Ɛ́séɖɔ̀ 26

Gèɖèpɔ́ɔ̀ jàɖàìn-gbòɔ̀

(Ɛ́séɖɔ̀ 36:8-38)

1Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Kà wa mɛ nyu ní jàɖàìn-gbòɔ̀ poɛ kɛɛ kɛà kɛ̀. Nyɔ ɓě ɓɛ́ wa dyuò sɛ́ɖɛ́ jɛ́ɛ́ kɛɛ mɛ nyu faà-ɖɔ̀ ɓaɖa-bùè. Wa mɛ mɔ̀ ɖénì-ɖɔ̀ nɔ̀mɔ̀ dyíin kɔ̃̀ kɔ̃ ɓɛ́ wa ɖaɓa cɛ́ɖɔ̀ ɓě kɛ. Cɛ́ɖɔ̀ ɓěɔ̀ mɛ mɔ̀ dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã. 2Faà-ɖɔ̀ séín ɓěɔ̀ mɛ ɓɛ́ìn wɔ̃. Wa ɖò-ɖòɛ̀ tɔ̀mɔ̀-tɔ̀mɔ̀ mɛ mɔ̀ ɓáɖáa mɛ̀nɛ̌ìn-sɔ̃́, ké waà xwíɖí-kù mɛ mɔ̀ ɓáɖáa dyúáɖò. 3Ɔ ɖǎ ná nìǐn, wa mɛ deìn faà-ɖɔ̀ɔ̀ hm̀m̌ dyí, ké kǎà wa mɛ nyu faà-ɖɔ̀ hm̀m̌ tɔ̀ɔ̀ ɖekè. 4Ɔ ɖǎ ná nìǐn, wa mɛ deìn faà-ɖɔ̀ sɔ̃́ ɓěɔ̀ kpo wáún dyi. Wa mɛ nyùìn kpo ɓěɔ̀ dyèě-ɖúú ɖàɓàìn kpèɛ̀ kɛ. 5Kpo kpáɖá-nyɔ sɔ̃́ ɓaɖa-bùè mɛ nì faà-ɖɔ̀ɔ̀ dú dyúáɖò wáún dyi, ɓɛ́ kpo kpáɖá-nyɔ sɔ̃́ ɓaɖa-bùè ké faà-ɖɔ̀ɔ̀ dú tɔ̀ɔ̀ wáún dyi nì, ɓɛ́ kpo ɓěɔ̀ ké dyí ɓɛɖɛìn. 6Ɔ ɖǎ ná nìǐn, wa mɛ ɖú góò dyí, ɓɛ́ wa kéɛ gbǎ kpáɖá-nyɔ sɔ̃́ ɓaɖa-bùè mú nyu, ɓɛ́ wa ké faà-ɖɔ̀ ɓěɔ̀ dyí-deìn-ɖɛ̀ jǔ.

