Ɛ́séɖɔ̀ 25

Nyíí-ɖɛ̀ ɓě nì ɓó Gèɖèpɔ́ɔ̀ jàɖàìn-gbòɔ̀ bììɛ

(Ɛ́séɖɔ̀ 35:4-9)

1Ɓó tia ɓaɖaa, Bounɓoɔ̀ cɛ̃ɛ ma Mózè gbo, ké ɔ ɖá, 2“Cɛ̃ɛ Éézùɖùɛ̀-dyù ɓěɔ̀ gbo, ɓɛ́ wa ké ḿ nyíí-ɖɛ̀ dyà. Nyɔ ɖò-ɖò séín kɔ̃̀ hwòɖǒ mu wɔ̃́ùn ɓɛ́ ɔ ké ḿ nyíí-ɖɛ̀ dyàa, m̀ mɛ kpɔ̃ɔ ɔ xwaún. 3Nyíí-ɖɛ̀ ɓě ɓɛ́ wa dyi dyà ní, m̀ kéà wa xwaún kpɔ̃ɛɛ, wa kɛà kɛ̀. Wa mɛ mɔ̀ góò kè séɓàɖà kè bàɖàsǐ 4kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã kè ɖénì-ɖɔ̀ nɔ̀mɔ̀ dyíin kè wiɖi-mì-ɖɔ̀ 5kè ɓáɖáá-ɓíɔ́-kùɖùù ɓɛ́ wa nyu ké ɔ nì zĩ-zã kɛ kè dyóún-ɓìɖǐɛ̀ kúɖúù ɔ kè àkésìà-cù. 6Ɖíɛ́ ɓě mɛ mɔ̀ ɔ́ɖè-cànà ɓó ɖáùnpò ɓěɔ̀ jè kè nyɔ́ún-nɔ̀mɔ̀-ɖɛ̀ ɓě ɓó bũ̌-po-cànàɔ̀ caìn jè kè nyɔ́ún-nɔ̀mɔ̀-ɖɛ̀ ɓě ɓɛ́ wa ké fɔ̃ɛ 7kè ɔ́nɛ̀-sɔ̀ɔ̌ ɔ kè sɔ́ɔ́ kpa ɖɛ ɖíɛ́ ɓě ɓɛ́ wa ké ɓó sáa-zà-nyɔ̀ vɛ̀nɛ̀ɔ̀ ífɔ̀ɔ̀ kè ɔ kɛ́í-jìɖǐ-ɖɛ̀ɔ̀#25:7 Ífɔ̀ nì kà Ɓǎsɔ́ɔ̀-nyɔ̀ nììn ɓùɓá ɓɛ́ wa po múɛɛ nìà kɛ. Wa sã̀ìn kɛ́í-jìɖǐ-ɖɛ̀ɔ̀ ɓó ífɔ̀ɔ̀ kɔ̃in. Gmɔ̀ ɖé Ɛ́séɖɔ̀ 28:1-30 mú. dyéɖéín dyi nɛ́ìn nyɛ. 8Wa ɖǎ ɖɛ ɓěɛ̀ dyà ní, nìí, wa mɛ po ḿ bìì jàɖàìn-gbò ɖò, ɓɛ́ ḿ ké ɖé wa hwìɛ̀ cĩ́. 9Ɖɛ séín ní muà m̀ gbo cɛ̃ìn ɓá kà wa ké jàɖàìn-gbòɔ̀ poɛ nyuɛ kè ɖɛ séín ké ɖéɛ mú nìɛɛ jè dyíɛɛ, kǎà wa mɛ nyuɛ nyɛ̀nɛ̀ɛ̀ cá.

