mɔɔ ɓɛ́ ɔ ké se ɓě dúún wáɖá.”

Júù-nyɔ̀ ɓěɔ̀ nyɔ vɛ̀nɛ̀ ɓěɔ̀ mɔ́ ɖàɓàìn-ɖɛ̀ dyéɛ dyi

(Máà 8:11-12; Ɖúù 11:29-32)

38Sɔ̀ìn ɓóɛ gboɛɛ, Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Fáɖòsíì-nyɔ̀ ɓěɔ̀ ɖíɛ́ ɓě cɛ̃ɛ ma Jízɛ̀ gbo, ké wa ɖá, “Nyɔ-ɖɛ-tɛ̀mɛ̀ìn-nyɔ̀, à mɔ́ ɓɛ́ m̀ ké ɖàɓàìn-ɖɛ̀ ɖò nyu, ɓɛ́ à kéɛ dyé.”

39Kɛɛ Jízɛ̀ cɛ̃ɛ ma wa gbo, ké ɔ ɖá, “Ɓě mɔ̀à kpeɖeín-nyìnììn-nyɔ̀ kè Gèɖèpɔ́ɔ̀ jè dyi-táà-nyɔ̀ ɓěɛɛ, ɓě mɔ̀ ɖàɓàìn-ɖɛ̀ dyi-mɔ́-nyɔ̀. Ɖàɓàìn-ɖɛ̀ nyɛ̀nɛ̀ɛ̀ ɓɛ́ Gèɖèpɔ́ɔ̀ mu ɓě dyí tɛ̀mɛ̀ìn nyɛɛ hwɔìn ɖɛ ɓɛ́ ɔ nyu zɔ̃̌ɔ̀ kà kpáá-ɖɛ̀-cɛ̃-nyɔ̀ Jónà bũ̌ kɛ. 40Kà ɓɛ́ Jónà nyu ma kà dyóɖóaún-wè tã kè máaún-hwùɖù tã ɖé zimii vɛ̀nɛ̀ɔ̀ xwíníín nyɛɛ, kà dyúáɖòɔ̀ kǎà mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ mu dyóɖóaún-wè tã kè máaún-hwùɖù tã ɖé ɓóɖó-kpàà hwuɖu nyuùn. 41Ɓó zaa-wɔ̃-po-wèɔ̀ ɓaɖaa, Nínívà-nyɔ̀ ɓěɔ̀ mu dyi nyànàùn, ɓɛ́ wa ké ɓě zaa dúún wáɖá. Sepóɛɖé ti wa wɔ̃́ ma Jónà Gèɖèpɔ́ɔ̀-wùɖù wáɖá-wáɖáɔ̀ kɛɛ, wa táà ma waà nàmàǔn-kpèɖè ɓěɔ̀ dyi. Kɛɛ gmɔ̀ nɔ̄, nyɔ ɓɛ́ ɔ kpa ɖɛ ké ɔ zi Jónà dyíɛɛ nì dà. 42Ɓó zaa-wɔ̃-po-wèɔ̀ ɓaɖaa, kã́á-màà ɓɛ́ ɔ sɔ̀ìn zɔ̃̌ɔ̀ kà ɖé Síɓà-ɓòɖòɔ̀ kɔ̃ɛɛ mu dyi nyànàùn, ɓɛ́ ɔ ké ɓě zaa dúún wáɖá. Sepóɛɖé ɔ sɔ̀ìn ma ɓóɖó-kpàà sèìn-naín, ké ɔ dyi ma, ɓɛ́ ɔ ké ma Sã́ɖómàà hwòɖǒ-fɔ̀nɔ̀-wùɖù ɓěɔ̀ gbo ɖùǔ tò. Kɛɛ gmɔ̀ nɔ̄, nyɔ ɓɛ́ ɔ kpa ɖɛ ké ɔ zi Sã́ɖómà dyíɛɛ nì dà.

Zùù gbà ɖe-dyi-dyi

(Ɖúù 11:24-26)

43“Ɔ jǔ ké zùù gbà ɖò dyi nyɔ ɖò mú sɔ̀ ní, nìí, zùù gbàɔ̀ kpa cĩ́-naín dyi mɔ́ɔ, dɛ̀ ɓɛ́ ní se nìɛ. Ɔ jǔ ké ɔ se cĩ́-naín ɖò dyé ní, nìí, 44ɔ cɛ̃ɛ ɔ mìɔùn gbo, ké ɔ ɖá, ‘Ní mu dɛ̀ ḿ sɔ̀ ma kà kɛɛ ɖe muùn.’ Ɔ jèɛɛ, ɔ mu ɖe, ké ɔ dyɛ̀ìn ɔ cĩ́-naínɔ̀ dyi. Ké ɔ dyéɛ kà nyɔ ɖò se ɖé nì, ké nyɔ ɖò ɖǎ ɖé dyi wúò, ké ɖɛ séín kpá páún wɛ̃. 45Nìí, ɔ mu ɖe, ké ɔ dyà zùù gbà mɛ̀nɛ̌ìn-sɔ̃́ ɓɛ́ wa nyìnììn kpeɖeín ké wa zi ɔ dyíɛ. Ké ɔ kè wa cĩ́ ɖé. Ɔ ɖǎ ná nìǐn, nìí, nyɔɔ̀ jè mu wìì-ɖɛ̀ jǔùn mìɔ, ɓɛ́ ɔ ké kà ɔ jè nyu ma nìɛ̀ kĩ́ín nyɛɛ dyí zi. Kǎà ɔ mu nììn ɓá ɓě mɔ̀à ɖɛ-gbà-nyu-nyɔ̀ ɓěɛɛ jè dyí.”

Jízɛ̀ ɖe kè ɔ ɖíí-gàà ɓě

(Máà 3:31-35; Ɖúù 8:19-21)

46Ti ɓɛ́ Jízɛ̀ nì ma nyɔ ɓěɔ̀ gbo wùɖùɛ̌n keɛɛ, ɔ ɖe kè ɔ ɖíí-gàà ɓě wóɖó ma xwáɖáún. Wa nyànà ma ɖé píé dyi, ké wa mɔ́ wa kèɔ̀ kè ké ma wùɖù. 47Nyɔ ɓěɔ̀ ɖò cɛ̃ɛ ma Jízɛ̀ gbo, ké ɔ ɖá, “Gmɔ̀ nɔ̄, m̀ ɖe kè nì ɖíí-gàà ɓě nyànà ɖé píé dyi, ké wa mɔ́ ɓɛ́ wa ké m̀ gbo wùɖùo.”

48Ké Jízɛ̀ cɛ̃ɛ ma gàa dyà ma kà cuò-wùɖùɔ̀ kɛɛ gbo, ké ɔ ɖá, “Nyɛ́ mɔ̀ ḿ ɖe kè ḿ ɖíí ɓěɔ̀ kɛ́?” 49Ké ɔ tò ma ɖé ɔ ɖeín-nà-nyɔ̀ ɓěɔ̀ gbo sɔ̃, ké ɔ ɖá, “Ḿ ɖe kè ḿ ɖíí ɓěɔ̀ kɛà kɛ̀, 50sepóɛɖé nyɔ ɓě mɔ̀ nyɔ ɓɛ́ wa nyu ḿ Ɓǎ nìà ɖé dyɔún wɛ̃ɛ mɔ́ɔ́-ɖɛ̀ kɛɛ, wa mɔ̀ ḿ ɖe kè ḿ ɖíí ɓěɔ̀ jɛ́ɛ́.”

Currently Selected:

Máfíò 12: ƁB02

Highlight

Copy