7“Ɔ ɖǎ ná nìǐn, wa mɛ nyu wiɖi-mì faà-ɖɔ̀ ɓaɖa-bùè sè dyúáɖò mú, ɓɛ́ wa ké jàɖàìn-gbòɔ̀ kɔ̃in-ɓáìn-ɖɛ̀ jǔ. 8Faà-ɖɔ̀ ɓaɖa-bùè sè dyúáɖòɔ̀ séín mɛ ɓɛ́ìn wɔ̃. Wa ɖò-ɖòɛ̀ tɔ̀mɔ̀-tɔ̀mɔ̀ mɛ mɔ̀ ɓáɖáa mɛ̀nɛ̌ìn-sɔ̃́ kè fá-kɛ́ín, ké waà xwíɖí-kù mɛ mɔ̀ ɓáɖáa dyúáɖò. 9Ɔ ɖǎ ná nìǐn, wa mɛ deìn faà-ɖɔ̀ɔ̀ hm̀m̌ dyí, ké kǎà wa mɛ nyu faà-ɖɔ̀ mɛ̀nɛ̌ìn-ɖò tɔ̀ɔ̀ ɖekè. Wa mɛ jaɖa faà-ɖɔ̀ mɛ̀nɛ̌ìn-ɖòɔ̀ mɛ̀nɛ̌ìn-ɖò nììnɔ̀, ɓɛ́ ɔ ké xwíníín deìn ɖé jàɖàìn-gbòɔ̀ dyúa. 10Ɔ ɖǎ ná nìǐn, wa mɛ deìn faà-ɖɔ̀-dù sɔ̃́ ɓěɔ̀ kpo wáún dyi. Kpo kpáɖá-nyɔ sɔ̃́ ɓaɖa-bùè mɛ nì faà-ɖɔ̀ɔ̀ dú dyúáɖò wáún dyi, ɓɛ́ kpo kpáɖá-nyɔ sɔ̃́ ɓaɖa-bùè ké faà-ɖɔ̀ɔ̀ dú tɔ̀ɔ̀ wáún dyi nì. 11Ɔ ɖǎ ná nìǐn, wa mɛ nyu bàɖàsǐ-gbǎ kpáɖá-nyɔ sɔ̃́ ɓaɖa-bùè, ɓɛ́ wa kéɛ faà-ɖɔ̀ ɓěɔ̀ dà ɓě ɓɛ́ wa dèà kpoíɛɛ mú ɓá, ɓɛ́ wa ké faà-ɖɔ̀ ɓěɔ̀ dyí dyaìn, ɓɛ́ wa ké dyúáɖò nì. 12Faà-ɖɔ̀ hm̀m̌ɔ̀ hm̀m̌ nììnɔ̀ ɓɛ́ìn-hwìɛ̀ sèà ɓóɛɛ mɛ beè ɖé jàɖàìn-gbòɔ̀ ɖeín dyi. 13Jìì-ɓàɖàǎ sɔ̃́-sɔ̃́ sèà ɓóɛɛ mɛ beè wáká sɔ̃́ ɓěɔ̀ ɖò-ɖò kɔ̃ dyi, ɓɛ́ wa ké jàɖàìn-gbòɔ̀ dyí zĩ̀ìn. 14Ɔ ɖǎ ná nìǐn, wa mɛ nyu ɓáɖáá-ɓíɔ́-kùɖùù ɓɛ́ wa nyu ké ɔ nì zĩ-zã kɛɛ jàɖàìn-gbòɔ̀ kɔ̃in-ɓáìn-ɖɛ̀ mú. Ké wa mɛ soɖoɛ dyóún-ɓìɖǐɛ̀ kúɖúù ɓě kɔ̃in.