Gma-gbɔ̀ɖɔ̀ɔ̀

(Ɛ́séɖɔ̀ 37:1-9)

10“Wa mɛ kɔ gbɔ̀ɖɔ̀ɔ̀ ɖò. Cu wa mɛ kɔ gbɔ̀ɖɔ̀ɔ̀ múɛɛ mɛ mɔ̀ àkésìà-cù. Gbɔ̀ɖɔ̀ɔ̀ tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ hm̀m̌, ké ɔ xwíɖí-kù mɛ mɔ̀ jìì-ɓàɖàǎ tã, ké ɔ dya-tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ tã. 11Ké wa mɛ po gbɔ̀ɖɔ̀ɔ̀ góò hwɛ̀ zɛ̀nɛ̌ǐn bũ̌in kè ɖéɛ xwíníín dyi, ké wa mɛ dèɛ̀ góò-kpã̀ wĩin. 12Ɔ ɖǎ ná nìǐn, wa mɛ ɖèìn góò, ɓɛ́ wa kéɛ gbɛ̌ɛ̀ hĩinyɛ mú nyu ɓó gbɔ̀ɖɔ̀ɔ̀ bìì, ɓɛ́ wa kéɛ gbɔ̀ɖɔ̀ɔ̀ ɓo ɓěɔ̀ dyí ɓá ɓóɛ gã hĩinyɛɔ̀ kɔ̃. Gbɛ̌ɛ̀ sɔ̃́ mɛ nì wáká ɖò kɔ̃, ɓɛ́ gbɛ̌ɛ̀ sɔ̃́ ké wáká tɔ̀ɔ̀ kɔ̃ nì. 13Ɔ ɖǎ ná nìǐn, wa mɛ nyu àkésìà-cù-kpóɖó ɓě, ɓɛ́ wa ké wa góò bũ̌in po. 14Ké wa mɛ sṹ cu-kpóɖó ɓěɔ̀ ɖé gbɛ̌ɛ̀ ɓě ɓɛ́ wa poà ɖé gbɔ̀ɖɔ̀ɔ̀ gã hĩinyɛɔ̀ kɔ̃ɛɛ mú, ɓɛ́ wa ké gbɔ̀ɖɔ̀ɔ̀ ɓéɖéìn-ɖɛ̀ jǔ. 15Cu-kpóɖó ɓěɔ̀ mɛ nì ɖé gbɛ̌ɛ̀ ɓěɔ̀ mú kánáá pū. Nyɔ ɖò mɛ ɓɔ́ ɖé wa zàà. 16Ɔ ɖǎ ná nìǐn, m̀ mɛ po gma ɓě ɓɛ́ ní muà m̀ nyíìn, ɓɛ́ wa muà ɓó sɔ́ɔ́-pĩ̀à sɔ̃́ kɔ̃ nììn nyɛɛ ɖé gbɔ̀ɖɔ̀ɔ̀ mú.

17“Ɔ ɖǎ ná nìǐn, wa mɛ nyu gbɔ̀ɖɔ̀ɔ̀ kĩ̀ǐn. Wa mɛ nyùɛ̀n góò hwɛ̀ zɛ̀nɛ̌ǐn. Ɔ tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ hm̀m̌, ké ɔ xwíɖí-kù mɛ mɔ̀ jìì-ɓàɖàǎ tã. Gbɔ̀ɖɔ̀ɔ̀ kĩ̀ǐnɔ̀ mu ní nyɔ-wìì-kɔ̃-ɓéɖéìn-naín jǔùn. 18-19Ɔ ɖǎ ná nìǐn, wa mɛ nyu cɛ́ɖɔ̀ sɔ̃́.#25:18-19 Cɛ́ɖɔ̀ mɔ̀ fɔ̀ɔ̀-ɖɛ̀ ɓě sɔ̀ìn ɖé Gèɖèpɔ́ɔ̀ gbo ɓɛ́ wa mɔ̀ ɖɛ-dyí-gmɔ̀-nyɔ̀ ɓěɛ. Wa mɛ mɔ̀ góò ɓaɖa-ɓaɖa. Ɖò mɛ nì gbɔ̀ɖɔ̀ɔ̀ kĩ̀ǐnɔ̀ máná ɖò gbo, ɓɛ́ ɖò ké máná tɔ̀ɔ̀ gbo nì. Wa mɛ nyuɛ ɓɛ́ cɛ́ɖɔ̀ ɓěɔ̀ kè gbɔ̀ɖɔ̀ɔ̀ kĩ̀ǐnɔ̀ ké ɖɛ dyúáɖò jǔ. 20Cɛ́ɖɔ̀ ɓěɔ̀ pìɔ̌ ɓěɔ̀ mɛ pɛ́ɛ̀, ɓɛ́ wa ké ɓó gbɔ̀ɖɔ̀ɔ̀ kĩ̀ǐnɔ̀ kɔ̃in tò. Cɛ́ɖɔ̀ ɓěɔ̀ mɛ gmɔìn dyéɖéín ɓó gbɔ̀ɖɔ̀ɔ̀ kĩ̀ǐnɔ̀ kɔ̃in. 21M̀ mɛ po gma ɓěɔ̀ ɖé gbɔ̀ɖɔ̀ɔ̀ mú, ɓɛ́ m̀ ké gbɔ̀ɖɔ̀ɔ̀ kĩ̀ǐnɔ̀ wĩín po. 22Ɓó cɛ́ɖɔ̀ sɔ̃́ ɓě nìà ɓó gma-gbɔ̀ɖɔ̀ɔ̀ kĩ̀ǐnɔ̀ kɔ̃ɛɛ pṹa, ɓóɛ̀ ḿ kè mɔ̀ mu gmɔ̌ìn, ɓɛ́ ḿ ké ní gma séín ɓě ḿ ɓéɖé ɓó Éézùɖùɛ̀-dyù séín ɓěɔ̀ bììɛɛ m̀ nyí.

