Hágàì 1
1
Bounɓoɔ̀ tò wuɖu ɓɛ́ wa ké ɔ gbǒɔ̀ po ɖe
1Ɖé Dìwáɖádyà ɓɛ́ ɔ mɔ̀ ma Pɔ́sìà-ɓòɖòɔ̀ kã́á kɛɛ nììn ɓóɖó-wuɖuí-kɔ̃̀-zɔ̃̀ɔ̀ sɔ̃́ nììnɔ̀ dɛ̀nɛ̀ mɛ̀nɛ̌ìn-ɖò nììnɔ̀ wé kĩ́ín-kĩ́ínɔ̀ ɓaɖaa, Bounɓoɔ̀ wùɖù ma Zɛ̀wáɖáɓèɓò ɓɛ́ ɔ mɔ̀ ma Sɛ́àtíèɛ̀ dyú-gàà, ɓɛ́ ɔ mɔ̀ ma Júɖà-ɓòɖòɔ̀ wuɖuí-kɔ̃̀-nyɔ̀ kɛ kè Jasúé ɓɛ́ ɔ mɔ̀ ma Jɛ̀hózàɖàà dyú-gàà, ɓɛ́ ɔ mɔ̀ ma sáa-zà-nyɔ̀ vɛ̀nɛ̀ kɛɛ gbo. Bounɓoɔ̀ tòìn ma wuɖuɔ̀ Hágàì ɓɛ́ ɔ mɔ̀ ma kpáá-ɖɛ̀-cɛ̃-nyɔ̀ kɛɛ mú.
2Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ma Hágàì gbo, ké ɔ ɖá, “Nyɔ ɓěɛ̀ cɛ̃ɛ kà ɔ séè ti ke ɓɛ́ wa ké ní gbǒɔ̀ po ɖe kɛ. 3Kɛɛ cɛ̃ɛ wa gbo, ɓɛ́ m̀ ké níiń, ‘Bounɓoɔ̀ ɖá, 4“Ɔ mɔ̀ ti, ɓɛ́ ɓě ké ɓěɛ̀ gbǒ nɔ̀mɔ̀ kɔ̃in ɓěɔ̀ mú nì, ɓɛ́ ḿ níǐn gbǒ gbàɔ̀ ké ɓó dyi nyànà kánáá pūe? 5Ɓě ní dyé ɖɛ ɓě nìà ɓě gbo kpáuń wɛ̃ɛ̀? 6Ɓě ɓá ɖɛ ɓáún-ɓáún ɖé ɓěɛ geɖe ɓěɔ̀ gbo, kɛɛ ɖɛ ɓě dyé ɖéɛɛ se xwaún dyi kpá. Ɓě ɖi ɖɛ, kɛɛ ɔ ní ɖoɓo ɓě dyí. Ɓě ná wã́ìn, kɛɛ wã́ìnɔ̀ se dyí vò ɓɛ́ ɔ ké ɓěɛ̀ hwòɖǒ dyi dè. Ɓě po ɖɔún, kɛɛ ɔ se ɓě zùzù kpɔ̃̀ìn ɓɛ́ìn. Ɓě mɔ́ wíɖí, kɛɛ ɓě poɛ ɓɔ̀ɔ̌ ɓɛ́ ɔ ɓéɖé ɓí ɓěɛɛ mú. 7Ɓě ní dyé ɖɛ ɓě nìà ɓě gbo kpáuń wɛ̃ɛ̀? 8Ɔ ná nì jèɛɛ, ɓě mu ɖé toɖo ɓěɔ̀ gbo, ɓɛ́ ɓě ké cu cɛ̃, ɓɛ́ ɓě ké ní gbǒɔ̀ po, ɓɛ́ ní hwòɖǒ ké dyi dè ɓáa jè dyí, nìí ɓɛ́ nyɔǔn ɓě ké ḿ dya dè.