15“Ɔ ɖǎ ná nìǐn, wa mɛ nyu àkésìà-cù-pĩ̀à ɓó ní jàɖàìn-gbòɔ̀ jè, ɓɛ́ wa ké wa dyi nyànàìn. 16Cu-pĩ̀à ɓěɔ̀ ɖò-ɖòɛ̀ tɔ̀mɔ̀-tɔ̀mɔ̀ mɛ mɔ̀ ɓáɖáa sɔ̃́ kè fá-kɛ́ín, ké ɔ xwíɖí-kù mɛ mɔ̀ jìì-ɓàɖàǎ tã. 17Cu-pĩ̀à ɓěɔ̀ ɖò-ɖò mɛ ɓéɖé gbǎ ɓɛɖɛìn dyéɖéí sɔ̃́, ɓɛ́ wa ké cu-pĩ̀à ɓěɔ̀ dyí-deìn-naín jǔ. 18Wa mɛ nyu cu-pĩ̀à kpáɖá-nyɔ ɖò ɓó jàɖàìn-gbòɔ̀ wáká hwɔà ɖé jàɖàìn-hwɔ̀ɖɔ̀ɔ̀ zɔ̃̌in dyíɛɛ jè. 19Ké wa mɛ nyu ɖɛ-kɔ̃-dè-ɖɛ̀ ɓɛ́ ɔ mɔ̀ séɓàɖà kɛɛ kpáɖá-nyɔ sɔ̃́, ɓɛ́ wa ké cu-pĩ̀à kpáɖá-nyɔ ɓěɔ̀ xwíɖíi-dè-ɖɛ̀ jǔ. Ɖɛ-kɔ̃-dè-ɖɛ̀ sɔ̃́ mɛ nì ɓó cu-pĩ̀à ɖò-ɖò bìì, ɓɛ́ wa ké ɓó gbǎ ɓěɔ̀ xwíɖíi dyí ɓɛ̀ɖɛ̀ìn. 20Wa mɛ nyu cu-pĩ̀à kpáɖá-nyɔ ɖò ɓó jàɖàìn-gbòɔ̀ wáká hwɔà ɖé jàɖàìn-hwɔ̀ɖɔ̀ɔ̀ xwía dyíɛɛ jè ɖekè. 21Ké wa mɛ nyu ɖɛ-kɔ̃-dè-ɖɛ̀ ɓɛ́ ɔ mɔ̀ séɓàɖà kɛɛ kpáɖá-nyɔ sɔ̃́. Ɖɛ-kɔ̃-dè-ɖɛ̀ sɔ̃́ mɛ nì ɓó cu-pĩ̀à ɖò-ɖò bìì. 22Wa mɛ nyu cu-pĩ̀à mɛ̀nɛ̌ìn-ɖò ɓó jàɖàìn-gbòɔ̀ ɖeín-wàká, hwɔà ɖé dyóɖó-dyi-kpáìn-naínɔ̀ dyíɛɛ jè. 23Ké wa mɛ nyu cu-pĩ̀à sɔ̃́ ɓó gbǒɔ̀ ɖeín-gã̀ sɔ̃́ ɓěɔ̀ jè. 24Wa mɛ deìn xwíníín ɖé gã sɔ̃́ ɓěɔ̀ kɔ̃. Kǎà wa sɔ̃́ɔ̀ mɛ nì. 25Ɔ jèɛɛ, cu-pĩ̀à ɓě hwɔ ɖé ɖeín dyíɛɛ mɛ nì mɛ̀nɛ̌ìn-tã, ké waà kɔ̃-dè-ɖɛ̀ ɓɛ́ ɔ mɔ̀ séɓàɖà kɛɛ mɛ nì ɓaɖa-bùè sè mɛ̀nɛ̌ìn-ɖò. Sɔ̃́ mɛ nì cu-pĩ̀à ɖò-ɖò xwíɖíi.

26“Ɔ ɖǎ ná nìǐn, wa mɛ nyu àkésìà-cù-kpóɖó ɓě, ɓɛ́ wa ké cu-pĩ̀à ɓěɔ̀ kɔ̃ cɛ̃ìn, ɓɛ́ wa ké wa dyí-gmaìn-ɖɛ̀ jǔ. Hm̀m̌ mɛ nì wáká ɖò kɔ̃, 27ké hm̀m̌ mɛ nì wáká sɔ̃́ nììnɔ̀ kɔ̃, ké hm̀m̌ mɛ nì ɖeín-wàkáɔ̀ kɔ̃. 28Cu-pĩ̀à ɓěɔ̀ kɔ̃-cɛ̃̀ìn-cù ɓɛ́ ɔ muà ɓó hwòɖǒǔn nììn nyɛɛ mɛ sɔ̀ máná ɖò gbo, ɓɛ́ ɔ ké ɖò gbo nyini. 29Ɔ ɖǎ ná nìǐn, wa mɛ po cu-pĩ̀à ɓěɔ̀ góò bũ̌in, ɓɛ́ wa ké góò-gbɛ̌ɛ̀ ɓě nyu, ɓɛ́ wa ké cu-pĩ̀à ɓěɔ̀ kɔ̃-cɛ̃̀ìn-ɖɛ̀ ɓěɔ̀ ɓó cu-pĩ̀à ɓěɔ̀ dyéɖéín-dyi-nɛ́ìn-ɖɛ̀ jǔ. Wa mɛ po cuɔ̀ kɔ̃-cɛ̃̀ìn nììn ɓěɔ̀ góò bũ̌in ɖekè. 30Ɔ ɖǎ ná nìǐn, wa mɛ poìn jàɖàìn-gbòɔ̀ xwaún kà ḿ nyuà m̀ gbo cɛ̃ɛ nɔ̄ toɖoɛ̀ dya kɛ.