Téɓèɖè kɔ̃̀ kɔ̃ ɓɛ́ wa ké bɛɖɛɛ̀ ɓɛ́ wa po wáká ɓó Gèɖèpɔ́ɔ̀ bììɛɛ dèɛ

(Ɛ́séɖɔ̀ 37:10-16)

23“Ɔ ɖǎ ná nìǐn, wa mɛ nyu téɓèɖè ɖò. Cu wa mɛ nyu téɓèɖèɔ̀ múɛɛ mɛ mɔ̀ àkésìà-cù. Téɓèɖèɔ̀ tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ hĩinyɛ, ké ɔ xwíɖí-kù mɛ mɔ̀ jìì-ɓàɖàǎ sɔ̃́, ké ɔ dya-tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ tã. 24Ké wa mɛ poɛ góò hwɛ̀ zɛ̀nɛ̌ǐn bũ̌in, ɓɛ́ wa kéɛ góò-kpã̀ wĩin dè. 25Ké wa mɛ dèɛ̀ ɓɔ ɓɛ́ ɔ kè xwa-pìɖì ɓɛ́ìn nyɛɛ wĩin, ɓɛ́ wa ké ɓɔɔ̀ góò-kpã̀ wĩin dè. 26Ɔ ɖǎ ná nìǐn, wa mɛ ɖèìn góò, ɓɛ́ wa kéɛ gbɛ̌ɛ̀ hĩinyɛ mú nyu ɓó téɓèɖèɔ̀ bìì, ɓɛ́ wa kéɛ téɓèɖèɔ̀ ɓo ɓěɔ̀ dyí ɓá ɓóɛ gã hĩinyɛɔ̀ kɔ̃. 27-28Gbɛ̌ɛ̀ ɓěɔ̀ mɛ xwɛ̃́ìn ɓó téɓèɖèɔ̀ ɓɔɔ̀ wĩín dyi. Ké wa mɛ nyu àkésìà-cù-kpóɖó ɓě, ɓɛ́ wa kéɛ góò bũ̌in po, ɓɛ́ wa ké wa gbɛ̌ɛ̀ ɓěɔ̀ mú sṹ, ɓɛ́ wa ké téɓèɖèɔ̀ ɓéɖéìn-ɖɛ̀ jǔ. 29Ɔ ɖǎ ná nìǐn, wa mɛ nyu ɖɛ-fùù ɓě ɓó téɓèɖèɔ̀ jè. Ɖɛ-fùù ɓěɔ̀ mɛ mɔ̀ péɖétè ɓě kè kópò ɓě kè kɛ̀ɓɛ̀ɛ̀ ɓě kè gbòɖòò ɓě ɓó náá-ɖɛ̀-sàǎ-zàìn-ɖɛ̀ ɓě jè. Wa mɛ mɔ̀ góò hwɛ̀ zɛ̀nɛ̌ǐn. 30Téɓèɖèɔ̀ mɛ nì ɓó gma-gbɔ̀ɖɔ̀ɔ̀ dyúa, ké bɛɖɛɛ̀ ɓɛ́ wa po wáká ɓó ḿ bììɛɛ mɛ nì ɓóɛ kɔ̃ kánáá pū.