9“ ‘ “Ɓě dèɔ̌ máa hwìɖǐi, ɓɛ́ ɓěɛ̀ geɖe ɓěɔ̀ kéɔ́ bã mìɔ, kɛɛ gmɔ̀ nɔ̄, ɖɛ ɓě dyé ɖéɛɛ se dyí vò. Ké ɔ nyɔ ɓě dyà hwɔɖɔún wɛ̃ɛ, ḿ poɛ pìɔ̌. Ɖɛ́ kɔ̃̀ jè ḿ nyuà náa kɛ́? Ḿ nyuɛ náa, sepóɛɖé níǐn gbǒ gbàɔ̀ nyànà ɓó dyi, ké ɓě se ɖɛ ɖò nyuɛń nì ɓáa jè dyí, kɛɛ ɓě nì ɓě mìɔùn nììn gbǒ ɓě poɛń. 10Ɓó ɖɛ ɓě nyuà kɛ jèɛɛ, dyɔɔ̀ ɖǎ ɔ dunuɔ̀ dyí kpɔ̃, ké ɓóɖóɔ̀ ɖǎ ɔ ɖoɓoɔ̀ dyí kpɔ̃. 11Ḿ ɖǎa nyu ké ɓóɖóɔ̀ ɖǎ kɔ̃in dyɛ ɖé ɓěɛ̀ geɖe ɓěɔ̀ gbo kè ɖé toɖo ɓěɔ̀ dya, ké ɓěɛ̀ ɓáá-ɖɛ̀ ɓěɔ̀ kè ɓěɛ̀ wã́ìn ɖìèɔ̀ kè ɓěɛ̀ cánáɔ̀ kè ɓěɛ̀ nyúà-ɖɛ̀ ɓěɔ̀ kè ɓě mìɔùn ɔ kè kũ̀à séín ɓɛ́ ɓě nyuɛɛ ɖò se mú wóɖó.” ’ ”
Nyɔ ɓěɔ̀ nyu Bounɓoɔ̀ wuɖuɔ̀
12Hwɛ̀ ké Zɛ̀wáɖáɓèɓò mɔ̀à Sɛ́àtíèɛ̀ dyú-gàà ɓɛ́ ɔ mɔ̀à Júɖà-ɓòɖòɔ̀ wuɖuí-kɔ̃̀-nyɔ̀ɔ̀ kɛ kè Jasúé mɔ̀à Jɛ̀hózàɖàà dyú-gàà, ɓɛ́ ɔ mɔ̀à sáa-zà-nyɔ̀ vɛ̀nɛ̀ɔ̀ kɛ ɔ kè Júɖà-nyɔ̀ ɓěɔ̀ xwéɖé wèɔ̀ nyu ma wuɖu ɓɛ́ Bounɓo mɔ̀à waà Gèɖèpɔ́ɔ̀ kɛɛ tòìn ma kà Hágàì mɔ̀à kpáá-ɖɛ̀-cɛ̃-nyɔ̀ɔ̀ kɛɛ múɛ, sepóɛɖé Bounɓoɔ̀ mɔ̀ nyɔ ɖoɓo ma ɔ ɖé wa gbo jè. Púɛɛ, nyɔ ɓěɔ̀ ɖú ma Bounɓoɔ̀ ɓiè kpàǐ hwòɖǒɛ̀-ɖé-hwɛ̀-kà. 13Hwɛ̀ ké Hágàì mɔ̀à Bounɓoɔ̀ kíáɔ̀ kɛɛ cɛ̃ɛ ma nyɔ ɓěɔ̀ gbo, ké ɔ ɖá, “Bounɓoɔ̀ ɖá ɔ nì ɓó ɓě gbo.” 14Ké Bounɓoɔ̀ nyuɛ ké Zɛ̀wáɖáɓèɓò kè Jasúé ɔ kè Júɖà-nyɔ̀ ɓěɔ̀ xwéɖé wèɔ̀ hwòɖǒ wɔ̃́ ma, ké wa dè ma Bounɓo mɔ̀ nyɔ nìà ɖɛ séín kɔ̃in, ɓɛ́ ɔ mɔ̀à waà Gèɖèpɔ́ɔ̀ kɛɛ gbǒɔ̀ kũ̀àɔ̀ nyuɛ gbɔ. 15Wa dè ma kũ̀àɔ̀ gbɔ ɖé Dìwáɖádyà nììn ɓóɖó-wuɖuí-kɔ̃̀-zɔ̃̀ɔ̀ sɔ̃́ nììnɔ̀ dɛ̀nɛ̀ mɛ̀nɛ̌ìn-ɖò nììnɔ̀ wé kpáɖá-nyɔ sè hĩinyɛ nììnɔ̀ ɓaɖa.
Currently Selected:
Hágàì 1: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