31“Ɔ ɖǎ ná nìǐn, nyɔ ɓě ɓɛ́ wa dyuò sɛ́ɖɛ́ jɛ́ɛ́ kɛɛ mɛ nyu faà-ɖɔ̀ ɖò. Ɔ mɛ mɔ̀ ɖénì-ɖɔ̀ nɔ̀mɔ̀ dyíin kɔ̃̀ kɔ̃ ɓɛ́ wa ɖaɓa cɛ́ɖɔ̀ ɓě kɛ. Cɛ́ɖɔ̀ ɓěɔ̀ mɛ mɔ̀ dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã. 32Ké wa mɛ ɓá faà-ɖɔ̀ɔ̀ àkésìà-cùè-ɓò hĩinyɛ ɓɛ́ wa po góò bũ̌in nyɛɛ dyí. Cúè-ɓò ɓěɔ̀ mɛ dè ɖɛ-kɔ̃-dè-ɖɛ̀ ɓɛ́ wa mɔ̀ séɓàɖà kɛɛ hĩinyɛ kɔ̃. Wa mɛ ɓáìn ɖɔɔ̀ góò-gbǎ ɓě dyií. 33Ɔ ɖǎ ná nìǐn, wa mɛ ɓá faà-ɖɔ̀ɔ̀ gbǎ ɓě ɓɛ́ wa deàìn faà-ɖɔ̀ ɓě nìà ɖé kɔ̃in nyɛ dyíɛɛ dyí, ɓɛ wa ké gma-gbɔ̀ɖɔ̀ɔ̀ ɖé faà-ɖɔ̀ɔ̀ ɖeín dè. Faà-ɖɔ̀ɔ̀ mu gbǒɔ̀ xwíníín cɛ̃ìn, ɓɛ́ Pá Hwɛ̀ǐn-hwɛ̀ǐn ké ɓó nì, nìí ɓɛ́ Pá Hwɛ̀ Mú Mìɔ ké ɓó nì. 34Wa ɖǎ ɖɛ ɓěɔ̀ nyuɛ hwɔ ní, wa mɛ po gbɔ̀ɖɔ̀ɔ̀ kĩ̀ǐn mɔ̀à ní nyɔ-wìì-kɔ̃-ɓéɖéìn-naínɔ̀ kɛɛ ɓó gbɔ̀ɖɔ̀ɔ̀ wĩín ɖé Pá Hwɛ̀ Mú Mìɔɔ̀ mú. 35Ké wa mɛ dè téɓèɖèɔ̀ ɖé Pá Hwɛ̀ǐn-hwɛ̀ǐnɔ̀ mú, hwɔ ɖé jàɖàìn-gbòɔ̀ xwía-wàkáɔ̀ kɔ̃ dyí, ɓɛ́ wa ké ɖáùnpò-kɔ̃-dè-ɖɛ̀ɔ̀ wáká tɔ̀ɔ̀ kɔ̃ dè, hwɔ ɖé zɔ̃̌in-wàkáɔ̀ kɔ̃ dyí.

36“Ɔ ɖǎ ná nìǐn, wa mɛ nyu faà-ɖɔ̀ ɖò ɓó gbǒ-wɔ̃̀ɔ̀ jè. Ɔ mɛ mɔ̀ ɖénì-ɖɔ̀ nɔ̀mɔ̀ dyíin kɔ̃̀ kɔ̃ ɓɛ́ wa ɖaɓa ɖɛ nɔ̀mɔ̀ kɔ̃in ɓěɛ. Wa mɛ ɖàɓàìn ɖɛ nɔ̀mɔ̀ kɔ̃in ɓěɔ̀ dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã. 37Ké wa mɛ nyu àkésìà-cùè-ɓò hm̀m̌ ɓɛ́ wa po góò bũ̌in nyɛ, ɓɛ́ wa ké faà-ɖɔ̀ɔ̀ góò-gbǎ ɓě nìà cúè-ɓò ɓěɔ̀ dyíɛɛ dyí ɓá. Ké wa mɛ nyu ɖɛ-kɔ̃-dè-ɖɛ̀ hm̀m̌ ɓɛ́ wa mɔ̀ bàɖàsǐ kɛɛ ɓó cúè-ɓò ɓěɔ̀ jè.

Currently Selected:

Ɛ́séɖɔ̀ 26: ƁB02

Highlight

Copy