Ɖáùnpò-kɔ̃-dè-ɖɛ̀ɔ̀

(Ɛ́séɖɔ̀ 37:17-24)

31“Ɔ ɖǎ ná nìǐn, wa mɛ ɓaɖa góò hwɛ̀ zɛ̀nɛ̌ǐn ɖò ɖáùnpò-kɔ̃-dè-ɖɛ̀ mú. Ɔ mɛ ɓéɖé ɖɛ hwɔìn cu-bùè ɓě, ɓɛ́ wa kéɛ bɛ̃̀ìn-ɖɛ̀ jǔ. Ɔ gbɔɔ̀ kèɛ̀ kpíìɔ̀ kèɛ̀ bùè ɓěɔ̀ wáká kò-kò ɓěɔ̀ mɛ mɔ̀ góò-pĩ̀à dyúáɖò. 32Ɔ mɛ ɓéɖé ɖɔ́ mɛ̀nɛ̌ìn-ɖò ɓóɛ dyí. Ɖɔ́ tã mɛ nì wáká ɖò kɔ̃, ɓɛ́ ɖɔ́ tã ké wáká tɔ̀ɔ̀ kɔ̃ nì. 33Ɖɔ́ mɛ̀nɛ̌ìn-ɖò ɓěɔ̀ ɖò-ɖò mɛ ɓéɖé ɖɛ hwɔìn ámɔ̀-cù-bùèɛɛ tã, 34ké ɖɛ hwɔìn ámɔ̀-cù-bùèɛɛ hĩinyɛ mɛ nì ɖáùnpò-kɔ̃-dè-ɖɛ̀ɔ̀ kpíìɔ̀ dyí. 35Cu-bùè dyúáɖò mɛ nì ɖɔ́ kĩ́ín-kĩ́ín sɔ̃́ síà ɖáùnpò-kɔ̃-dè-ɖɛ̀ɔ̀ kpíìɔ̀ dyíɛɛ xwíɖíi, ké cu-bùè ɖò mɛ nì ɓó ɖɔ́ sɔ̃́ kɔ ɓó dyíɛɛ xwíɖíi, ké cu-bùè ɖò mɛ nì ɓó ɖɔ́ sɔ̃́ kɔ ɓó dyí ɖeɛɛ xwíɖíi. 36Ɖáùnpò-kɔ̃-dè-ɖɛ̀ɔ̀ cu-bùè ɓěɔ̀ kèɛ̀ ɖɔ́ ɓěɔ̀ kèɛ̀ wáká tɔ̀ɔ̀ ɓěɔ̀ mɛ mɔ̀ góò-hwɛ̀-zɛ̀nɛ̌ǐn-pĩ̀à dyúáɖò. 37Ɔ ɖǎ ná nìǐn, wa mɛ nyu ɖáùnpò mɛ̀nɛ̌ìn-sɔ̃́, ɓɛ́ wa ké wa ɓó ɖáùnpò-kɔ̃-dè-ɖɛ̀ɔ̀ dú-hwìɛ̀ dè, ɓɛ́ wa ké ce tò ɓó pá nìà ɓóɛ dyúa kɛɛ jè. 38Ɖáùnpò tĩ́ɔ-dyí-zàìn-ɖɛ̀ ɓěɔ̀ kèɛ̀ tɛ́nɛ́ɛ̀ ɓěɔ̀ mɛ mɔ̀ góò hwɛ̀ zɛ̀nɛ̌ǐn. 39Wa mɛ ɖú góò hwɛ̀ zɛ̀nɛ̌ǐn ɓɛ́ ɔ xwa-ku-ku ɖu pṹá-dyèɖè kpáɖá-nyɔ tã ɓaɖa-bùè sè hm̀m̌ wɛ̃ɛ dyí, ɓɛ́ wa kéɛ ɖáùnpò-kɔ̃-dè-ɖɛ̀ɔ̀ kè ɖɛ séín ɓáa dyíɛɛ mú nyu. 40Wa mɛ nyu wa kà ḿ nyuà m̀ gbo cɛ̃ɛ nɔ̄ toɖoɛ̀ dya kɛ.”

Currently Selected:

Ɛ́séɖɔ̀ 25: ƁB02

Highlight

Copy